†ბრწყინვალე შვიდეულის ჟამნობა

ლოცვითა წმიდათა მამათა ჩვენთათა, უფალო იესო ქრისტე, ღმერთო ჩვენო, შეგვიწყალენ ჩვენ.

ქრისტე აღსდგა მკვდრეთით, სიკვდილითა სიკვდილისა დამთრგუნველი და საფლავების შინათა ცხოვრების მიმნიჭებელი. (3–ჯერ).

აღდგომა ქრისტესი ვიხილეთ, თაყვანის ვსცეთ წმიდასა ამას უფალსა დიდებისასა იესოს, მხოლოსა ღმერთსა ჩვენსა და ესრეთ ხმა ვჰყოთ: ჯვარსა შენსა თაყვანის ვსცემთ ქრისტე მეუფეო და წმიდასა აღდგომასა შენსა ვუგალობთ და ვადიდებთ, რამეთუ შენ ხარ ღმერთი ჩვენი და ჩვენ შენსა გარეშე სხვა ღმერთი არა ვიცით, მოვედით ყოველნი მორწმუნენი, თაყვანის ვსცეთ ქრისტეს, ღმრთისა ჩვენისა აღდგომასა, რამეთუ აჰა ესერა მოიწია ჯვარისა მიერ და აღდგომისა სიხარული ყოვლისა სოფლისა, მარადის ვაკურთხევდეთ ქრისტესა და ვუგალობდეთ აღდგომასა მისსა, რამეთუ ჯვარცმა თავს იდვა ჩვენთვის და სიკვდილითა სიკვდილი განაქარვა. (3–ჯერ).

ცისკარსა მსთუად მოვიდა მარიამ მოყვსებითურთ და ჰპოვა ლოდი იგი გარდაგორვებული და ანგელოზისაგან ესმა ხმა საწადელი: ნათელსა შინა სამარადისოსა მყოფსა მას, მკვდართა თანა რად ეძიებთ ვითარცა კაცსა? იხილენით დაფლვისა მისისა სახვეველნი, წარვედით და ყოველსა სოფელსა უქადაგეთ, ვითარმედ სიკვდილი მოჰკლა მხსნელმან ჩვენმან და აღსდგა დიდებით, ვითარცა არს იგი ძე ღმრთისა და მაცხოვარი კაცთა ნათესავისა.

დაღაცათუ ნებსით თვისით საფლავად შთახედ უკვდავო, არამედ ჯოჯხეთისა იგი ძალი დაარღვიე და აღსდეგ ვითარცა მძლე, ქრისტე ღმერთო, ხოლო მენელსაცხებლეთა დედათა ხარება მიჰმადლე და მოციქულთა მშვიდობა მიანიჭე, რომელმან დაცემულთა მიეც აღდგომა.

საფლავად ხორცით შეჰხვედ, ხოლო ჯოჯოხეთს სულითა, ვითარცა ღმერთი და სამოთხეს ავაზაკისა თანა და საყდარსა მამისა და სულისა თანა განუშორებელ იყავ ქრისტე, რომელი ყოველსავე აღავსებ, გარეშემოუწერელო უფალო დიდება შენდა.

დიდება მამასა და ძესა და წმიდასა სულსა.

ვითარცა ნათლით შემოსილსა და ვითარცა უშვენიერესსა სამოთხისასა, ესრეთ გიცნობთ შენ, რომელი გამოსჩნდი მხსნელად ყოვლისა სოფლისა, აღსდეგ უბრწყინვალესი ყოველთა ნათელთა ქრისტე ღმერთო ჩვენო და გამოსჩნდა საფლავი შენი ვითარცა წყარო ჩვენისა აღდგომისა.

აწ და მარადის და უკუნითი უკუნისამდე, ამინ.ზეგარდამო განწმედილ იქმენ, ღმრთისა სამკვიდრებელო,

გიხაროდენ, რამეთუ შენს მიერ მიეცემის სიხარული ყოველთა, ღმრთისმშობელო, რომელნი გიღაღადებენ შენ სიხარულით: კურთხეულ ხარ შენ დედათა შორის, ყოვლად უბიწოო დედუფალო.

უფალო შეგვიწყალენ (40–ჯერ).დიდება მამასა და ძესა და წმიდასა სულსა, აწ და მარადის

და უკუნითი უკუნისამდე, ამინ.ანგელოზი ღაღადებს მიმადლებულო, წმიდაო ქალწულო,

გიხაროდენ და კვალად გიხაროდენ, ძე შენი აღსდგა მესამესა დღესა საფლავით და მკვდარნი აღადგინნა, ერნო გიხაროდენ.

განათლდი, განათლდი, ახალო იერუსალიმ, დღეს დიდება უფლისა შენ ზედა გამობრწყინდა, განსცხრებოდე და იხარებდ სიონ და აწ შენცა იშვებდი ღმრთისმშობელო აღდგომასა ძისა შენისასა.

უპატიოსნესსა ქერუბიმთასა და აღმატებით უზეშთაესსა სერაბიმთასა, განუხრწნელად მშობელსა სიტყვისა ღმრთისასა, მხოლოსა ღმრთისმშობელსა გალობით გადიდებდეთ.

ქრისტე აღსდგა მკვდრეთით, სიკვდილითა სიკდილისა დამთრგუნველი და საფლავებისა შინათა ცხოვრების მიმნიჭებელი. (3–ჯერ).

დიდება მამასა და ძესა და წმიდასა სულსა, აწ და მარადის და უკუნითი უკუნისამდე, ამინ.

უფალო შეგვიწყალენ (3–ჯერ).მეუფეო ზეცათაო გვაკურთხენ. ამინ.