Ħarġa numru 3 – jannar 2014 maħruġa mis-sezzjoni mut youth...
TRANSCRIPT
Ħarġa numru 3 – Jannar 2014 Maħruġa mis-sezzjoni MUT Youth tal-Malta Union of Teachers – kuntatt: [email protected] – www.mut.org.mt
MUT Youth e-newsletter Daħla mill-editur Justin Schembri
Għadna kemm bdejna sena ġdida li tifsser ħafna għall-MUT. Fil-fatt, fl-2014 hemm l-elezzjonijiet sabiex jinħatar il-Kunsill il-ġdid li mbagħad jirrappreżenta lill-edukaturi għat-tliet snin li ġejjin. Fl-istess waqt, il-formazzjoni preżenti tal-MUT Youth waslet fi tmiemha wkoll u għaldaqstant, irid jinħatar kumitat ġdid.
F’din il-ħarġa qegħdin, għall-ewwel darba nniedu kompetizzjoni tal-fotografija li għaliha jistgħu jieħdu sehem il-membri kollha tal-Unjin. Hija opportunità għalina bħala MUT Youth sabiex nersqu dejjem eqreb il-membri tagħna. L-intenzjoni ewlenija tal-MUT Youth wara din il-kompetizzjoni hija mingħajr dubju li nnisslu sens ta’ kompetizzjoni fuq livell professjonali li minnha jista’ jibbenifika kemm min għandu l-fotografija għal qalbu u kemm dawk li japprezzaw il-fotografija inġenerali. It-tema magħżula hija marbuta mal-edukazzjoni, sabiex tinħoloq rabta bejn ir-ritratt li jaqbad mument partikolari mill-ħajja edukattiva u t-tifsira li tmur lil hinn minn sempliċiment ritratt.
Din l-inizzjattiva hija l-bidu ta’ opportunitajiet li ’l quddiem, aħna bħala MUT Youth nittamaw li nibqgħu noffru sabiex ikun hemm relazzjoni dejjem aktar wiesgħa bejn il-Unjin u l-edukaturi membri tagħha. Min-naħa tagħna, ninsabu ottimisti li din il-kompetizzjoni sejra tkun suċċess.
Irrid nieħu din l-opportunità sabiex nawgura sena tajba mimlija hena u saħħa.
Nikkonkludi billi nirringrazzja lil FXDD, li għoġobhom jisponsorjaw din it-tielet ħarġa tal-e-newsletter.
Kompetizzjoni tal-fotografija Premijiet sbieħ x’jintrebħu – il-membri tal-MUT mħeġġa jipparteċipaw
L-MUT Youth qiegħda tniedi kompetizzjoni fotografika bit-tema Unite for Quality Education – ejjew
ningħaqdu sabiex bil-kreattività tagħna nsaħħu l-kwalità tal-edukazzjoni li nipprovdu.
Fil-fatt din il-kompetizzjoni għandha l-għan li tqajjem kuxjenza dwar dak kollu li hemm bżonn sabiex l-
edukazzjoni tkun ta’ aktar kwalità – dik li verament tagħmel differenza fil-ħajja tal-istudenti tagħna –
tista’ tiġi pprovduta. Il-kampanja dinjija Unite for Quality Education tal-Education International (li
magħha hija affiljata l-MUT) għandha tliet pilastri f’dan is-sens li huma għalliema, għodod u ambjent
edukattiv ta’ kwalità. Għaldaqstant il-parteċipanti għandhom jissottomettu ritratti li huma direttament
jew indirettament relatati ma’ din it-tema.
Min jipparteċipa f’din il-kompetizzjoni, li hija miftuħa għall-membri tal-MUT, jista’ jirbaħ €200 fi flus bl-
ewwel premju waqt li min jikklassifika t-tieni u t-tielet jirbaħ vawċer ta’ sena miżata tal-MUT. It-tliet
rebbieħa jingħataw ukoll ċertifikat ta’ rikonoxximent.
Kull membru jista’ jissottometti sa erba’ ritratti fl-istess applikazzjoni akkumpanjata ma’ sinopsi ta’ 20
kelma għal kull ritratt li jiddeskrivi l-motivazzjoni warajh. Is-sottomissjonijiet iridu jintbagħtu bil-posta
jew jittieħdu l-uffiċċju tal-MUT l-Belt Valletta sal-5 ta’ waranofsinhar tal-Ġimgħa 28 ta’ Frar 2014. L-
aġġudikazzjoni mbagħad ser issir minn Facebook (25% tal-voti) u minn tliet membri ta’ ġurija esperta
magħżula apposta.
L-applikazzjoni, it-termini u l-kundizzjonijiet tal-kompetizzjoni jinsabu fuq www.mut.org.mt. Kull min
jixtieq aktar tagħrif jista’ jibgħat lil [email protected] jew iċempel 2123 7815.
“Ejjew ningħaqdu
sabiex bil-kreattività
tagħna nsaħħu l-
kwalità tal-edukazzjoni
li nipprovdu.”
Agħfas fuq l-indirizzi biex tidħol fil-paġni tal-MUT:
https://www.facebook.com/groups/mutgroup/
https://twitter.com/MaltaMUT
http://www.youtube.com/MUTcampaigns
http://edcommut.blogspot.com/
www.fxdd.com
Inħarsu ‘l quddiem Chris Vella, Ċerpersin tal-MUT Youth
Ninsabu fil-bidu ta’ sena kalendarja ġdida, għalkemm bħala għalliema s-‘sena’ ilha aktar minn tliet xhur li bdiet u fil-fatt terz minnha prattikalment għaddiet.
Naturalment, ikun mument tajjeb għal kull persuna, u wisq iktar għall-għalliema li jieqfu ftit u jevalwaw il-ħidma tagħhom biex jaraw xi frott qed tħalli kemm fil-ħajja tagħhom u wisq iktar fil-ħajja tal-istudenti li jgħallmu. Naturalment, l-eżamijiet ta’ nofs is-sena għandhom ikunu indikatur tajjeb tal-frott miżrugħ.
Imma tajjeb li nkomplu niġġeddu bħala għalliema sabiex il-ħidma tagħna tkun ta’ kwalità dejjem aħjar, mhux biss fil-kontenut akkademiku li nagħtu, imma fl-għodod ta’ tagħlim li rrawmu fl-istudenti tagħna. Mhux biżżejjed li l-istudenti jkunu jafu ħafna informazzjoni imma ma jiksbux il-ħiliet neċessarji biex ikunu kapaċi jiskopru u jfittxu l-kontenut waħedhom u jkollhom dak l-istess għatx li l-għalliema ta' qabilna għaddew lilna (forsi)!
Din it-tema fil-fatt – lejn kwalità ta’ edukazzjoni aħjar – hija tema ewlenija li fuqha l-Unjon ser tkun qed taħdem u tippromwovi fl-2014.
Min-naħa tagħna, is-Sezzjoni tal-MUT Youth xtaqna nagħtu s-sehem tagħna permezz ta’ kompetizzjoni tal-fotografija dwar din it-tema. Jiena nħeġġeġ lil dawk li jħobbu l-fotografija jieħdu sehem u fl-istess ħin nawgura li din ma tkunx biss tema ta’ attività imma l-Mission Statement ta’ ħajjitna bħala edukaturi
Nawguralkom sena mimlija riżq, ħidma tajba u frott xieraq!
X’inhu għaddej: Il-Laqgħa mal-NQTs
Bħal kull sena l-Unjin tistieden lill-edukaturi l-ġodda għal laqgħa ta’ introduzzjoni għall-impjieg tagħhom waqt li tfisser is-sehem tal-istess Unjin fil-ħajja professjonali. Kien hemm attendenzi numeruża għaż-żewġ laqgħat li aħna bħala kumitat organizzajna f'isem il-Unjin mal-istudenti Universitarji tal-B.Ed. u l-PGCE. Dawn l-edukaturi prospettivi kellhom ukoll l-opportunità li jistaqsu ħafna mistoqsijiet relevanti għall-impjieg futur tagħhom.
Kien ta’ pjaċir għalina li ltqajna ma’ dan in-numru sabiħ ta’ edukaturi ġodda li attendew għal-laqgħa f’Novembru li għadda u magħhom qsamna xi esperjenzi dwar x’verament tfisser id-dinja tax-xogħol.
Bħala MUT Youth, u bħala għalliema li ilna diversi snin naħdmu fis-setturi kollha tal-edukazzjoni, nifhmu kemm l-edukaturi l-ġodda jkunu jixtiequ u jistennew appoġġ. Huwa proprju minħabba f'hekk li norganizzaw laqgħat bħal dawn ta’ kull sena.
Nawguraw lil dawn l-edukaturi l-ġodda kull suċcess fil-karriera tagħhom waqt li nħeġġuhom jipparteċipaw fil-ħidma tal-Unjin, speċjalment fil-qasam tal-Youth. Għaldaqstant qegħdin ninkoraġġixxu lil dawk li jixtiequ jiktbu fl-e-newsletter sabiex jikkunttatjawna permezz tal-email jew Facebook.
Il-Mixja / Il-Ġirja tal-President
Għat-tieni sena konsekuttiva l-MUT Youth ingħaqdet mal-eluf ta’ Maltin fil-mixja u l-ġirja għall-Istrina nhar il-Ħadd l-1 ta’ Diċembru.
Li l-Unjin tħares ‘il barra mil-limiti tagħha u tagħti l-għajnuna tagħha f’att ta’ solidarjetà huwa ġest mill-isbaħ u għani minnu nnifsu. Għaldaqstant, aħna l-membri tal-MUT Youth flimkien ma’ edukaturi oħrajn li għoġobhom jipparteċipaw fil-mixja jew il-ġirja, ingħaqadna sabiex nuru solidarjetà ma’ dawk aktar fil-bżonn minna.
Jalla, matul din is-sena jerġa’ jkollna l-opportunità sabiex ningħaqdu f’atti ta’ solidarjetà għaliex dawn huma l-mumenti meta l-Unjin tkun l-aktar qrib is-soċjetà.
Eżempju tal-Members’ News Update li qiegħda tintbagħat
regolarment lill-membri rreġistrati mal-Unjin.
L-Uffiċċju tal-Komunikazzjoni tal-MUT Antonio Olivari, Uffiċjal tal-Komunikazzjoni MUT
L-MUT wettqet u qiegħda tippjana diversi inizjattivi u huwa importanti li l-membri kollha, speċjalment iż-żgħażagħ li huma parti essenzjali mill-Unjin, ikunu kemm infurmati kif ukoll attivi f’dak li jkun qiegħed jiġri fil-qasam tal-edukazzjoni. Xogħlijiet li saru s’issa jinkludu:
- ristrutturar tal-paġna ewlenija www.mut.org.mt sabiex issa hemm lista aktar sempliċi tal-aħbarijiet wara xulxin bid-data u wieħed jista’ jikklikkja f’dawk l-aħbarijiet li jinteressawh;
- il-Members’ News Update e-newsletter (ara ritratt fuq il-lemin) li tintbagħat regolarment lill-membri kollha tal-MUT u li hija għodda ewlenija ta’ informazzjoni. Min għal xi raġuni mhuwiex jirċiviha nħeġġuh jibgħat in-numru tal-membership flimkien mal-indirizz tal-email fuq [email protected] ħalli l-informazzjoni fid-database tagħna tkun dejjem korretta kif imiss;
- l-istess informazzjoni qegħdin nippubblikawha wkoll fil-paġna ta’ Twitter u anki fil-grupp ta’ Facebook għall-membri. Dan tal-aħħar huwa mezz ukoll ta’ kif ikun hemm diskussjoni bejn il-membri dwar suġġetti relevanti. Ara l-links fl-ewwel paġna biex iżżur dawn il-paġni.
Apparti dan, hemm ukoll diversi inizjattivi oħra ppjanati inkluż attivitajiet relatati mal-kampanja “Unite for Quality Education” tal-Education International, kampanji ta’ informazzjoni dwar is-cyberbullying fl-iskejjel, aktar promozzjoni lill-MUT Publications u l-qari bil-Malti, u anki korsijiet u seminars għall-membri. Informazzjoni dwar dawn tingħata aktar ‘il quddiem.
Fl-aħħarnett nixtieq nirringrazzja lil Chris, Justin, Adrienne u Jonathan li jiffurmaw it-tim sabiħ tal-MUT Youth tal-merħba li tawni. Nawguralhom kull suċċess fl-inizjattivi interessanti li għandhom ippjanati għaż-żmien li ġej.
Min jixtieq jikkontribwixxi għall-ħarġiet li
jmiss ta’ din l-e-newsletter jista’ jibgħat email fuq [email protected].
Grazzi bil-quddiem!