faamaumauga mo le taita...revelation seminar – presentation notes page 1of 14 o le feau a le...

Revelation Seminar – Presentation Notes of 14

O le Feau a le Faaaliga mo i Tatou

Suesuega 1

Faamaumauga mo le Taita

Ata Tele

Sini o le Suesuega

1. Ia faailoa ai o valoaga o i le Faaaliga e talafeagai lelei ma tulaga uma o

le olaga o tatou faafesagai nei i lenei Senituri 21.

2. Ia atinaeina le faamoemoe ma le uiga o le olaga, ma

faamalamalamaina ai le faavaeina o le Faaaliga i luga o le “Lauga a

Iesu i luga o le Mauga,” e faatatau i le iuga o le lalolagi.

3. Ia faamanino ai o looo silafia ma pulea pea e Le Atua lenei lalolagi,

ma Na Te aumaia ai se malamalamaaga faavae mo le Tusi o Faaaliga

mai le vaaiga o le tala faasolopito o le lalolagi.

O Vaaiga Taua ma auala e Faasoaina ai lenei Vasega

E le o iai se fuafuaga a lenei vasega e atina’eina se lagona faavauvau ma se atuatuvale ona o mea o loo vaaia i le lalolagi i le taimi nei. Ia manatua, ua matua toatele e ua faatumulia i le matau, ma e le toe taliu ma i ni mafutaga e lagona ai le fefe. E

manaomia e tagata le faamoemoe, le uiga, ma le mafuaaga i lenei olaga ma ona faafitauli. Atinae le talitonuga, it ala atu o nei faigata, o loo iai le folafolaga o le ola sili atu i le afio mai o Iesu.

Manatua: I Faamaumauga mo Taitai, e mafai ona filifili le taitai e faaaogaina faamaumauga o i le poloka lanu samasama ma foliga ataata . O tulaga e una’ia le taitai e faia o loo tusia i

lanu mumu [faatatafa] ma le faaau . O Faatomuaga i Fautuaga mo le Taitai o loo tusia i le lanu mumu. O tusitusiga mai le au vasega o loo tusia i le lanu moana.

O le Lisi o mea e ao ona mautinoa ua faatulagaina lelei mo lenei Vasega

Suesuega 1 “O le Feau a le Faaaliga mo i Tatou” [order from Signs]

Faamaumauga mo le Vasega (e maua i le DVD a le Taitai)

PowerPoint mo le Vasega 1 (emaua i le DVD a le Taitai)

Tuuina atu i le Vasega

Fautuaga mo le Suesuega 2, mo le vasega e sosoo mai

Faamaumauga e faatatau i le Vasega 1

Suesuega Faapitoa o le Vasega1 e ono manaomia

“O Auala Eseese mo le Faamalamalamaina o le Faaaliga.”

“O le Faaataina mai e le Faaaliga o le Lauga a Iesu i le Mauga o Olive.”

“O Auala e Suesueina ai le Tusi o Faaaliga.”

Session 1 - Revelation’s Message for Us

Revelation Seminar – Session 1 Presentation Notes of 14

O nei Suesuega Faapitoa, e mafai ona tuuina atu i le au vasega pe a manaomia. O Suesuega Faapitoa 1 & 2, e talafeagai mo e ua mafai ona fesoasoani tele ia i latou ua maea ona suesueina le Faaaliga i nisi auala. O lona tolu e talafeagai mo le au vasega uma lava e ave i o latou aiga mo le suesueina.



Faatomuaga o le Suesuega

Amata le vasega i feau masani nei:

Talofa

Talofa. O lo’u igoa: ____________.

Faamoemoe o le a faatuputeleina lo tatou femalamalamai a o tatou mafuta ma suesueina lenei tusi lauiloa ua faaigoaina o le Faaaliga.

Tusi Paia

O Tusi Paia ua tufaina atu, e avea ma oe ina ua atoa sauniga e ______ e te faatasi mai iai.

O Faamaumauga

E te le tigaina ona tau tusitusiina la tatou suesuega. E te maua faamaumauga uma o la tatou suesuega i lau folder e te le tau tusitusiina. E iai le faamoemoe o le a e silasila totoa i vaega uma nei a o faagasolo la tatou suesuega ma talatalanoaga.

E manaomia lava oe e aumai lau folder ia tatou suesuega uma. E te maua faamaumauga uma o suesuega taitasi.

Manatu Faasoa

O loo iai foi ma le pepa i lau folder e tuuina atu ia te oe le taimi e te ta’u mai ai ni ou lagona e faatatau i la tatou suesuega.

Fesoasoani mo Suesuega

E iai foi Fesoasoani mo le Suesuega ua saunia mo oe pe a maea vasega taitasi. O le a e maua ai le avanoa e te suesue ai le mataupu o loo sosoo mai.

A e filifili e te faaaogaina fesoasoani nei, o le a iloa lona aoga tele i le faamalamalamaina i lea mataupu ona ua e faaaluina le taimi e suesueina ai sea mataupu.

Ia tatou suesuega la, o le a e maua ai le avanoa e te faasoaina ai ni faamanuiaga e te maua i lau suesuega. O le a maua foi se mea alofa ona o lou taumafai e suesueina mataupu mo oe lava i lou aiga. Pe sa’o pe sese, e le o le mea taua lena—fai iai lou fai mea lelei.

A e te lei foi i lou aiga i iuga o suesuega taitasi, o le a tuuina atu ia te oe le Fesoasoani lenei mo le vasega lona lua . . .

[Sii i luga le Fautuaga mo le Suesuega 2]

Faatomuaga o le Suesuega

O le a e maitauina a o tatou faasolosolo ia tatou suesuega, e taua tele lou le misia o se suesuega, ona e faavae le suesuega o sosoo ma i le suesuega ua mavae atu. Afai e te misia se suesuega, faailoa mai ina ia mafai ona fesoasoani atu e faatutumuina ni vaega o misia.

Talosia e mafai ona tatou auai faatasi i la tatou faamalosi mama pe a maea la tatou vasega.

Tatalo Amata

Se’i o tatou fesiligia le fesoasoani mai a Le Atua a e le’i amataina la tatou suesuega.



[Tatalo]

Faafetai lo matou Atua ina ua mafai ona matou mafuta iinei i le aso. E eseese uma lava mea matou te o mai ai, e eseese foi o matou manaoga. E te silafia nei mea uma ma ua matou tatalo atu ai ia E faatasi mai ai ia i matou. Tatalaina o matou loto ma aumaia ia i matou le malamalamaaga o lenei tusi. Ua matou tatalo atu ai i le suafa o Iesu Keriso. Amene.



O Faamaumauga Amata mo le Vasega Muamua

Mo le faaaogaina o Faamaumauga mo le Vasega, mulimuli i faasinomaga o i totonu o le pusa samasama i lalo.

E tele ata ma faatusa Matautia i valoaga i le Faaaliga: e iai manu feai e o a’e mai le sami ma le fanua; o tietie solofanua e o a’e mai le tatalaina o faamaufaailoga; ma le tal i fafine e toalua—o le tasi e ofu sisina a o le isi e ofu mumu ulaula. E iai le faamatalaga i le taimi e le toe mafai ai ona faatau atu pe faatau mai, atoa foi ma le numera “666.”

E mafai ona faaosofia le atuatuivale i le faitauina o lenei tusi.

E matua aafia tele lava tagata i le tusi lenei. Ua mafua i le faitauina o le tusi o Faaaliga le solo tetee o tagata. O se tusi foi ua e maoae ona ata ua faia ai ata tifaga. E mafai ona faananati ma faifai lemu foi ona vaaiga eseese e matua maofa a ii nei tifaga, e vaaia ai foi ituaiga musiga ma le feilafi o malamalama eseese ma le felanulanuai mai vaaiga eseese o mea pue ata.

Ua tele ata tifaga a Hollywood ua faia mai le tusi o Faaaliga, e iai The Terminator ma le Star Wars. O se tasi tifaga lauiloa o le The Lion King. E sili atu i le 70 miliona tagata na matamata ai. Aisea lava? O le mea moni o lenei tifaga e le faatatau i ni manu, a e faatatau i tagata, tatou. O le tala i se malo na faaleagaina ma toe faafouina. Na faatoilaloina ai e le Leona lelei le Leona leaga ma faasaoina ai le malo. O le tele o lenei ata e atagia mai ai le Tusi o Faaaliga, ma lona tala autu i le toe faafouina o le parataiso e ala i le Leona e igoa ia Iesu Keriso.

O tusitala o tusi ma tusi ata, e tele ina o latou faaaogaina o manu e faaataina mai ai uiga ma amio a tagata ma motu o tagata. E faigofie ona tatou vaaia i tatou lava ma a tatou amio ma uiga pe a faaataina mai i se tala e faaaogaina ai manu. Afai e tuusa’o mai e se tusitala se manatu maaleale, e tele ina tatou teena ona tatou te manatu ua osofaia i tatou.

O le mafuaaga lena e malosi tele ai le Tusi o Faaaliga. E ui lava e foliga mai o se tala i ni manu, e le faatatau i ni manu. E pei lenei tala o se ata o feutagaiga i le va o tagata, e aofia ai le lelei ma le leaga. E faatatau foi i le mafutaga a Le Atua ma le fanau a tagata, a e maise le tulaga e iu iai le tala faasolopito o le tagata soifua.

Aisea ea la e faigata ai i tagata ona malamalama i le Tusi o Faaaliga? Ona na faavaeina e le tusitala lenei tala i ata ma faatusa, e le o le senituri e 21st, a o le vaitaimi o le 90 TA Senituri 1,st ma sa tusia faapitoa e le tusitala mo tagata o ekalesia e fitu I le itumalo Roma i Asia Ititi.

Na faaaogaina e Le Atua la latou gagana ma Ia faamalosia i latou i tulaga sa latou iai. A o feau na Ia tuuina ifo ia i latou, na Ia faaaogaina ai ni ata ma ni faatusa e tumau lo latou malosi mo Ona tagata e sili atu I le 2000 tausaga.

E iai nisi e manatu e matautia tele le Tusi o Faaaliga pe a suesueina. Ua tele ai ni manatu eseese e tutupu a’e a ii manatu o nisi. O le tusi lenei na tutupu ai manatu o David Koresh ma fetauai ai ma leoleo o le malo Amerika. Atonu e le’i sa’o le auala na ia suesueina ai le tusi. O le mea lea e alaga tatau ai ona tatou faataatitiaina ni aiaiga e puipuia ai la tatou suesuega.

O nisi la nei o aiaiga taua mo la tatou vasega:



[Fai i le vasega e liliu loa i Faamaumauga mo Vasega]



[FAAMAUMAUGA MO LE VASEGA, ITULAU 1]

O le Faaaliga, o se tusi e faapitoa, ma e uiga ese foi lona feau. Ina tatou malamalama i lona taua mo i tatou i ona po nei, o nisi nei o manatu faavae e puipuia ai la tatou suesuega:

Loto Maualalo.

O i tatou uma lava o tamaiti aoga. O le tagata aoaoina moni lava, na te malamalama i le ititi o se mea na te iloa. E iai taimi e tatau ai ona tatou faapea ane, tatou te le iloa le tali. E iai foi taimi e tatau ai foi ona tatou faapea ane, e iai manatu eseese e tatau ona filifilia. O lea ia tatou agalelei ai ia i latou e eseese o tatou talitonuga. E a lena?

Ia manino i le matautia o le faasese e le tagata, o ia lava.

O le faigofie ia ona tatou faaopoopoina o tatou lava manatu i lenei tusi. A e tatau lava ona tatou taumafai e tumau i le uiga tonu lava o le mau. E aofia i lenei taumafai le tuueseina o nisi o tatou manatu ua loa ona tatou talitonu iai. E tatau lava ona tatou faatauaina le lapataiga a Ieremia17:9: “E sili le faaoleole o le loto i mea uma, ma ua matua leaga lava. Po o ai na te mafaia ona iloa?”

E tele ata ma faatusa e faaaogaina e le Faaaliga. E faigofie ai ona see ese la tatou suesuega mai le aoaoga a le Tusi Paia ma uiga tonu o nei ata ma faatusa.

E matua taua le tatalo e fesili ai i Le Atua e taitaina i tatou i le suesueina o lenei tusi.

O lenei tusi e mai Le Atua, ma e sili atu pe a mai ia te Ia le faamalamalamaga.

E sili atu foi ona faaaluina le tele o lo tatou taimi e suesueina ai vaega o le tusi e faigofie ona malamalama iai.

O lona uiga, e le aoga tele le alu o le taimi e taumate ai manatu e le taua tele. E ono taitaieseina ai la tatou suesuega mai le manatu autu o le tusi.

Suesue faatasi ma isi.

E taitaina e Le Atua manatu e tele, e le na o se tasi. E mafai e mafutaga suesue ona felafolafoai, fefaasoai, ma fesoasoani le tasi i le isi. E mafai ona faaseseina le taga e suesue toatasi pe a leai nisi e siakiina le suesuega.

Vaai muamua pe o le a le uiga o feau mo i latou na muai auina atu iai lenei tusi, ona faatoa saili ai lea o uiga mo i tatou i le aso.

O le a tatou suesueina le lalolagi o le senituri muamua ina ia iai so tatou malamalaaga i o latou manatunatuga. Ona tatou iloa ai lea pe o a ni uiga mo i tatou.

E iai feau mo i latou i le senituri muamua, e iai foi feau mo i tatou i le aso.

[Faitau le Faaaliga 1:19]

le auiliili o la tatou suesuega o lenei tusi o le a maua ai nisi o vaaiga fou e faatatau i le malamalamaaga ia Iesu Keriso.



Mulimuli lava, ma sili foi ona taua, o le ki i le malamalamaaga e maua i le fuaiupu muamua lava. “O le faaaliga a Iesu Keriso na tuuina atu e Le Atua i ate Ia ina ia faaali mai i Ana auauna o mea e tusa ona vave oo mai. Ua auina mai foi e Ia Lana agelu e faailoa mai ai i Lana auauna o Ioane.”

E le se tusi e na ona faamalieina ai lo tatou fia iloa o le lumanai, e ui lava ina faailoa mai ai le faamoemoe ma se lumanai uiga, e loloto atu aoaoga o feau a le tusi o Faaaliga. E faaalia mai ai Iesu Keriso i se auala faapitoa lava.

O le tusi e fesoasoani mai ia tatou iloa ma faatauaina atili ai o Ia. O le tusi na tusia e liua ai olaga o tatou tagata, a e le na ona faailoa mai ni feau ia i tatou. E fesoasoani mai ia tatou iloa le uiga ma le mafuaaga, ma tali ai o fesili tetele o le olaga.

O le a amata loa la tatou savaliga.

Tatou te iloa le Tusitala o le Faaaliga?

Faitau le Faaaliga 1:4

Na tusia e Ioane le Faaaliga e aunoa ma le tau faailoaina mai o ia lava. Ua loa lava ona malamalama ekalesia e fitu o Asia ia Ioane.

[Faaali le ata o le faafanua o Asia Ititi i le Senituri Muamua o faailoga ai ekalesia e fitu]

Ua ta’ua le vaega lenei o le lalolagi o “Take.”

E foliga mai na mafaufau faa Eperu Ioane a e tusitusi faa Eleni. E le lelei tele lana faa Eleni. E foliga mai foi e leai se tasi na fesoasoani ia te ia—leai sa na failautusi e pei o isi tusitala o le Tusi Paia.

O Ioane lenei, o se tasi o soo o Iesu. O le Iutaia a e na tusitusi i le

gagana Eleni. Na malamalama ma masanai lelei tagata o Ekalesia i Asia

Ititi ia Ioane.

O fea na iai le Tusitala i le taimi o le tusiina o le Faaaliga?

Faitau le Faaaliga 1:9

Sa faaaunuua Ioane i le motu o Patamo, e le mamao ma le talafatai o

Asia Ititi ina, a o tuuina ifo iai e Le Atua le fe’au i Ekalesia e 7.

Amanaia le faaupuga: “Na a’u i le motu e igoa ia Patamo . . .”

[Faasino le Motu o Patamo i le faafanua, faaali ai lea ma ata o le motu]

O Patamo o se tamai motu i le sami e ta’ua o le Agean Sea. E tusa ma le 26 kilomita le uma, a e 10 kilomita le lautele. O le faamatalaga a le faiaoga o le tala faasolopito o le ekalesia Kerisiano o Eusebius tusa ma le 200 tausaga mulimuli ane, faapea na faaaunuua Ioane i Patamo e le taitai Roma o Domitian tusa ma le TA 95.



[FAAMAUMAUGA MO LE VASEGA 1]

O anafea na tusia ai le Faaaliga, ma o ai foi na tusia iai?

E tele tusitusiga mai senituri e lua ma le tolu, e talitonu na tusia le Tusi o Faaaliga i le taimi o le taitai Roma o Domitian—i le va o le TA 81 ma le 96. O le taimi lea na amata ai ona saua le taitai lenei i Kerisiano. Na faateteleina mulimuli ane sauaga, ma na tusia ai le Faaaliga e faamalosia ma lapataia ai ekalesia e fitu.

A o le a tatou molimauina, e mamao ma loloto feau a le Faaaliga e lapataiina ai i tatou uma lava i augatupulaga uma e mulimuli atu i ekalesia e fitu i Asia. O le mafuaaga taua e talitonu ai e moni le manatu lenei, ona o le tele o feau o le tusi a Ioane e totogo mai uma i le lauga a Iesu i le Mauga o Olive i Ierusalema e faatatau i le iuga o le lalolagi. E lei umi ona mavae Lana lauga a e faasatauroina loa o Ia.

E taua foi le amania, e na o Mataio, Mareko ma Luka na faamaumauina le Lauga a Iesu, a e lei ripotia mai e Ioane. E mafai ai ona faapea ane, o le tusi o Faaaliga, o le faamaumauina lea e Ioane o le lauga a Iesu i le Mauga o Olive.

E maua mai i le lauga lenei o le iuga o faailoilo e le gata i le vaitaimi o Lona toe afio mai, a e faapena foi ma lapataiga i ala e faamautuina ai le faamoemoe, le uiga ma le mafuaaga o tatou olaga i le aso, a o tatou latalata atu i le iuga.

O le aoaoga a le Tusi Paia, o le iuga o le lalolagi e pei ona tatou vaaia nei, e taunuu i le afio mai o Iesu Keriso.

I le Faaaliga 1:1, o loo ta’ua mai ai e Ioane na ia tusia

lenei tusi e faailoa mai ai mea “e tusa ona vave oo mai.”

O le Faaaliga 1:3, o loo unaia ai e Ioane le au faitau ia faalologo i le valoaga, “aua ua latalata ona po.”

O le toe afio mai o Iesu, o se manatu autu lea e sosolo mai lava i le amataga seia oo i lona faaiuga o le tusi atoa o Faaaliga:

E vaaia i upu tomua. Faitau le Faaaliga 1:7.

E lalagaina foi i upu taualuga. Faitau le Faaaliga 22:7, 12, 20.

O le afa mulimuli o le tusi e iai mea e tutupu e agai atu i le toe afio mai o Iesu i le lalolagi. E faaaogaina ai o ata ma faatusa na Ia faaaogaina i Lana lauga e faatatau i le iuga o le lalolagi.

[Faaali ata o le toe afio mai o Iesu. Faasino i le vasega, a taunuu loa lea, o le a vaaia o Ia e mata o tagata uma lava. O se mea e tupu moni lava. O le afa mulimuli o le tusi o Faaaliga o loo faailoa mai ai mea o le a tutupu a o agai atu i le toe afio mai o Iesu ma o loo faaaogaina ai o ata ma faatusa e maua mai i le Lauga a Iesu i le Mauga o Olive, e faatatau i le iuga o le lalolagi]

Se’i toe foi lava la tatou vaai i le Lauga a Iesu e faatuputeleina ai i lo tatou malamalamaaga i le Tusi o Faaaliga.



A o faasolo la tatou suesuega i lenei semina, o le a tatou fefoifoi a’i lava i le Faaaliga ma le Lauga lenei a Iesu. O le a tatou faaaluina ai si na taimi iinei pe o a ni mea o fetalai iai Iesu Keriso i Lana lauga. E talitonu o le a fesoasoani tele lava lea e faatumauina ai la tatou vaai, a o tatou galulue faasolo i lenei tusi o Faaaliga.

E iai nisi e manatu na faia e Ioane nei faamatalaga ona, i le Lauga a Iesu, na Ia faailoa mai ai faailoilo e iloa ai e Ona soo le latalata o le taimi (Mat. 24:33). E lei faamaumauina e Ioane le Lauga i lana evagelia a o le tusi o Faaaliga. Na ia tusi ma le malamalama o mea ia na fetalai ai Iesu, e le toe mamao a e taunuu.

Ia Ioane, ua faatafunaina nei Ierusalema ma manatu ai o mea uma na fetalai Iesu e taunuu i le iuga o le lalolagi, ua amata i lona taimi ona tutupu.

Ia i tatou, e tatau ona tatou suesue auiliilia le Lauga a Iesu e faatatau i le iuga o le lalolagi, o le a faateleina ai lo tatou iloa ma le malamalama i la tatou savaliga o le Tusi o Faaaliga. O le a tatou teulotoina lenei Lauga e fesoasoani a i la tatou savaliga faasolo i le Faaaliga.

Sa faailoa atu e Iesu i Ona soo e iai le aso, o le a faatafunaina ai le malumalu i Ierusalema. Na manatu loa Ona soo o le iuga lea o le lalolagi. Na mafua ai a alatou fesili pe o afea e taunuu ai ia mea.

Tatou faitauina loa le Mataio 24:13.

E iai taimi tatou te faitauina ai le faamaumauga a Luka foi ia, ona e iai ma nisi manatu faaopoopo e aoga tele mo lo tatou malamalamaaga.

Faitau le Mataio 24:13

A o tali atu Iesu i Ona soo, sa fefiloi i Lana tali o tulaga o le faatafunaina o Ierusalema. A e na Ia faaalia foi le aafia uma o le lalolagi i

tulaga o Lona toe afio mai. Faataitaiga, faitau le Mataio 24:3031.

Na fetalai Iesu e faatatau i le faatafunaga o Ierusalema ma le iuga o le lalolagi, e pei lava o le mea e tasi. Aisea, i lou manatu, na Ia faaaaogaina ai lea auala?

E lamoimoi lava le faatafunaga o Ierusalema, a e na Ia faaaogaina e aoaoina ai tagata i tulaga o le iuga o le lalolagi.

E lei faamalamalamaina e Iesu, o faatafunaga nei e lua e valavala i senituri e tele

Se manu e matua faavaivai ai lava ona soo pe a na latou iloa lea tulaga.

[Faaali le ata ititi o le faatafunaga o Ierusalema, ma le faatafunaga o le lalolagi pe a afio mai Iesu, i le ata tele]

O le faaaogaina o se tulaga o se mea ititi e tupu e faaataina mai ai se tulaga o se mea tele e tupu mulimuli mai, o se tasi lea o metotia e faaaogaina e valoaga a le Tusi Paia. E avea se mea ititi e tupu mai, ma ata e faatusa iai se mea tele e tupu mai i le lumanai.



Na faailoa mai e Iesu faailoilo o le a vaaia a o latalata atu le faatafunaina Ierusalema.

Na fetalai Iesu e iai mea e muai tutupu, a o lei faatafunaina Ierusalema i le senituri TA muamua.

Faitau le Mataio 24:48

[A o talanoaina vaega eseese o mulimuli mai, o loo faaalia foi i ata o le faatafunaga o Ierusalema. O le talanoaga i le taimi lenei e faatatau tonu lava i le faatafunaga o Ierusalema.]

O Taua. Sa iai taua i vaega eseese o le malo tele o Roma i le vaitaimi o le TA 60. Sa faamaonia lea, a e maise lava le siosiomaga o Palesetina. Sa tele osofaiga eseese faa terorisi i Palesetina atoa.

O Oge. I le TA 44, sa iai se oge tele lava i Palesetina. E oo lava i le taimi puupuu na pule ai le taitai Roma o Claudius, e 4 oge o loo faamaumauina na iai.

O Faamai. O le Luke 21:11 o loo faaopoopoina ai faamai i le lisi—“E iai mafuie tetele i lea mea ma lea mea, o oge foi ma faamai, ma faaiteite ma faailoga tetele mai le lagi.” E tusa ma le 30,000 i latou na maliliu i le faamai e ta’ua o le bubonic plague i Rome i le taimi o Nero i le 3 masina.

O Mafuie. I le TA 60, na matua faatafunaina ai Laotikaia, sosoo ai ma Pompeii TA63. A o toe tau fausia Pompeii, a e toe tanumia atoa loa e le lava ina ua pa le Mauga o Vesuvius TA 79. Sa avea mafuie ma mea e masani ai i le ogatotonu o le senituri muamua.

O le tulai mai o Keriso ma Perofeta pepelo. Na fetalai mai lava Iesu o le a toatele i latou ia. Molimau mai le tusitala Iutaia o Josephus sa toatele mesia pepelo. Sa matua lofia Palesetina e le au tau faasese ma le au faafoliga o e na latou faavaeina le tetee i le malo o Roma.

O le Mataio 24:1517, o loo faailoa mai ai le pule e ta’ua, “o le mea inosia e faatafunaina a’i.” Na faailoa mai e Iesu e faataunuuina lea (Luke 21:20), i le faatafunaina e Roma Iuta—“A iloa e outou ua siosiomia Ierusalema i ‘au o le taua, ia outou iloa i lea aso, ua latalata ona faatafunaina.”

E ta’u mai ia i tatou e le ‘au tusitala na taunuu lenei fetalaiga a Iesu a o lumanai ai le faatafunaga o Ierusalema TA 70. Na fasiotia e Iuta le au fitafita a Roma i Ierusalema na mafua ai ona faatonuina loa e le taitai ‘au kovana Suria o Cestius Gallus, le ‘autau e 30,000 ma latou siosiomia Ierusalema. Na taumafai e aea Ierusalema mai le maota o Herota faapena foi le Mautietie o le Malumalu, peitai e lei manuia. Na matua maofa Iutaia ina ua toe solomuli ‘autau a Roma agai i le sami. Na tuliloa e ‘autau a Iutaia, ma fasiotia ai fiafita Roma e 6000.

E masani ona tauaveina e fitafita Roma a latou faailoga, mo a latou tapuaiga, i luga o pou uumi. O nei pou uumi e faakoluse tumutumu e tuu ai a latou faailoga nei. E tofu lava le vaegaau ma lana faailoga. I legata Iutaia, o ifoga tupua nei. O le ifo i tupua, o se mea inosia tele lea i tagata Iutaia, ma o laueleele i tuapa o le aai, o ni eleele paia ia.

O le mafuaaga lea o le molimau a Mataio, “o le mea inosia lenei e faatafunaina ai ua tui le Mea Paia.” A e molimau Luka, o le a siomia o Ierusalema e autau.

Sa masani le Kerisiano o le senituri muamua i le Lauga a Iesu, ina ua latou vaaia lona faataunuuina, na latou iloa ai loa ua tatatu ona sosola.



Na latou vaaia le solomuli o autau a Roma o lo latou avanoa lea ma latou sosola ai loa i le aai lata ane e igoa ia Pella.

Na toe taliu mai lava ‘autau a Roma i lalolifo o le taitaiga a Titus. O le taimi lea, na matua olopalaina ai le aai, a e leai se Kerisiano e tasi na maumau ai lona ola. Na latou mulimuli uma i faatonuga uma a Iesu.

I le In Mataio 24:2931, e manino lava o loo fetalai Iesu e faatatau i le iuga o le lalolagi e pei ona tatou malamalama iai.

E le gata ina valoia e Iesu le faatafunaga o Ierusalema i le senituri muamua; o Ana valoaga foi na valoia ai ma le iuga o le lalolagi nei, ma tuuina mai ai ia i tatou o faailoilo tatou te iloa ai lona latalata tele mai.

O lenei la ua tatou vaaia le ata tele o le faataunuuina o lenei valoaga maoae. E manino iinei e le’i fetalai ma vavalo Iesu na o Palesitina.

[Faaali le ata o le vaaia o le toe afio mai o Iesu ma Ana agelu]

Amanaia fuaiupu 32-35, e iai le taimi o le a iai le augatupulaga e vaaia ia mea uma o tutupu. A e o le a iai faailoilo latou te iloa ai le latalata mai tele o le tutupu o nei mea uma.

A o le taimi lava e tasi, o loo Ia lapatai foi i le fuaiupu: “A o le aso ma le itu aso, e le iloa e se tasi.”

Vaaiga Aofaiga:

Na faailoa mai e Iesu faailoilo e iloa ai le oo mai o le faatafunaga o Ierusalema. I nai tausaga talu ona Ia afio i le lagi, na latou vaaia ai nei mea uma o tutupu i le malo: taua, oge, faamai, mafuie, Keriso ma perofeta pepelo. Na latou molimauina uma le faataunuuina e pei lava ona valoia mai e Iesu. Na aoga lea e faamautuina ai lo latou faatuatua.

Ona oo mai loa lea o le faailoga mulimuli: o le siomia e autau a Roma le aai o Ierusalema. A faapefea nei ona latou sosola?

E sili lava le malamalama i valoaga o le Tusi Paia pe a oo ina faataunuuina. Ona latou vaaia loa lea o le solomuli o autau a e le mailoa le mafuaaga. Ua matalatala nei faitotoa o le aai ma tuliloaina loa e autau a Iutaia le fili. Ona maua loa lea o le avanoa o Kerisiano e sosola ai i le saogalemu.

E iai se feau a le Tusi o Faaaliga mo i tatou o ona po nei?

Ioe, e manino lava le tali. O lenei tali e amata mai lava i le taimi o Iesu seia aulia Lona toe afio mai i le lalolagi.

I le Faaaliga 1:19, na fetalai mai ai Iesu ia Ioane o mea uma o loo Ia faailoa mai ia te ia, e faatatau ia i taimi o Ioane atoa foi ma le lumanai. O le mafuaaga lea e tatau ai ia i tatou ona faitau ma malamalama.

Na faamalamalama atili e Iesu uiga o le olaga o le a iai le lalolagi seia oo lava i Lona toe afio mai.

A e tatou te le’i manatunatu i lenei tulaga, se’i muamua ona tatou vaavaai ma faalogo i manatu o tagata i le 100 tausaga ua mavae atu nei, e faatatau i le senituri e 2oth.



O le faaiuga o le senituri 19, o se vaitaimi o le vaaiga o le manuia. Na vaaia ma molimauina le agai i luma o le atamai faasaeanisi. Na foliga mai ua agai atu i le mafai e le tagata ona pulea le lumanai mo ia lava.

O le tala lenei a se tasi tagata ta’uta’ua: “Ou te vaaia se lalolagi, o le a lepetia ai nofoalii ma liu efuefu ai tupu. Ou te vaaia se lalolagi, e le toe iai se pologa, a ua saoloto le fanau a tagata. Ou te vaaia se lalolagi, e le toe mafatia ai se tagata ese, e le toe oi ai se pagota. Ou te vaaia se augatupulaga e le toe faamaia o le tin ope o le mafaufau, a e tino lelei ma le momosi, a e faatasia le tino ma le faatinoga, ma a o o’u vaai atu, ua ou vaaia ai le faaloaloaina o le soifua, loloto le olioli, ufitia le lalolagi i le alofa, a efaamalumalu ifo le malamalama o le fetu o le faamoemoe e faavavau.”

O le alii lenei e igoa ia Robert G. Ingersoll. O le tagata na ta’utino le avea o le Tusi Paia ma ona fili. A e se’i o tatou faatusatusaina lona talitonuga ma ma manatu foi o is i le 100 tausaga talu ai, ma fetalaiga a Iesu 2000 tausaga talu ai.

[PARTICIPANT NOTES PAGE 4]

Na fetalai mai Iesu o le a iai:

O Taua

O Oge

O Mafuie i lea mea ma lea mea, atoa foi ma

Keriso ma perofeta pepelo peitai o lalata mai le iuga o le lalolagi, o le a faateleina nei mea uma.

Tatou te mautinoa foi o le a toe tutupu mean a fetalai iai Iesu e tutupu e Tuaoi ma Lona toe afio mai. E tutupu mai nei mea e pei o le faatiga a le fafine o le a fanu, a amata lona sosoo ma faateleina ia tiga,ona iloa lea o le a fanau le pepe.

Taua

E matua faamaonia lea i taua ma lo tatou mafai ona faatafunaina i tatou lava. Ua mafai nei e le tagata ona faaumatia mea ola uma o i le paneta.

[Faaali ata o taua]

A o tatou iai i taua, e mafai ona tatou faapea ane o le tala faasolopito o le lalolagi, o le talaaga foi lea o taua. E foliga mai tatou te tau lava i taimi uma. Peitai, o taua o ona po nei ua foliga mai ua aofia ai le lalolagi atoa i lona aafiaga.

O le taimi nei, o loo faafeagai ai lo tatou lalolagi ma le taua ma terorisi. O le eseesega o le taua lenei ma taua tetele muamua o le lalolagi o le senituri ua mavae atu, ona o le faitau afe o tagata tau e naunau ia oti, i le taua, a ia toatele le ‘au le talitonu e maliliu faatasi ma i latou. Latou te faia ia matatau tagata e toe femalagai, e oo lava i ala o femalagaiga a tagata lautele.

Sei o’u faamanatu atu ua faavaeina a tatou mafutaga nei ia faamautuina ai lo tatou faamoemoe. Ona o lenei tusi o le Tusi Paia, o loo ta’ua mai ai o loo pule pea Le Atua i le lalolagi. A o faasolo la tatou suesuega, o le a tatou vaaia ai Lona taofia o malo. O le a faatuputeleina ai foi lo tatou lototetele.



Tatou te molimauina o taua o le lumanai, o le a tauina i auala e matua eseese lava ma le taimi ua mavae. Faataitaiga:

o O le a mafai ona ulufia komipiuta a le tasi malo, ma faaleagaina. O le a faaleagaina ai fesootaiga, a e maise foi o mea totino e iai le suavai, eletise, faalapotopotoga mo le puipuiga o lea malo.

o O le a atinaeina o faamai ia afaina ai ituaiga tagata eseese. O le a faigofie ai lava e le fili ona osofaia ma faatoilaloina tagata o le malo e aunoa ma le faaleagaina o mea totino pe o le siosiomaga.

o

Oge

[Faaali ata o faamai]

O le aso, e sili atu i le piliona tagata e ola i le ititi ifo i le $1 i le aso. O le 20% o tagata aupito mauoa latou te faaaogaina le 86% o mea tamaoaiga o le lalolagi, a e o le 20% o le lalolagi aupito matitiva, latou te faaaogaina na o le 1.4% o le tamaoaiga o le lalolagi.

800,000,000 tagata o le lalolagi e le maoona pe matua leai ni mea ‘ai e aai ai. E 750,000 tamaiti e foeti i vaiaso uma mai le fia aai ma faamai e mafai ona togafitia. E ui ina tatou malamalama e 80% o le fai’ai e ausia le matua i le lua o tausaga o le tamaititi, 150 miliona tamaiti o le lalolagi latou te le maua mea ‘ai e mafai ona ausia ai e le faiai lea matua, ma agai atu ai ina faaleagaina o latou mafaufau.

Peitai, e le agai uma i le malaia. E iai tulaga o loo agai i luma. Ona o le maliliega i le va o malo e faasaolotoina fefaatauaiga, ua mafua ai ona faatuputeleina fefaatauaiga. E ui

ina le se vaaiga faamanuiaina atoatoa, a o loo iai lava le agai i luma i nisi vaega o Asia, ma ua siitia a i luga tulaga o le olaga o nisi e toatele.

O loo molimauina le faaititia o e mafai ona faitau, faaititia le faafaigaluegaina o tamaiti, a e faaititia foi ma tamaititi e fananau ma ii le lalolagi. O le saoasaoa o le faatuputeleina o le tamaoaiga i atunuu e iai Saina ma Initia ua faaitiitia ai le numera o tagata matitiva i le lalolalgi i tausaga ua mavae.

Peitai, o loo le manuia pea le tulaga o iai. E ui ina iai le agai i luma, o loo molimauina pea le salalau o oge i vaega eseese o le lalolagi. O loo tumau lava le lalolagi e pei ona valoia e Iesu.

Mafuie

[Faaali ata o mafuie]

E sili atu i le 250,000 tagata na maliliu i le tsunami ia Tesema 26, 2004, na mafua i le mafuie i le vasa i Asia i Saute. I le 2008, e sili atu i le 60,000 na maliliu i le mafuie i le itumalo Szechwan earthquakes i Saina, ma faitau miliona ai e leai ni mea e nonofo ai.

[Faaali le faafanua o mafuie]

Na valoia e Iesu mafuie i lea mea ma lea mea ma o loo tatou faamaonia lava le moni o lea valoaaga i ona po ne ii vaega eseese o le lalolagi.

[FAAMAUMAUGA A LE VASEGA, ITULAU 4]



Keriso ma Perofeta Pepelo

[Faaali le ata o perofeta pepelo ma faiga faataulaitu ia malamalama a e mea matautia o tutupu iinei]

Na fetalai mai Iesu o le a iai o Keriso ma perofeta pepelo. Latou te faia faailoga ma vavega.

O loo tatou ola i se lalolagi nei ua matua faatumulia i le fia iloa ma le maofa i “vavega ma faailoga” i le lalolagi o agaga. E lapataia i tatou e le Tusi o Faaaliga ‘aua tatou te talitonu i mea uma w vaaia e o tatou mata. A o tatou galulue faasolo i le Tusi o Faaaliga, o le a tatou vaaia ai le taua tele o lo tatou usitaia o lapataiga a Iesu e faatatau i Keriso ma perofeta pepelo.

O le a tatou auiliilia lenei mataupu a o faasolo la tatou suesuega o le Faaaliga. O le upu “vavega,” o se tasi o upu autu e faamalamalamaina ai faasesega ma le iuga o le tala faasolopito o le lalolagi.

E talitonu nisi o loo tatou ola i augatupulaga ma faalapotopotoga faa taulaitu. O taimi uma lava tatou te molimauina ai tagata le mautonu i le lumanai, o taimi uma foi ia tatou te molimauina ai faalapotopotoga o tagata e faalagolago i agaga. E faanaunau le tagata ia talia a latou fesili ma faanaunauga i le lumanai.

Faamoemoe, Uiga, Mafuaaga

O mea uma nei e tutupu e faailoa mai ai ua tatou latalata atu tele lava i le iuga o le tala faasolopito o le ola. E oo ma i le taimi nei, o loo pei

lava le olaga o tulaga uma na valoia e Iesu. O le a le taua o le malamalama o feau o lenei tusi?

O le lalolagi o tatou ola ai, o se lalolagi e le tele se faamoemoe pe o se uiga foi o le ola. Peitai o loo aoao mai le Faaaliga ia tatou le faavaivai pe fefefe i le lumanai. O loo ai pea i le aao o Le Atua le pulea o le lalolagi.

E ui lava o loo lapataia i tatou e faatatau i faigata, ua ia tuuina mai foi le faamoemoe e faatasi ma i tatou a o tatou faafesagai ma le lumanai. A tatou taliaina feau a le Faaaliga, ona tatou iloa lea o loo mulimuli mai le manuia le mafaamatalaina.

O loo lotolotoi i le Faaaliga 1:7, le faamanatuga o le

sini tutotonu o le tusi e toe afio mai Iesu i le lalolagi nei!

[Faaali ata o le toe afio mai o Iesu]

E au atu le Faaaliga it ala atu o le senituri muamua, e oo mai lava i le senituri e 21st. ‘Aua le faavaivai pe fefe. O le tulaga o iai nei le lalolagi, o le tulaga lava lea o loo molimauina e le

Tusi Paia o le a oo iai.

A o loo iai pea le aao o Le Atua i mea o tutupu i le lalolagi. E iai lava lo tatou faamoemoe.

[Faamaumauga Faaiu … Faaauau i Manatu Faasoa]



[Tufa pepa Manatu Faasoa i le vasega. Tuu iai se taimi e faitauina ma tusia ai o latou manatu i fesili ai]

[Faafetaia le vasega i lo latou auai ma toe valaau e auai i le vasega e sosoo ai (tusi le taimi ma le aso o le vasega e sosoo ai). Tufa Fautuaga mo le Suesuega 2, ma unai e manatunatu agai i luma ma suesue le mataupu o sosoo mai e aoga tele lava mo le malamalamaaga ma faigofie ai ona mulimuli i le suesuega atoa. Faailoa iai e togia i latou e taumafai i le mea sili e tali ai fesili. Faamamafa iai, e taua tele lo tatou malamalama i manatu o tagata uma a o tatou galulue faasolosolo faatasi i lenei tusi]

© All rights reserved Seventh-day Adventist Church South Pacific Division. Not for profit

publication. Faatagaina le faaliliuina e Etuati E. Erika [email protected] http://carrumdowns.adventist.org www.revelationhope.com

mailto:[email protected]

http://carrumdowns.adventist.org/

http://www.revelationhope.com/

faamaumauga mo le taita...revelation seminar – presentation notes page 1of 14 o le feau a le...

Documents