home | cccs - congregational christian church in samoa · author asus created date 1/10/2016...

Copyright © EFKS 2016

1

EKALESIA FAAPOTOPOTOGA KERISIANO SAMOA

Matagaluega o A‟oa‟oga Kerisiano

TUSI AOGA ASO SA

VASEGA FEOLOOLO 2016

Faasologa o Mataupu

MANATU AOAO: “O LE ATUA A‟OA‟O MA LAVEA‟I”

FEPUARI: “TATALA MAI LE FAITOTOA” 14 Tatala o tatou loto mo le Alii” Fa‟aaliga 3:20 – 22

21 O le ala i le malo o le Atua Mataio 5:1 - 12

28 Matou te auauna i le Atua Soifua Iosua 24: 14 – 17

MATI: “FAALOGO I LE FETALAI MAI O LE ATUA”

6 O le taua o le poto Faataoto 5: 1 – 9

13 E faatauvaa mea uma Failauga 6: 7 – 9

20 Faamaoni ma le loto lelei Luka 8: 9 – 15

27 O upu e a‟oa‟o mai e le Agaga Paia 1 Korinito 2: 6-13

APERILA: “O LE ATUA NA TE FAAFOUINA”

3 E faia e le Atua mea fou Numera 16: 28 – 35

10 O le feagaiga fou Ieremia 31: 31 – 34

17 O le Aoga o le Tusi Paia 2 Timoteo 3: 14 – 17

24 O le manuia o Iopu Iopu 42: 12 - 15

ME: “E FAATUPU FAAMOEMOE LE MAUTINOA”

1 Ua pupula le tauaso faatuatua Luka 18: 35 – 43

8 O le tinā poto sa ia lavea‟iina 2 Samuelu 20:4 – 22(Faiaoga)

lona nuu 2 Samuelu 20:14-22 (Vasega)

15 Malologa Fono Tele

22 Tumau faamaoni i le Atua Ioane 20: 24 – 29

29 Toe fanau faa-le-agaga iā Iesu Galuega 9: 1 – 18


2

IUNI: “UA I LUMA LE ALA MO TAGATA UMA”

5 Ia amanaia tutusa tagata uma 1 Samuelu 30: 9 – 19

12 Faatali pea le Atua mo oe Luka 15: 17 – 24

19 O le alofa, na faamalosia le tinā o Mose Esoto 1: 22- 2: 10 (Faiaoga)

Esoto 2: 1 – 10 (Vasega)

26 Ofo mai e Iesu Ia mo tatou Ioane 10: 11 – 18

IULAI: “MALAGA FAATASI MA LE ATUA I TAIMI UMA”

2 Fasiotia Aapo le Tupu 1 Tupu 22: 1 – 38 (Faiaoga) 1 Tupu 22:15-17; 29-38 (Vasega)

9 O Iesu o lo tatou ala i le Atua Ioane 14: 1 – 7

16 O le tofotofoina o Iopu Iopu 1: 13 – 22

23 Faamalolo e Iesu le tauaso Ioane 9: 1 – 12

30 Ia mataala e le aunoa Luka 21: 34 - 38

AUKUSO: “AUAUNAGA MO LE ATUA”

7 Ia ola Fesoasoani Iosua 2:1-7

14 O le leoleo mamoe lelei Ioane 10: 1-6

21 Tautino le mea moni Ruta 1:1-17

28 O le fafine aiū Ioane 4:7-15

SETEMA & OKETOPA: “FAATINO FAATAITAIGA LELEI”

4 Ia ola felagolagomai Ioane 21:1-14

11 „Aua le ola faapito Luka 12: 13-21

18 Faalogo i le Atua i so o se taimi Faataoto 1; 20 – 30

25 O le mea e te fuaina atu e toe fuaina mai Galuega 5:1-11

OKETOPA

23 O le tatalo a le ao lafoga Luka 18: 9-14

30 Falepuipui ae leai se agasala Kenese 39: 11-23


3

NOVEMA: “IA TAUSI LE NOFOLELEI MA ISI TAGATA”

6 Aua le faaseseina i le malosi o le oa Luka 16:19-31

13 Taui atu le leaga i le lelei 2 Samuelu 19:16-24

20 O le faamasinoga poto a Solomona 1 Tupu 3:16-28

27 O Iesu le taulaga ola Roma 5:6-11

TESEMA: “UA TATALA MEASINA A LE LAGI”

4: O le manuia ua folafola mai Isaia 9:1 - 7

11: Ua taunuu valoaga Mataio 2:1-7


4

MANATU TAIALA O FEPUARI:

“TATALA MAI LE FAITOTOA”

Ua tatou toe aulia mai foi lenei tausaga ma ua toe faagasolo galuega

faa-Aoga Aso Sa mo lenei tausaga 2016. E viia ai le alofa ma le

agalelei o le Atua i lana tausiga i lo tatou ola. O le tele o le tamaoaiga

faaleagaga ua tatou maua mai i ana Afioga Paia, o le a‟oa‟i mai lava lea

o le Atua mo i tatou ma ua lavea‟iina mai ai o tatou tagata mai le tele o

faafitauli e tutupu mai pea. Ia tatou faalogo pea ma usita‟i i le fetalai

mai o le Atua, ma tatala o tatou loto mo ia, le o faalagolago i ai le

manuia o galuega o lenei foi tausaga.

ASO SA: 14 FEPUARI 2016

MATAUPU: TATALA O TATOU LOTO MO LE ALII

SINI: Ia a‟oa‟o tamaiti, o le faaulufale o Iesu i o tatou

loto, e manuia ai le ola taumafai ma le ola tauivi

mo so o se faamoemoe mo le lumanai manuia.

TUSI FAITAU: Fa‟aaliga 3: 20 – 22

Tala puupuu mo tamaiti:

I totonu o Aferika i Saute, sa i ai se tasi aai e tu ai le lotu, ma na o tagata

papae (palagi) e faataga ona lolotu ai, taimi lea o le malosi o le faailoga

lanu i totonu o Aferika. Ua oo i se tasi Aso Sa, ua ala usu se tasi

toeaina meauli e sauni mo le lotu. Ua ta mai le logo amata, ona tamoe

lea o le toeaina e tuliloa le amataga o le lotu, e taunuu atu si toeaina

meauli, ua tapuni uma faitotoa o le falesa. Ua fiu si toeaina e tu‟itu‟i le

faitotoa o le falesa, ae leai se tasi e tatala mai mo ia, ona punou lea o le

toeaina ma toe foi i lona fale ma le faanoanoa tele. Ua te‟i le toeaina

ina ua pa‟i atu le tagata i lona tauau, ma fesili “Se a le mea e te


5

faaanoanoa ai?” Ua tali le toeaina “E lē mafai ona ou alu i totonu o le

falesa e tapuai i lou Alii, e faasā a‟u, na o tagata papae e faataga, o le

mea lena ua ou faanoanoa ai”. Ua faateia le toeaina ina ua faapea atu le

tagata:, “Se a le aogā o lena tapuaiga pe a ou le i ai, ta o, ta talisua

faatasi ma oe i lo‟u fale.” Tamaiti o Iesu lava lea na fetalai i le toeaina

meauli.

FESOASOANI MO FAIAOGA:

(1) “Ou te tu i le puipui ma tu‟itu‟i atu”

O se vaaiga uiga ese lenei o le tu o le Faaola i fafo ma tu‟itu‟i atu i le

puipui, po o le faitotoa. O le faailoga o le mana‟o o Iesu e ulufale atu i

le loto o le tagata. E tele lava ina naunau o tatou loto i mea o le lalolagi

nei ma oo ai lava ina galo le Alii ia i tatou. Ae a fetaiai ma faafitauli ma

puapuaga, ona faatoa manatua lea o Iesu. E mana‟o Iesu e ulufale ma

nofo tumau i lou loto, ae fua lea i lou tatala mai o le faitotoa. E lē

faamalosia le ulufale atu o le Alii, sei vagana ua talia atoatoa e le tagata

o Ia. A o le ulufale o Keriso i lou loto, e avea ai o ia ma tapasa o lou

ola, ma i‟u ai i le manuia.

(2) “Ma te nonofo faatasi ma au i lou nofoalii”

O le taunuuga lea e oo i le tagata e talia Iesu i lona loto. E ulufale i le

olioli moni i le malo o Keriso. O le upu moni, o le tagata ua i ai Iesu i

lona loto, e manuia mea na te faia.

- E lelei ana galuega

- E toamalie lona aiga

- E nofo fealofani tagata o lona nuu

- E faasoa atu lona alofa

Ae a tu‟u mai iā te i tatou tamaiti, o lou talia o Iesu Keriso i lou loto,

- E i‟u manuia lau aoga

- E faafiafiaina ou matua

- E te manatua ai pea le tulafono e 5

- E faaeaina lou aiga, lou nuu, atunuu ma lau Ekalesia ia te oe.

GALUEGA FAATINO: Vaevae le vasega i vaega e lua


6

Vaega 1 Vaega 2

Lisi mai ni mea lelei e iloa ai ua Lisi mai ni amioga e iloa ai, e

talia e le tagata Iesu I lona loto. le‟i talia e le tagata Iesu i lona

loto (Amio lē lelei)

1. 1.

2. 2.

3. 3.

4. 4.

5. 5.

Ta‟ita‟i o vaega – tau i le vasega mea lelei, ma mea lē lelei.

Faiaoga – O lau susuga e ta aofai ai le atoaga o le galuega faatino a le

fanau.

PESE: “Faauta, faauta ou te tu i le faitotoa…”

A‟OA‟OGA:

1. Talia Iesu i lou loto

2. E mana‟o Iesu iā te oe

3. Faasoa atu lou alofa mo isi.

…………………………


MATAUPU: O LE ALA I LE MALO O LE ATUA

SINI: Ia a‟oa‟oina tamaiti, o le lauga a Iesu lea e taua i

le Tusi Faitau, o le ala moni lea e ao ona savavali

ai mo le malo o le Atua.

TUSI FAITAU: Mataio 5: 1 - 12

Tala mo tamaiti


7

A o savavali Iesu ma se tasi taulealea i luga o le matafaga na faateia le

taulealea i le vaai atu, e i ai taimi e vaai atu ai, ua na o le tasi le tulaga

vae o le tagata i luga o le oneone. Ua mafaufau le taulealea pe mafua i

se a. Ona fesili lea o le alii iā Iesu. “Se faamolemole lava Iesu, o lea ou

te vaai atu, e i ai taimi e tasi ai le tulaga vae, i luga o le oneone, pe

aisea?” Ua tali Iesu “Vaai oe atalii, e sa‟o oe, o lona mafuaaga, e i ai

taimi e te vaivai ai, ona ou sii lea o oe i luga ma ave i ou lima.”


E i ai le manatu o le lauga lenei a Iesu i luga o le mauga o le fatu lea o

lana galuega tala‟i. O lea ua faailoa mai e Iesu le ata o le ola e ao ona

olaina e le tagata Kerisiano, e mafai ai ona faatumuina i latou i le fiafia

moni ma maua ai le ola e faavavau. I lo tatou ola faaletino nei, e faigata

ona tatou savavali i ala ua faasino mai e Iesu, auā e faigatā ona tatou

talia le ola toilalo, e taliagatā foi le ola mativa.

O le mativa i le agaga, e pei ona taua e le fuaiupu 3, e lē o le mativa i le

Agaga o le Atua, ae o le lē naunau o le loto po o le agaga o le tagata i

mea o le lalolagi nei (tamaoaiga, mamalu, faamaualuga, alofa faapito

ma le tele o isi mea faapena). Aua nei faataua e le tagata mea nei, ae ia

oa i le alofa o le Atua. E i ai taimi tatou te faanoanoa ai, ma ua le

amanaiaina i tatou, tuulafoaiina, vaai maualalo mai ai nisi, agaleagaina

ma upuesea. Lea ua fetalai Iesu aua le faanoanoa, e faamafanafana le

Atua, auā e le galo i tatou iā te ia. O le agamalu, naunau i le amiotonu,

alofa, loto mama, ma faatupuina le filemu. O ala ia e faaeaina ai le

tagata. E lē faapea na o le malo o le Atua i le lagi, e oo lava i lo tatou

ola i le taimi nei, o mea ia e maua ai le ola tauleleia. A e agamalu, e te

loto faamagalo; a fai mea tonu e amanaia oe e tagata; a alofa e faaolaina

se ua mafatia; a loto mamā e lelei galuega e te faia; a faatupuina le

filemu e maua le nofo fealofani.

O le mea lea ua faa-amuia ai Iesu i le tagata e ola i le ola lea. Auā e lē

gata ina ola i le malo o le Atua, ae manuia foi lona ola i le tino nei. Le

manuia lea ma le filemu o le Atua, e leoleoina ai le ola o le tagata.


8

GALUEGA FAATINO: (Galuega e fai i le fale)

i) Manaia pe a faatonu le vasega e a‟o faatauloto le lauga lenei a

Iesu 1 – 12

ii) A oo i le Aso Sa e soso‟o ai, ona tauloto faatasi mai lea po o ua

maua.

A‟OA‟OGA:

1. Savavali i ala o le Alii.

2. O lo o silasila mai le Atua i o tatou ala.

3. O le ola i le taimi nei, e filifili ai tatou e le Atua.

………………………….


MATAUPU: MATOU TE AUAUNA I LE ATUA SOIFUA

SINI: Ia a‟oa‟o tamaiti, ina ia „aua nei faasiliina se isi

mea i le Atua. Auauna ma le faamaoni i le Atua.

TUSI FAITAU: Iosua 24: 14 – 17


“O upu taumavae a Iosua”

Ua lata ina oti le taitai au o Iosua, ona ia faamafanafana atu ai lea i le

nuu o Isaraelu. Ae o le mea o lo o mamafa i le loto o le taitai „au, o le

ifo i tupua o le nuu, ua lē faamaoni le nuu i le Atua. Ua auauna ma

tapuai le nuu i atua o Kanana, ae ua faagalo le Atua na latou osi

feagaiga. Lea ua tau atu e Iosua, ia latou matata‟u i le Alii, ma auauna

ia te ia ma le loto sa‟o ma le faamaoni. Ia tu‟u ese atua o nuu ese, auā e

le‟i faaolaina i latou e ia atua mamate. O le faatauanau a le ta‟ita‟i au

ina ia toe faafouina le feagaiga a Isaraelu ma le Atua ae le‟i oti. Auā a


9

fua i le alofa o le Atua na faasa‟olotoina mai ai latou mai Aikupito, le

alofa na leoleoina ai latou mai le 40 tausaga i totonu o faigata, e lē

mafai e se isi lava atua ona faia ia mea. O le mana‟o o Iosua ina ia toe

manatua e Isaraelu le alofa lea o le Atua, ma „aua nei auauna i atua ese.

Auā afai e lē matatau ma le auauna i le Atua, ona liliu ese ai lea o le

alofa o le Atua ona tigaina ai lea o i latou. Auā o le Atua e faamaoni

lava lona alofa.

O Iosua, o le tagata e tumau lona loto i le Atua, auā o le Atua na foa‟i

mai iā te ia le malosi ma le ola e ta‟ita‟iina ai lona nuu. Lea ua tautino e

Iosua, afai latou te lē mananao i le Atua, ia filifili o latou loto “A o au

ma lo‟u aiga, matou te auauna i le Atua Soifua.” Ona salamō ai lea o le

nuu, ma latou filifili e auauna i le Atua.

GALUEGA FAATINO:

Vaevae le vasega i vaega e tolu:-

Vaega muamua - Aiga

Vaega lona lua - Aoga

Vaega lona tolu - Lotu

Fesili:-

1. Ta‟u mai ni galuega e tatau ona galue ai ma le faamaoni, e avea ai

oe ma auauna lelei mo le aiga, aoga ma le lotu.

2. Ta‟i lima galuega mo vaega taitasi.

* Faaiu le galuega faatino a le vasega, i le saunoa a lau susuga i le

faiaoga, e fa‟aatoatoa ai le mataupu.

A‟OA‟OGA:

1. Galue ma le faamaoni.

2. Filifili e auauna mo le Atua.


10

3. O i tatou o auauna filifilia a le Atua.

………………………………

MANATU TAIALA O MATI:

“FAALOGO I LE FETALAI MAI O LE ATUA”

“Ai se tasi e faalogo i lou leo”. O le a ea le mafuaaga ua lē mafai ai e le

tagata ona lagonaina le valaau mai o le Alii? Ua tele leo eseese ua

lagonaina i nei ona po. O leo ua faigofie ona tosina ai le loto o le

tagata, o faafiafiaga faaona po nei, leo o suiga eseese ua lolofi mai (new

technology), leo o le tuinanau vale tau le lalolagi (worldly desires) ma

le tele o mea o le olaga nei ua gaoia ai le loto o le tagata. O mea ia ua

punitia ai le faalogo ma le usita‟i ai i le fetalai mai o le Atua, o le

manuia sili lea mo le tagata e tumau e oo i le faavavau.

………………………………

ASO SA: 6 MATI 2016

MATAUPU: O LE TAUA O LE POTO

SINI: Ia a‟oa‟oina tamaiti i le tulagaese o le taua o le

poto ma le ola a‟oa‟oina.

TUSI FAITAU: Faataoto 5: 1 – 9


Manaia pe a amata le Vasega i le Fesili mo tamaiti “O le ā le taua o le

poto?” Faamatala le Mataupu:


11

O le vaega lenei o le tusi a Faataoto, o lo o faalauiloa ai e Solomona le

ituaiga poto lea e manao matua ina ia maua e le fanau. O le amio lelei

(discipline) amiotonu (righteousness) mafaufau lelei (good knowledge)

ma le usita‟i (obedience). O le poto lea o lo o manao matua ina ia ola ai

le fanau i aso uma, i totonu o aiga, aoga ma le nuu, e tauleleia ai e

tagata. E taua le poto o lo o a‟oa‟oina ai i potu aoga, ae a maua le poto

lea o lo o tautala ai Solomona, ona fua mai lea o galuega a le fanau i le

lumanai i fua lelei. O ā fua lelei e fua mai ai le fanau?

- Faamaoni

- Usita‟i (matua/faiaoga)

- Ava i matua

- Loto maualalo

- Loto alofa

- Loto fesoasoani

- Toaga i le aoga

- Fiafia i le lotu (Aoga Aso Sa)

E faapefea ona maua le poto taua lea? “O le mata‟u i le Atua o le

amataga lea o le Poto”. Fai mai foi le upu a Solomona. “O le tama

poto e fiafia ai le tamā, a o le tama valea e faanoanoa ai le tinā. E lē

faapea o le valea i le aoga, a o le valea ina ua le maua le poto lea o lo o

tautala ai le tusi a faataoto.

Tamaiti, ia faalogo ma usita‟i i matua, ona maua ai lea o le poto lelei.

„Tauloto faatasi le tulafono e 5, e faauma ai le mataupu.

GALUEGA FAATINO:

Tusigatala: Ulutala “E taua le Poto” (Lua parakarafa o le tala – 10

togi)

PESE: Iesu e, ua ou valea


12

A‟OA‟OGA:

1. Tulafono e lima

2. O le poto sili e foa‟i mai e le Atua.

………………………………..

ASO SA: 13 MATI 2016

MATAUPU: E FAATAUVAA MEA UMA

SINI: Ia a‟oa‟oina tamaiti ia talia mea ua foa‟iina mai e

le Atua, ae lē o le manao tele.

TUSI FAITAU: Failauga 6: 7 – 9


“E faatauvaa mea uma” O le manatu autu lea o le tusi lenei o Failauga.

E galue le tagata ina ia faamalieina lona mana‟o, ae manatu le Failauga,

po o le a lava le tele o mea e maua e le tagata, e lē mafai lava ona

faamalieina lona mana‟o. E lelei le tamaoaiga, a o lona faaletonu, e

faatupulaia ai le mana‟o tele, e lē leaga le mativa, auā e le popole vale

lona loto. A o le mauoa ma le mativa, e taunuu uma lava i le oti “Ona

tuua ai lea o mea uma.” O le mea lea, ua manatu ai le Failauga, e

faatauvaa mea uma.

A fua i tusitusiga a le Failauga, e foliga mai e faatauvaa mea uma na

foafoa e le Atua, e leai sona aoga. Tamaiti e lē o le mea lea o lo o

taumafai Solomona e tau mai. „Aua le taumafai e saili tele le oa, po o

mea matagofie o le lalolagi nei, auā foi e le tumau, ma e le faamalieina

ai le loto. Ae a maua foi le tamaoaiga ma le poto, ae leai se faautauta, e

leai sona aogā ma e maimau ai ma le ola.


13

„Aua le maumauina le taimi e saili solo ai mea e taufaamalie ai le

mana‟o. O le Atua e tumau lona alofa, ma e sili i so o se isi lava mea e

matagofie i le vaai. A maua e le tagata le Atua ma tumau i lona

finagalo, ona faamalieina lea o ia i mea ua foa‟i mai e le Atua mo lona

ola.

GALUEGA FAATINO:

Lua vaega e vaevaeina ai le vasega.

Vaega 1 - lisi mai ni mea taua se lima e moomia mo le ola o

le tagata. (faata‟ita‟iga - laau)

Vaega 2 - lisi mai ni mea se lima e manao ai le tagata

(faata‟ita‟iga - televise)

Vaega Mulimuli Galuega Faatino

Suesuega i le Tusi Paia:-

Vaega Muamua – Feagaiga Tuai:-

O a ni mea taua ua mana‟o le Atua ina ia fai e Isaraelu, e ola manuia ai?

Vaega Lua - Feagaiga Fou:-

O a auala taua, e ola ai le tagata Kerisiano e sao atu ai le malo o le Atua.

A‟OA‟OGA:

1. E leaga le mana‟o tele.

2. Fa‟aaogā tatau meaalofa ua foa‟i mai e le Atua.

……………………….


MATAUPU: FAAMAONI MA LE LOTO LELEI


14

SINI: Ia malamalama tamaiti o le lelei ma le manuia o

so o se faamoemoe e faalagolago i le galue

faamaoni ma le loto tele.

TUSI FAITAU: Luka 8: 9 – 15


O le faataoto lenei i le lulu saito o lo o a‟oa‟o ai Iesu i ona so‟o. I le

faataoto lenei, o lo o aumai ai ituaiga eleele na luluina ai e Iesu fatu

saito. O ituaiga eleele ia o le faatusaina i le loto o le tagata.

(1) Papa:- O lo o faatusaina i le loto maaa o le tagata, e latou te talia

le upu a le Atua ae lē tumau. “E leai ni o latou aa.” A oo i le

taimi e faaosoosoina ai latou, ona o ese lea mai le Atua.

(2) Vao tuitui:- Loto femoumoua‟i, o i latou ia e talia foi le upu, ae o

lo o popole o latou loto i le tamaoaiga ma mea faafiafia o le

lalolagi nei. E lē tumau foi i le Atua.

(3) Eleele lelei:- O le tagata ua talitonu ma faatuatua faamaoni i le

Atua. Le loto lelei, e ola tauivi, taumafai ma finau, e onosa‟i. O i

latou ia e faalogo ma talia le Upu a le Atua. O le talia e le tagata

o Iesu, e galue ai ma le faamaoni ma le loto lelei, ma fua mai ai

lea o ana galuega i fua lelei.

Uiga o Upu:

i) maaa - a faigata ona talepe, malo (fia faalii)

ii) vao tuitui - vao leaga

iii) faataoto - tala faatusa

iv) femoumoua‟i - le tumau (feosofai solo)

v) tamaoaiga - tele mea (mauoloa)


15

GALUEGA FAATINO:

Faafeso‟otaiga o upu/fuaiupu ma o latou uiga (Matching) Vase le upu i

lona uiga

(a) Papa - Loto femoumoua‟i

(e) Eleele lelei - tagata agasala

(i) Vao tuitui - faamaoni ma faalagolago i le Atua

(o) Lulu saito - Loto lelei

(u) Faatuatua - Loto maaa

A‟OA‟OGA:

1. Tumau i le Atua

2. Faamaoni i le Atua

3. Faalogo ma usita‟i i matua.

………………………….


MATAUPU: O UPU E A‟OA‟O MAI E LE AGAGA PAIA

SINI: Ia a‟oa‟oina tamaiti, e i ai le taimi e gata ai le poto

o le tagata, a o le poto faaleagaga o le Atua e tumau

e oo i le faavavau.

TUSI FAITAU: 1 Korinito 2: 6 – 13


“O le Poto o le Atua”

O upu e a‟oa‟o mai e le Agaga Paia, o le poto sili lea pe a maua e le

tagata. A talia ma talitonu i ai, ona faaolaina lea o ia. O le mea tonu lea


16

o lo o taumafai le Aposetolo o Paulo, e tau atu i le Ekalesia i Korinito e

ala i le vaega lenei o lana tusi. E le faapea ua lē faatauaina e Paulo le

poto faalelalolagi nei o le tagata. A o le manatu o le aposetolo, o le

poto lea, e i ai le taimi e muta ma gata ai, e mavae ma mou atu. E i ai le

taimi tatou te lē malamalama ai i le faagasologa o nisi o mea o le olaga

nei. E oo lava i mea o le natura, a fesili faalēmafaufau lava i tagata ua

maoae lo latou poto faalelalolagi, ua avea ma saienisi (scientists). Ua lē

talitonu i le Atua. Ua taumafai e saili, po o le a le mafuaaga na maua ai

le lalolagi, po o ai na faia le tagata, a o le a foi le tupuaga o le tagata?

(Darwin‟s Evolution). O le mea moni, e oo mai lava i le taimi nei, e le‟i

maua lava se tali. O le isi itu, a oo ina matua le tagata, ona amata lea

ona galogalo mea i lona mafaufau.

Lea ua ta‟u mai e Paulo le poto lilo o le Atua, e le oo i ai le malamalama

o le tagata. Le poto lea o le Atua na ia faia ai le lagi ma le lalolagi atoa

ma le tagata. Le poto lea o le Atua ana maua e ta‟ita‟i o Iutaia latou te

lē faasatauroina Iesu, lea o lo o molimau ai le Aposetolo. “Ana latou

iloa,” upu a le Aposetolo o lo o faasino i le Atua. A na maua e tagata

Iutaia le poto o le Atua ma a‟oa‟oina ai i latou, semanū ua talitonu ma

faatuatua iā Iesu Keriso.

Le poto o le Atua na ia faaolaina ai le lalolagi e ala iā Iesu Keriso. Le

poto na maua e le Aposetolo ina ua taia e le malamalama o Keriso, ma o

lea foi ua a‟oa‟oina ai o ia, ua ia talia ma faatuatua ai i le Atua.

GALUEGA FAATINO:

Suesuega i le Tusi Paia

1) Vaevae le vasega i ni vaega se lua (1, 2)

2) Faatalatalanoa i vaega taitasi, se (science fair) na latou faia, ona

galulue ai lea a maea ona faatusatusa lea i le tala o le foafoaga

(Kenese 1) pe i ai sona feso‟otaiga ma a latou galuega

(Fesoasoani mo faiaoga)

A‟OA‟OGA:


17

1. O le matau i le Atua o le amataga lea o le poto.

2. E a‟oa‟o mai le Atua i mea lelei.

3. O Iesu le faiaoga sili.

………………………………

MANATU TAIALA O APERILA:

“O LE ATUA NA TE FAAFOUINA”

“Le Alii e, ia e faia se loto fou mo au”. O le mafutaga a le Atua ma le

nuu o Isaraelu, o le ata vaaia lava lea o Keriso ma le tagata. O le upu

moni, e le faigofie ona toe liliu ese mai ai le tagata i mea sa masani ai

lona ola. E le faapea ua manao Iesu e alu ese mai le tagata mai mea ua

masani ai lona ola. Afai ua masani le tagata e fai mea lelei ma faatino

le alofa, ia tumau ai ma le faamaoni. Ae afai o ola le tagata i le agasala

ma ua fiafia ai lona loto, le ola lea o lo o manao Iesu e alu ese mai ai le

tagata. A faafouina le loto iā Keriso, e fou atoa le ola o le tagata ua

toilalo ona o le agasala.

………………………………

ASO SA: 3 APERILA 2016

MATAUPU: E FAIA E LE ATUA MEA FOU

SINI: Ia a‟oa‟o tamaiti o nisi o faafitauli e tutupu mai i

le ola, e mafai ona a‟oa‟iina ai le tagata ina ia

„aua nei toe faia le mea sese.

TUSI FAITAU: Numera 16: 28 – 35


18


E tele faafitauli na feagai ma Mose, ina ua filifilia o ia e le Atua e taitai

lona nuu. O faafitauli, e tutupu mai lava i tagata Isaraelu. O le muimui

ma le faasea soo iā Mose, pe a oo ina tutupu faigata i lo latou ola. Lea

ua oo lava ina fouvale Koru i le ta‟ita‟iga a Mose. O le mataupu e 16, o

lo o faamatalaina mai ai le fouvale o Koru, Tatano ma Apiramo, o nisi o

taitai o le ituaiga o Levi ma Reupena. Ua fai atu Koru ia Mose, o i

latou foi o ta‟ita‟i ua filifilia, ma e paia foi i latou. E le nā o le ta‟ita‟i o

ituaiga ua tofia i ai latou, ae ao foi ona ta‟ita‟i i le nuu atoa, pei o la‟ua

(Mose ma Arona). Ona vavae ai lea e Mose o le nuu, o tagata ua tumau

i le ta‟ita‟iga a Mose, ma e ua filifili e o iā Koru. O le mea ua galo iā

Koru ma lana faapotopotoga, o le latou fouvale iā Mose, o lo latou

fouvale lava lea i le Atua, auā foi o le Atua na ia filifilia Mose. Ona fai

lea o Mose iā Koru, ia potopoto le nuu uma atoa ma lana vaega (Koru) e

molimau i le finagalo o le Atua. Afai e oo taeao, ae oti le tagata e pei

ona masani ai, e pei o le ma‟i, ua matua, ma faafitauli masani, ona iloa

ai lea e le‟i valaauina Mose e le Atua. Ae afai e oti le tagata ona o se

mea fou ua faia e le Atua, ona iloa ai lea o Mose na valaauina e le Atua.

Tamaiti, o le mea fou na tupu, fai mai ua faamaga le eleele (vaeluaina le

eleele) ma pauu ai Koru ma lana vaega ma ua tanumia, ina ua tapuni le

eleele ma feoti ai. E lē lelei le ola loto leaga. O le mea lea na mafua ai

ona lē fiafia Koru ia Mose, o le avea ma ta‟ita‟i o le nuu. Ae ia

malamalama le tagata, o le a lava le galuega ua galue ai o lona

valaauina lava lea e le Atua. E lē faapea e faia e le Atua mea fou ina ia

oti ai le tagata, ae ia fai ma mea e a‟oaiga ai le tagata ina ia alu „ese ai

mai le agasala.

GALUEGA FAATINO:

TUSIGATALA:


19

Tu‟u le avanoa i tamaiti e tusi mai ai se tala, e faamatalaina ai, po o le a

le galuega e mana‟o e galue ai i le lumanai. (Faataitaiga:- foma‟i,

faiaoga etc) 2 parakalafa o le tala (10 togi)

A‟OA‟OGA:

1. Ia fai ma le loto lelei galuega.

2. „Aua le ola taulamalama

3. Talia lou valaauina (avea ma tamaitiiti aoga)

………………………………


MATAUPU: O LE FEAGAIGA FOU

SINI: Ia malamalama tamaiti o Iesu Keriso o le

Feagaiga Fou lea a le Atua, na mafua ai ona toe

mafuta le tagata ma le Atua.

TUSI FAITAU: Ieremia 31: 31 – 34


I le Feagaiga Tuai o lo o aumai ai le tala i le faagasologa o le mafutaga

a le Atua ma lona nuu o Isaraelu. A o le mafutaga e fua i le feagaiga na

osia i le mauga o Horepa. E fai oe ma ou nuu, fai au ma o outou Atua.”

Le feagaiga lea ua tau atu e le Perofeta o Ieremia i le nuu o Isaraelu, o le

a faafou e le Atua. O le Feagaiga Fou lea o le a osia e le Atua ma le

tagata, e le tutusa ma le feagaiga ma Isaraelu. Auā ua solia e le nuu le

feagaiga, ua tele ina ua latou o ese so‟o ma le Atua. O le faagasologa la

o le Feagaiga Fou, e pei ona fetalai mai ai le Atua ia Ieremia.

(i) E osia pe a mavae ia aso.

(ii) E tu‟uina i totonu i latou.


20

(iii) E tusia i o latou loto.

(iv) E lē toe a‟oa‟o atu le tagata i lona tuaoi ma lona uso (Ia outou iloa

le Alii)

(v) E iloa au e i latou uma lava.

(vi) Ou te faamagalo iā latou amio leaga.

(vii) Ou te lē toe manatua a latou agasala.

Upu o le Feagaiga Fou, lea e foliga mai e faatatau iā Iesu Keriso. Le

feagaiga e le gata ina toe faafou ai le mafutaga a le Atua ma le tagata, ae

ua faafou ai foi ma le ola. “A o se ua iā Keriso o le tagata fou ia, faauta

ua mavae le ola tuai, ua oo mai le ola fou.”

O Isaraelu o le feagaiga lea a le Atua ua lē mafai ona faataunuu lona

finagalo, lea na fetalai ai le Atua ia Aperaamo, “E manuia nuu uma o le

lalolagi i lau fanau”

O Iesu Keriso, le Feaigaga Fou a le Atua, na atoatoa ona Ia faataunuu le

finagalo o le Atua, na oo lava i le oti.

GALUEGA FAATINO:

Tulafono 10: (Feagaiga Tuai)

(i) Faatonu tamaiti e tauloto mai tulafono e sefulu. A lē mafai ona

tusi lea e lau susuga i le faiaoga o tulafono ma ave i tamaiti e a‟o

(Esoto 20)

(ii) Tulafono Auro (Feagaiga Fou)

Ta‟u i tamaiti le tulafono auro – “Ia e alofa atu i lou Atua ma lou

loto atoa, agaga atoa, ma lou malosi atoa ……”

A‟OA‟OGA:

1. O i tatou o le Feagaiga Fou a le Atua.

2. E faafouina oe e le Atua.

……………………………..


21


MATAUPU: O LE AOGA O LE TUSI PAIA

SINI: Ia a‟oa‟oina tamaiti i le taua o le ola su‟esu‟e ma

faitau le Tusi Paia e maua ai le poto sili mai le

Alii.

TUSI FAITAU: 2 Timoteo 3: 14 – 17


O le tusi lenei a le Aposetolo o Paulo na tusia a o i ai i totonu o le fale

puipui. O le tusi e apoapoa‟i ai ma faamalosi au i lona atalii faale-

Agaga o Timoteo a o galue ai i le Ekalesia i Efeso.

Ua silafia lelei e le Aposetolo le tulaga ua i ai le Ekalesia i Efeso, i le

tele o a‟oa‟oga fou ma a‟oa‟oga sese. O nei a‟oa‟oga e ono suia ai le

manatu o Timoteo ma ia lafoa‟i ai lona faatuatua iā Iesu Keriso. Lea ua

tusi atu Paulo ia Timoteo, ia tumau lona faatuatua iā Iesu ma ia manatua

taimi o lona tamaitiiti, ma a‟oa‟oga na a‟oa‟oina ai o ia i le Tusi Paia.

O le avea ai o Timoteo ma Kerisiano e le‟i mafua ona o ni lauga po o ni

a‟oa‟oga ma isi tagata. O Timoteo, mai lava i lona laitiiti, sa faavae

lona ola i le Tusi Paia.

Lea ua faamanatu Paulo iā Timoteo, o a‟oa‟oga a le Tusi Paia, amata

mai lava i le Feagaiga Tuai, o a‟oa‟oga e agai uma lava iā Iesu Keriso.

E lē o se tusi na tusia i se loto o se tagata, a o le Agaga Paia o le Atua.

O le tusi o lo o faamatalaina ai le moni o le alofa faapalepale o le Atua.

O lo o faailoa ai le faamaoni o le Atua, upu o le ola, e aumai ai le poto

sili mo le tagata e iloa ai lona tulaga ma le Atua, ma lona auala i le

faaolataga, tumau i le faatuatua.

Ia tumau Timoteo i le ola faapaiaina, ma le fiafia e tala‟i atu le upu

moni mai le upu. “O Tusi Paia uma lava, e mai le Agaga o le Atua ia,

e aoa‟i, e faatonu ai, e faapoto ai foi i le amiotonu.”

O le mea tonu ia iloa e le tagata, o le Tusi Paia, e a‟oa‟o mai, ina ia iloa

e le tagata ona fai le mea lelei.


22

GALUEGA FAATINO: Finauga (Debate)

Manatu Autu: “E aoga le Tusi Paia”

PESE: Faitau le Tusi Paia ma tatalo i aso uma

A‟OA‟OGA:

1. E aogā upu o lo o a‟oa‟o mai ai le Tusi Paia.

2. Toaga e faitau le Tusi Paia.

…………………….


MATAUPU: O LE MANUIA O IOPU

SINI: Ia a‟oa‟o tamaiti ina ia malamalama, o le ola

faamaoni ma le tutumau i le Atua, e sili ona

manuia.

TUSI FAITAU: Iopu 42: 12 – 15


Ua tatou malamalama i le tala ia Iopu:-

O le tagata onosai: Ae na oo puapuaga ia Iopu, ma aveeseina ai lona

tamaoaiga e oo lava i lana fanau, na feoti uma. Na faifai ai ana uo iā te

ia. O lona toalua foi sa mana‟o e faifai Iopu i le Atua.

O le tagata faatuatua: O le vaega la o le tusi na tatou faitauina, ua toe

liligi mai e le Atua faamanuiaga sili atu iā Iopu. Fai mai ua faaluaina

mai mea sa i ai muamua iā Iopu. Faata‟ita‟iga:- Afai e 1,000 mamoe sa


23

i ai muamua ia Iopu, ina ua faamanuia le Alii, ua maua e Iopu le 2,000 o

mamoe. Afai e 2,000 oti sa iā Iopu, o lona uiga ua 4,000.

Sa toe maua foi le fanau a Iopu, fai mai le tala, e leai lava se isi fanau i

totonu o le nuu e tutusa le lalelei ma le malolosi e pei o le fanau a Iopu.

Le manuia lea e maua e le fanau pe a fai e faamaoni ma tumau matua i

le Atua. E oo lava i le ola o Iopu, na tului e le Atua. E oti Iopu ua 140

ona tausaga.

Uiga o Upu:

i) faifai - fai upu leaga

ii) liligi - aumai/faatafe ifo

iii) tului - faateleina

GALUEGA FAATINO:

Tali Fesili

1. O le a le ma‟i na ma‟i ai Iopu?

Tali: O le ma‟i papala.

2. O le a le upu e faatusa ai Iopu?

Tali: O le onosa‟i.

3. E alofa le Atua ia Iopu?

Tali: Ioe.

4. Na ita Iopu i le Atua?

Tali: Leai.

5. O le a le manuia na toe maua mai e Iopu mai le Atua?

Tali: Faateleina lona tamaoaiga nai lo le mea sa i ai muamua, ma saga

faamausali atili ai lona faatuatua i le Atua.


24

A‟OA‟OGA:

1. E le tu‟ulafoa‟iina i tatou e le Atua i taimi o puapuaga.

2. „Aua nei faifai le tagata i le Atua.

…………………………

MANATU TAIALA O ME:

E FAATUPU FAAMOEMOE LE MAUTINOA

O le tusi fesili a tamaiti o lo o faapea mai; “O le faatuatua, o le

faamoemoe lea i le mea e lē o vaaia.” Tatou te lē vaaia le Atua, ae o lo

tatou faatuatua, po o lo tatou faamoemoe iā te Ia, e mafua mai ina ua

tatou mautinoa, ma talitonuina atoatoa i o tatou loto; “O le Atua, o le

pule aoao o mea uma, o lona alofa tunoa foi, e tumau ma tausi mai e lē

aunoa i tagata uma lava.

ASO SA: 1 ME 2016

MATAUPU: UA PUPULA LE TAUASO FAATUATUA

SINI: Ia a‟oa‟o tamaiti ia latou iloa, o le tauaso sa

faapupulaina ona mata e Iesu o le tagata

faatuatua.



O le tauaso o tā‟ua nei i le tala a Luka e pei ona agai i ai la tatou

mataupu; Tatou te mafai ona faavasega i lalo o tagata mama‟i ma


25

matitiva. O tagata nei o feagai pea ma mafatiaga i aso uma o le ola, o lo

o matuā moomia foi se fesoasoani auā ua fia mapu ma fia malōlō.

O le isi itu ia silafia, o lo latou nofoaga masani lea, o fetaulaiga ala i aai;

auā o iina e tumutumu ai tagata i aso uma mo a latou feau, a o le latou

avanoa lea e taualaga ai ma tauvalavalaau i tagata mo ni fesoasoani.

O le aai tele la o Ieriko, sa ui atu ai Iesu i se tasi o ala e aga atu i le aai,

o iinā tonu sa nofonofo ai le tauaso ma taualaga solo i le tumutumu o

tagata. O le pisapisaō o le aai, na tu‟ufesili ai le tauaso, po ua mafua i

se a lea pisaō tele? Ae tali ane ai tagata, o Iesu le Nasareta lea e maliu

ane, lea e mafua ai! Ona valaau leotele lea o le tauaso ma faapea atu,

“Iesu e, le alo o Tavita, ia e alofa mai iā te au!” Ua fiu tagata e vavao le

tauaso e „aua le pisa, ua lē mafai lona tauvalaau pea i le Alii o Iesu.

Ua tu Iesu ma fai atu i tagata, e ta‟ita‟i mai le tauaso iā te ia. Ona fesili

lea i ai o Iesu, “Se a le mea e te manao i ai ou te faia mo oe?” “Le Alii

e, ia vaai o‟u nei mata,” o le tali ane lea a le tauaso i le Alii. Ona toe

fetalai atu lea o le Alii iā te ia, “Ina vaai ia ou mata, o lou faatuatua o le

a e malōlō ai” Ona pupula loa lea o mata o le tauaso, ua mulimuli ma

vivii atu iā Iesu atoa ma i latou e toatele sa vaai i le mea ua faia.

O le itu taua mulimuli, “E faapefea ona iloa, o le tauaso o le tagata

faatuatua e pei ona tau atu e Iesu? O lana valaau, “Iesu le alo o Tavita”

O le ta‟u lea e ave i le Mesia o ta‟ua e Isaia 11: 1 – 3. O lona uiga, o lo

o maua i lana faalogo le igoa Iesu, le Mesia ua leva ona faatali i ai Iutaia

mo so latou faaolataga. Ma o ī na silafia lelei ai e Iesu, na ona lē pupula

o ona mata-faa-le-tino, a o lona loto o talitonu ma tumau i le Alii. Ona

fetalai atu lea o Iesu, ma ua pupula ona mata, ua malōlō.

GALUEGA FAATINO:

1. Fai se faatinoga pu‟upu‟u o le mea na tupu, pe afai e lava le taimi,

po o le

2. Sauni e lau susuga i le faiaoga ni fesili e fetufaa‟i ai ma le vasega,

e tuliloa ai lo latou iloa, ma lo latou malamalama i le tala.

PESE: “A tumau ia Iesu, tatou te filemu …..”


26

A‟OA‟OGA:

1. Talitonu faamaoni i le alofa o le Atua.

2. E leai se mea e faigata i le Alii.

3. E tatau i le Atua le viiga.

TATALO:

Faatumau pea le viiga silisili i lau Afio le Atua, ona o le matalasi o lou

alofa fa‟aalia i lo matou ola i so o se ala. Faamagalo matou le fanau, ona

o lo matou lē amanaia o nai tagata mama‟i ma vaivai. Tatou ma lau

Afio i le tapuaiga a lou nu‟u a faia nei, ma aso uma o lenei vaiaso Sa.

Amene.

…………………………

ASO SA: 8 ME 2016

MATAUPU: O LE TINĀ POTO, SA IA LAVEA‟IINA

LONA NUU

SINI: A‟oa‟o le vasega ina ia latou iloa ma

malamalama lelei, i le uiga o le poto o le tinā lea

sa ia lavea‟iina lona nuu.

TUSI FAITAU: 2 Samuelu 20: 4 – 22 (mo le Faiaoga)

2 Samuelu 20: 14 – 22 (mo le Vasega)


O la tatou galuega e fai faatasi, a e le faatonua le tofā iina. O le

fautuaga, taotao le faamatalaga o le tala i le vaega tonu o le a faitau e

tamaiti. E mafai ona taua ni vaega o i luma, ae ia lelei le soso‟oga i le

vaega o le Tusi faitau.

O Sepa le igoa o le tagata sa fouvale ma tete‟e i le tupu o Tavita, o le

atalii o Pikeri le sa Peniaminā. E ui i le fouvale o lea tagata, ae toatele

lava foi tagata na mulimuli e lagolago o ia. Ua iloa e Tavita le tete‟e o


27

lea tagata, ona faatonu lea o ana ta‟ita‟i-au ma ona tagata tau, e saili ia

maua Sepa e fasioti, ina nei tupu tele le fouvale, ma malepe ai le malo.

Ona sola lea o Sepa ua oo lava i le nuu o Apela Petemaaka i le itu i

matu. (Faafanua i tua o le Tusi Paia – “O Palesitina ma ituaiga o

Isaraelu.” O le numera 9, o le laueleele atoa lena o le ituaiga o Nafatali,

o se mea o le laueleele lena e i ai le nuu o ta‟ua i luga.)

Ua oo atu Ioapo ma lona uso o Apisai, o ta‟ita‟i-au a Tavita, ona

faatonu lea o vaega-au e osofai le nuu, ona o le nuu foi e siomia e pa

maualuluga, e puipuia mai ai ona fili. Ua toetoe solo i lalo pa o le aai o

Apela, Petemaaka, ae valaau mai loa se fafine mai totonu, e fia talanoa

iā Ioapo le taitai-au. Ona faapea mai lea o le fafine iā Ioapo mai totonu

o le pa o le aai. “O a‟u o se tasi o tagata filemu ma faamaoni ia Isaraelu;

O lo o e saili e fasioti se tasi nuu ma se tasi tinā, se a le mea e te

faaumatia ai le tofi o le Alii?” Ua iloa e Ioapo, e sa‟o le fafine; auā po o

ai lava le nuu ma le ituaiga, o se vaega lava o Isaraelu na filifilia e le

Atua e fai mo Ia. I le ma le isi itu, e le gata o le tinā o ta‟u mai lona

faamaoni, a o lona i‟uleo malū, ma ana upu faagau loto. Ona tali atu lea

o Ioapo, e leai se mea faapena e tupu, latou te le faaumatia lava le aai.

Pau lava le tagata o fia maua, o Sepa le atalii o Pikeri, ona o le tagata

fouvale ia Tavita. Ona toe valaau mai lea o le fafine; “O le a lafo atu

lona ulu i fafo iā te oe. Ona faia lea e le fafine le tonu sa‟o ma le tatau i

le nuu, ma latou fasioti loa Sepa, vavae lona ulu ma togi i fafo iā Ioapo,

ona toe foi ai lea o itu taua a Tavita, a‟e ua saogalemu ma lavea‟iina le

nuu. Ua sa‟o ai le upu faa-muagagana; “O le tali filemu, e liliuina ai le

ita.”

Uiga o Upu ma Fuaitau:

i) vagaia (f 15) - siomia/faalatalata i ai ma sauniuni.

ii) utu (f 15) - o se maupuepue (eleele)

iii) taulepeti (f 15) - osofai/talepe ma faaleaga

iv) faatafunaina (f 20)- faaleaga atoa.

GALUEGA FAATINO:


28

Taliga Fesili (Tali mai i le “Sa‟o” po o le “Sese”)

i) O Apela-Petemaaka, o le nuu lena o Sepa.

Tali: Sesē (O le nuu na sola iai Sepa, ae lē o sona nuu)

ii) O Ioapo le igoa o le fafine poto.

Tali: Sese (E lē o taua i le tala se igoa o le fafine, a‟o Ioapo, o le taitai-

au a Tavita)

iii) O le mea leaga a Sepa sa fai, o le fouvale lea iā Tavita le tupu.

Tali: Sa‟o

iv) O le iuga o Sepa, o le oti.

Tali: Sa‟o

v) O le numera (iii) & (iv) o lo o ta‟u maia iā tatou, e le lelei le ola

tete‟e i lē na tofia e le Atua e fai ma pule.

Tali: Sa‟o.

PESE: Tulei ese, tulei ese, tulei ese

Avega mamafa uma i lou agaga

A‟OA‟OGA:

1. E lelei le poto.

2. Ia fai oe ma lavea‟i i lou aiga.

3. O le iuleo filemu, e na te faatea le ita.

…………………………….

ASO SA: 22 ME 2016

MATAUPU: TUMAU FAAMAONI I LE ATUA


29

SINI: A‟oa‟o tamaiti ia latou iloa, o le tumau ma le

faamaoni i le Alii o Iesu Toetu, o le faailoga o le

tagata faatuatua ia te Ia.

TUSI FAITAU: Ioane 20: 24 – 29


E taua lo tatou mautinoa o le taimi tonu o tupu ai lenei fetaiaiga, auā o

lo‟o tau mai i le tusi faitau, na muai ta‟u atu e uso-a-so‟o o Toma iā te

ia, “O Iesu ua Toetu” O le upu a Toma, “seiloga e pa‟i i a‟ao ma le itu o

Iesu, ona talitonu lea.” O le tuanai o aso e valu, o lona uiga, ua tele le

taimi e mafaufau ai Toma i le mafutaga ma Iesu, ma ana upu sa fai atu

ai iā latou, “E oti ae toetu mai i le aso tolu.”

Ua uma le feiloaiga muamua lea sa le i ai Toma. Lea ua toe afio atu

Iesu Toetu ina ua tuanai aso e valu, a o faatasi foi le auso‟o i le fale

faatasi ma Toma. Ona afio atu lea o Iesu, a‟o tapunipuni le fale, ona

latou faatasi lea ma Ia i le fale. Ua fetalai atu foi Iesu, “Ia outou

manuia.” O isi ia fa‟aaliga o le Alii, sa faita o le a talitonu ai Toma, ae

leai lava.

Ona fetalai atu lea o Iesu iā Toma, aumaia lou lima ma tago i mea sa

tutu‟i i fao ma manu‟a o lo‟u tino, vaai foi ma talia, ae „aua e te

masalosalo vale, ae faatuatua mai. Ona tali mai lea o Toma iā Iesu

“Lo‟u Alii e, ma lo‟u Atua e.” O lona uiga o ana upu, o lea ua tautino

ua talitonu. Ua toe fetalai atu Iesu iā te ia, “Toma, ua e faatuatua, auā

ua e vaai mai iā te a‟u; Amuia le tagata e lē vaai mai iā te a‟u, ae

faatuatua mai lava.”

Tamaiti, o le tāua ia o lo tatou avea ma tagata o le Alii, e ala i le talitonu

i mea uma na te faia, ma mea foi o fetalai mai ai o Ia. Ae lē na o le

ta‟uta‟u, o tatou o so‟o o Iesu, ae lē talitonu iā te Ia. O le saunoaga a

Iesu iinei, o lana faamanuia e alu i le tagata e faatuatua, tusa lava pe le‟i

vaai tino i le mea ua faatuatua i ai. Ua lē ese la le upu lea a Iesu ma le

uiga o le faatuatua o i ai i le Tusi Fesili a tamaiti; “O le faatuatua, o le

faalagolago lea ma le faamoemoe, ma le talitonu i mea e lē o vaaia.”


30

GALUEGA FAATINO:

Taliga Fesili (Fa‟aaoga le Tusi Paia, ma mafaufau lelei i le tala sa

faamatala e le faiaoga, ona tali mai lea o fesili o i lalo, e iloa ua e

malamalama lelei i le tala o i le Tusi Paia)

1. O le a se mea taua o fetalai i ai Iesu iā Toma, o ta‟ua i le f 29?

Tali: O le lelei o le tagata e faatuatua iā Iesu, tusa lava pe le‟i vaai tino

iā Ia!

2. O le a tonu le aso lea na afio atu ai Iesu ua i ai ma Toma i le fale?

Tali: O le aso lona iva, ina ua mavae aso e valu talu ona uma le

feiloaiga muamua.

3. O le a le mafuaaga na finagalo ai Iesu e avatu lima o Toma e pa‟i i

ona lima ma lona itu?

Tali: Ina ia talitonu, auā o lona manao lea, seiloga e pa‟i faato‟a

talitonu.

4. Na ui mai Iesu i se faitotoa i totonu o le fale pe leai?

Tali: E leai, na nimo mai i le mafai o lona mana faa-Atua!

PESE: Ia tumau ma pipii mau (x 2)

A‟OA‟OGA:

1. Faamausali lou faatuatua iā Iesu.

2. E leaga le masalosalo.

3. O Iesu, o le manuia.

TATALO:

Faafetai i lou alofa ua matou maua ai pea le ola, faafetai foi mo au

faamanuiaga eseese uma lava mo lo matou ola, ma tagata uma lava.


31

A‟oa‟o mai ia matou talitonu ma tutumau iā te oe, e ala i le faatuatua.

Faamagalo o matou sese ma agasala. I le suafa o Iesu. Amene.

………………………..

ASO SA: 29 ME 2016

MATAUPU: TOE FANAU FAA-LE-AGAGA IĀ IESU

SINI: A‟oa‟o tamaiti ina ia latou iloa, o le suia o le

talitonuga ma le faatuatuaga o Saulo (Paulo) ina

ua liliuina lona loto ma talitonu loa iā Iesu Toetu,

o le toe fanau faa-le-Agaga lena.

TUSI FAITAU: Galuega 9: 1 – 18 (mo le Faiaoga)

Galuega 9: 1 – 6 (mo le Vasega)


Ua manatu e faitau uma e lau susuga le f 1 – 18, e fesoasoani i lau

galuega, o le faamatalaina lea o le tala, auā e maua ai ni manatu mo le

mataupu. E manatu foi, e lelei ona e faasinoa i ai le ulutala o le

Mataupu o faitau o le Tusi Paia, auā e feso‟otai le tofia o Saulo e fai ma

Aposetolo; ma lona liliuina, po o lona toe fanauina faa-le-Agaga; auā e

lē mafai ona liliu pe suia se talitonuga o se tagata, e aunoa ma le ioeina

e lona loto.

O le tala ua tatou iloa, tapā e Saulo mai ta‟ita‟i o le Lotu o talitonu ma

faatuatua i ai, ni tusi mai ē pule i le Lotu, e alu ai e fasioti ma faa-

falepuipui tagata o talitonu foi latou iā Iesu Toetu. O le alu la lea a

Saulo, “e lē o se lelei,” mo tagata Kerisiano, po o tagata o talitonu iā

Iesu Toetu, e pei foi o tatou. O le alu a Saulo, o le alu a le tagata e ita le

loto i tagata o mulimuli iā Iesu Toetu, ma talitonu iā te ia. Na alu la e

alu i Tamaseko, le nofoaga o tā‟ua mai ai le toatele o tagata o ta‟uta‟u le

igoa o Iesu, ma fiafia iā te Ia.


32

O le latalata o Saulo i le nuu o Tamaseko, ae faafuasei loa ona taia o ia

e se malamalama uiga ese mai le lagi, ua matuā lē mafai ai ona ia toe

iloa se mea e tasi i lana vaai, e o‟o a i lana aumalaga na latou ō, ua na

leiloaina. Ona paū lea o Saulo i lalo, ae faalogo atu i le siufofoga o

faapea mai iā ia, “Saulo, Saulo e, se a le mea ua e saua mai ai iā te a‟u?”

Ua fesili pogisa atu Saulo, “Le Alii e, o ai ea oe?” O a‟u o Iesu ua e

sauā mai i ai; o le mea faigatā ia te oe le aa-i-tui! Na matuā faateia

Saulo i le tali mai o le Alii, O ia o Iesu!

Ua fefe ma gatete, ua mata‟u Saulo ma ua ia lagona lona popole, ona o

Iesu lea o inoino i ai lo latou faatuatuaga, ma lē talitonu i ai, lea ua tali

mai o ia, ma ua aa-i-tui atu Saulo iā Ia. Na lē mautonu lona loto ma

valaau atu, “Le Alii e, se a le mea e te finagalo i ai, ou te faia?” Tu i

luga e alu i le aai, o le a ta‟uina atu lava iā te oe le mea e te faia. Ona

tutu ai lea o ia ma ona tagata i luga, ua na ona faalogo i faatonuga,

pupula foi mata ae leiloa se mea. Ae na ta‟ita‟iina lava latou e le

malamalama o le mana o Iesu Toetu i le mea na faatonu e ō i ai. O ī

tonu na toe liua ai lona loto, ua talitonu loa ma faatuatua iā Iesu. Ua toe

fanaufouina faa-le-Agaga Saulo e le Alii o Iesu Toetu, ma ua faasino i

le mea o le a faapine ai lona avea ma auauna a Iesu.

Tamaiti, e mafaia lava e le mana o Iesu ona liliuina tatou, ma suia o

tatou loto, mai le mea o tatou fiafia i ai.

Uiga o Upu ma Fuaitau:-

i) mapugatamai (f 1) - leai se toafilemu/ita ma le loto naunau

ii) sunako (f 2) - fale-tapuai/falesa

iii) Ala (f 2) - o le igoa sa ta‟u ai tagata e talitonu iā

Iesu.

iv) aa-i-tui (f 5) - faauigaina i le faatautavā i le mea

malosi ma le matautia (a‟a le tui o

mea maai e aafia ai)

GALUEGA FAATINO:


33

1. Fai se faatinoga pu‟upu‟u o le tala, ae fa‟aaoga uma ai le vasega.

O le a tofia lava e lau susuga tagata autū, ae tau ina auai le toatele

e fa‟aaoga ai.

PESE: Ua ou iloaina x 2

E alofa Iesu iā ita x 2

A‟OA‟OGA:

1. Liliu i le Alii moni.

2. E matata‟u tagata i le Alii.

3. E alofa Iesu.

TATALO:

Ua e ta‟ita‟i mai i le manuia lo matou ola i lenei Aso Sa, matou te faafoi

atu le faafetai tele i lau Afio. Tatou ma oe i le tapuaiga a faia nei, ma

faamanuia mai i tagata uma lava i lenei vaiaso. Faamagalo matou le

fanau, ona o lo matou aa i tui iā te oe. Amene

……………………..

MANATU TAIALA O IUNI:

“UA I LUMA LE ALA MO TAGATA UMA”

O le toe soifua manumalo mai o Iesu, mai le oti ma le tuugamau

(TOETU) o le ala lava lea o le mautinoa ua tatala mai mo tagata uma e

ui ai, e ala i loto e talitonu ma faatuatua i le Atua Soifua. Mo tatou foi

le fanau, e taua lo tatou iloa o le tala i le manumalo o Keriso, ma

talitonu faamaoni i ai, tusa lava pe le‟i vaai tino iā Iesu Toetu; Auā o le

faatuatua, o le talitonu lava lea ma le faamoemoe i le Atua e lē o vaaia.

ASO SA: 5 IUNI 2016

MATAUPU: IA AMANAIA TUTUSA TAGATA UMA


34

SINI: Ia a‟oa‟o tamaiti ina ia latou iloa, e tāua tele le

amanaia, ma le tutusa lelei o le faiga o tagata

uma, e pei o la Tavita i le tagata na latou maua i

le vao.

TUSI FAITAU: 1 Samuelu 30: 9 – 19


E le tasi se feau taua o i totonu o tala o i ai i le Afioga Paia a le Atua.

Peitai, ua filifilia lenei feau faamamafa e pei ona fai ma mataupu o lenei

Aso Sa, ona e le gata ina tāua tele i lo tatou va nonofo ma le feagai ai

ma tagata i aso uma, ae o se faafitauli foi o fai lava ma alia‟e mai, i lo

tatou lotoifale faa-Kerisiano.

O le nuu o Sekeleka sa nonofo ai avā e toalua a Tavita; ma tagata uma,

o fanau ma aiga o lana itu taua. O le taunuu mai o Tavita ma ona tagata

mai Filisitia, na latou iloa ai, ua mu uma ma faatama‟ia le aai o

Sekeleka, ua avea foi faatagata o taua fafine, ma fanau a le nuu e le itu

taua a Amaleka, o aofia ai ma avā e toalua a Tavita.

Sa faanoanoa tele Tavita, ae ua ita foi tagata o lona lava nuu iā te ia; ua

latou fia fasioti iā Tavita, talu le mea ua tupu. A o Tavita, ua vave ona

ia saili i le Atua se fōfō. Ua ia fesili atu i le Atua, ona faatonu mai lea o

le Atua; Alu ae ia e tuliloa i latou, auā e te maua lava, ma e toe faafoi

mai mea uma!

O le tuliloaga lea na maua ai e Tavita ma lana itutaua se tagata

Aikupito, sa fai ma auauna i se ta‟ita‟i a‟u o le vaega-au a Amaleka. O

le tagata lea sa ma‟i ua lē atoa lona malosi, ona lafoa‟i loa lea ma tia‟i e

lona matai ma le itu taua a Amaleka.

Sa fesili i ai Tavita, po o ai ia? A‟e po o le a foi le mea ua tupu? Sa

ta‟u sao lava e le tagata, o latou na susunuina Sekeleka, a o i ai i le

vaega-au a Amaleka. Ona fai lea i ai o Tavita, pe na te faasinoina iā ia

ma ona tagata le mea o i ai le itu taua a Amaleka. Sa loto le tagata e

tauto Tavita na te lē faia se leaga iā ia, ona faapena lea ona fai; ua fai le

tauto ma faamaoni. Ona o loa lea, ua ta‟u uma e le tagata lenei iā

Tavita, le vaega tonu o i ai Amaleka. Ona osofaia lea e Tavita ma


35

faaumatia, fai mai e leai ma se toatasi na sao, vagana le 400 na tietie i

kamela. Ua toe faafoi mai le nuu uma ma avā e toalua a Tavita le tupu.

Na matuā inoino ma ita le itu taua a Amaleka i le tagata Aikupito, lea na

latou lafoa‟i ia oti, ae ua fa‟aaoga nei e le Atua, na te ta‟ita‟i ma faasino

Tavita ma lana itu taua i le mea o i ai Amaleka. Sa alofagia e Tavita ma

ona tagata lenei auauna ua tu‟ulafoa‟iina ma sa ia taui mai le agalelei o

Tavita ma ona tagata, i lona tā‟ua o le mea o i ai Amaleka. Agalelei ma

amanaia tagata tou te fetaui, tusa lava pe foliga e lē amanaia i le vaai.

Auā tatou te lē iloa lava, le finagalo o le Atua ma lona fa‟aaogāina o i

latou e fai ma o tatou fesoasoani, ae faalagolago i le tatou tali atu iā i

latou.


i) galau (f. 9) - selau (ono galau = ono selau)

ii) potopotoga mati - mea ai ua uma ona faamago ma lelei i

mamago (f.12) le taumafa.

iii) vete (f 19) - Oloa e maua mai le tāua (mea aogā

eseese, e le tasi se ituaiga.

GALUEGA FAATINO:

1. Faitau lelei le faatonuga o i lalo, ina ia e malamalama ona fai lea o

le galuega faatino o faatonu atu. Fa‟aaoga lau Tusi Paia

(Faatonuga – Fetu‟una‟i le faaupuga po o le faamatalaga tonu o

iai i le “Lisi B” ia laina tutusa ma le upu e tatau i ai o i le “Lisi A”

(Faata‟ita‟iga o le tali – A1 = B5, po o le A2 = B2

Lisi A Lisi B

1. Vine mamago - Na tafea ai ava a Tavita

2. Tavita - lafoai anapō luā

3. Pesora - mo le auauna mai Aikupito

4. Sekeleka - nonofo ai tagata le tau


36

5. Amaleka - fasi mai le taeao segisegi

6. tu‟ulafoa‟i - tagata susunu nuu

TALI: A1 = B3 A4 = B1

A2 = B5 A5 = B6

A3 = B4 A6 = B2

2. Fetufaai i ni fesili mai lau Susuga a le Faiaoga.

PESE: “Where the Spirit of the Lord is, there is love!

(O fea lava o i ai le Agaga, o i ai le alofa)

A‟OA‟OGA:

1. „Aua le faailoga tagata.

2. Ua faagaganaina tama valevale.

3. E fa‟aaogaina e le Atua tagata tu‟ulafoa‟iina, e ala mai ai lona

finagalo.

………………………….

ASO SA: 12 IUNI 2016

MATAUPU: FAATALI PEA LE ATUA MO OE

SINI: A‟oa‟o tamaiti ia latou iloa lelei, po o le a le

leaga ma le agasala o le tagata, e faatali ma

tu‟uavanoa pea le Atua alofa, seia salamō ma toe

foi mai.




37

O lenei tala ua tatou tau ane so‟o ai (O le uii faamaumauoa) a‟e ina nei

avea lo tatou masani ai, ma ala e māmā ai le manatu i lona tāua; ae

maise le faamamafa o tuliloa i lenei Aso Sa. Taumafai lava ina ia

matuā manino ma malamalama lelei le sini.

O le tala i le atalii laitiiti, sa tapa i lona tamā, e aumai sana vaega o lana

oloa o fa‟aagaga mo lana fanau. Ua aumai, ona alu malaga loa lea o le

atalii, ua alu ese mai lona tamā ma lona aiga. Ua faasaga i fiafiaga faa-

le-lalolagi, ua saoloto e fa‟aalu le o‟a e faamalie ai le tuinanau, ma

mana‟oga o le loto. Mulimuli ane, ua uma lelei le o‟a sa iā te ia, ua

mativa ma ua fia ai; Ua aisi ma tau saili solo se mea e ola ai. Sa fai ma

pologa na te fafaga ina pua‟a a le isi aiga, ma ai ai lava i meaai a pua‟a.

O le tasi aso, ua na iloa lona mafatia, ona sagatonu ai lea o lona

mafaufau, ua lagona faamaoni foi e lona loto lona sēsē. Ua salamō, ma

ua manatu e toe foi i lona tamā, la e tele ana o‟a ma ana mea ai; o le a

alu e faatoese i le Atua, atoa ma lona tamā, ma fai i ai e fai ia ma ana

auauna, ae „aua le toe tā‟ua o sona atalii. E foi mai le tama, o lo o

faatali pea lona tamā mo ia. Na iloa mamao atu e lona tamā lana sau,

ona tula‟i lea ua tamoe atu, ua fusi mai ma sogi atu i ai, ua mutimutivale

lona lava alofa iā te ia. Sa faatoese le tama i le Atua, atoa ma lona tamā,

ma ta‟u atu foi i ai lona mana‟o. E le‟i manatu le toeaina i ia gaosā, ae

na tapa vave loa i ana auauna, aumai se ofu tatapuvae aupito lelei, le

mama ma seevae, sei faaofu ma faasee ai o ia, ma faamama lona aao.

Sa fasi foi le tamai povi peti i lea aso, ua fai ai le aiga fiafia ma ia, auā o

le tama sa leiloa ma oti i le agasala, a‟o lea ua toe maua, ua ola ma ua

salamō.

Tamaiti, e faapena le Atua lo tatou Tamā, tiga lo tatou oese mamao mai

iā te Ia, ona o lo tatou ola agasala ma le leaga; e faatali pea le alofa o le

Atua seia tatou salamō ma foi mai faamaoni i le Atua e ola ai.


i) sogi (f 20) - kisi

ii) tatapuvae (f 22) - ofu totoso/ofu talaloa

GALUEGA FAATINO:


38

1. Fai sina faatinoga pu‟upu‟u o le tala (skit)

2. Felafoa‟i lau susuga ma le vasega i fesili ma tali, e te silafia ai so

latou malamalama ua i ai i le mataupu.

PESE: Tinā tinā ea, o e lagona mai ita

Ta fia foi atu i le aiga (sui le tinā i le tamā)

A‟OA‟OGA:

1. E faapalepale le alofa o le Atua.

2. E taua le salamō.

3. „Aua le faamaumau oa.

………………………….


MATAUPU: O LE ALOFA NA FAAMALOSIA LE TINĀ

O MOSE

SINI: Ia a‟oa‟o tamaiti ia latou iloa, o le alofa moni o le

tinā o Mose i lana tama, sa ia faamalosi ai lava i

so o se ala na te mafai ona fai, e faasaoina ai o ia.

TUSI FAITAU: Esoto 1: 22 – 2: 10 (Faiaoga)

Esoto 2: 1 – 10 (Vasega)


O le lē taunuu o le manaoga sauā o le tupu o Farao ona o le matatau i le

Atua o faatosaga o Sepela ma Pu‟a; (Esoto 1: 15 ff) Na liliu ai loa le ita

o le Tupu i le isi faaiuga ua sili ona matuiā, fai mai – “O tama uma lava


39

e fananau mai, ia lafo i le vaitafe e oti ai; a‟o teine e fananau mai, ia

faaola i latou.”

E fanau mai la Mose, ua taoto le iuga lea; a‟e ona e le gata i le lalelei o

le pepe, a‟e faamaoni foi le alofa o le tinā i lana tama. O lea na ia tausi

nānā ai lava o ia. Ua tuputupu le tama ma ua malosi ma lē mafai ona

toe lilo pe a nānā pea i le fale. Ona mafaufau lea o le tinā i lenei auala,

o le lalagaina lea o le ato-kome malosi, ona puluti lea i le pulu-emeri ma

le pulu-safeta, ina ia malu lelei ma le sao i ai se vai. Ona tu‟u lea i ai le

tama, ma tuu ifo ai loa i le vaitafe i totonu o le vao utuutu, ua opeopea

ai e pei o se vaa.

O le agai ifo o le afafine o le tupu ma lana galu-teine e ta‟eele i le

vaitafe, na iloa atu ai e le Purinisese le ato, ona auina atu lea o le tasi

teine e aumai le ato iā te ia. Ua tatala le ato ma ia iloa ai se tamaitiiti

lalelei o tagi, ua lagona lona alofa iā te ia, ona poloai lea le afafine o le

tupu e su‟e mai se fafine na te tausia le tama mo ia. O le tuafafine lava

o le tamā o le pepe, na alu aumai le tinā moni lava o le pepe, na tausia

mo le Purinisisese le tama ae totogi. Ua ola le tama ua matua, ona

faaigoa lea ia Mose, auā o ia na toina a‟e mai le vai. (O le uiga lenā o le

igoa Mose)

Ioe tamaiti, o le alofa faamaoni e lē nofonofo vale, ae faamalosi ma

sailiili auala, pe ono lavea‟iina ai si ana tama. E foliga mai o le tinā o le

pepe e lē usita‟i i le tupu, peitai, o le moni o le alofa o le tinā, o lo o

atagia ai le finagalo o le Atua, ina ia ola le tama. Tatou te iloa mulimuli

ane, o Mose lea na auina e le Atua i Aikupito e aumai lona nuu o

Isaraelu.


i) (f 3) nā - nana/faalafi

ato kome - o le kome o le laau tuaiti, e pei o se ofe

ae malo lava, e aoga e lalaga ai ato, ma

ili ma isi mea e tele.

puluti - punitia/pupuni ina ia le toe i ai se avanoa

pulu emeri - o pulu malolosi ma pipii sa fa‟aaoga i

pulu safeta - na ona po i mea faapea.


40

ii) (f 5) galu teine - o teine e auauna i le afafine o le tupu.

vao utuutu - o vao uumi pei foi o ni kome, e ola tele

i tafatafa o vai tafe ma vai tuloto.

GALUEGA FAATINO:

1. Filifili mai le mataitusi o le tali sa‟o e iloa ai ua e malamalama

lelei i le mataupu (Taliga Fesili)

(i) Sa tigaina le tinā e fai le ato-kome e tuu ai Mose, o lo o iloa ai, o

ia o se fafine.

(a) lē usiusita‟i i le faatonuga a le tupu.

(e) sili ona poto e lalaga ato-kome

(i) e tumu i le alofa. Tali: (i)

(o) e fia sili i tinā uma lava.

(ii) E i ai lava le malosi sili sa i tua o lenei mea na tupu e tusa o le

tala; lea ua faasa‟oina mai ai le tama mai le pule a Farao. O ai le

malosi lea?

(a) O le tinā o Mose

(e) O le afafine o le tupu (Purinisese)

(i) O Mose Tali: (o)

(o) O le Atua

(iii) O ai le tagata e fetaui i ai le faaupuga lea, “O ia le tagata na toina

ae nai le vaitafe.”

(a) O le Atua

(e) O le tupu

(i) O Mose Tali: (i)

(o) O le afafine o le tupu


41

(iv) O le a le galuega a le tuafafine o le tamā o Mose o ta‟ua i le tala?

(a) lalaga ato-kome

(e) auauna a le afafine o Farao

(i) teine tausi tama Tali: (e)

(o) ave-feau a le tupu

PESE: Ia matua faamalosi….. Iesu! (Pese ma Viiga)

A‟OA‟OGA:

1. E malosi le alofa pe a moni.

2. E le vaoia e se isi le finagalo o le Atua.

3. E lē lelei le faufau i mea leaga pei o Farao.

…………………………


MATAUPU: OFO MAI E IESU IA LAVA MO TATOU

SINI: “A‟oa‟o tamaiti ina ia latou iloa le alofa faamaoni

o Iesu i tagata, na ia ofoina mai ai lona soifua

atoa (ola) ina ia ola ai tagata.”

TUSI FAITAU: Ioane 10: 7 – 18 (Faiaoga)

Ioane 10:11 – 15 (Vasega)


O lo o tautino lava e Iesu iinei, o ia o le leoleo mamoe lelei, e eseese ma

le auauna e tofia na te leoleoina mamoe. E galue ma le faamoemoe i

lona taui, na pau lea o le itu o mamafa iā te ia, o le taui mo lona lava

lelei, A e a osofaia mamoe o le lafu e manu feai, e pei o luko, ona fefe


42

lea ma sola ese, ae tia‟i mamoe. Ona saeia lea e manu feai o mamoe o

le lafu, ua faatamaia ma faasalalauina. E sola le auauna auā e lē o

mamafa tele iā ia le ola o mamoe, vagana lona lava ola ia saogalemu; a

o Iesu, e moni ma faamaoni lona alofa i mamoe; auā e le gata o Ia lava e

ona le lafu mamoe, a o lona lava foi soifua atoa, e ofoina atu mo le

lavea‟iina o ana mamoe. E lē gata ina silafia lelei e Iesu ana mamoe, ae

masani lelei foi ana mamoe iā te ia.

E pei ona vava lalata, ma femalamalamaa‟i le va nonofo ai o le Atua ma

Iesu lona Alo pele, e faapena foi Iesu ma ana uo. O le vaaiga atoa lea i

le Alii o Iesu, o le faamaoni o lona alofa i le lalolagi o tagata, e aofia ai

ma tatou; lea lava na afio mai ai i le lalolagi, ua ofo mai lona soifua

atoa, e ala i le taulaga osi, na ia maliu ma toe soifua manumalo mai ai.

Tamaiti, o le alofa o Iesu e faatusaina i le alofa o ou matua iā te oe; po o

le a le lē lavāvā o lou tamā ma lou tinā, e lē mafai ona solomuli i la

lā‟ua tausiga alofa iā te oe, ina ia e ola ma manuia. E leai foi se isi alofa

mafanafana e sili atu iā te oe nai lo ou matua, vaganā lava le Alii o Iesu.

GALUEGA FAATINO:

Taliga Fesili (Fa‟aaoga le Tusi Paia)

1. “O au le leoleo mamoe lelei” O ai e ona upu ia, a o ai foi e

faatatau i ai?

Tali: O Upu a Iesu, o faatatau iā te ia lava!

2. O le a le mea e lelei ai Iesu nai lo le auauna?

Tali: Ona o Iesu e ofo atoa le soifua e lavea‟iina ai mamoe, a o le

auauna e leai.

3. E faapefea ona e iloa, e lē tu‟uina atoa le ola o le auauna i le

galuega leoleo mamoe?

Tali: E iloa i le taimi e fetaia‟i ai ma manu feai e pei o le luko, ona sola

lea ua fefe, ae tiai le lafu mamoe.

4. O ai le “Tamā” o taua i le f.15?


43

Tali: O le Atua.

PESE: (373)

1. O mai outou tamaiti

Tou te ola iā Iesu

O ia le alofa tele

I e o atu iā te ia.

Tali: Tamaiti e, x 2

Vave maia ia Iesu

Tamaiti e, x 2

Vave maia iā Iesu.

A‟OA‟OGA:

1. E moni ma faamaoni le alofa o le Atua

2. O le alofa, o le ofo atoa atu o le ola

3. E lelei tamaiti alolofa.

…………………………….

MANATU TAIALA O IULAI:

“MALAGA FAATASI MA LE ATUA I TAIMI UMA”

O le soifuaga o tatou i ai nei, o le malaga fai umi. E tele faafitauli e

mautinoa tatou te fetaiai i le ala, o le taunuu foi o le malaga, tatou te lē

iloa lava taimi tonu e oo mai ai ia mea uma. O le taua lea o lo tatou

faatasi ma le Atua i taimi uma, auā o lona Agaga na te faatupu le

mautinoa i o tatou loto, tatou te malaga ai ma le talitonu ma le faatuatua

iā te Ia e lē aunoa.

ASO SA: 2 IULAI 2016


44

MATAUPU: FASIOTIA AAPO LE TUPU.

SINI: Ia a‟oa‟o tamaiti ina ia latou iloa le ala faaleiloga

na fasiotia ai Aapo, a o le taunuuga lava lea o le

upu na fetalai mai ai le Atua, e ala mai lana

auauna o Elia, (1 Tupu 21: 19) talu le lē faalogo

ma le lē usitai o Aapo le tupu i le Atua.

TUSI FAITAU: 1 Tupu 22: 1 – 38 (mo le Faiaoga)

1 Tupu 22: 15 – 17, 29 – 38 (mo le Vasega)


O sulu e tele e lelei mo la tatou galuega, o le ala fautuaina lea e faitau

mai i le amataga o le mataupu 22, ma se vaega o le mataupu 21, e pei

ona ta‟u atu i le sini. O iinā o le a matuā malamalama lelei ai i le mea o

tupu, le gaupule o Aapo i le finagalo o le Atua, seia oo lava ina oti ai i

se auala faa-le-iloga.

Ua lē au faalogo lava Aapo i le finagalo o le Atua. Auā na fesili lava iā

Mekaio le tagata o le Atua, “Pe tatau ona ō a‟e i le taua pe „aua?” O le

tali tautino a le perofeta, o le finagalo lava lea o le Atua. “E nofo auā a

alu, e oti ai.” Lea la sa tatou faitau nei i le vaega tonu o le tusi faitau, o

lo o agai i le oti o Aapo. Ua lē tu‟uaulafo lava Aapo i le finagalo o le

Atua e „aua le alu, lea lava ua sauni le taua. O le isi togafiti ua fai nei,

ua lē ofu i lana toniga masani o le taua, ae ua ofu ese. Po o le manatu o

le tupu, o le a lē tuliloaina ia ona o le ese o ona ofu, ma lavea‟iina ai

mai le taua. Peitai, e lelei togafiti, ae lē lavea‟iina ai. Auā o le

faatonuga o le itu-taua a Suria, taatia lava le loaloa o le au-tau, ae agai e

tulituliloa lava le tupu ina ia fasiotia. O le mafuaaga lea na tulitulia ai

Iosefatu e fitafita sili e toa tolusefulu ma le lua a Suria, ona e le gata o

ofu i ona ofu tau, ae sa manatu fitafita o le tupu lea o Isaraelu. Na alaga

Iosefatu, e lē o ia o se tupu, ona liliuese lea le fitafita ma faasaoina ai o

ia. Ae o Aapo, e lei iloa le vaega tonu o lafilafi ai, ae fai mai, sa soona


45

fana a‟e e se tasi fitafita lana “u” i luga, ae na ifo tonu lava ma lavea ai

le tupu o Isaraelu, ma oti ai lava.

Tamaiti, e leaga le tete‟e ma le lē usiusita‟i i le Atua, ona o le fia fai o le

mea o e loto ai. „Aua le fesili fua i le Atua, pe afai e te lē talia le mea o

finagalo ai o Ia. Po o le a le atamai ma le malosi o le tagata, a lē

finagalo ai le Atua, o puapuaga lava e i‟u i ai. Usita‟i ma faalogo iā

tamā ma tinā, o lā‟ua o sui vaaia o le Atua i lo outou aiga, la te iloa lelei

le mea e sili mo lou ola manuia, ma lou lavea‟iina.

Uiga o Upu ma fuaitau:

i) manu (f. 36) - logo/ta‟u/fa‟aaliga

ii) ulī (f.38) - maile

GALUEGA FAATINO:

Taliga Fesili: (Tali mai le i le “Sa‟o” po o le “Sese”; fa‟aaoga lau Tusi

Paia)

1. O le tupu o Isaraelu, o le tupu lava lea o Ramota Kiliata o tā‟ua i

le tala?

Tali: Sese

2. “Ou te ofu ese a‟u, ma alu i le taua.” O le f.30 o i ai le fuaitau lea.

O le faamoemoe o le “ofu-ese,” ina ia sao ai mai le taua?

Tali: Sa‟o

3. E le‟i ola Iosefatu ona o lana alaga o i le f 32, a‟e na ola ona o le

faatonuga a le tupu o i ai i le f. 31.

Tali: Sa‟o

4. Na ita Iosefatu ina ua tuliloaina o ia e fitafita a Suria, talu ai mea a

Aapo. O lea na ia liliu ane loa ma fasioti loa ma le tupu o

Isaraelu.

Tali: Sese


46

5. O le oti o Aapo i le “ū” sa so‟ona fana, ua sa‟o ai le upu faa-

Samoa, “Ua lavea fua foaga a‟e lei fai misa!”

Tali: Sese

PESE: Pese ma Viiga 221 ( f. 1 & 2 – tali f.5)

A‟OA‟OGA:

1. E oti matagā le faamaualuga.

2. E lelei le usita‟i i le Alii.

3. E lē seua e se tagata le finagalo o le Atua.

……………………


MATAUPU: O IESU LO TATOU ALA I LE ATUA

SINI: Ia a‟oa‟o tamaiti ina ia latou iloa ma malamalama

lelei; “O Iesu, o lo tatou ala lea tatou te maua ai

le Atua, e ala i le talitonu ma faatuatua faamaoni

iā te Ia.”



O le ala po o le auala, o le vaega tonu ua faasino mai e te ui ai, ina ia e

taunuu tonu i le mea o tuliloa ma faamoemoeina. Faataitaiga:- O le

onosai ma le faamaoni, o le a e tau i le poto ma le faaeaina. O le ala foi

i le pule, o le tautua; fai mai ai le mau a Samoa. O le ala foi tatou te

maua ai le Atua, o Iesu Keriso lea.


47

O le fesili tele tatou te fai, E faapefea ona tatou savavali ma ui atu iā

Iesu, ina ia tatou maua le Atua? Ua le ese lea ma le fesili a Toma iā

Iesu, “Le Alii e, matou te iloa faapefea le ala? O fesili e mafua ona o le

lē malamalama. O le tali mai la a Iesu, ua iloa ai, o Ia lava le ala!

Fetalai Iesu, “ ‟Aua le atuatuvale tatou, ae faatuatua; auā e le gata ina

alu e tapena se mea e nonofo ai tatou i le maota o lona Tamā, a o Ia lava

foi le ala tatou te ui atu ai i le Atua.”

O le mautinoa ma le mausali lea ua aumai; Auā o Iesu lava mea uma;

pau lava o lea, o le tagata i lona loto pe na te talia ma faatuatua, pe leai

foi! O Iesu o le Alo o le Atua. E lē gata o Iesu o le tagata, a o le Atua

foi. O le tagata la e talia Iesu ma faatuatua iā te Ia, o le tagata foi lena

ua na maua le Atua. Manatua, e leai lava se isi o tatou e vaai i le Atua,

tatou te lē iloa uma foi le ala e tau iā te Ia, pe maua ai o Ia. A o Iesu, o

Ia o le tagata Atua, na o Ia lava le ala tatou te maua ai le Atua.

Ioe tamaiti, o le ola faavavau e na o le Atua e maua ai. O lo o tausiniō

tagata uma e fia fai mo latou le ala lea. Ae fai mo tatou, pe a tatou

faatuatua faamaoni iā Iesu, auā o Ia le ala e tau i le Atua le ola.

Uiga o Upu

i) atuatuvale (f. 1) - popole/lē mautonu

GALUEGA FAATINO:

(a) Taliga Fesili (Fa‟aaoga le Tusi Paia, atoa ma lou malamalama

i le tala, sa faamatala e le faiaoga)

1. E faapefea ona tatou ui atu iā Iesu, ma tatou maua ai le Atua?

Tali: O Iesu le Alo o le Atua, o Ia lava o le Atua liutino tagata. A tatou

faatuatua, talitonu, ma talia Iesu i o tatou loto, o le Atua lava lena

ua tatou talia.

2. O le fuaiupu 7 – (i) O ai e faasino i ai le “ia” o faai‟u ai le

fuaiupu? (ii) O fea e iloa pe vaai ai iā te ia?

Tali: (i) O le Atua e faasino i ai.


48

(ii) A vaai lava iā Iesu, (faatuatua iā te Ia) o le vaai lava lena i le

Atua.

3. E faapefea ona tatou iloa le faamaoni o Iesu, o lo o taua mai le

fuaiupu 2 – 3?

Tali: E iloa i le alu toe sau. Auā ana alu ma alu ai, tatou te lē talitonu

foi.

(e) E mafai foi ona fai lava e lau susuga ma le vasega nisi

fetufaaiga e saga lautele ai le mataupu.

PESE: Pese ma Viiga 385 (f. & f. 5 – tali f. 6)

A‟OA‟OGA:

1. O Iesu le ala moni.

2. O le Atua o le Ola lava lea.

3. Faatuatua iā Iesu.

………………………………


MATAUPU: O LE TOFOTOFOINA O IOPU

SINI: Ia a‟oa‟o tamaiti ina ia latou iloa, o le matuitui o

faigata sa feagai ma Iopu, o le ala lava lena sa

tofotofoina ai o ia, ma iloa ai lona faatuatua tele i

le Atua.

TUSI FAITAU: Iopu 1: 13 – 22



49

O le upu “tofotofo,” e mafai ona tatou faapea, o lona uiga, o le

su‟esu‟eina lava lena, po o le sailia o le loto o se tagata, pe o lavā onosai

pe leai foi, e ala i se mea ua tupu ma ua aafia ai o ia!

O le soifuaga nei o tatou i ai, o se soifuaga e tumu i mea faigata, ua

lu‟itauina ma tofotofoina ai pea lo tatou ola i aso uma. Fai mai isi, e le

lelei, pe leaga foi tofotofoga! Ae e i ai foi le talitonuga o isi tagata, i la

latou vaai faa-mataupu silisili, o se tagata mataala ma mataalia, se

tagata e ola i se olaga e tumu i faigata e tofotofoina ai pea o ia i aso

uma.

Foliga tonu ia o le olaga ua i ai nei Iopu, e tusa o le tala sa tatou

faitauina. O ia o se tagata mata‟u ma amiotonu i luma o le Atua, ma e

le taumateina, o le pogai lea o lona tamaoaiga i le tele o mea i le tino

nei. Sa iā te ia se fanau e toatele, ae maise o le anoanoa‟i o lafu manu

eseese, sa avea ai o ia ma tagata e tua i le vao ola. Peitai, o le tala ua

aumai nei i le mea ua tupu, ua tatou iloa ai, e lē faigofie le tulaga ua oo i

ai Iopu ma lona aiga. Auā o lea ua fasiotia uma le fanau, ma aveesea

uma le tamaoaiga faale-tino sa iā te ia, ae ua leai nei se mea e tasi o

totoe iā te ia.

O le ogaoga lea ma le matuitui ua feagai nei ma Iopu, auā ua aafia mea

uma, o lona tino, mafaufau, ma lona loto. A e ui lava i lea, afai lava o le

Atua sa tamaoaiga ai Iopu i le tino ma le agaga, e talitonu foi, e eseese

lava ala e saili ma tofotofoina ai e le Atua lana fanau faatuatua. O lo o

taua i le fuaiupu 16, “O le afi na paū ifo mai le Atua.” O lona uiga la, o

lo o i aao pule lava o le Atua mea uma, e oo i aafiaga o lana auauna o

Iopu.

O lo o fa‟aalia mulimuli ane i le tala, e ui lava ina tafiesea mea uma e

oo i le fanau, mai ia Iopu, ae sa ia tautino lava; “Ia tumau ma

faamanūina pea le suafa o le Atua.” Auā o le Atua e ou mea uma na

aumai mo le tagata, o le Atua pule aoao foi na te toe aveese. O iinei o

lo o iloa ai le loto faatuatua moni o Iopu i le Atua, ma iloa tino ai foi

lona faamanuiaina faale-Agaga, auā sa tumau i le Atua, i itu aso faigata

o le ola tofotofoina. E leai se agasala a Iopu i ia mea uma.

GALUEGA FAATINO:


50

Taliga Fesili (Tali mai i le “Sa‟o po o le Sese)

1. O nei mea uma ua tutupu, o le taui lava lea o le tagata lē usiusita‟i

i le Atua?

Tali: Sese

2. Se tagata lava ina a faalii o Iopu, pe a fua i lana mea ua fai, o taua

i le fuaiupu e 20?

Tali: Sese

3. E ui lava ina maumau le ofu o Iopu e pei ona taua i le fuaiupu 7,

ae o le mea sili, o lo o atagia ai lona loto salamō i luma o le Atua!

Tali: Sa‟o

4. O Iopu, o le tagata faatamaoaigaina i le Agaga, auā ua aveeseina

mea uma ma fasiotia lana fanau, ae fai mai – “Ia faamanūina le

suafa o le Alii!”

Tali: Sa‟o

5. Afai o nei mea uma na tutupu o le tofotofoga o Iopu, ae o lo o

tā‟ua mai i le fuaiupu e 22 – E leai se agasala a Iopu, o sa‟o la le

mea ua fai iā Iopu pe sese?

Tali: Sa‟o (E pule lava le Atua i le mea e fai)

PESE: Pese ma Viiga 244 [f (1) & (2)]

A‟OA‟OGA:

1. O Iopu o le tagata onosa‟i.

2. Tofotofoina, pe mausalī le faatuatua.

3. Ia faamanūina le suafa o le Alii.

……………………………….



51

MATAUPU: FAAMALOLO E IESU LE TAUASO

SINI: Ia a‟oa‟o tamaiti ina ia iloa, o le faapupulaina e

Iesu o mata o le tauaso, lea ua malōlō ai; o le

fa‟aalia lava lena o galuega mamana a le Atua, e

ala iā Iesu ma le mea ua ia faia.



O le tala i le tagata na fanau mai lava i le lalolagi lenei o tauaso, ae ua

avea foi ma ala e tutupu ai manatu ma masalosaloga o tagata. Manatu

nisi, po o le agasala ua mafua ai ona faapea! Lea lava ua i‟u ina fesili ai

le au-so‟o iā Iesu, “Po o le tama ea, po o ona matua e agasala, ua mafua

ai ona fanau mai o ia o tauaso?”

Ona tali lea i ai o Iesu; E leai! E lē o le tama, e lē o ona matua foi e

agasala. Ae na fanau mai lava le tama o faapena, ina ia fa‟aalia ai le

mana o le Atua na te mafai ai ona faia so o se mea. O le galuega

faamalōlō a Iesu lea sa faapupulaina ai mata o le tama, o le fa‟aaliga

lava lena o le mana o le Atua.

Ona toe faapea atu lea o Iesu, “E tatau ona ou faia galuega a lē na auina

mai a‟u, manu o ao! Auā e lē toe mafai ona galue se isi i le po! Manū

foi o Ia i ai i le lalolagi, auā o Ia lava o le malamalama, e mafai ai ona

galueaina mea uma o loto i ai tagata.

Na uma loa ona tali atu Iesu faapea i ona so‟o, ona feanu lea i le

palapala, na palupalu ai le palapala i ona feanuga, ona ia avane lea o

palapala ua nini ai mata o le tama tauaso, ma fetalai atu loa i ai – “Alu

loa e mulumulu (fufulu) ou mata i le taelega i Seloa.” Ua alu le tama, ua

ia faapea ona fai e pei ona sa faatonu atu e Iesu, ma ua pupula ai ona

mata. Ua vaai tagata sa latou iloa o ia sa tauaso, a o lea ua pupula, ona

latou tau tōmanatu lea ma fesilisili solo. A o ia ua faapea mai, “O au

lava lenei!” Ua fesili atu tagata, pe na faapefea ona toe pupula? Ona

faamatala lea i ai e le tama le mea atoa na fai e Iesu iā te ia, ma le


52

faatonuga e alu e taele i Seloa! Ua latou fesili foi i le tama, “Po o fea o

i ai Iesu? A ua tali mai o ia, na te lē iloa.

Tamaiti, o le mana o le Atua, na te mafaia ai ona fai so o se mea lava e

finagalo ai o Ia, ae maise i lona alofa lavea‟i ma faaola i tamaiti e pei foi

o outou. O lea ua fa‟aalia iinei le mana alofa o le Atua, ina ua toe

faapupulaina e Iesu le tamaitiiti tauaso.


i) f (1) Rapi e, - o le faiaoga

ii) f (7)Taelega i Seloa - O Seloa o le igoa o le vai sa i tuapā o

Ierusalema, o le vai lea na auina i ai e

Iesu le tauaso e mulumulu ai ona

mata, ma pupula ai.

iii) f(7)Mulumulu - fufulu/faamama

GALUEGA FAATINO:

1. Fai se faatinoga (skit) pu‟upu‟u o le mea na tupu.

2. Fetufaa‟i ma lau vasega i ni fesili ma tali.

PESE: E alofa le Atua iā te au. (God loves me)

A‟OA‟OGA:

1. E mafai e le Atua mea uma.

2. Faatuatua i le mana o le Atua.

3. E alofa le Atua i tagata mama‟i.

………………………..


MATAUPU: IA MATAALA E LE AUNOA


53

SINI: Ia a‟oa‟o tamaiti ina ia latou iloa lelei, le taua ma

le tatau o le mataala pea e lē aunoa, auā e lē iloa e

se isi le taimi tonu e toe Afio mai ai le Alii.



O le manatu taua lea o faamanatu atu e Iesu i ona so‟o iinei, “Mataala”

O le mataala e mafai ai ona latou iloa le taimi tonu e toe foi mai ai Iesu

lo latou matai. Po o le a lē leva talu ona saunoa Iesu i nei upu, e tumau

a le moni. Ma e tatau ona mataala ma ia lava saunia faa-le-Agaga

tagata uma, auā e toe Afio mai lava le Alii. O lona uiga, galulue ma le

faatuatua i tofiga ua tofia ai e le Atua le ola, ae „aua le faapouliuligiaina

mafaufau ma agaga, i le ola lē faaeteete, inu „ava, po o le faamalie o le

ola i mea sēsē ma le lē faautauta. „Aua le avea faafiafiaga o le ola o fai

nei, ma avega mamafa iā i latou, ma galo ai le aso e toe Afio mai ai le

Alii. Nei faafuasei mai le aso e pei o se mailei iā latou, auā e oo mai

lava mo tagata uma o i le fogaeleele.

O le aso o le Alii, o le faamasinoga mo tagata uma lava. O le tāua lena

o le mataala, a e o le mataala e ō faatasi ma le tatalo. Auā o le tatalo, o

le feso‟otaiga lilo lea ma le Atua, o Lē e aumai ai le malosi e mataala ai

i mea uma ua tali oo mai. O le masani lea a Iesu, e alu i le ao i le

malumalu e a‟oa‟o tagata, auā e tumutumu i ai tagata e faalogologo iā te

Ia. Ae o le po, e alu ai i le mauga o Olive e nofo tatalo ai i lona Tamā,

auā o iinā o i ai le talitonuga, o afio ai le Atua e ou le malosi.

Tamaiti, e tele faigata o le ola e ono aafia ai tatou, ae tāua le mataala,

ma toaga e tatalo. O le tamaitiiti ma le teineitiiti e mataala, o le tama

lena ma le teine, e mafaufau pea e lē aunoa, usiusita‟i ma mulimuli i

poloaiga a ona matua, auā o mea na e manuia ai. O le usiusita‟i foi ma

mulimuli i faatonuga a matua, o le faailoga lava lena o le tamaitiiti e

mataala i luma o le Atua, ma fai le finagalo o Iesu.



54

i) f(34) mafatia - tigaina

soona ulavale - ova le ulavale/tele nauā mea le

sa‟o ua fai.

mailei - togafiti e maua ai, pe aafia ai.

ii) f(35) fogaeleele uma - lalolagi atoa

mataala - mataalia/nofo sauniuni i taimi uma.

GALUEGA FAATINO:

Taliga Fesili (Fa‟aaoga lau Tusi Paia)

1. O le a le mea o popole i ai le Tusitala, o mafua ai ona naunau mai

ina ia mataala tagata uma?

Tali: O le popolega o le Tusitala, ona e leai se isi na te iloa tonu le

taimi e afio mai ai le Alii. Na o le tagata mataala na te iloa, ma

mautinoa le faasaoina.

2. Aisea e lē faigofie ai ona iloa e le tagata lea aso, ae oo mai ā o ala,

auā o lo o fiafia ma olioli i le lalolagi?

Tali: E lē faigofie ona na o ona mata faa-le-tino o ala ma mataalia i mea

a le lalolagi, a o ona mata faa-le-Agaga, o lona loto faatuatua i le

Atua, ua matuā vāivāi lava ma leiloa le Alii.

3. O le a le uiga moni o le mataala iinei?

Tali: O le tagata e tapenapena lelei lona loto ma mafaufau i le Atua i

taimi uma; ae lē o le matapupula i tuinanauga o le olaga nei.

4. O le a le feso‟otaiga o le tatalo ma le mataala?

Tali: O le tatalo, o le feso‟otaiga lilo a le tagata ma le Atua, ma so o se

tagata e fiafia e tatalo, o lona uiga, o lo o feso‟otai pea ma le Atua

e lē aunoa. O lagona foi e lona loto e lē aunoa le fetalai mai o le

Atua, ma mafaufau ai pea i le Atua i taimi uma.

PESE: Pese ma Viiga 146 ( f 3)


55

A‟OA‟OGA:

1. E mataala tagata o le Alii.

2. E leaga le soona ulavale.

3. Fiafia i le tatalo.

…………………………….

MANATU TAIALA O AUKUSO:

“AUAUNAGA MO LE ATUA”

O le ola auauna i le Atua o le faia lava lea o lona finagalo. O galuega

uma foi ma tiute eseese ua tatou galulue ai, o tofi ma tiute mai le Atua.

E oo lava ia i tatou le fanau i le feagai ai ma le ola a‟oa‟oina, o vaega

uma ia e fa‟aalia ai lo tatou ola auauna mo le Atua. O le avea ma auauna

e lē faigofie, peitai ua aumaia e lo tatou Alii Faaola le fa‟aa‟oa‟o sili, e

ala i le ofoina o lona ola o lana lea auaunaga mo le lalolagi atoa. O lea

ia tatou iloa ona galulue ma le faamaoni e auauna mo le Atua.

ASO SA: 7 AOKUSO 2016

MATAUPU: IA OLA FESOASOANI

SINI: Ia a‟oa‟oina le fanau ia malamalama - E tāua le

ofoina atu o le fesoasoani mo ē manaomia, auā o

le faia lava lea o le finagalo alofa o le Atua.

TUSI FAITAU: Iosua 2: 1 - 7


Ina ua oti Mose ona tofia lea o Iosua le atalii o Nuno e ta‟ita‟ia le nuu o

Isaraelu. Ua māfua ona avea Iosua ma ta‟ita‟i ona o se tagata ua lava

tapena. O lea lava tapena ona o ia o se tagata sa mulimuli ma vaavaai ia


56

Mose. Na ia talitonu foi i le mana auai o le Atua sa tauto‟aluaina le

galuega faa-ta‟ita‟i a Mose. E tula‟i mai Iosua ua latalata Isaraelu i le

nuu sa folafolaina. Peitai o le agai atu o Isaraelu i le nuu sa folafolaina e

le‟i faigofie auā e fetaua‟i pea ma nuu sa ui atu ai.

O le tasi o ia nuu o Ieriko. Na auina faalilolilo e Iosua nisi o ana fitafita

e toalua i Ieriko, o le faamoemoe ina ia iloa e Iosua ma fitafita Isaraelu

mea o lo o tutupu i totonu o Ieriko, aemaise o le faatulagaina o le aai ina

ia faigofie mo la latou osofaiga. Na iloa e le Tupu nei fitafita, ona auina

lea o fitafita Ieriko e saili iā i lā‟ua nei. Fai mai le tala o se fafine

agasala i manatu o tagata Isaraelu, o lona igoa o Raava. O le fafine lenei

sa ia faia le galuega fesoasoani i fitafita Isaraelu. O se galuega lelei tele

mo Iosua ma ana fitafita, auā ana leai le galuega fesoasoani a lenei

fafine e ala lea i lona faaulufale o nei fitafita ma faalafi i totonu o lona

fale, semanū e lē sao i lā‟ua.

Sa iite/masalomia e le tupu o Ieriko o lo o faalafi e Raava fitafita nei i

totonu o lona fale ona aami foi lea o Raava ma fesiligia o ia. O le

galuega fesoasoani na faia e Raava, sa ia lē faailoaina i le tupu o lo o i

ai fitafita Isaraelu i lona fale. O lona uiga sa ia pelogia le tupu o Ieriko.

O le mea moni ana faapea e tautala sa‟o lenei fafine semanū e feoti nei

fitafita Isaraelu. E lē o se mea leaga la na faia e Raava, auā e mulimuli

ane sa faasaoina o ia ma lona aiga ina ua soloia i lalo pa o Ieriko ma

faatamaia loa e le mana o le Atua auai iā Isaraelu.

Na toe faasaoina nei fitafita ina ua toe faasola e Raava e ui atu i le isi

ituala. O le galuega fesoasoani a Raava o se galuega sa faia mo le

saogalemu o fitafita Isaraelu. O se galuega foi o lo o tauleleia ai lenei

fafine o Raava, auā sa toe faia ai e le Atua le galuega fesoasoani mo ia

ma lona Aiga.


i) Asiasi faalilolilo - o e leiloa e nisi, „aua nei iloa mai.

ii) Vaavaai - matau, ia iloa.

iii) Nanā - faalafi

iv) Asaga - faailoga o le auala


57

GALUEGA FAATINO: Taliga Fesili

i) O ai le igoa o le tamā o Iosua?

Tali: Nuno.

ii) Aisea ua filifilia ai Iosua e ta‟ita‟ia le nuu o Isaraelu?

Tali: Ona o ia o le tagata ua tapena e ala i faata‟ita‟iga mai iā Mose,

auā sa mulimuli iā Mose a o avea ma ta‟ita‟i.

iii) Aisea na auina faalilolilo ai e Iosua ana fitafita i Ieriko?

Tali: Ina ia vaavaai ma matau le faatulagaina o le nuu mo la latou

osofaiga

iv) O ai le igoa o le fafine sa nonofo ai nei fitafita?

Tali: Raava

v) O le a le taui o le galuega fesoasoani sa faatinoina i le tala?

Tali: Sa faasaoina le tinā iā Raava ma lona aiga.

A‟OA‟OGA:

1. Ia tatou fiafia e fesoasoani atu i isi tagata

2. O le fesoasoani atu, o le faia lava lea o le finagalo alofa o le Atua

3. E tauia e le Atua pe a tatou ola fesoasoani

4. Faatino le ola fesoasoani i totonu o Aiga.

TATALO:

Faafetai le Atua i lou fetalai mo i matou le fanau i lenei taeao fou. O lau

Afio na e faia le galuega fesoasoani mo matou e ala i le soifua o lou Alo

Pele o Iesu Keriso. A ua matou tatalo ia atagia pea i o matou tagata uiga

lelei ma le ola fesoasoani atu i isi tagata. E ala iā Iesu…Amene.

………………………


58


MATAUPU: O LE LEOLEO MAMOE LELEI

SINI: Ia a‟oa‟oina le fanau ia malamalama, o Iesu o le

leoleo mamoe lelei.

TUSI FAITAU: Ioane 10:1 – 6


O le tala sa faitauina o se tala faa-faatusa (Faataoto). O lo o faatatau i le

tagata leoleo mamoe ma le tiute faa-leoleo mamoe lelei. O se Faataoto o

lo o tautala ai Iesu i tagata faa-fiaamiotonu e pei o le au Faresaio ma isi.

O le vaega taua muamua o lo o tā‟ua i le Faataoto - O le Faitoto‟a. O le

Faitoto‟a, o se vaega faapitoa lea e ulufale ai i totonu o se fale po o se

pa. O lona uiga afai ae fia ulufale se isi i totonu, e tatau lava ona ui atu i

le faitoto‟a. Auā afai ae lē ulufale e ala i le faitoto‟a, o lona uiga e tā‟ua

lea tagata o le gaoi ma le faomea. Peitai o le tagata e ui atu i le faitotoa

o le lotoa mamoe, o ia lava lea o le leoleo mamoe e pule i le pa mamoe.

O le vaega taua lona lua – O le Va-Feso‟otai o le leoleo mamoe ma le

lafu mamoe. O le va-feso‟otai ua matuā vava lalata. E lē iloa gofie ni

aga feso‟otai o mamoe e mautinoa ai le mafanafana o mamoe ma le

leoleo mamoe. Peitai e faigofie ona iloa i le natura o meaola. Ua iloa

lava e le mamoe le siufofoga/leo o lona matai, o le manogi o le leoleo

mamoe aemaise o aga faaleoleo mamoe.

A o se vaaiga lava ia i se Leoleo Mamoe lelei, o se tagata ua matuā

tapena lelei mo le galuega i ia ona aso. O lona to‟oto‟o umi e i ai le mea

pio e lave mai ai le mamoe ua tau pau atu i le vanu. O lona ofu talaloa

mo le malulu ma le ie pulupulu e afisi ai ma faamafanafana i tamai

mamoe. O lana ato afisi o lo o i ai le maata i totonu e tete‟e atu ai i

manu feai e osofai le lafu mamoe. Aemaise ai o le tapenaina o le

faguvai ma le meaai auā sona malosi. O nisi lava o Leoleo mamoe ua

ave ma sana mea faaili e usu ai le pese e faamomoe ai mamoe, ae taofia

ai lona matamoe. O mea uma ia e iloa ai le leoleo mamoe lelei. Peitai, e


59

mafai ona aofia uma nei uiga faaleoleo mamoe i le FAAMAONI. Auā a

leai se faamaoni i le leoleo mamoe, e lē mafai foi ona ia faatino uma

mea e pei ona ta‟ua e iloa ai le leoleo mamoe lelei.

O se feau foi lea mo tatou le fanau – E tāua lo tatou faamaoni i totonu o

tatou aiga. O tatou amio e atagia ai le leoleo mamoe lelei, o le faia lava

lea o le faamaoni. O Iesu Keriso o Ia lava o le leoleo mamoe lelei, o

lana galuega faaola, e ala i lana galuega faamalōlō ma isi, na oo lava i

lona soifua na ofoina ma le faamaoni, ua atagia ai uiga ma amioga o le

leoleo mamoe lelei.

Uiga o Upu:

i) Lotoā - o le pa mamoe

GALUEGA FAATINO:

i) Faamatala mai ni vaaiga e pei ona ta‟ua i le tala e iloa ai le Leoleo

Mamoe lelei?

Tali: E i ai lona to‟oto‟o, o lona ie pulupulu e faamafanafana ai tamai

mamoe, o maatā e tete‟e ai le fili, o lana meaai, ma se mea faili.

ii) O le a le ta‟u e ta‟u ai le tagata e lē ui atu i le faitoto‟a?

Tali: Gaoi po o le Faomea

iii) O le a se taua o le va-feso‟otai o le leoleo mamoe ma ana mamoe?

Tali: Auā foi e mafanafana ai mamoe ma le leoleo mamoe.

iv) Aisea ua tā‟ua ai Iesu o le leoleo mamoe lelei?

Tali: Ona o lana galuega faamalōlō, ma vavega mo e mama‟i, aemaise

o le faaolaina o e ua maliliu.

PESE : Alaga le siufofoga o le leoleo mamoe…….

A‟OA‟OGA:


60

1. Ia tatou maua le faamaoni o le Atua.

2. O Iesu o le leoleo mamoe lelei, o le fa‟aa‟oa‟o sili mo i tatou.

3. O Iesu o le faitotoa o le lotoa mamoe i le ola e faavavau.

TATALO:

Lo matou Tamā o i le Lagi, o lau Afio o le leoleo mamoe lelei. O lau

fa‟aa‟oa‟o e matou te maua ai le ola e faavavau. Alofagia i matou le

fanau, puipui malu lo matou ola mai faaosoosoga a le fili e osofaia lau

lotoa mamoe. Aumaia le faamaoni o lau Afio e matou te ola ai.

Faamagalo i ni o matou sese. E ala ia Iesu lo matou Alii…Amene.

…………………………


MATAUPU: TAUTINO LE MEA MONI

SINI: Ia a‟oa‟oina le fanau ia malamalama – E ao lava

ona tautino ma ta‟u mea moni, ae „aua tatou te

tala pepelo atu i nisi. O le mea moni, o le mea lea

mai le Agaga o le Atua.

TUSI FAITAU: Ruta 1: 1 – 17


O le tala i le tamā ia Elimeleka ma lona toalua o Naomi ma le la fanau

tama e toalua o Maalona ma Kiliona. Sa nonofo i latou i Peteleema i

Iuta. Peitai, ina ua tupu tele le oge i Peteleema ona latou ō ai lea i le nuu

o Moapi ma nonofo ai. Auā sa mau pea ma tele meaai i le nuu o Moapi.

Na maliu ai Elimeleka le tamā o le aiga i Moapi, ae faiāva ai tama e

toalua i teine Moapi. O Orepa ma Ruta igoa o tamaitai. E tusa ma le

sefululua tausaga o nonofo ai pea Naomi ma lana fanau tama ma o la


61

taitoalua, ae maliliu uma loa tama o Maalona ma Kiliona. Ona manatu

ai lea o Naomi, o le a toe foi i lona nuu moni o Peteleema i Iuta. Auā ua

faalogo Naomi ua uma le oge tele sa feagai ma le nuu.

Na faigata iā Orepa ma Ruta ona tuua na o Naomi e foi na o ia, e ui ona

ua maliliu o la ta‟itoalua le fanau a Naomi. O le faailoga lea o le alolofa

faamaoni o nei tamaitai iā Naomi. Na i‟u ai lava ina o Naomi ma nei

fafine e toalua. A o alu pea le faimagalaga a nei fafine e toalua, na

manatu Naomi e sili ai ona talanoa iā Orepa ma Ruta ina ia la toe foi ia i

Moapi. Fai mai Naomi – “O ia oulua ina foi atu taitasi i le aiga o lona

tinā, Ia agalelei le Alii iā te oulua”Ua manatu Naomi, o ia ua matua

ailoga a toe maua se fanau tama e fai ma tane a nei tamaitai. Ae afai foi

e maua ni fanau tama, e la te faatali ea sei matutua i laua?

Na faamavae Naomi ia Orepa ona toe foi lea o Orepa i lona nuu moni,

peitai sa lē mafai ona foi Ruta ona o lona alofa faamaoni iā Naomi. Sa

taumafai pea Naomi ia fo‟i Ruta. Peitai, ua tupu tele le alofa o Ruta iā

Naomi, le ala lea na matuā tautino ai e Ruta lona alofa faamaoni i le tinā

o lana avā. E iloa le tautinoga faamaoni a Ruta e ala i ana upu – Auā o

le mea e te alu i ai, ou te alu ai foi, o le mea e te nofo ai ou te nofo ai

foi, e fai lou nu‟u mo‟u nu‟u, e fai foi lou Atua mo‟u Atua. E le‟i pepelo

le alofa o Ruta iā Naomi, auā na taunuu lava ia upu. Ua mulimuli lava

Ruta iā Naomi ma tausi iā te ia e pei lava o sona tinā moni.

O le feau foi lea mo tatou le fanau, O le alofa moni o tatou i matua, e

tatau ai ona tatou matuātautino le mea moni. O lona uiga, „aua nei o

tatou olegia pe pepelo i o tatou matua. O le mea moni e ese le faamaoni

o le alofa o tatou matua ia i tatou, e tatau ai foi ona tatou tautatala i le

mea moni i o tatou matua.

O Iesu na ia tautino le feau moni na auina mai ai o ia e lona Tamā, e ala

i lona ola na ofoina mai ma le atoatoa. O lona ola ua magalo ai

tautinoga sese ma mea le moni sa tutupu i lo tatou ola.

Uiga o Upu:

i) Oge – ua leai ni meaai.

ii) Sogi – faafeiloai, kisi.

iii) Siliga – fiu e faatali.


62

GALUEGA FAATINO:

Tusi mai le gafa o lo o ta‟ua i le Tala, fa‟aaoga le ata o le laau (Family

Tree).

Apimeleko Naomi

Ruta Maalona Orepa Kiliona

PESE: Le Alofa o le Atua e ofoofogia………..

A‟OA‟OGA:

1. Ia tatou iloa ona tautino le mea moni.

2. Ia moni lo tatou alofa i matua.

3. „Aua le ola pepelo.

…………………..


MATAUPU: O LE FAFINE AIŪ.

SINI: Ia aoaoina le fanau ia malamalama - E lē lelei le

ola aiū, e ao lava ona tufa atu ma alofa atu i nisi o

manaomia se fesoasoani.

TUSI FAITAU: Ioane 4: 7-15


63


A o faagasolo pea le galuega a le Alii Faaola e ala i ana faamalologa,

papatisoga, ma vavega na ia faia. Sa taumulimuli pea i ai le Au Faresaio

e tau faaleaga i le galuega a Iesu. Ina ua faalogo ai Iesu i nei tagata, ona

tuua lea e Ia o Iutaia, a ua toe maliu atu i Kalilaia. Na ui atu o Ia i le aai

o Samaria. Ua oo atu o Ia i le tasi aai o Samaria, o Sukara le igoa, e

latalata ane i le fanua na avatu e Iakopo i lona atalii o Iosefa. Ua lagona

e Iesu le vaivai, ona malōlō ai lea o ia i luga o se tasi vaieli.

A o malōlō pea Iesu i luga o le vai, na alu ifo se tasi fafine o Samaria e

utuvai. Na fetalai ai Iesu ina ia avane sina vai sei ona inu ai, peitai na

aiu lenei fafine. O le manatu o lenei fafine, o ia o le Samaria a o Iesu o

le tagata Iutaia. A o le tu ma le aga masani lea i le va o tagata Iutaia ma

tagata Samaria, o ē ua taua o nuu ese. E lē mafai ona feavea‟ia a latou

mea. E manatu ai o le ala lea o le aiū o lenei fafine e avane sina vai sei

taumafa ai le Alii Faaola.

O le fafine sa aiū, ae mulimuli ane ua toe aisi iā Iesu i le vai ola, auā na

toe fetalai ai Iesu ana ia iloa le mea foa‟ifuaina, ma le tagata lea e fai atu

iā te ia, Aumaia ou te inu…E manatu ai o le isi lea mafuaaga o le aiū o

lenei fafine, auā foi e na te le o iloa o Iesu le tagata lea o lo o aisi atu iā

te ia mo sina vai sei inu ai.

I le manatu lava ia, e ui i se tu ma se aga e lē feavea‟ia mea a Iutaia ma

Samaria. Ia po o le leiloa foi e lenei fafine o Iesu. Peitai, o le alofa lava

ia e leai ni ona tuaoi. Auā ana faapea e i ai se loto alofa o lenei fafine

semanū lava e na te ave lava sina vai mo Iesu. A o le uiga lea o le tagata

aiū, e mafua ona aiū ona e le o i ai se loto alofa atu i isi tagata. E leai se

manao e na te ave se mea ma se isi tagata. Lea ua a‟oa‟o i ai e Iesu – o

le vai o lo o ia aiū ai, o le vai e inu pea. O le vai e toe fiainu foi, e alu ai

ma toe foi ane e utuvai. A o le vai e na te avatu iā te ia o le vai ola, e lē

toe foi ane ai e utuvai. O le vai lena o le Alofa Tunoa o Iesu Keriso. Ua

a‟oa‟o Iesu e le tatau ona ia aiū i le vai, leaga e le gata o ia na ia faia le

vai o lo o aiū ai, ae sili atu foi le faamalieina e maua i lana vai sili o le

Alofa Tunoa. O se feau mo tatou ina ia „aua tatou te aiūū, ma lima mau

i mea tatou te maua. Ina nei sili atu mea e maua e nisi nai lo mea o lo o


64

tatou aiūū ai. E ao lava ona tatou faasoa manuia ma mea lelei uma ua

tatou maua, aua e mulimuli ane e tatou te aisi foi.

O Iesu Keriso, na ia le aiū e faali mai le finagalo alofa o lona tamā. Ina

ua ofoina mai lona ola atoatoa ina togiola ai le tagata agasala ina tatou

maua ai le vai sili e tatou te le toe fia feinu ai e faavavau.

Uiga o Upu:

i) Utu - ki, asu.

ii) Feaveai - fesuia‟i, aumai ma avatu.

iii) Mea foai fua - o le alofa fua mai, alofa tunoa.

iv) Vaiola - vai e ola e le mavae.

v) Vaipuna - vai e puna pea e lē pe.

GALUEGA FAATINO: Saili mai upu o lo o i totonu o le poloka?

Faalava ;

1. Igoa o le nuu na malōlō ai Iesu? (Sukara).

2. E le ________ mea a Iutaia ma Samaria (Feaveaia)

3. Igoa o tagata sa tau faaleaga i le galuega a Iesu (Faresaio)

Faatutu:

4. E mafua ona aiū ona e leai se_______________ (alofa)

5. Ana e iloa le mea ____________ fua ina mai (foai)

6. O le a le mea foai fuaina mai?? (alofa tunoa)

A E F E A V E A I A

L I O P E S S F E L

O S U N O F L O S O

F E N M F O K A A F

A F S L A M O I S A


65

E O A K T P P A O T

R P M A U M U S M U

D L K S N P I E P N

F I F A R E S A I O

M S U K A R A E N A

PESE: Alofa Iesu iā i tatou uma….

A‟OA‟OGA:

1. „Aua le ola aiū.

2. Faasoa ni manuia ua tatou maua.

3. Alofa i le isi ou uso a tagata.

………………………………

MANATU TAIALA O SETEMA & OKETOPA:

“FAATINO FAATAITAIGA LELEI”

E taua upu ma faamatalaga ae sili ai ona leotetele faatinoga. O foliga

vaaia ia e iloa tino ai le moni ma le atoatoa o se mea e loto i ai. E le o

taimi uma foi e sa‟o ma lelei ai faatinoga. Peitai a faavae i le alofa ma le

Agaga o le Atua, ona manino ai lea o faatinoga e fai ma faata‟ita‟iga

lelei mo nisi. O faata‟ita‟iga lelei o se faatinoga lea e te fa‟aalia mo le

isi uso a tagata ina ia ola ma faatino e lea foi tagata. O le faamoemoe ia

fai ma avefeau e tauave ai pea lea lelei.

ASO SA: 4 SETEMA 2016

MATAUPU: IA OLA FELAGOLAGOMA‟I


66

SINI: Ia a‟oa‟oina le fanau ia malamalama, e taua le ola

felagolagoma‟i. O le galulue faatasi, e fesoasoani

le tasi i le isi.

TUSI FAITAU: Ioane 21:1 – 14


O le tala i le faiva o le auso‟o i le vai o Tiperia. O se galuega sa

atamamai ai le toatele o nisi o le auso‟o, auā na valaauina mai nisi o

so‟o a o i ai i latou i tapenaga mo faiga faiva. Na tapena le faiva e na‟o

Simona Peteru na sauni e alu e fagota, peitai na faalologo ai nisi o so‟o

o lo o ta‟ua i le tala e pei o Toma, Natanielu ma atalii o Sepetaio, ona

mananao ai lea latou te o ma Simona Peteru. O le uiga lea o le ola

felagolagoma‟i, aua ua o faatasi le auso‟o e fagogota. E ui lava e mafai

lava ona fagota na‟o Simona Peteru, a o le mea tāua o le ō faatasi e

felagolagoma‟i e faigofie ai le faiva ma vave maua ai i‟a.

Peitai, faimai le tala na alu le po atoa o fagogota le auso‟o e lē maua se

i‟a. Ona faaali ai lea o Iesu i le vaveao i ona soo. I le tala lava ia o le

fa‟aalia o le mana silisili ese o Iesu Keriso. E ui ona ua alu le po atoa e

le maua se i‟a. Peitai, e taua le felagolagoma‟i o le auso‟o. O le ala foi

lea o le fa‟aali ai o Iesu i le auso‟o. Ia iloa ma mautinoa e le auso‟o le

Agaga felagolagoma‟i ina ua ia fesoasoani i lo latou faiva.

Ua mautinoa lagona o le vaivai ma le lē lavavā o le auso‟o. A ua fetalai

Iesu ina ia toe lafo le upega i le itu taumatau. O le uiga moni lava ia o le

fa‟aalia o le mana silisili ese o Iesu Keriso. O lona mana lea na atagia

ma iloa ai le felagolagoma‟i o le tagata ma le Atua e ala i lona Alo pele

o Iesu Keriso. A o le faamoemoe sili lea na manatu i ai le Alii Faaola –

ina ia galulue felagolagoma‟i le auso‟o e faatino le galuega tala‟i ua

tofia i latou e galulue ai. Lea ua iu ina tali fa‟aaliali le Agaga o le

felagolagoma‟i, ina ua maua i‟a o le faiva o Iesu ma ona so‟o.

Na taumate nisi so‟o iā Iesu peitai o le maua ai o i‟a o le faiva. O le

faailoga lea na iloa manino ai e le auso‟o, e moni lava o lo latou matai o

Iesu lenei tagata. E lē gata ua fesoasoani le Alii Faaola i le faiva, a ua

fesoasoani foi i lagona ma manatu o le auso‟o. Auā ua suia le vaivai


67

mai le po atoa i le malosi, ua suia foi le fefe ma le faanoanoa i le fiafia

ua a‟e manuia le faiva. Faimai ua lē mafai ona toso ae lē upega auā ua

matuā tele le i‟a. Na iu ina o ifo ai nisi o so‟o sa i uta ma fesoasoani i ai

i le tosoga o le upega ua tele ai i‟a. O le ata lava o le galulue

felagolagoma‟i e faia ai se galuega ona mama lea ma vave ona maea.

I le maliu o Iesu Keriso, na ia aumaia ai le Agaga o le felagolagoma‟i, e

ala i lona toto ina ia magalo ai le va feso‟otai sa fefulituaa‟i ona o le

agasala. Na ia manumalo mai le oti ma le tuugamau, ina ia afio i le lagi,

ae aumai le poloaiga sili – Ia outou fealofani, o le ola felagolagoma‟i

lava lea.


i) Vai o Tiperia - O le vaitafe lea i totonu o Kalilaia.

ii) Taumafa - meaai

iii) Alofaina - mafanafana le mafutaga, alofagia.


i) Lisi mai igoa o so‟o o lo o tā‟ua i le tala?

Tali: Simona Peteru, Toma (Titumo), Natanielu, Atalii o Sepetaio, ma

isi e toalua.

ii) Aisea e taua ai le ola felagolagoma‟i?

Tali: E vave ma mama ai se galuega e faatinoina.

PESE: Ou te faia outou ma faifaiva i tagata….

A‟OA‟OGA:

1. Ia tatou galulue faatasi.

2. Ia ola fesoasoani le tasi i le isi.


68

3. Ia atagia le ola felagolagoma‟i i totonu o Aiga.

4. Ia usitai i matua.

…………………


MATAUPU: „AUA LE OLA FA‟APITO

SINI: Ia a‟oa‟oina le fanau ia malamalama – e le tatau

ona faapito lo tatou alofa na o tatou lava. A ia

faasoa manuia ua tatou maua.



O le tala sa faitauina – O se taulealea mai le motu o tagata na alu ifo ma

fesili iā Iesu, ina ia fetalai ifo i lona uso. Ina ia vaelua a‟e le tofi iā te ia.

E iloa mai ai e le o lelei le va o lenei tagata ma lona uso matua. O lo o

fa‟aalia ai le ola faapito o le uso o lenei tagata mo ia lava, ae ua le

faasoa ane ona manuia ua maua. Lea lava ua saili fesoasoani lenei

tagata iā Iesu. Na fetalai manino Iesu – “Ia outou ia leoleo outou iā te

outou „aua le matapeapea, auā e lē ola se tasi i le tele o ana mea ua iā

te ia” O lona uiga e lē tatau ona e mitamita i le tele o mea ua e maua,

auā e te lē ola ai e faavavau i le tele o mea e maua, ae ao ona e faasoa

ma tufa atu i nisi o mana‟omia le fesoasoani.

Na tali Iesu e ala i lona faamatalaina o le faataoto po o le tala faa-

faatusa – Faimai o se tasi tagata mauoa sa fai lona togavine tele lava. Ua

fua tele mai, ona fesili lea i lona mafaufau – Po o le a sana mea o le a

fai, auā e leai se fale e faaputu ai saito..(Manaia foi ae tovā ai i se fesili

e tuliloa ai mafaufau o le fanau – A tele ni mea e maua – O le a se mea

e tatau ona fai? ff togafa‟i – A oo ina tele le aufai ua pula, e saga


69

faaputu ai lava ina ia tele….Ioe!!! o le manatu e lē tatau ona saga

faaputu, e ao ina faasoa atu mo nisi tagata.

Peitai sa lē manatu lenei uso matua e faasoa le saito mo lona uso laitiiti.

A ua manatu o ia ina saena pe elia nisi ona fale saito ina ia faaputu ai

ma ia lava. O le manatu faapito lea o le uso iā te ia lava, auā e lē gata ua

ia saga faaputu i ana saito, a ua fai ifo foi i lona lava loto ma ona

mafaufauga – Lo‟u Agaga e, ua iā te oe mea lelei e tele ua teuina mo

tausaga e tele, ina ia nofonofo filemu ia, ina ia ai ma inu ma ia e olioli.

Ioe tamaiti, o le tagata lava ina a ola ma manatu faapito, o le a manatu

ea e ola lelei na o ia, ae faafefea si ona uso o lo o mana‟omia sina saito

e ola ai???.

Ua manatu lava le uso matua o ia ua ola filemu i lenei olaga atoa i le

tele o ana mea ua maua. Ua manatu o ia ua atamai auā ua leai se mea e

toe popole ai. Peitai, e le o le finagalo lea o Iesu Keriso, e lē mana‟o

Iesu i le ola faapito ma le ola le alofa i le uso a tagata. A lea ua tali

manino le Alii Faaola – O oe na le vale e aamiina atu lou agaga nai ia

te oe i le po nanei, a e fai ma ai mea ia ua e saunia. O le uiga o lea upu

tamaiti. Afai ae oti nanei lenei tagata ma ana saito e tele, o ai la o le a

ave ma ia???O le finagalo o le Atua „aua tatou te manatu faapito auā o

mea tatou te maua e le o tatou e ana ia mea, a o meaalofa a le Atua ua

faasoa mai mo i tatou. E tatau ai foi, ona tatou toe faasoa atu mo tatou

uso a tagata.

I le satauro o Iesu Keriso, e le‟i manatu faapito Iesu mo Ia lava. A ua

aumai ma faasoa mai lona ola atoa ina ia maua ai e nisi le ola e

faavavau ina ua magalo a tatou agasala.

Uiga o Upu:

i) Vaeluaina - faasoa i vaega e lua, tufatufa.

ii) Faamasino - faia faaiuga.

iii) Matapeapea - manao tele, mana‟o, lē faamalieina

iv) Faaputu - tuu fatasi

v) Aamiina - amia, (oti), aveeseina atu.

GALUEGA FAATINO:


70

Faatumu avanoa o lo o i lalo i upu nei:- alofa, saito, mafanafana, tufa,

filemu, faapito, aso, faasoa.

O le va feso‟otai o le uso i le uso e tatau lava ona 1__________, Peitai o

le va o uso o lo o ta‟ua i le tala e le o i ai se 2__________. Ua soona

faaputu 3___________ a le uso matua, ae leai se manatu e

4__________ atu mo lona uso laitiiti. Ua manatu le uso matua o le a

nofonofo 5______________, ai ma inu i 6_________ e tele o lona ola.

Peitai, ua ese ona manatu ese le finagalo o le Alii Faaola. E finagalo

Iesu Keriso ina ia „aua nei o tatou manatu 7___________.

TALI: 1. Mafanafana

2. Alofa

3. Saito

4. Tufa/faasoa

5. Filemu

6. Aso

7. Faapito.

PESE: Alofa Iesu iā i tatou uma……

A‟OA‟OGA:

1. „Aua tatou te manatu faapito

2. Ia maua lo tatou alolofa atu i nisi tagata.

3. Talia ma le fiafia meaalofa mai le Atua

4. „Aua tatou te mana‟o tele.

…………………………..


71


MATAUPU: FAALOGO I LE ATUA I SO O SE TAIMI.

SINI: Ia a‟oa‟oina le fanau ia malamalama – E tatau

lava ona tatou faalogo i matua, ma ē matutua auā

o le upu fetalai mai lea mai le Atua.

TUSI FAITAU: Faataoto 1:20 – 30


O le tusi sa tatou faitauina, o lo o faatatau i le Poto. O lo o talanoa mai

ai le Tusitala o le Poto o ia o le tagata. O lona uiga o le poto ua fai lona

siufofoga e tauvalaau ai, ua i ai foi lona fofoga e tautala ai. O lona uiga

o le Poto o le Atua lava lea o lo o tauvalaau mai i ona tagata, o lo o

tautala mai foi i tagata amiotonu. Faimai o le Atua lea o lo o alaga i fafo

ua leotele i malae, i le mea e sili ona talili ai o tagata, o faitoto‟a o le

aai. O le alaga po o le tauvalaau, o le faamoemoe ina ia lagona ma

manino lelei i le faalogo a tagata. E feso‟otai le leo po o le siufofoga ma

le faalogo ona manino lea o se feau o lo o alagaina.

E tolu ni vaega taua tatou te manatunatu ai tamaiti i vaega o lo o

tauvalaau ai le Atua po o le Poto.

Fafo/Malae – O le malae o se avanoa e toatele ni tagata e ofi ai. O se

avanoa e taalaelae, le ala lea o le alaga leotele o le Poto ina ia lagona

lelei mai i so o se itu o le malae aemaise o fafo e tau le lagona ai se leo

pe a leo laitiiti. Peitai e ui i le leotele o le tauvalaau, ae maise ai o le

toatele o tagata. A ua faigata ona latou faalogo ma lagona le leo o le

Poto. Aisea?? auā foi ua fiafia e fai le agasala ma le amio sese.

Faitoto‟a o le aai – O le faitotoa o le auala lea e tatau ona ulufale uma ai

tagata i totonu. Auā e lē mafai ona ulufale se isi e ala atu i se faamalama


72

po o se isi avanoa. O le uiga o le manatu, o le faitoto‟a foi e maua uma

ai tagata. O le faitoto‟a lea o lo o tu ai foi le Atua/Poto ma valaau i

tagata uma o lo o ulufale mai i totonu. O le mea mautinoa – e tatau lava

ona lagona ma faalologo uma tagata o lo o ulufale atu i lē o lo o alaga

leotele.

Faigofie – O le vaega lea o lo o aafia uma ai tagata e lē o fia faalogo. O

tagata tauemu, o e valelea, o e lē amanaia se a‟oa‟iga. O le faigofie, o i

latou ia ua faigofie ona tosina i mea sese ma le agasala o lenei ola. Le

ala foi lea e latou te lē fia faalogo ai, auā ua faigofie ona faalogo i le

tiapolo, ae ua faigata ona faalogo i le siufofoga o le Atua o lo o alaga

leotele mo i latou.

E lua itu o lo o i ai i le tala, o le itu a le tiapolo ma le itu a le Atua. O lo

o tauvalaau mai le itu a le Atua, ae peitai e lē o faalogo i ai le itu a le

tiapolo. E alaga mai pea le itu a le Atua, ae o lo o mulimuli pea i le

tiapolo le itu a le tiapolo. O le itu a le tiapolo, o lo o i ai malaia,

atuatuvale, puapuaga, fefe, faitogafiti ma le tele o mea e lē lelei. A o le

itu a le Atua o lo o alaga, o lo o i ai le manuia, fiafia, ma le ola e

faavavau. O lona uiga o fea o nei itu e tatau ona tatou faalogo i ai? O le

itu a le Atua, po o le itu a le Tiapolo??? Ioe E tatau ona tatou faalogo i

le leo ma le siufofoga o le Poto, po o le Atua lava lea. I so o se taimi

lava e tatou maua ai i puapuaga o le ola nei, ia tatou faalogo i le leo o le

Atua.

I le satauro o Keriso, o le leo lea na alaga ina o le ā toe afio Iesu i lona

Tamā– Ia outou fealofani. O le leo e maua ai lo tatou nofo lelei ma le

fealofani sili. O le leo e tatou te maua ai le manuia i o tatou aiga, a o le

leo foi lena tamaiti o lo o alaga mai e ala i le upu a matua o lo o tatou

faalogo pea i ai i aso uma o le ola.

Uiga o Upu:

i) Alaga - tautala leotele, ee.

ii) Tauemu - faifai, vaai maualalo.

iii) Faaloaloa - tuu faasasa‟o lima i luga.


73

iv) Faigofie - augofie, tosina gofie, manatu māmā

v) Ata ai a‟u - fiafia

vi) Asiosio - o le matagi lea e agi faataaliolio

vii) Puapuaga - mala, faigata, faafitauli.

viii) Atuatuvale - fefe.

GALUEGA FAATINO: Taliga fesili

1. Aisea e tatau ai ona leotele i malae?

Tali: Ina ia lagona lelei lona siufofoga aemaise o le feau taua

2. O le a le taua o le faitoto‟a ua tu ai le Poto?

Tali: E maua uma ai tagata o lo o ulufale atu i totonu.

3. O a ni mafuaaga ua le lagona ai le leo o le Poto?

Tali: Ona ua tosina gofie tagata i mea a le tiapolo.

4. Lisi mai ni mea e iloa ai le tagata faigofie?

Tali: Tauemu, valelea, faitogafiti….

PESE: Faalogo ma le usita‟i…..

A‟OA‟OGA:

1. E taua lo tatou faalogo ma lagona.

2. Ia lagona le leo o le Atua mo i tatou.

3. „Aua tatou te tosina gofie i le tiapolo ma ana mailei.

4. E aumaia e le Atua manuia moi tatou.

TATALO:

Le Atua lo matou Tamā, faafetai i le leo o lau Afio ua matou faalogo ai

ma le manino i lenei taeao. Ua e fetalai pea auā lo matou ola a‟oa‟oina

mo lau Afio. Matou tatalo, ia saga tatala pea e lau Afio la matou faalogo

i au Afioga Paia. Fesoasoani lou Agaga i feau o le tala lelei o lenei aso.


74

Faamagalo ni o matou sese ina ua matou lē faalogo i lou leo..E ala iā

Iesu…Amene.

…………………………….


MATAUPU: O LE MEA E TE FUAINA ATU E TOE

FUAINA MAI

SINI: Ia a‟oa‟oina le fanau ia malamalama, „aua nei o

tatou pelogia le Atua, auā e mulimuli ane e toe

taui mai tatou e le Atua.

TUSI FAITAU: Galuega 5: 1 – 11


O le tala i se ulugalii o Anania le igoa o le tamā ma lona toalua o

Safaira. O lenei ulugalii sa galulue i se tasi Ekalesia, sa avea le tamā iā

Anania o se teutupe i le Ekalesia. Na tele ni tupe ma fanua o lenei

Ekalesia mo lona atinaeina, peitai na tosina le loto o le tamā lenei o

Anania i le tupe. Ona la faatau ai lea o nisi o fanua o le Ekalesia, sa o la

ave isi tupe i le lotu i Aposetolo, ae ua la nana ma fa‟aaoga nisi mo i

laua. Ua la pelogia le Atua e ala i tupe o fanua.

O le fua lea ua fuaina atu e lenei ulugalii, ua la fa‟aaoga i tupe o le lotu.

Na fesiligia e Peteru le Aposetolo po o fea uma tupe o le tau o fanua o

le lotu. Peitai, sa pelogia e lenei ulugalii le Aposetolo e la te lē o

fa‟aaogaina se tupe. O le isi vaega faanoanoa, ona ua autasi lenei

ulugalii e fai lenei pepelo. O lona uiga, ua faatonuina e Anania lona

toalua ina ia „aua nei tautala i le tupe o fanua ua la fa‟aaogaina. E le o se

amio lelei lea amio, auā sa tatau ona fautua malosi le tinā o le aiga i


75

lona toalua i se mea sese ua faia. O uiga ia o le mana‟o tele ma le

malosi o le oa e taufaasese i le tagata.

Na lilo i manatu o Anania o lo o sisila fofoga o le Atua, aemaise lona

Agaga o lo o auai i lana au Aposetolo e pei o Peteru. O so‟o ia ua i ai le

Agaga o le Atua e latou te iloa ai mea lilo ma mea sese. Na fesiligia

lenei ulugalii, ae sa le‟i mafai lava ona tautala i le mea moni sa tupu. Le

ala lea na faagaganaina ai e le Agaga Paia Peteru ina fa‟aalia ai le mea

moni. Anania e, se a le mea ua faatumu ai e Satani lou loto e te pepelo

ai i le Agaga Paia…..Faimai le tala, na faalogo loa Anania i ia upu, ona

paū ai lea o ia i lalo ua to lana manava ua maliu. Ona tutu lea i luga o

taulelea, ua teuteu iā te ia ma ave i fafo ua tanu ai. Ua mavae aso e tolu,

ona sau ai foi lea o le toalua o Anania iā Peteru. Ona fesiligia foi lea e

Peteru – Se a le mea ua lua loto gatasi ai e tofotofo i le Agaga o le

Alii???…Ona paū ai foi lea o le fafine ua to lana manava ma maliu. Ona

latou ave lea iā te ia i fafo ma tanu i tafatafa ane o lona toalua o Anania.

Ioe tamaiti! O le fua lea na toe fuaina mai ai le pepelo a Anania ma

Safaira, ua maua le pepelo ma ua feoti uma ona ua la tofotofo le Agaga

o le Alii. Ua a‟oa‟o mai ia i tatou lenei tala – „Aua tatou te olegia o

tatou matua, o matua o sui vaaia ia o le Atua i totonu o tatou aiga. E toe

taui mai e le Atua i tatou pe a tatou faia ni mea pepelo.

O Iesu Keriso o lo tatou Alii Faaola na Ia lē pelogia i tatou ina ua ofoina

mai lona ola atoatoa e fai ma sui oi tatou ona o a tatou agasala.

Uiga o Upu:

i) Faanana - nānā, faalafi, ave e aunoa ma se iloa.

ii) To lana manava - uma le manava,

GALUEGA FAATINO: Matega Tupua

E fai si o‟u malosi, o a mea e manao i ai e maua lava ia te au. E te maua

ai meaai e tele, o meafale e tele, o fanua e tele. Ua tele ina afaina nisi

ona o lo‟u malosi tele. O ai la au???? Tali: Tupe

O le mea e leai sona tino mai, e leai ni ona mata e iloa mai ai oe. Peitai

o lana vaai e iloa uma ai au gaioiga uma e oo a i tulu‟iga o le lalolagi. O


76

lona malosi e le gata mai, e tatau ai ona tatou faamaoni i ai, auā afai e te

sese ai, o lou i‟uga o le oti…..Tali: Agaga o le Alii.

PESE: O le Atua e telē, e malosi e matautia…….

A‟OA‟OGA:

1. „Aua tatou te pelogia o tatou matua.

2. Ia tatou fua atu le mea moni ma le faamaoni.

3. O le Atua e ati lana vaai ma lona iloa ia i tatou

4. Ia iloa ona faatoese ma tautino le mea moni.

TATALO:

Le Atua alofa e, o le Atua Lau Afio o le malosi. Matou vivii pea ma

faafetaia lau Afio, auā ua e a‟oa‟o mai pea ia i matou i lo matou ola

faamaoni e le gata i totonu o aiga, ae faapea foi i le va ma lau Afio. Afio

maia lau Afio e te faatumauina lo matou faamaoni, ia matou auauna atu

pea i lau Afio i le moni atoatoa. Faamagalo i matou auā ua matou fuaina

atu mea sēsē i le tele o taimi o lo matou ola…ona o Iesu…Amene.

…………………..

ASO SA: 23 OKETOPA 2016

MATAUPU: O LE TATALO A LE AO LAFOGA

SINI: Ia a‟oa‟o le vasega ia malamalama o le tatalo a le

ao lafoga, o se faataitaiga lelei mo i tatou, i le

auala tatou te tatalo ai i le Atua.




77

O le faataoto lenei a Iesu, o lo o ia a‟oa‟o mai ai le leaga o le tagata ua

manatu ifo o ia ua amiotonu ma lelei, a‟o isi tagata ua leaga.

Ua fa‟aaoga e Iesu tagata e toalua, e fai ma faata‟ita‟iga. O i laua ia o le

faresaio ma le tagata ao lafoga. O nei tagata o ni tagata e iloga o la

tulaga i totonu o le sosaiete. O le faresaio o le tagata e faamamalu i le

tausiga o le lotu faa-Iutaia. O faresaio o tagata ua vavae ese mai i le

toatele o le nuu ua faasaga i tu faapaupau. O tagata ao lafoga o i latou

ia sa tofia e le malo e ao lafoga po o tupe e totogi e tagata i le malo. O

ni tagata e inosia e le toatele o tagata ona o a latou amio e ao faasili

lafoga ina ia maua ai ni tupe mo i latou.

O lona uiga i le vaai lautele i nei tagata e toalua, e foliga mai e lelei le

faresaio, ae leaga le ao lafoga. O i laua la nei, o lo o taua na o a‟e i le

malumalu e tatalo ai. I le tatalo a le faresaio ua ia faatusatusa ai o ia ma

isi tagata. Fai mai a ia “Le Atua e, ou te faafetai atu iā te oe, ina ua ou

lē pei o isi tagata, o ē fao mea, o ē amio leaga, o ē mulilulua, e lē pei o

le la tagata ao lafoga foi.” E le gata i lea ua ia laulau ana mea lelei ua

fai e pei o lona anapogi ma ana sefulu a‟i.

Peitai o le tatalo a le tagata ao lafoga ua iloa ai le tagata e ava ma

mata‟u i le Atua ma iloa lona faatauvaa. Ua ia tautino foi lona sese ma

le agasala i luma o le Atua. O lea ua aioi mo se faamagaloga, fai mai

lana tatalo, “Le Atua e, ia e alofa mai ia te au le tagata agasala.”

Fai mai Iesu ua ta‟uamiotonuina le ao lafoga i lana tatalo. Aisea? Aua

foi sa tatalo ma le loto faamaulalo i luma o le Atua. Na te le‟i

faatusatusaina o ia ma isi tagata pe ta‟uta‟u ni ona lelei i luma o le Atua.

Tamaiti o se faataitaiga lelei lea mo i tatou, i le auala tatou te tatalo ai i

le Atua. Ia tatou lagona lo tatou lē aoga ma le faatauvaa i luma o le

Atua, ona o mea sese tatou te faia.

Uiga o Upu:

i) faresaio - o tagata ua vavae ese

ii) ao lafoga - tagata e aoina lafoga/tupe mo le malo.

(telona)


78

iii) anapogi - faatigaina o le tino ona o le agasala, e le

ai ai le inu.

iv) sefulu a‟i - o se foai sa faia e Aperaamo ia

Mekisateko (Kenese 14: 20)


Tali mai Fesili nei:-

1. O le a tonu le mea o lo o faatatau i ai le faataoto lenei a Iesu?

Tali: O lo o faatatau i le tagata ua manatu o ia ua amiotonu ae leaga isi.

2. O ai le tagatga faafiaamiotonu o lo o taua i le tala?

Tali: O le faresaio

3. O ai le tagata na lagona lona salamo i luma o le Atua i lana tatalo

sa fai?

Tali: O le ao lafoga

4. O a upu o le tatalo a le ao lafoga?

Tali: Le Atua e, ia e alofa mai ia te au le tagata agasala.

5. Ia Iesu ma lona finagalo, o ai na ia tauamiotonuina?

Tali: O le tagata ao lafoga.

PESE: 1. Ua a‟oa‟o mai o Iesu

Faamanatu mai ia i tatou

O le faafiaamiotonu

O se mea le tatau,

Aisea?

Faaleaga ai fua isi tagata

Toe feau uma au auaunaga

Manatu ifo o oe ua lelei

Ao isi e leaga.


79

2. Tatalo a le tagata ao lafoga

E taua tele lena a‟oa‟oga

Tatou fa‟aa‟oa‟o i ai

Aua e fiafia i ai le Alii

Aisea?

Ia tautino atu i tatou moni lava

O tagata agasala ma le faatauvaa

Ua salamo i luma o le Atua

Ma lana silafaga.

A‟OA‟OGA:

1. Ia salamo i luma o le Atua ona o agasala.

2. E le lelei le ola faafia amiotonu.

3. Aua le ola taufaaleaga.

TATALO:

Le Alii e, ia a‟oa‟o mai pea ia i matou ma ia o matou lagonaina le alofa

moni i lau Afio ma o matou uso a tagata. Ia avea foi i matou o ni fanau

e iloa ona salamo mai mea sese matou te faia, ona o Iesu ua matou

tatalo ai nei. Amene.

………………………………….

ASO SA: 30 OKETOPA 2016

MATAUPU: FALEPUIPUI AE LEAI SE AGASALA

SINI: Ia a‟oa‟o le vasega ia malamalama ua falepuipui

Iosefa ae leai sana agasala.

TUSI FAITAU: Kenese 39: 11 – 23


80


O le mea masani lava, a matuia ma ogaoga se agasala e faia e se tagata,

e faafalepupui e tuli ai lona faasalaga. O le falepuipui, e le o se nofoaga

lelei ma e leai foi se isi e fia oo i ai e nofo ai. E ola pologa toe saisaitia

ma leai se saolotaga e maua i lea nofoaga.

O le nofoaga la lea na tuuina i ai Iosefa e lona alii o Potifara talu ai le

pepelo o le ava a Potifara. O le mea sa tupu ua leva ona manao le ava a

Potifara la te momoe ma Iosefa, talu ai o Iosefa o se tama aulelei tele.

Peitai e le manao i ai Iosefa, ona o lona alofa i lona Alii. E le gata foi i

lea o Iosefa, o le tama e i ai le Alii i lona olaga. O lona uiga o ia o se

tagata e mata‟u ma alofa i le Atua. O le mafuaaga foi lea o le manuia o

mea na te faia ma ua manuia ai ma le aiga o Potifara.

E ui i le musu o Iosefa e talia le manao o le avā a lona matai, ae sa

taumafai pea le fafine e tauanau o ia i lea aso ma lea aso, peitai, e lei

mafai lava Iosefa. I se tasi la o aso ina ua alu atu Iosefa e fai ana

galuega masani, na tago atu ai loa le fafine i le ofu o Iosefa ma fai atu ia

te ia la te momoe. Na musu Iosefa ma ua sola i fafo ma le fale ae ua

uumau lona ofu i le lima o le fafine. O le auala la lea ua fa‟aaoga e le

avā a Potifara e tauleagaina ai Iosefa ma molia ai o ia.

Ua ia alaga i tagata o lona aiga ma ua fatu le pepelo e faapea ua sau

lenei tagata Eperu ia te ia la te momoe, peitai ua ia alaga leo tele ona

sola ai lea o ia i fafo ae tuu lona ofu.

Talofa e ia Iosefa, o lea ua tuuaifua ma faaleaga e le fafine. E tutupu

nei mea uma, e le o i ai Potifara. Ua tuu nei e le fafine le ofu o Iosefa

sei oo mai lana tane ona faailoa lea i ai o le mea ua tupu. Na lē fiafia le

alii ia Iosefa ona o le mea ua tupu, ma le lilo i ona manatu e pepelo lana

avā. O le ita tele o Potifara na ia tuuina ai loa o ia i le falepuipui.

E lei mafai e Iosefa ona tete‟e i le faaiuga ua fai ia te ia, peitai e le‟i

tuulafoa‟iina o ia e le Atua. Ua alofagia o ia e le pule o le falepuipui ma

ua tuu i ai le pule ia Iosefa ia i latou uma sa i ai i le falepuipui. Sa

faamanuia le Alii ia Iosefa ma mea uma sa ia faia, a o i ai o ia i le

falepuipui.


81

Uiga o Upu:

i) falepuipui - fale po o le nofoaga e tuu i ai tagata ua

faamaonia a latou solitulafono.

GALUEGA FAATINO: Tali mai i Fesili:-

1. O ai Iosefa lea o lo o ta‟ua i le tala?

Tali: O le atalii o Iakopo lea na agaleaga i ai ona uso.

2. Aisea na falepuipui ai Iosefa?

Tali: Ona ua pepelo le avā a Potifara e faapea na alu atu Iosefa la te

momoe ona ia alaga ai lea ae sola ai Iosefa ma galo ai lona ofu.

3. O le a se mea sa fai ma faamaoniga po o se molimau a le fafine i

le mea na tupu?

Tali: O le ofu o Iosefa.

4. Aisea ua fai ai e le avā a Potifara lenei mea?

Tali: Ona ua fiu e tauanau Iosefa la te momoe.

5. Pe moni le mea na molia ai Iosefa?

Tali: E leai.

6. O le a se tulaga na oo ia Iosefa i totonu o le falepuipui?

Tali: Sa alofagia e le pule o le falepuipui, ma ua tofia e pule ia i latou

sa i ai i le falepuipui.

PESE: 199 (Pese ma Viiga)

Iesu taitai oe

Ia i matou nei

Ui ina tigaina

Matou mulimuli pea

Sei ia taunuu ai


82

I le nuu lelei

A‟OA‟OGA:

1. „Aua nei talia ni fautuaga leaga.

2. Ia tumau i le Atua ma usitai i ai.

3. „Aua le molimau pepelo.

TATALO:

Le Atua e, ia e a‟oa‟o mai pea ina ia mafai ai ona matou lagonaina lou

finagalo ma lou mafuta mai. E mafai ai e i matou ona tete‟e atu i

faaosoosoga a le alii o lenei lalolagi ma manumalo ai. Amene.

………………………….

MANATU TAIALA O NOVEMA:

“IA TAUSI LE NOFOLELEI MA ISI TAGATA”

O le faamoemoe o mataupu o lenei masina, ia tumau le fealofani i le va

fesootai o tagata lautele faapea foi fanau. O le mea moni, e le solo lelei

ai pea aso uma o lo tatou ola. O le taimi ua fiafia o le taimi ua

faanoanoa. O le taimi ua alofa, o le taimi foi ua ita. O uiga masani ia o

le soifuaga e tutupu pea. Peitai e tatau lava ona vaavaai i ni itu e

faaitiitia ai feeseeseaiga, ae ia tupu pea le nofo lelei i le va o tagata. O

le tausia o le nofo lelei, e moomia ai le alofa, onosai, faapalepale ma

tausi le filemu. Faapei ona poloai le Alii Faaola, “Ia e alofa atu i le lua

te tuaoi, ia pei o oe lava ia te oe.”

ASO SA: 6 NOVEMA 2016

MATAUPU: AUA LE FAASESEINA I LE MALOSI O LE

OA

SINI: Ia a‟oa‟o le vasega ia malamalama ia aua nei

faaseseina i le malosi o le oa.


83



O le oa o le isi upu lea e tutusa o la uiga ma le tamaoaiga. O se

faamanuiaga e le maua e tagata uma. A maua e se tagata le oa ua

faigofie ona faatino ona manao ma e leai se mea e toe popole ai.

Peitai o se mea e ao ona fa‟aaoga ma le faautauta auā e mafai ona avea

le oa ma ala e sese ai ma le lagona ai le alofa i le isi uso a tagata. O le

tala e pei ona ta‟ua mai i le tusi faitau, o lo o faamatala ai le tagata

mauoa ma Lasalo le tagata mativa ma papala. O le mauoa ua lelei ona

laei ma mea e tausi ai lona soifua i aso uma. Ao Lasalo le tagata mativa

ua taatia i le faitotoa o le mauoa, ona o lona fia ai i mea o lo o toulu ifo i

le laulau a le mauoa, ae o le taimi foi lea o lo o etoeto ai e le uli ona

papala. E le o se olaga faigofie o lo o ola ai Lasalo, auā o le mea ua

mautinoa, e lē alofa i ai le mauoa. E tutusa i le vaai a le mauoa iā

Lasalo ma ulī. O se lagona ua iloa ai le manatu faatauvaa ma le augapiu

o se alofa o le mauoa mo le tagata o lo o fia maua se fesoasoani. A

manatu i le tele o lona tamaoaiga sa tatau lava ona fai se galuega sei tali

le fia ai o le tagata mativa, peitai ua aunoa ma se alofa. Ua faamaualuga

ma mimita i le oa ua ia maua.

Ua feoti uma le mauoa ma Lasalo, ona alu lea o le agaga o le mauoa i

seoli, ao Lasalo ua tietie i le fatafata o Aperaamo. O lona uiga ua i ai

Lasalo i le manuia a o le mauoa o le malaia. O le iuga ua la maua, e

faafeagai ma le olaga sa ola ai. O le manuia sa i ai le mauoa, ua leai. O

lea ua faafeagai ma puapuaga ona o le vevela o le afi. Ua ia manaomia

le fesoasoani a Lasalo le tagata sa lē alofa i ai. A o le mafuaaga lea o

lona oo i puapuaga, auā foi e le‟i alofa. Sa manatu faapito mo ia lava.

O lona taunuuga la o seoli ma le afi.

Uiga o Upu:

i) talileleia - ola fiafia i aso uma

ii) uli - maile


84

GALUEGA FAATINO:

Tali mai i Fesili:-

1. E faapefea ona faamatala le tagata mauoa o lo o taua i le tala?

Tali: E ofu i le ofu pāuli, ma le ie vavae, ua talileleia i aso uma.

2. O ai le igoa o le tagata mativa o lo o taua i le tala?

Tali: O Lasalo.

3. O fea na ave i ai Lasalo ina ua oti o ia?

Tali: Na avea o ia e agelu i le fatafata o Aperaamo.

4. O le a le mea na tupu i le mauoa ina ua oti o ia?

Tali: Ua i seoli o ia, ua faataugāina ai.

5. Aisea ua oo ai le mauoa i seoli, ae sa tele ana mea a o ola o ia?

Tali: Ona e le‟i alofa iā Lasalo le tagata mativa.

PESE: “Alofa o se mea e te faasoa atu”

Love is something that you give itg away”

A‟OA‟OGA:

1. Ia „aua nei faasesēina i tatou ona o le oa.

2. Alofa atu i le o manaomia le fesoasoani.

3. O le mea e te lulu e te toe selesele.

TATALO:

Le Atua e, o lau Afio e ou le tamaoaiga, ua matou manuia ai. Ia e

fesoasoani mai ina ia matou mafai ona fa‟aaoga ma le tatau mo le

manuia o lau galuega ma manuia ai ma nisi o manaomia le fesoasoani.

Amene.

…………………………….


85


MATAUPU: TAUI ATU LE LEAGA I LE LELEI

SINI: Ia a‟oa‟o le vasega ia malamalama e tatau ona

latou loto faamagalo ma ia taui atu le leaga e fai

mai e nisi i le lelei.

TUSI FAITAU: 2 Samuelu 19: 16 – 24


O le loto faamagalo ma taumafai e taui atu le leaga i le lelei, o se uiga

ma se lagona e faigata ona maua i le tagata. Aua e leai se tasi e fia ola

toilalo i se isi tagata. Peitai o la tatou mataupu o lenei Aso Sa ua

faaulutalaina – “TAUI ATU LE LEAGA I LE LELEI.

Ina ua foua e le atalii o Tavita o Apisaloma lana nofoaiga, ona sola ai

lea o Tavita. Ua tuua e ia o Ierusalema ma agai atu i le mauga o Olive

ma ui ane ai i Pauri. O iina sa mau ai le tagata lenei o Semi. O ia o se

tasi o le aiga o Saulo. Ua ia alu ane ma fetuu fano ia Tavita, ma fetogi

ia te ia ma ana auauna i maa. Fai mai le fetuu a Semi: “Alu atu, ina alu

atu ia oe le tagata totolima, le tagata ulavale, ua taui atu e le Alii ia te oe

le toto uma o le aiga o Saulo, na fai oe ma tupu e sui a‟i o ia, ua tuu atu

foi e le Alii le malo i le pule a Apisaloma lou atalii, faauta foi, ua tua ia

te oe lou lava leaga, auā o le tagata totolima lava oe.” (2 Samuelu 16: 7

– 8)

E lē o ni upu lelei na lafo e Semi i le tupu o Tavita, atoa foi ma le

fetogiina o le tupu ma ana auauna i maa. O se mea na lagona ai le lē

fiafia o Apisai ma ia mana‟o ai e faaoo le oti ia Semi. Peitai na taofi e

Tavita Apisai ma ana auauna ma ua faasaoina ai le ola o Semi.

Ina ua oti Apisaloma i le taua ma auauna a Tavita, ona toe foi ai lea o

Tavita Ierusalema. Ua omai tagata uma e faafetaia‟i iā Tavita. O Semi


86

le atalii o Kira, ua omai faatasi ma tagata e faafetaia‟i le tupu. Ua sau o

ia ua faapau i luma o le tupu ma aioi ua faapea atu – „Aua le tauia mai

la‟u agasala e lo‟u alii, „aua le manatu foi i le mea na agaleaga ai lau

auauna, i le aso ua afio mai ai lou alii le tupu mai Ierusalema, ina nei

faalotoloto i ai o le tupu. Auā ua iloa e lau auauna ua agasala lava au.

O upu ua iloa ai le tagata ua salamō ma lagona le sese o lana mea sa fai.

O lea ua aioi mo se faamagaloga ma ua lagona le fia ola, aua ua fefe ona

o lona agaleaga i le tupu.

A o le‟i tali ane le tupu, sa faapea ane ia Apisai o le a oo le oti ia Semi

aua sa ia fetuuina le tupu. Peitai na le fiafia Tavita ia Apisai ma ia fai

atu i ai, “O le a ea la oulua na ia te au, o oulua le fanau a Seruia? aua e

fai oulua ma faalavelave mai ia te au i lenei aso, e fasiotia ea se tasi i le

aso nei i Isaraelu? Aua e le ua ou iloa ea, o a‟u lava le tupu o Isaraelu i

le aso nei?” O upu ua tautino atu ai e Tavita, o ia o lo o i ai le pule, ma

e le faia e se tasi se faaiuga ua na o ia lava. Ona tauto ai lea o le tupu ia

Semi “E te le oti oe.

Tamaiti, e ese ma le manaia o le tagata ae maua i ai le agaga o le loto

faamagalo, aua e maua ai le filemu ma le alofa o le Atua. E le o se mea

lelei lo tatou taui ma sui, i isi tagata e agaleaga mai. Ae ia avea i tatou,

ma e ē iloa ona taui atu le leaga i le lelei.

Uiga o Upu:

i) tautuu - o lo o malaga mai ai

- o lo o momoli mai ai.

GALUEGA FAATINO: Tusiga o le Tusi Faatoese

1. Tusi sau tusi faatoese i sau uo, ona o se mea sese/leaga, sa e faia

ua afaina ai lona loto ma leaga ai la oulua mafutaga.

PESE: Pese ma Viiga 138


87

A‟OA‟OGA:

1. Ia taui atu le leaga i le lelei.

2. Ia salamō i mea ua sese ma leaga ai.

3. Ia faalogo i ē o lo o fai ma ta‟ita‟i.

………………………………


MATAUPU: O LE FAAMASINOGA POTO A

SOLOMONA

SINI: Ia a‟oa‟o le vasega ia malamalama o le

faamasinoga poto a Solomona na maua ai le

filemu i le va o fafine e toalua.

TUSI FAITAU: 1 Tupu 3: 16 – 28


O le Faamasinoga, o le nofoaga lea ua saili i ai tagata mo ni fofo i o

latou faafitauli. A vevesi ma tutupu ni feeseeseaiga i le va o tagata i ni

mafuaaga eseese e fia maua i ai se faaiuga tonu, o le faamasinoga e agai

i ai. Peitai e i ai taimi e le faamalieina ai tagata i nisi o faaiuga e aumai

e le faamasinoga, aua e manatu ua faaituau le faaiuga.

O le mataupu o lenei Aso Sa – “O LE FAMASINOGA POTO A

SOLOMONA” O se tala ua masani ai i tatou, i tinā e toalua na o ane i le

tupu o Solomona mo se faaiuga o le la mataupu.

O tinā nei e toalua e nonofo faatasi. Sa fanaua foi e i laua ni tama tane.

E i ai le mea na tupu ao momoe i laua i le tasi po. O le tasi tinā ua tatao

e ia lana tama, ao moe o ia ona oti ai lea o le pepe. Ua faia e ia le

togafiti leaga, ua ia ave lana pepe ua oti, ma faataoto i le fatafata o le

tinā o lo o ola lana pepe ae aumai le tama o lo o ola a le tinā lea ma ia.


88

O le taeao na iloa ai e le tinā e ou le pepe o lo o ola, le mea ua tupu; ua

fai e le tinā, o lo o la mau faatasi, le mea leaga ia te ia. Ua vaai atu le

tina lea, e le o foliga ia o lana pepe. Peitai sa finau foi le isi tinā, o lana

pepe lava le pepe o lo o ola.

O le mataupu lea a tinā nei na oo ane ai ia Solomona le tupu. O le mea

moni, e le o se mataupu faigofie, aua e leai ni molimau. O tinā foi nei

ua na o i laua lava le la fale. O le pepe foi, o lo o laitiiti, e lei iloa ni

mea e oo lava i lona tinā na te lē iloaina.

E ofoofogia lava le faaiuga na faia e le tupu o Solomona, e aumai le

pelu e isilua ai le pepe o lo o ola ona tofu ai lea o le tinā ma lana itu. O

se faaiuga e faigata ona talia i le mafaufau, auā o le pepe o lo o ola, o le

mafuaaga lea o le finauga a tinā, ae o lea ua saunoa le tupu e isilua, o

lona uiga ua leai se aoga o le finauga auā o lea o le a oti le pepe. Peitai

o lea ua saili e Solomona loto ma mafaufau o tinā ia e ala i lana faaiuga.

Sei saili po o fea o taoto ai le alofa moni i loto o tinā nei. E le i umi

lava ae aliali mai loa le mea moni. O lea ua gagana mai lava le tinā i le

mea o lo o i lona loto. O le tinā moni o le pepe, ua ia augani e faasao le

ola o le pepe ae ave atu i le isi tinā. Peitai, o le tinā leaga ua ia le

manao, e ave atu le pepe ma ia ae ia fai pea le faaiuga a le tupu e isilua.

Ua avea o la lagona ua fa‟aalia, ma auala ua iloa ai e Solomona le tinā e

ona ia le pepe. O le fafine o lo o manao e faasao le ola o le pepe, o le

tinā moni lea o le pepe. Manatua foi tamaiti o le poto o Solomona, o le

poto mai le Atua, lea sa tatalo ai i le Atua e foai mai le poto ia te ia. Le

poto lea ua mafai ai e Solomona ona faia faamasinoga.

Uiga o Upu:

i) isilua - tipi lua/ vavae i afa e lua.

GALUEGA FAATINO:

Tali mai Fesili

1. Aiseā na o ai tinā e toalua i le tupu?

Tali: E saili poo ai le tinā moni o le pepe o lo o ola.


89

2. O le a le mea na tupu i le aiga o tinā ia?

Tali: Ua oti le tama a le tasi tinā ao momoe i le po, ona alu lea ua

fesuia‟i lana pepe ma le pepe a le isi tinā.

3. O le a le faaiuga muamua a le tupu na fai?

Tali: Ia isilua le pepe o lo o ola ma avatu le tasi itu i le tasi, ma le tasi

itu i le isi.

4. O le a se tala a le tinā moni o le pepe o lo o ola e uiga i le faaiuga?

Tali: Le alii e, avatu le tama o lo o ola ia te ia, aua lava nei fasioti ia te

ia.

5. O a upu na tautala ai le tinā pepelo?

Tali: „Aua le au mai ia te au, pe avatu ia te oe ae isilua.

6. O le a le faaiuga poto a Solomona na fai mulimuli ane?

Tali: Ave le pepe o lo o ola i le tinā o lo o manao e faasao le ola o le

pepe.

7. Aisea ua mafua ai lea faaiuga?

Tali: Ua iloa e Solomona e alofa moni le tinā lea i le pepe auā o lana

tama.

PESE: Pese 368 (Fai mea tonu)

A‟OA‟OGA:

1. „Aua le molimau pepelo.

2. Ia alofa i le lua te tuaoi.

3. Ia fai mea tonu e maua i le nofo filemu.

4. Fa‟aaoga le poto mai le Atua e fai ai mea amiotonu.

……………………………..



90

MATAUPU: O IESU LE TAULAGA OLA

SINI: Ia a‟oa‟o le vasega ia malamalama o Iesu o le

taulaga ola na afio mai mai le Atua e togiolaina le

tagata agasala.

TUSI FAITAU: Roma 5: 6 – 11


O le nuu o Isaraelu o se nuu e tele ituaiga taulaga eseee latou te faia. O

nei taulaga uma, o mea sa poloaiina ai i latou e faia i le taimi o le

Feagaiga Tuai. E mafai ona maua i le tusi o Levitiko le tele o ia

taulaga. O taulaga la nei, sa fa‟aaogaina ai mea eseese e osi ai, e pei o

manu felelei, manu vaefa, ma meaai. Peitai, o le tatou mataupu i lenei

aso, “O IESU LE TAULAGA OLA”

O lo o taumafai le aposetolo o Paulo, e faamatala atu i le Ekalesia i

Roma, le uiga ese ma le tele o le alofa o le Atua i le tagata ina ua pau

atu i le agasala. Le alofa tunoa lea o le Atua mo le tagata na auala mai

iā Iesu, na afio mai e faaola le tagata, ma ia faalelei le tagata ua leaga

ona o le agasala.

O Iesu la o ia o le taulaga ola na saunia e le Atua mo le faamagaloina o

a tatou agasala. Ua lē faia e pei ona masani ai i le Feagaiga tuai, a

agasala se tasi ua ave se povi poa taanoa e osi ai le taulaga e faamagalo

ai agasala (Levitiko 4). Peitai, ua auina mai e le Atua lona Alo pele e

toatasi e fai ma taulaga e togiola ai le tagata agasala. O le taulaga

togiola na faia e le Atua i lona lava finagalo ona o le alofa ia i tatou.

Uiga o Upu:

i) faalematau - tagata agasala/tagata o lo o ola i le

amioleaga.

GALUEGA FAATINO:


91

Saili upu nei i totonu o le paso.

alofa, faamalosi mitamita

amiotonu fili tasi

agasala lelei tatau

oti leleiga toasa

faaolaina lona toto

faalematau maliu vaivai

f i l i a m l t s u

a t e s l i o a a f

a o l a o t n t m a

o u e t f a a a i a

l i i s a m s u o m

a l e l e i g a t a

i a p l n t o t o l

n m a t o a s a n o

a a v a i v a i u s

f a g a s a l a e i

PESE: E lelei le Atua

A‟OA‟OGA:

1. O Iesu le taulaga ola mai le Atua.

2. E faamaoni le alofa o le Atua mo le tagata.

3. Ia tatou ola faamagalo i isi tagata.

TATALO:

Le Atua alofa, ua e alofa mai ia i matou i le alofa silisili, ina ua e auina

mai lou Alo pele e togiolaina ma faaolaina i matou e ala i lona soifua na


92

ofo atoa mai mo i matou. Ia avea i matou le Alii e ma taulaga ola e paia

ma mama e fa‟aaoga mo au feau ma lau talalelei, ona o Iesu ua matou

tatalo atu ai, Amene.

…………………………

MANATU TAIALA O TESEMA:

“UA TATALA MEASINA A LE LAGI”

Ua taunuu mai i le masina faaiu o le tausaga, e aga atu ai i aso fiafia. O

le faamanatuina o le aso na sau faatagata ai le Atua mamalu ma silisili

ese. Ua tuua e Ia lona nofoalii mamalu, ae afio ifo e auai faatasi ma

tagata o le lalolagi. O le fa‟aalia lea o le alofa le faatuaoia o le Atua ina

ia le fano ai lava se tasi e ola faatuatua. Ua leai se mea o totoe i le lagi, a

ua leai foi se isi e toe fano aua o lea ua afio mai le atalii o le tagata. Ua

a‟oa‟o mai ai, o lea ua iā i tatou le Atua ( Emanuelu).

ASO SA: 4 TESEMA 2016

MATAUPU: O LE MANUIA UA FOLAFOLA MAI

SINI: Ia a‟oa‟o le vasega ia malamalama i le manuia ua

folafola mai mo le nuu o le Atua.

TUSI FAITAU: Isaia 9: 1 – 7


O le faatafunaina o Isaraelu e pei ona taua i le mataupu e valu (8) o le

tusi a Isaia, o le faatusa lea o le pouliuli e pei ona i ai i le amataga o le

tusi faitau o la tatou mataupu. Manatua foi, a oo ina tatou faafeagai ma

ni faigata ma puapuaga, ona foliga lea ua pouliuli atoa mea uma o lo

tatou olaga. E faapea le tulaga na oo i ai le nuu o le Atua, ina ua oo i ai


93

puapuaga, talu ai ina ua latou o ese mai le finagalo o le Atua ae ua

faalagolago i isi malo.

Peitai, o lea ua folafola mai le manuia o le a oo mai mo le nuu o le

Atua, lea e faapea mai ai le fuaiupu muamua, “A e le pouliuli pea i le

nuu ua puapuagatia; faapei ona ia faaleaogaina anamua o Sepulona

ma lenuu o Nafatali, e faapea ona ia faamamaluina ai i ona po

amuli….”

O lo o manino mai i nei upu le faamoemoe fou ma le tala fiafia mo le

nuu o le Atua. Le nuu sa oo i ai puapuaga ona o le pule faitoatasi a le

Atua lea lava ua toe saunia e le Atua le faaolataga mo lona nuu. O le a

oo mai le malamalama tele. E lē toe savavali i le pouliuli ma toe

nonofo i le nuu o le vanu o le ata o le oti auā ua i ai le malamalama lea.

O le malamalama lea ua faatusaina i le tama o le a fanau mai. O lona

igoa “o le Silisili Ese, o le Faipule, o le Atua malosi, o le Tamā o le

faavavau, o le Alii o le Filemu”

O le fanau mai o le tama lea, o le a oo mai ai le malamalama mo le nuu

sa nofo i le pouliuli. O le a gauia ai le amo o lana avega, ma le sasa na i

le ua o le nuu. O lona uiga o le a faasaolotoina le nuu sa nofo pologa e

le tama o le a fanau mai. O se tala lelei lea mo le nuu o le Atua auā o

lea ua folafola mai le manuia.

Uiga o Upu:

i) amuli - aso o lumanai/aso o i luma

ii) vete - o ni oloa e maua mai i le taua.

GALUEGA FAATINO:

Tali mai i Fesili:

1. O le a le mea sa tupu i le nuu?

Tali: Sa nonofo i le pouliuli.

2. O le a le uiga o lea mea sa savavali i le pouliuli?

Tali: Sa ola pologa ma puapuagatia.


94

3. O le a le manuia lea ua folafola mai mo le nuu?

Tali: O le a oo mai le malamalama, e ala i le tama o le a fanau mai.

4. O ai o lo o faatatau i ai le malamalama?

Tali: O Iesu po o le Mesia.

5. O a ni igoa o le tama lea o le a fanau mai?

Tali: O le Silisili ese, o le Faipule, o le Atua Malosi, o le Tamā o le

faavavau, o le Alii o le Filemu.

PESE: For unto us a child is born

A‟OA‟OGA:

1. E saunia e le Atua le manuia mo i tatou.

2. E i ai le fiafia i tua atu o faigata.

3. O le Mesia e afio mai e aumai le filemu.

TATALO:

Le Atua e, faafetai i lou alofa pea mo i matou, e ala i a Iesu lo matou

Alii Faaola ua maua ai, e lau fanau lou malamalama matou te ola ai ma

lavea‟iina i matou mai i le pouliuli. Amene.

………………………..

ASO SA: 11 TESEMA 2016

MATAUPU: UA TAUNUU VALOAGA


95

SINI: Ia a‟oa‟o le vasega ia malamalama o le fanau mai

o Iesu, ua taunuu ai valoaga a perofeta.

TUSI FAITAU: Mataio 2: 1 - 7


O le fanau mai o Iesu, o se mea ua leva ona valoia mai e le au perofeta.

O fuafuaga mamao a le Atua ua leva ona faataoto. Peitai, o lo o atagia

mai i le Tusi Faitau, mo le mataupu, lē leai o se malamalama o le tupu o

Herota e uiga i lea valoaga. Ua faailoa ai lona ola lē magafagafa ma

su‟esu‟e i mea o le a tutupu i totonu o lona malo.

E tu‟u faafeagai le ola lē tapena o Herota ma makoi mai Sasae na omai

e saili le mea ua fanau mai ai le tupu o tagata Iutaia. O lo o faailoa i la

latou mau, o ni tagata mataala ma suesue, auā o le mafuaaga lea o lo

latou oo ane i Ierusalema ua latou vaaia le fetu i Sasae o le tupu o tagata

Iutaia ua fanau. O lea la ua omai e saili e ifo i ai.

O le mea ua tupu ia Herota ma tagata o Ierusalema, ua lagona le

atuatuvale. O lagona ia e oo i le tagata lē mataala ma ola lē sauniuni. E

faafuasei loa i se mea e tupu, lagona loa le popole ma le atuatuvale. Ua

aoga foi le oo faafuasei ane o makoi, ua toe tau sailiili ai i faamaumauga

e uiga i le Keriso. Ua faapotopoto e Herota ositaulaga sili ma tusiupu

ma fesili i ai po o fea e fanau ai le Keriso, auā o i latou ia e tatau ona i ai

so latou iloa e uiga i le Keriso. Ua latou faapea ane: “O Peteleema i

Iutaia; auā ua faapea ona tusia e le perofeta.” “O oe foi Peteleema i le

nuu o Iuta, e te lē topito ona faatauvaa i alii o Iuta, auā e tupu mai ia te

oe le faipule, o lē na te pule i lo‟u nuu o Isaraelu.”

O le mea ua mautinoa, ua taunuu le valoaga a le perofeta, auā o lea ua

omai makoi mai Sasae, e saili i le tupu ua fanau mai ona o le fetu ua

latou vaaia. O le fetu ua fai ma faailoga o le tupu ua fanau mai, na

taitaiina mai i latou. O Herota lē mataala foi ia atoa ai ma Ierusalema

atoa ua latou iloa nei ua taunuu valoaga a perofeta, ua fanau mai le tupu

o tagata Iutaia.

Uiga o Upu:


96

i) makoi - o tagata popoto/e suesue i fetu ma o latou

uiga.

ii) atuatuvale - popole/lē mautonu/fefe

iii) tusiupu - tagata sa tusitusia ma faamau upu anamua ma

mea a le tupu.

GALUEGA FAATINO:

Tali mai i Fesili

1. O le a le vaitaimi na fanau ai Iesu?

Tali: O ona po o Herota le tupu.

2. O fea na omai ai makoi?

Tali: Omai mai Sasae

3. Aisea na o ane ai makoi i Ierusalema?

Tali: E saili i le mea ua fanau ai le tupu o tagata Iutaia.

4. Na faapefea ona iloa e makoi ua fanau le tupu o tagata Iutaia?

Tali: Ona o le fetu na latou vaaia.

5. O le a le mea na oo ia Herota ina ua ia faalogo i le tala a makoi?

Tali: Ua atuatuvale o ia.

6. O le a le valoaga a le perofeta, e uiga i le mea e fanau ai le

Keriso?

Tali: “O oe foi Peteleema i le nuu o Iuta, e te lē topito ona faatauvaa i

alii o Iuta; auā e tupu mai ia te oe le faipule, o lē na te pule i lou

nuu o Isaraelu.”

PESE: Alalaga ia, pepese fiafia

A‟OA‟OGA:


97

1. Ua taunuu valoaga a perofeta.

2. Ia ola mataala.

3. Ua fanau mai Iesu le tupu.

.

TATALO:

Lo matou Tamā o i le lagi, faafetai ina ua fanau mai lo matou Alii o

Iesu, ua taunuu ai valoaga aemaise o lou finagalo ia lavea‟iina i matou e

ala i lou Alo Pele e toatasi. Ia i lau Afio pea le viiga. Amene.

………………………….

home | cccs - congregational christian church in samoa · author asus created date 1/10/2016...

Documents