inkulumo yesabelomali yomnyango ......social cohesion report yezi-2015 kanye ne- migration report...
TRANSCRIPT
1
INKULUMO YESABELOMALI YOMNYANGO WEZOBUCIKO NAMASIKO (VOTE 15) YOWEZI- 2017/18 EYETHULWA NGUNGQONGQOSHE WEZOBUCIKO, AMASIKO, EZEMIDLALO KANYE NOKUNGCEBELEKA, UMHLONISHWA BN SITHOLE-MOLOI ESISHAYAMTHETHO SAKWAZULU-NATALI MHLA ZI-2 KUNHLABA WEZI-2017
Sihlalo
Somlomo
Sekela likaSomlomo
Malungu Ahloniphekile ESishayamthetho
Amakhosi akhona
Zihambeli zethu ezivela Embonini Yezamasiko, Amagugu Nezobuciko
Zicukuthwane ezikhethekileyo
Bafowethu nodadewethu
Sanibonani! A Salaam Wailikum! Nemaste! Molweni! Good Day!
Isendlalelo
Ngikubona kufanele ukuba ngiqale le Nkulumo Yesabelomali soMnyango Wezobuciko
Namasiko waKwaZulu-Ntali ngokubalula ukuthi lo nyaka uhambisana nemigubho
yeKhulunyaka ka-OR Tambo. UMengameli weRiphabhlikhi yaseNingizimu Afrika,
uMhlonishwa J.G Zuma, wasikhumbuza ngesikhathi ethula iNkulumo Echaza Ngesimo
Sesizwe ukuthi u-O.R Tambo ubezoba ehlanganisa iminyaka yobudala eyi-100 kulo
nyaka. Siyambonga uMengameli u-O.R Tambo ngokuba yisibani esakhanyisela
iNingizimu Afrika, i-ANC kanye nemibutho yenkululeko jikelele ngesikhathi somzabalazo.
2
Umlando wakhe uzoqhubeka ube neqhaza elikhulu eminyakeni eminingi ezayo yize esalandulela leli, ngenxa yobuqotho nemigomo ayeyimele.
UMhlonishwa uNdunankulu, ngesikhathi ethula iNkulumo Echaza Ngesimo
Sesifundazwe, naye wakhipha umyalelo wokuthi singasebenza kanjani ngokubambisana
siyizikhungo ezahlukene ekuqhubeni le mibungazo yeKhulunyaka lika- OR Tambo.
UMnyango Wezobuciko Namasiko uye wasabela kuleli khwelo wangabe usapholisa
maseko. Njengamanje sekuhlonzwe imikhakha eyahlukene yezobuciko eye yafakwa
ethimbeni Lezamasiko lwesiFundazwe saKwaZulu-Natali oluhlongozwayo,
olubandakanya: umkhakha womculo wamakhwaya kanye nomkhakha wemidlalo
yeshashalazi. Maqondana nomkhakha womculo wamakhwaya, sibone kunesidingo
sokuba kube namaculo aqondene no-OR Tambo ngesikhathi soMncintiswano Womculo
Wamakhwaya woMnyango Wezamasiko Nobuciko ngenyanga kaNtulikazi. Emkhakheni
wemidlalo yeshashalazi, sizoqhuba umkhankaso wokuvundulula amakhono
esifundazweni sonkana, sizogxila kakhulu entsheni esiqede isikole, ngenhloso
yokuyifaka ibe yingxenye yethimba labadlali beshashalazi elizonandisa ngemidlalo
emaqondana nokugubha umlando weqhaza lika-O.R. Tambo, okuzoba ngumcimbi
omkhulukazi wesifundazwe.
Amagugu Esizwe
Maqondana nokubungaza amaqhawe namaqhawekazi akithi, uMnyango usuqalise
uhlelo oluzoba minyaka yonke lokubungaza izingwazi nezihlabani ezisaphila olubizwa
ngokuthi Amagugu Esizwe. Sifuna ukugqugquzela ukuhlonishwa kwezihlabani zakithi
zezamaciko namasiko ngesikhathi zisaphila. Kulo nyaka sibungaze isihlabani uSolwazi
uJoseph Shabalala, umsunguli weQembu leSicathamiya elihlonishwa umhlaba wonke, i-
Ladysmith Black Mambazo. Lokhu sakwenza ngokuthi sisingathe isidlo sokumhlonipha
(gala dinner) mhla zingama-31 kuNdasa wezi-2017, esalandelwa yidili lomculo
ngakusasa, lu-1 kuMbasa. Le mibungazo izolandela uhlelo olubekiwe kunokuba ibe
yimicimbi eyenzeka ngesiqubu esisodwa nje. Ngifisa ukubonga umlingani wami,
uNgqongqoshe uDlungwane kanye nomnyango wakhe ngokubambisana nathi
3
ekugubheni impilo yalesi sihlabani ngokuqamba kabusha igama lesikole eMnambithi sabizwa ngegama lalesi sihlabani.
Ukuhlelwa kabusha Kwezamasiko Namagugu.
Ukugubha amagugu ethu kungumongo wamasu ethu okusebenza. Ukufezekisa lokhu,
siwubuyekeze, sabe sesiwubeka kanje umbono woMnyango: Impumelelo Nokuhlalisana
okuhle Kwemiphakathi Ngezobuciko, Ezamasiko Namagugu. Ezamasiko Namagugu
ziyahambisana, ukuzama ukukwehlukanisa lokhu nanoma ngabe ingayiphi indlela
kungaba ukudlala ucabhayiyane nje. Lo mbono omusha obuyekeziwe uhambisana
nanoMthetho Ohlongozwayo omaqondana Nezobuciko, Ezamasiko Namagugu, obuyisela Amagugu endaweni yawo efanele Yezobuciko Namasiko.
Ukuqhakanjiswa Kwamasiko njalo NgoLwesine (Cultural Thursdays)
Kuyintokozo enkulu kimina ukwethula kule Ndlu Ehloniphekileyo uhlelo Lokuqhakanjiswa
Kwamasiko njalo NgoLwesine, okuluhlelo oselugunyazwe yiSigungu Esiphezulu,
okuhloswe ngalo ukuqhakambisa amasiko anhlobonhlobo, ubunjalo bomuntu, ukubunjwa
kwesizwe kanye nokuhlalisana okuhle kwemiphakathi ngezindlela ezahlukene.
Sezibekiwe iziqubuluo zanyanga zonke kanti-ke zibandakanya izithangami
zokuxoxisana, ukudla kanye nemvunulo yesintu, imibukiso, izinkulumo nezethulo
zezikhumbuzo, imincintiswano, ngokunjalo namafilimu nezinhlelo zemisakazo ezimaqondana namasiko anhlobonhlobo.
Sifuna abasebenzi bakahulumeni, izishabasheki zezamasiko kanye nomphakathi ngothi
lwawo babe sekhaleni lalo mkhankaso. Lolu hlelo luzoqhutshwa ngokubambisana
nabanye okusetshenziswana nabo ababandakanya yonke iminyango kahulumeni, i-KZN
Tourism (umkhakha wezokwamukelwa kwezivakashi), iNhlangano Yezabamabhizinisi,
Ubuholi Bomdabu, Izinhlangano Zezamasiko kanye nezikhungo zemfundo ephakeme.
4
Lolu hlelo luzobhekela nokubandakanya isiko eliyintandokazi entsheni kanye
nokwehlukahlukana kwamasiko. Eqinisweni yilona galelo lomkhakha wezamasiko
nobuciko leli ohlelweni lukahulumeni olubizwa ngokuthi Azibuye Emasisweni. Nginxusa
aMalungu ale Ndlu ukuba ahambe phambili ekuvuseleleni amasiko ethu,
ekuqhakambiseni amagugu ethu kanye nezinto ezisibumbayo sibe yisizwe yize sehlukahlukene.
Ukwengamela Okuhle
Okungenhla esengikwethulele le Ndlu bekuseyingeniso nje. Ngifisa ukuthinta izinto eziphathelene nokwengamela ngaphambi kokuba ngingene ezinhlelweni zomnyango.
Ngesikhathi ngifika kulo Mnyango, ngakhipha umyalelo wokuthi labo okusetshenziswana
nabo babambe iqhaza ezinhlelweni zomnyango. Ngakho-ke, uHlelo Lwamasu
Okusebenza olubuyekeziwe kanye noHlelo Lonyaka Lokwenziwa Komsebenzi
engikwethule kule Ndlu emasontweni amabili edlule kungumphumela wokubonisana esakwenza ezifundeni nalabo esisebenzisana nabo.
Njengalokhu ngiyinhloko ngokwepolitiki eMnyangweni, sengiqalise uhlelo lokuhlela
kabusha umkhakha wezamasiko, ezobuciko namagugu oluhambisana nokuhlelenjwa kabusha kwezinhelo zomsebenzi womnyango. Sibuyekeza umumo womnyango
ngokwezikhundla ukuqinisekisa ukuthi uyahambisana nohlelo lwethu lokuletha
izinguquko ukuze kwenziwa ngcono ukuhanjiswa kwezidingo kubantu. Lolu hlelo
lubandakanya ukuhlelwa kabusha kwezinhlelwana ezingaphansi kwezinkulu ukuze
kuqedwe ukuphindaphindeka kwezinhlelo kanye nokwenza ngcono ukuqhutshwa
komsebenzi ngempumelelo.
Ukuhola Ngobuqotho - Izinsika zamasu okusebenza ezinhlanu
Ukufezekiswa kwezinjongo zikahulumeni maqondana noguquko olusheshayo
kwezenhlalo-mnotho kuncike ekwengameleni okuhle, okubonakala, phakathi kokunye,
5
ngobuholi obuqotho, okukhonjiswa ngumbono kanye nezinhloso ezicacile. Maqondana
nalokhu-ke, ngibeke lezi zinsika zamasu okusebenza ezinhlanu, okuyilezi, (1) inguquko
kwezenhlalo, (2) ukuthuthukiswa kwezindawo zasemakhaya kubandakanya
nengqalasizinda, (3) ukuqiniswa kokuxhumana nalabo okusetshenziswana nabo, (4)
ukuthuthukiswa kwentsha nabesifazane; kanye (5) nokuhlonyiswa ngolwazi namakhono
kwalabo abangakwazi ukuzimela. Zonke izinhlelo zethu zizogxila kakhulu kulezi zinsika.
Ukuqinisekisa ukuzibophezela kwethu ekufezekisa lokhu, sengiqashe uMsebenzi
obhekele Ezentsha, osehhovisi lami kanti-ke umsebenzi wakhe omkhulu kulo nyaka ngukusingatha iNgqungquthela Yentsha eseMkhakheni Wezobuciko Namasiko.
Ukulwa nokukhwabanisa kanye nenkohlakalo
UMnyango unamasu okusebenza acacile maqondana nokulwa nokukhwabanisa kanye
nenkohlakalo ngoba lezi zenzo ezinyanyekayo ziyaqhubeka nokucekela phansi
umsebenzi omuhle owenziwa nguhulumeni. Ngibonga uMhlonishwa uNdunankulu
ngokusungula uMkhankaso obizwa ngokuthi ‘I do Right’ okungukuthi ‘Ngenza Kahle’.
UMnyango uyaqhubeka nokusebenzisa izinjongo ezinhle zalo mkhankaso ngale
kokwesaba noma ukuchema njengalokhu senza okusemandleni ukubuyisela ubuqotho
kanye nezindlela ezinqala zokulawula ezinhlelweni zethu. Ngenxa yalokhu, uMnyango
uzosebenza ngokuzikhandla ukuthola umbiko wokucwaningwa kwamabhuku
ongenagcobho nomncane onyakeni wezimali wezi-2017/2018. Ngikholwa ukuthi impela
siyibambe ngakho ngokusuka embikweni wokucwaningwa kwamabhuku onogcobho sathola umbiko wokucwaningwa kwamabhuku ongenagcobho.
Ukuhlomisa ngamakhono abahlinzekimsebenzi abasafufusa
Ngaphezu kwalokho, selokhu ngiqalile kulo Mnyango, sengenze isiqiniseko sokuthi
bayakhokhelwa bonke abahlinzekimsebenzi obesekwadlula izinsuku ezingaphezulu
kwezingama-30 bengakhokhelwe. Kusasele kuphela labo bahlinzekimsebenzi
6
esingakwazi ukubathola ukuthi balethe imininingwane ababengayihlinzekanga ze sikwazi ukubakhokhela.
UMnyango futhi usuqalise izinhlelo zokukhipha izinkampani ezenza imisebenzi
yokuhlanza izakhiwo, okusho ukuthi abasebenzi abasenzela umsebenzi wokuhlanza
sebezongena ngaphansi koMnyango. Izinhlangano eziqashayo angeke siyikhulume
indaba yazo noma ngabe kwenzenjani. Ukuzibophezela kwethu okugxile kwi-Preferential
Procurement Policy Framework Act (PPPFA) okunguMthetho Wohlaka lweNqubomgomo
Yokuthenga Ngokuchema, kanti izinhlelo zethu zibandakanya ukuyekwa kwezinkontileka
ezinkulu ngenhloso yokuhlomisa osonkontika abancane be-BBEE ukuze nabo benyukele
eqophelweni elidingekile. Asithandabuzi ukuthi zonke lezi zinhlelo zokungenelela zizosisiza ekuletheni izingququko zezomnotho ezibonakalayo.
Ukuqasha ngokulingana
Kulokhu kuseqhulwini ezinhlelweni zethu ukufinyelela ezibalweni ezifanele maqondana
nokuqasha ngokulingana kanjalo nokumeleleka kwabesifazane ezingeni laBaphathi
Abaphezulu. Njengamanje, abesifazane abakuleli zinga bangama-46% bese kuthi
abakhubazekile bona bami kuma-1.99%. Sizosiguqula lesi simo ukuze sifinyelele
ezibalweni ezibekiwe. Sizothatha izinyathelo zokulawula ezifanele maqondana
nokwehluleka ukufezekisa lokho okulindelekile kanye nokwehluleka ukuhambisana nemithetho kahulumeni.
Sengingena ezinhlelweni ezingumongo zoMnyango kanti ngizophinda futhi ngikhombise
ukuthi sizobhekana kanjani nezinselelo zokungalingani, ububha kanye nokungabibikho
kwemisebenzi okubhekene nemiphakathi yethu.
Uhlelo 2
Ukuhlalisana Okuhle Kwemiphakathi kanye noKuhlunyeleliswa Kwezimilo
7
Ngale kokusebenzisa ngokuqonde ngqo amagama athi “ukuhlalisana okuhle
kwemiphakathi”, uMthethosisekelo we-1996, uqinisa imigomo yokunganaki ubuhlanga
kanye nokungacwasi uphinde futhi uqinisekise ukuphokophelela ukubuyisana kanye
nokubunjwa kwesizwe. Imibiko emaqondana nokuhlalisana okuhle kwemiphakathi, i-
Social Cohesion Report yezi-2015 kanye ne- Migration Report yezi- 2015 yocwaningo olwasungulwa yisiGungu Esiphezulu ukuthi kuphenywe ngezimbangela zezenzo
zodlame olubhekiswe kwabofika kuleli ngokunjalo namazwi acwasa ngokobuhlanga
ayesesabalalele emphakathini ikhombisa ukuthi kunokungalingani okukhulu, okungase
kuphazamise le mpokophelo, uma kunganqandwa. Le mibiko yathola ukuthi
ukungalingani kwezenhlalo–mnotho yikhona okungumnyombo wobungozi obubhekene
nokuhlalisana okuhle kwemiphakathi. Yomibili le mibiko yathola ukuthi isimo sezenhlalo,
ingcebo kanye namathuba okwakuhlelwe ngokwenqubo yobukoloni kanye
nangokwenqubo yobandlululo yizona zinto ezabangela ukuba iNingizimu Afrika ibe nomlando wokungabibikho kwemisebenzi kanye nokungalingani.
Le mibiko ihlonza ukuthi ukwakheka kwemiphakathi ebumbene kuncike kakhulu ekutheni
iKwaZulu-Natali ilusingethe kanjani uhlelo lokulingana kwezenhlalo-mnotho kanye
nanokuthi ikukhuthaza kanjani ukwamukelana okusezingeni eliphezulu kwemiphakathi
eyahlukene. Ukufezekisa lokhu, kuzosingathwa ingqungquthela yesifundazwe
eminxaminingi emaqondana nokuhlalisana okuhle kwemiphakathi kanjalo
nokuhlunyeleliswa kwezimilo mhla lu-1 kuya kumhla zi- 3 kuNhlangulana wezi-2017
ngenhloso yokwakha isu lokusebenza maqondana nokuhlalisana okuhle kwemiphakathi
kanjalo nohlelo lokusebenza oluzokwenza sikwazi ukubhekana nalezi zinkinga
ngokubambisana nabo bonke abantu baKwaZulu-Natali ngale kokubheka ubuhlanga, inkolo, ubulili, kumbe ukukhubazeka.
Ukulungiselela iNgqungquthela
Sekukuningi osekwenziwe maqondana nokulungiselela le ngqungquthela. Kusukela
ngowezi-2014, cishe zingama-48 izingxoxo zokubonisana kwemiphakathi
esezisingathiwe esifundazweni ezaphetha ngokuthi kube nesidingo sokuthi kusingathwe
8
le ngqungquthela yesifundazwe yokuhlalisana okuhle kwemiphakathi kanye
nezingqungquthela ezimbili zikazwelonke. UMnyango uzoqhubeka nokusingatha
izingxoxo zokubonisana kwemiphakathi kuzo zonke izifunda kulo nyaka omusha
wezimali. Lezi zingxoxo zivulela izakhamuzi zalesi siFundazwe zayo yonke imikhakha
inkundla yokuzwakalisa imibono yazo futhi zinikeze uMnyango amathuba okuqalisa
izinhlelo zokufezekisa izidingo kanye nezinjongo zemiphakathi ewusebenzelayo. Le
ngqungquthela ehlelwayo emaqondana nokuhlalisana okuhle kwemiphakathi izonikeza
izifundiswa, izishabasheki zezamasiko, abomkhakha wezamabhizinisi, iZinhlangano
Ezingekho Ngaphansi kukaHulumeni kanye nabanye ithuba lokwakha isu lokusebenza elimaqondana nokuhlalisana okuhle kwemiphakathi kanye nokubunjwa kwesizwe.
Umkhankaso Wokufunda Olunye Ulimi
Lolu hlelo lwaqalwa wuMnyango eminyakeni emibalwa eyedlule, nokho-ke belugxile
kakhulu ezilimini ezikhulunywayo. UMnyango usuzolunweba-ke manje lolu hlelo ukuze lubandakanye noLimi Lwezandla.
Yize uLimi Lwezandla lungakamenyezelwa ngokuthi ulimi olusemthethweni, kodwa-ke
uMthethosisekelo ulunikeza isithunzi esilinganayo njengezinye eziyi-11 ezisemthethweni kuleli zwe.
Ngaleyo ndlela-ke kusobala ukuthi uMthethosisekelo kanye neminye imithetho eshayiwe
kanjalo nezinqubomgomo esingabala kukho uMthetho Wokusetshenziswa Kwezilimi
Ezisemthethweni, uMthetho we-PanSALB kanye neNqubomgomo Yezilimi yeSifundazwe
saKwaZulu-Natali iyalwazisa futhi ilwela ukuvikela nokukhuphula isithunzi soLimi
Lwezandla.
Abantu abangezwa bakuthola kunzima ukufinyelela emisebenzini ehlinzekwa uhulumeni
ngenxa yokuthi abasebenzi abaningi bakahulumeni abaluqondi uLimi Lwezandla.
Kuyinhloso yalo Mnyango ukukhuthaza ukusetshenziswa kanye nokufundwa koLimi
Lwezandla ukuze abantu abangezwa baqondwe uma bekhuluma bese bekwazi
ukufinyelela ngokulinganayo ezinsizeni ezihlinzekwa uhulumeni.
9
Kulo nyaka sizothatha izinyathelo ezinqala ngenhloso yokukhuthaza ukusetshenziswa
koLimi Lwezandla kanti futhi sizogxila kubasebenzi bakahulumeni kanye nabaholi
bezepolitiki esifundazweni kubandakanya isigungu esiphezulu, amalungu
esishayamthetho kanye namakhansela.
Ingqungquthela Yabakhubazekile
Ngibona kufanele kulesi sikhathi ukuba ngibike ukuthi uMnyango wasingatha
ngempumelelo iNgqungquthela Yabakhubazekile obengekuyokuqala ngqa yalolu hlobo.
Le Ngqungquthela kwakuhloswe ngayo ukudidiyela izinhlelo zabakhubazekile
ezinhlelweni zethu zokuhlinzeka ngezinsiza emphakathini. Sizosebenzisana neminye
iminyango eqondene, ikakhulu uMnyango Wezokuthuthukiswa Komphakathi, phakathi
kweminye, kanye nomasipala ukuqinisekisa ukuthi izinqumo ezathathwayo ziyaqaliswa
ukusebenza. Esinye sezinqumo ezisemqoka esathathwa ngukusingathwa kweDili
Lezobuciko Nezemidlalo labantu abakhubazekile okokuqala ngqa, elihlelelwe inyanga kaLwezi.
INqubomgomo kanye noMthethosivivinywa Wezilimi Wesifundazwe
Maqondana noMthethosivivinywa Wezilimi waKwaZulu-Natali kanye neNqubomgomo
okususelwe kuyo uMthethosivivinywa, ngikhiphe umyalelo wokuthi kubuyekezwe
iNqubomgomo Yezilimi yeSifundazwe saKwaZulu-Natali. Lokhu kuzoqinisekisa ukuthi
inqubomgomo, kanjalo nomthetho wesifundazwe ozolandela, kuhambisana
nokusetshenziswa kwezilimi esifundazweni ngokwezibalo zemiphumela yokubalwa
kwabantu kowezi-2011. Inqubomgomo ebuyekeziwe iyona ezohlahla indlela maqondana
nomthethosivivinywa iphinde futhi igqugquzele ukubandakanywa kwawo wonke umuntu
kanye nokufinyelela kwabantu abakhubazekile ezinsizeni nasolwazini oluhlinzekwa nguhulumeni.
Izinhlaka ezibhekele izilimi esingabala kuzo i-KWANILAFO, Amathimba Okufunda
Nokubhala, USIBA kanye ne-Centre for Creative Arts zizoqhubeka nokuthola ukwesekwa
10
eMnyangweni ngokwezimali kanye nangemisebenzi yobubhalane ngenxa yeqhaza
ezilibambayo ekuthuthukiseni izilimi. Ukuthuthukiswa kwezokubhalwa kwezincwadi
zobucikomazwi kuzogxila ezilimini zomdabu kulo nyaka kanye nasekuphendlweni
kwendawo yezincwadi zomdabu emitapweni yolwazi. Yonke imizamo yethu sizobe sihlose ngayo ukugqugquzela ukubhala ngezilimi zomdabu.
Yize kunezinhlelo zokubuyekezwa kwenqubomgomo yezilimi engikhulume ngakho
phambilini, kuyintokozo ukusho ukuthi omasipala bezindawo i-Danhauser, uBuhlebezwe,
eZinqoleni, uMngeni, The Big Five, uMvoti kanye neMbabazane bazokwelekelelwa
ekwakheni izinqubomgomo zabo zezilimi kulo nyaka, nakuba luzobe luqhubeka uhlelo lokubuyekezwa kwenqubomgomo yezilimi.
Ubuliminingi
Imicimbi yokugqugquzela ubuliminingi esingabala kuyo umgubho woSuku Lokuhumusha
Lomhlaba Wonke, umgubho woSuku Lwebele Lomhlaba Wonke kanye nomqhudelwano
obizwa nge-Anton Lembede Speech Contest kuzoqhubeka kube ngumgogodla wohlelo lokuguqulwa kwesimo sezenhlalo.
Kuyangithokozisa ukusho ukuthi nakuba sibhekene nesimo somnotho esingesihle,
uMnyango uyaqhubeka nokuhlinzeka iminyango kahulumeni kanye nomasipala
ngemisebenzi yokuhumusha nokutolika mahhala. Le misebenzi isemqoka kakhulu ekwenzeni abantu bakwazi ukufinyelela olwazini.
Ukuqanjwa Kwamagama Ezindawo
Ngokwakhela empumelelweni yeminyaka eyedlule, uMnyango uzocwaninga uphinde
uhlelembe amagama abalelwa kwayi-100 kulo nyaka wezimali. Sizosebenzisana
nomasipala, abaholi bomdabu kanye nabanye esisebenzisana nabo ohlelweni
lokuqanjwa kwamagama ezindawo. UMnyango usuyiguqulile indlela oqhuba ngayo,
awusezokugxila kuphela ekubhalekeni kwamagama, obekuyinto elula kakhulu ukuyenza.
11
Manje usuzoqala uhlelo lokufundisa imiphakathi ngokuthi ubambe imihlangano
yokulalelwa kwemibono yomphakathi, ngalokho usize imiphakathi ikwazi ukuziqalela
izinhlelo zokuguqula amagama ngokomlando wendawo; isibonelo nje- ukuguqula igama
lendawo i-Melmoth libe uMthonjaneni, osekuvele kuqalile. Sizosayina Isivumelwano
Sokusebenzisana noMnyango Wezokuthutha ukuze siqinisekise ukuthi amagama aselungisiwe ayabhalwa emigwaqeni.
Izinsuku Ezisemqoka
Ziyanda minyaka yonke izinsuku ezisemqoka kwezamasiko nokuyizindaba ezimnandi
emnothweni wesifundazwe kwazise phela le micimbi iheha abavakashi abavela ezweni
lonkana. Imikhosi okunguMkhosi WoMhlanga, Umkhosi WeLembe, Umkhosi Woselwa,
Umkhosi Wesivivane, Umkhosi kaNomkhubulwane kanye Nomkhosi Wamaganu,
ingamagugu isizwe esizigqaja ngawo. Imikhosi i-Eastern Rendezvous kanye ne-
Afrikaners Ventersfees sesiyifake ohlwini lwezinsuku ezisemqoka ngenhloso
yokubungaza ukwehlukahlukana kwethu. Kulo nyaka sibeke eceleni u-R23 million
maqondana nokusingathwa kwale micimbi yezamasiko kubandakanya nokwesekwa kwemigubho yoSuku Lwenkululeko kanye noSuku Lwentsha.
Umkhosi WeLembe owawusingathwe enkundleni i-Moses Mabhida nyakenye
wawusezingeni eliphezulu futhi waqhakambisa ubuhle baMasiko kaZulu. Lo mgubho
kwabe kungowokubungaza iminyaka engama-200 emva kokuba iLembe eleqa amanye
amalembe ngokukhalipha, iNkosi Shaka yahlanganisa izizwe ezehlukene zaba yisizwe
samaZulu, nowaheha izithameli eziyi-35000 ngosuku olulodwa nje. Lo mcimbi futhi
wawubungaza iminyaka engama-45 iSilo Samabandla esibusayo njengamanje sathatha
ubukhosi bukaZulu. Umviliyelo wesintu wandulelwa yinkonzo eyayiholwa yibandla
lamaNazaretha lakwaShembe. Amakholwa abuthana ukuzohalalisela nokuzohlonipha
iSilo Samabandla ngempumelelo yaso ekubumbeni isizwe nasekulondolozeni amasiko kaZulu.
Umkhosi Woselwa usuhlelwe kabusha wabandakanya uhlelo lwezemidlalo olubizwa nge-
Uselwa Challenge. Siyohlala sithokoza koNgangezwe Lakhe ngoholo nokuseseka
12
asinika kona ekuqinisekeni ukuthi isiko lethu liyavuselelwa futhi libekwe ebalazweni lomhlaba.
Liyakhula nesasasa lale mikhosi yethu ngisho nasemazweni angomakhelwane. Uhlelo
lomnyango lokuhlomulisa imiphakathi luzoholela ekuhlomuleni kwemiphakathi yendawo
ngqo ngokuthi kutholakale kuyo ingqalasizinda kanye neminye imisebenzi ephathelene
nemicimbi, esingabala kuyo ezokuphepha kanye nokuhlinzeka ngokudla. Ngale
kwemihlomulo yezomnotho kuzofakwa nezinhlelo zezemfundo ezigxile
ekuhlunyelelisweni kwezimilo kanye nokusiza abafundi maqondana nokukhetha
imikhakha yemisebenzi abangayifundela.
Idili Lengoma elibizwa ngokuthi Zidlana Imilala Ingoma Festival
Kulo nyaka wezimali uMnyango uzokwandisa amadili eNgoma esuka kuma-67 kuya
kuma-73. Sihlose ukuwandisa impela kule minyaka emithathu yezimali ezayo. Ingoma
ibamba iqhaza elisemqoka ekuhlalisaneni okuhle kwemiphakathi kanye nasekubunjweni
kwesizwe. Ekuqhubeni lolu hlelo, sizokwenza okusemandleni ukubhekelela zonke
izinhlobo zamasiko. Kuyintokozo ukubika ukuthi kokuqalayo ukubakhona kulolu hlelo
singabala i- Andra Maha Sabha Eisteddfod, Ilembe Fashion Show, i-Durban Diwali
Festival, umcimbi wabantu abadala, ukuveza okumbalwa nje. Kulo nyaka futhi sizokwethula i-Kingdom Sport, Arts and Culture Festival.
Kuyintokozo ukusho ukuthi kuyandlondlobala ukusebenza ngokubambisana phakathi
koMnyango Wezobuciko Namasiko kanye nowezeMidlalo Nokungcebeleka. Kusemqoka
ukuthi le minyango emibili, ehlobene kakhulu futhi ehlinzeka imisebenzi yayo, engaphansi
kukaNgqongqoshe oyedwa, isebenzise amathuba akhona okuthi isebenze
ngokubambisana ekuqhubeni izinhlelo zawo. Seziyabonakala izithelo zokusebenza ngokubambisana kwale minyango emibili.
Izimboni Zezobuciko ziyimikhiqizo
13
Izinhlelo zethu zihlelwe ngendlela yokuthi zidale amathuba ezomnotho kanye
nawokungenisa imali. Ukufezeka kwale njongo kuncike ohlotsheni lwamaciko ethu.
Ngaleyo ndlela-ke, nonyaka sizoba nezinhlelo zokuqeqesha amaciko ayizi-2040 kuso
sonke isifundazwe emikhakheni eyehlukene yezobuciko, sigxile kakhulu emakhonweni
ezamabhizinisi, ukuqinisekisa iqophelo elifanele, ukunquma amanani emikhiqizo,
ukuzimaketha, nokunye. Inhloso yethu ukuba sibacije futhi sibalekelele bakwazi ukukhiqiza imikhiqizo ethengisekayo neseqophelweni eliphezulu.
I-Grahamstown National Arts Festival kanye ne-Durban International Film Festival
kuyaqhubeka nokuhlinzeka ngesigcawu sezinhlelo zokwabelana ngamasiko. Kulo nyaka,
uMnyango usebenza ngokubambisana noMnyango Wezokuthuthukiswa Kwezomnotho,
Ezokuvakasha kanye Nezemvelo kanjalo nezikhungo zawo okuyi-Tourism KZN,
uzothatha amaciko ethu abe yingxenye yezohwebo kanye nemihlangano yezamabhizinisi
yomhlaba jikelele. Amaciko ethu asemikhakheni eyahlukahlukene azothola ithuba
lokukhangisa amakhono awo kanye nokuthengisa imikhiqizo yawo kulabo abahambele le mihlangano.
Kulokhu sikhuthazwe nayimpumelelo yeqembu lomculo wamacilingo i-Durban Youth
Wind Band elisanda kubuya nendondo yegolide ngenkathi libambe iqhaza
emqhudelwaneni i-New York Wind Band Festival ebeyisingethwe yi-World Projects.
Lokhu kuhlabana kwabo kukhombisa ngokusobala ukuthi ithalente kanye nekhono
esinalo kulesi sifundazwe lisezingeni elilinganayo nelabahamba phambili emhlabeni
jikelele, yingakho kunesidingo sokuba kufakwe izinsizakusebenza ezithe thuthu ukuze lithuthukiswe.
Ezingeni lendawo, uMnyango uzosayina isivumelwano sokusebenzisana
nezinxanxathela zezitolo ukuze amaciko anikezwe izinkundla zokukhangisa futhi akwazi
ukuba athengise imikhiqizo yawo.
Kuyintokozo kimina ukubika ukuthi imibukiso sesiyibeke kwelinye izinga. Impokophelo
yethu ukuthi abantu bakwazi ukuziphilisa ngezobuciko. Kuze kube manje sesisingathe
imibukiso emikhulukazi yemisebenzi yezandla kulezi zindawo: oThukela
14
wawuhambisana nomgubho woSuku Lokuhumusha Lomhlaba Wonke, eDumbe
wawuhambisana nombukiso wengqephu, e-Bulwer wawuhambisana nomgubho woSuku
Lolimi Lwebele; ngesikhathi kunezethulo maqondana nolwazi lomdabu, oPhongolo;
ngesikhathi kuneLekgotla yeKhabhinethi, e-Mayville ngoNhlolanja; kanjalo nangesikhathi
kuvulwa iSishayamthetho ngokusemthethweni. Sizokhuthaza ukuthi kukhangiswe
ngemisebenzi yamaciko kuyo imicimbi kahulumeni lapho kunokwenzeka khona; futhi
sigqugquzele nabahambele leyo micimbi ukuba bathenge imikhiqizo, ngaleyo ndlela
baseke, basimamise amaciko endawo.
Idili lemisebenzi yobuhlalu elihlelwe nguMnyango Wokubusa Ngokubambisana kanye
Nezindaba Zomdabu lizodidiyelwa kanye nezinhlelo zoMnyango ezihleliwe.
Kuzosingathwa ingqungquthela yamaciko enza umsebenzi wezandla ukuze amaciko akwazi ukuhlonza indlela azosebenza ngayo kanjalo nendawo azosebenzela kuyo.
Izinhlelo ezibhekele intsha
Ngaphezu kohlelo lwamaThwasa olubhekelela imikhakha ehlukene yemisebenzi futhi
esizoqasha kulo asebeneziqu abangama-85 onyakeni wezimali wezi-2017/18
ngesabelomali sika-R4.9million , uMnyango ubeke eceleni isamba sika-R1 million
obhekele imifundaze yalabo abangasebenzi emnyangweni, abafundela imikhakha
yezobuciko namasiko esingabala nje ukwenziwa kobucwebe (jewellery design and
manufacture), i-fine art, i-drama, ezeshashalazi (theatre) kanye ne-performing art.
Inhloso yethu ukuheha intsha ukuba ingene kulezi zinhlobo zobuciko ezikhona.
Sizokwamukela intsha edinga ukwenza izifundo zokuqeqeshelwa emsebenzini (in-
service training) okuyingxenye yokuzibophezela kwethu ekuthuthukiseni amakhono kanye nokucijela intsha ukuze ikwazi ukuthola umsebenzi.
Uhlelo i-The Young Patriots
UMnyango uzibophezele ekwesekeni uhlelo olubizwa nge-“The Young Patriots”,
okungolunye lwezinhlelo ezinohlonze loMnyango Wezobuciko Namasiko kuZwelonke.
15
Lolu hlelo oluhlabahlosile kuhloswe ngalo ukwelekelela intsha ukuba ithole amava
omsebenzi kanye nokugqugquzela ukuthanda izwe. Kulesi Sifundazwe sekuqokwe
intsha engama-35 eyizishisekeli zezwe (young patriots) ukuze ishabasheke, ikhuthaze
ukuhlalisana okuhle kwemiphakathi kanye nokubunjwa kwesizwe ngokunjalo
nokufundisa enye intsha ngomlando, amagugu kanye nangeqhaza elabanjwa yintsha
emzabalazweni wenkululeko yesizwe kanye nokuyifundisa ukuba iyazise intando yabantu yakuleli.
Ukudalwa kwamathuba emisebenzi
Kulo nyaka wezimali ngikhiphe umyalelo wokuthi izinhlelo kumele zihlelwe zingagcini nje
esibonelelweni se-EPWP kepha zingene ngisho kulesi sabelomali esinaso. Ukudalwa
kwamathuba emisebenzi kubiza ukuthi sibe nobuchule futhi sikwazi ukuzisungulela izinto
ezintsha. Ingqalasizinda, kubandakanya izingadi kanye nokunakekela, ukuqoqwa
kwamathoyizi okudlala abantwana, abalekelela emitapweni yolwazi, amaciko ezikoleni,
ubuciko obenziwayo kanye nobuciko bemisebenzi yezandla kusalokhu kuyikona
okuyindlela emqoka uMnyango odala ngayo amathuba emisebenzi.
Izikhungo ezixhaswa ngumnyango ngezimali
Izikhungo ezixhaswa ngumnyango ngezimali zinamathuba amaningi okudala amathuba
emisebenzi kodwa esikhathini esiningi imisebenzi eziyenzayo ayicaci kahle, ngaphandle
kokudluliselwa kwezimali zokuzixhasa. Kulo nyaka siqalise izinyathelo ezinqala zokubika
ngemisebenzi eyenziwa yilezi zikhungo. Okokuqala nje, sizoqinisekisa ukuthi amasu azo
okusebenza kanjalo nezindlela zazo zokubika ngemisebenzi eziyenzayo lezi zikhungo
kuhlelwa kuhambisane nombono nezinhlelo zoMnyango. Okwesibili, kusukela manje
kuya phambili, sezizohlinzeka ngezibalo zamathuba emisebenzi eziwadalile maqondana,
phakathi kokunye, nentsha, abesifazane kanye nabakhubazekile abahlomulayo
ezinhlelweni zabo, okungenani njalo ngekwata. Ucwaningo lwethu lokwandulela
esilwenze ngoNhlolanja kulo nyaka luveza ukuthi lezi zikhungo zidale amathuba
omsebenzi wesikhashana angaphezulu kwezi-7500. Ngikholwa ukuthi u-R36 million
ofakwe ezinhlanganweni zobuciko namasiko zizodwa nje kuphela kubandakanya ne-The
16
Playhouse Company kanye ne- KZN Philharmonic Orchestra kulo nyaka wezimali
uzodala amathuba emisebenzi abonakalayo uma uzophathwa ngendlela efanele.
UMnyango uzoxoxisana nalezi zikhungo ezimbili ngenhloso yokusingatha izinhlelo
ngokubambisana ukuze usebenzise ulwazi ezinalo.
Ukubuyekezwa kwezimali ezidluliselwa ezinhlanganweni
UMnyango usubuyekeze uxhasomali olunikezwa ngokudluliselwa kwezimali
ezinhlanganweni zobuciko namasiko. Izinto esizibhekile zibandakanya ukuthi
lungakanani uxhasomali obelutholwa yizinhlangano ezizodwa phambilini, isikhathi
soxhaso olukhona njengamanje uma luqhathaniswa nesabelomali somnyango
esingengakanani kanye nesidingo sokubhekelela izinhlangano ezintsha. Ngenxa yalesi
simo, ukuhlelwa kwezimali ezidluliselwa ezinhlanganweni kwehlisiwe kusuka ku- R48
million kuya ku-R36 million kanti-ke lesi samba sizosebenza kuyo yonke iminyaka emithathu elandelayo.
Ukuvuselelwa Kwezikhungo Zobuciko
Kuyasikhathaza ukungasebenzi ngendlela efanele kwezikhungo zobuciko. Ukubhekana
nale nselelo, uMnyango sewakhe isu lokusebenza elizoguqula lesi simo. Sesiqalile ukuqasha abadidiyeli bezinhlelo kanye nabanye abasebenzi kulezi zikhungo.
Ukubuyekezwa koxhasomali lwezinhlangano zobuciko namasiko i – KZNACC
Ukwehliswa kwesibalo sezinhlangano zobuciko namasiko ezixhaswa ngezimali
nguMkhandlu Wezobuciko Namasiko KwaZulu-Natali sisuka kwezingama- 42 siya
kweziyi-18 kwaba ngumphumela wokubuyekezwa koxhasomali olutholwa yizinhlangano
olwaluphakathi kuka-R30 000 no- R60 000 inhlangano ngayinye. Sifuna ukuthi ukuxhasa
kwethu ngezimali izinhlangano kwenze umsebenzi obonakalayo kuphinde kwelekelele ekufezekiseni izinhlosongqangi zenhlangano.
17
Amaciko Ezikoleni
UMnyango usubuyekeze iSivumelwano Sokusebenzisana (i-MOA) noMnyango
Wezemfundo futhi uye wafaka noMnyango Wezemidlalo Nokungcebeleka waba
yingxenye yalesi Sivumelwano. Lesi Sivumelwano sihlose ukugqugquzela ezobuciko,
amasiko kanye namagugu ukuze kukhuthazwe ukuhlalisana okuhle kwemiphakathi
kanye nokubunjwa kwesizwe, ukuhlonza kanye nokunakekela amathalente ngezinhlelo
ezahlukene kanye nokusiza izikole jikelele ukuze zikwazi ukufezekisa izinjongo
zokufunda nokufundisa. Lesi sivumelwano sokusebenzisana sasayinwa ekuqaleni
kukaMbasa kanti futhi sizokuqapha ukusebenza kwaso. Uhlelo lwamaciko ezikoleni
olubizwa ngokuthi i- Artists in schools – lapho izinkakha zobuciko zisebenzisana nothisha
- seluqalile ukuthela izithelo ezinhle. Ziyi-180 izinkakha ezitzoshalwa ezikoleni ngokwalolu hlelo, kulo nyaka wezimali.
Uhlu lwemininingwane kanye nokuhlelwa kwamaciko ngokwamaqophelo akuwona
Sesakhe uhlu lwemininingwane yamaciko oluqokelelwe kukhompyutha (database) kanti
sethemba ukuthi sizobe sesikwazi ukulusebenzisa kahle ngoMandulo wezi- 2017. Lokhu
kuzoqinisekisa ukuba sobala kokusebenzisana kwamaciko neminyango kyesifundazwe.
Amaciko, kubandakanya nalawo enza imisebenzi yezandla azohlelwa ngokwamaqophelo
akuwona ukuze kubonakale ukuthi angene kusiphi isigaba sezimakethe. Lolu hlelo
luzosiza ekuhlomiseni uMnyango ukuze ukwazi ukuqalisa ukusebenza komyalelo
weSigungu Esiphezulu oyalela uMnyango Wezobuciko Namasiko ukuba kube yiwona
osekhaleni ekudidiyelweni kwezinhlelo zokuqokwa kwamaciko azokwenza imisebenzi edingekayo emicimbini kahulumeni.
Imitapo Yolwazi
18
Ukuhlaziya kwethu kuveze ukuthi ukwakhiwa kwemitapo yolwazi bekugxile kakhulu
eningizimu yesifundazwe. Ngenxa yalokhu, kusukela manje kuya phambili, uMnyango
uhlela ukugxila enyakatho yesifundazwe kanye nasezindaweni zasemakhaya ukuze kube
yizona ezihlomula kakhulu.
Imiklamo yemitapo yolwazi eqhubekayo njengamanje
Ukuthuthukiswa kwengqalasizinda kuyingxenye ebalulekile yalo Mnyango yokuqinisekisa
ukuthi abantu bayafinyelela ezinsizeni zemitapo yolwazi ukuze bathole ulwazi,
ukuzijabulisa kanye nokufunda impilo yonke. Nonyaka sizotshala u-R82, 889 million
maqondana nengqalasizinda yemitapo yolwazi. Njengamanje kwakhiwa umtapo wolwazi
waseNgwavuma kuMasipala waseJozini kanye nomtapo wolwazi waseBilanyoni
kuMasipala waseDumbe. UMnyango sewudlulisele isamba sokuqala sika-R10 million
kuMasipala wase-Newcastle maqondana nokwakhiwa komtapo wolwazi wase-
Charlestown. Ingxenye esele elinganiselwa ku-R15 million izodluliselwa kulo nyaka
wezimali ukuze kuphothulwe ukwakhiwa kwalo mtapo wolwazi. Ukwakhiwa komtapo
wolwazi wase-Port Shepstone onezitezi ezintathu kwaqala ngoNhlaba wezi- 2016 kanti-ke kulindeleke ukuba uphotholwe ngoNhlangulana wezi-2018.
Imiklamo yemitapo yolwazi esiphothuliwe
Ukwakhiwa komtapo wolwazi waseManyiseni kuMasipala waseJozini kwaphothulwa
ngonyaka wezimali owedlule nokuyinto ekhombisa ukuzibophezela kwethu ekuhambiseni
intuthuko ezindaweni ezisemakhaya. Umtapo wolwazi waseVulamehlo kuMasipala
waseMdoni kanye nokulungiswa kabusha komtapo wolwazi wase-Brutville nakho
kuphothulwe ngonyaka wezimali owedlule. Kuzolungiswa kabusha umtapo wolwazi waseMzimkhulu kanye nowase-Utrecht, eMadlangeni.
19
Imiklamo yezakhiwo zemitapo yolwazi zokubambisa
Kuzophothulwa izakhiwo zemitapo yolwazi zokubambisa eziyisishiyagalombili ngekwata
yokuqala yowezi-2017/18, lezi zakhiwo zikulabo masipala: (Ibisi) eMzimkhulu;
(eBhamshela) eNdwedwe; (eNkwezela) Dr Nkosazana Dlamini-Zuma; (KwaSthebe)
eMandeni; (KwaMthethwa) eMfolozi; (KwaChwezi) eNkandla; (kuWadi 17) eNquthu;
(Bhekuzulu) Abaqulusi kanye (naseSthembile) eNdumeni. Kulo nyaka wezimali,
uMnyango uzokwethula umfanekiso wepulani yesakhiwo somtapo wolwazi esinganwetshwa ngokubonakala kukhula isidingo sokusebenza kwawo ukuze uzongena
endaweni yesakhiwo sokubambisa esikhona njengamanje.
Imidwebo yemitapo yolwazi emisha
Imifanekiso yamapulani okungeyokugcina ngci yemitapo yolwazi waseMzumbe; e-
Dannhauser, eNquthu, oLundi kanye nowaKwaNongoma izophothulwa ekupheleni
konyaka wezimali bese isikhishelwa amathenda. Yonke le mitapo yolwazi izoba
senyakatho yesifundazwe njengokuzibophezela kwethu, ngaphandle kowaseMzumbe, okunguwona kuphela umasipala wendawo njengamanje ongenawo umtapo wolwazi.
Ukufinyelela ku-internet nakuma-e-learning kiosk
Yonke le mitapo yolwazi, kanye naleyo evele ikhona njengamanje, izokuba ne-internet
yamahhala ukuze amalungu omphakathi ezokwazi ukusebenzisa amakhompyutha
ukubheka imisebenzi, ukwenza izinhlelo zamabhizinisi kanye nama-CV. Yonke le mitapo
yolwazi izoba nama- e-learning kiosk ukuze umphakathi ukwazi ukufinyelela olwazini
emitapweni yolwazi. Ama-e-learning kiosk aqala ukufakwa emitapweni yolwazi emithathu
kowezi-2016/17 kanti-ke kusazofakwa amanye emitapweni yolwazi eyahlukene kowezi-
2017/18. Lezi zikhungo, ama-kiosk phela, zinezinsiza ezingama-touch screen zihlinzeka
20
phakathi kokunye, ngokuthi ukwazi ukudawuniloda ulwazi olulekelela abafundi kanye nolwazi oluqondene namabhizinisi amancane.
Izinsiza zemitapo yolwazi ezibhekelela abangaboni
Kulo nyaka wezi-2017/2018, kuzosetshenziswa u-R35 million emitapweni yolwazi emisha
kanye naleyo evele ikhona ukuthenga izinsiza zemitapo yolwazi ezintsha, ezibandakanya
izincwadi, amakhasethi alalelwayo nawezithombe ezibukwayo, amaphephabhuku,
amaphephandaba, amathoyizi abantwana kanye nemishini yokudlala. Lusazoqhubeka
uhlelo lokufinyelela ezincwadini ezifundeka nge-internet mahhala, olubizwa nge-e-Book
Subscription Service, nokuwuhlelo olukhombisa intshisekelo yoMnyango yokuhlala
uletha ulwazi oluhambisana nesikhathi maqondana nokufunda kanye nokuhlangabezana
nezidingo zomphakathi. Izinsiza eziyisipesheli ezimaqondana nabangaboni
ezitholakalayo njengamanje emitapweni yolwazi engama-23 sezizosatshalaliselwa
nakweminye emine kulo nyaka ngokugxile ikakhulu ezinhlelweni zokukhuthaza kanye nokukhangisa.
Izinhlelo zokukhuthaza
Kulo nyaka kuzoqaliswa izinhlelo zokukhuthaza ngenjongo yokutshala isiko lokufunda
kubantwana, ngenhloso yokuxhasa izinhlelo zikazwelonke zoMnyango Wemfundo Eyisisekelo eziqhubekayo njengamanje.
Yonke imitapo yolwazi emisha izokuba nendawo yokudlala neyokungcebeleka; isibonelo, amabhodi okudlala i-chess, imidlalo yomdabu, nokunye ngenhloso yokukhuthaza indlela yokuphila enhle. Sizoqhubeka nokuheha intsha ngalolu hlelo lwethu esilubiza ngokuthi i- “gaming @ your library”.
Kuzodaleka amathuba emisebenzi ngokuba kuxhaswe omasipala ngemali ukuze
kuqashwe abasebenzi abazosebenza emiklamweni yengqalasizinda, abazoqoqa amathoyizi abantwana, abazohlela izincwadi kanye nabazohlanza imitapo yolwazi.
21
Phezu kwalokho, kuyinto esiyaziyo sonke ukuthi ukuthuthukiswa kwabantwana
besebancane kuyingxenye esemqoka yokwesekelwa kwezemfundo esikuhlinzekayo
singuMnyango. Lokhu sikwenza ngokuba sihlinzeke ngamathoyizi nezimpahla zokudlala
emitapweni yolwazi engama-38 kanjalo ngokuba sihambise amathoyizi angama-tubby toys ezinkulisa ezingama-86.
Kulo nyaka wezimali, uMnyango uzodlulisela u-R198, 923 million komasipala bezindawo
okuwuxhaso olumaqondana nezindleko zokukhokhela abasebenzi abenza imisebenzi
ephathelene nemitapo yolwazi yomphakathi. Lolu xhasomali lwenza sikwazi ukubeka
amaqophelo aphezulu okwenziwa komsebenzi emiphakathini ehlinzekelwa yile mitapo yolwazi.
Ezemisebenzi Yezinqolobane Zokugcina Imilando Ebhaliwe
Njengengxenye yokuguqulwa kwezenhlalo, eZemisebenzi Yezinqolobane Zokugcina
Imilando Ebhaliwe kanye noPhiko Olubhekele Ukuphathwa Kwamarekhodi bazoqhubeka
nemikhankaso yokuqhakambisa izimpawu nemiyalelo yesizwe. Kuzovakashelwa izikole
ngenhloso yokuchaza ukuthi zisho ukuthini izimpawu zesizwe bese kunikezelwa
ngamafulegi kanye namabhokisi okugcina imilando ukuze kugqugquzelwe ukubunjwa kwesizwe kanye nokuthanda izwe kubantwana besikole.
Ukuphathwa Kwamarekhodi
Uphiko Olubhekele Ukuphathwa Kwamarekhodi olungaphansi kweZemisebenzi
Yezinqolobane Zokugcina Imilando Ebhaliwe luyaqhubeka nokusebenzisana neHhovisi
likaMcwaningi-mabhuku Jikelele waseNingizimu Afrika ngenhloso yokuqinisa izindlela
zokugcinwa kwamarekhodi kuyo yonke iminyango kahulumeni esifundazweni kanye
nakomasipala. SinguMnyango Wezobuciko Namasiko, siyakholwa ukuthi isiko eliqinile
lokugcinwa kwamarekhodi lenza kube lula ukufinyelela olwazini lukahulumeni, lwenza ngcono ukuthunyelwa kwezidingo kubantu futhi lwenyusa nokweneliseka kwezakhamuzi.
22
Ukulondolozwa Kwamagugu
UPhiko olubhekele Umlando Oxoxwayo olungaphansi kweZemisebenzi Yezinqolobane
Zokugcina Imilando Ebhaliwe luyaqhubeka nokuxoxisana nezakhamuzi esezikhulile
nalabo ababecindezelekile phambilini emiphakathini yethu ngenhloso yokuthola ulwazi;
ngaleyo ndlela-ke luphonsa itshe esivivaneni emzamweni yophiko Lwezemisebenzi
Yezinqolobane Zokugcina Imilando Ebhaliwe KwaZulu-Natali yokuqinisekisa ukuthi
umlando wezenhlalo walesi sifundazwe uveza ukwehlukahlukana kwabantu baso, amasiko kanye namagugu aso.
Inqolobane Yesifundazwe Yokulondoloza Imilando Ebhaliwe
Ikhona inqubekela phambili esiyenziwe maqondana nokwakhiwa kweNqolobane
Yokulondoloza Imilando Ebhaliwe Yesifundazwe saKwaZulu-Natali. Selwenziwe
ucwaningo lokwandulela lokubheka ukuthi kungenzeka yini lokhu kwaphinde kwethulwa
nombiko walokho okuhlonziwe. Ucwaningo oluphelele luyaqhubeka njengamanje kanti
luzophothulwa ngekwata yokuqala yalo nyaka. Kubekwe eceleni u-R 20 881 356 kulo nyaka maqondana nokwakhiwa kwaleli bhilidi.
Imibuthano yokubungaza u-OR Tambo
UMnyango uzosingatha imibuthano emihlanu eyingxenye yokubungaza ikhulunyaka lika-
OR Tambo. Emine yale mibuthano izosingathwa ezifundeni ezine bese kuthi owesihlanu
ube yingxenye yeSifundo Somphakathi Sezezinqolobane Zokugcina Imilando Ebhaliwe
saminyaka yonke.
Izigcinamagugu
Ukuguqulwa Kwezigcinamagugu
23
Ziyadlondlobala izinhlelo zoMnyango zokuguqulwa kwezigcinamagugu kanye namagugu
agcinwe kuzo. Ngonyaka wezi- 2016/17, kwakuhloswe ukuguqulwa kwesigcinamagugu
sase-Howick kanye nesase-East Griqualand (e-Kokstad). Kowezi- 2017/18 sizobhekana
ne-Lucas Meijer eseFilidi, i-Howick (iSigaba 2), uMdlovana, iKwaDukuza kanye ne-
Maritime Museum eseSayidi. Ukuguqulwa kwale zigcinamagugu kubandakanya
ukuqinisekisa ukuthi amagugu akulezi zigcinamagugu aveza umlando kanye namasiko
abantu bendawo. Kuzoxoxiswana nezigungu zabaqondisi bezigcinamagugu
ukuqinisekisa ukuthi abasebenzi bazo baveza isithombe esiphelele sezinhlanga ezikhona esifundazweni.
Imikhankaso yokuqwashisa
UPhiko Lwezemisebenzi Yezigcinamagugu ngokohlelo lwalo lokufinyelela emphakathini
luzoqinisa izinhlelo zokwazisa imiphakathi ebincishwe amathuba phambilini
ngemisebenzi engafundelwa kwezokugcinwa kwamagugu, okubandakanya izikhungo
zabakhubazekile, okungabakhuzeke ngokomzimba, abangezwa kahle kumbe
abangezwa nhlobo, abangaboni kahle, abangaboni nhlobo kanye nabantu abanenkinga yokuxhumana nabanye abantu.
Uphiko Lwezemisebenzi Yezigcinamagugu luzophinda futhi lubeke izikhangiso futhi
luxoxisane nabantu ezingqungqutheleni zabakhubazkile ngokunjalo nangesikhathi
sezinhlelo zokufundisa izitshudeni ngokukhubazeka ezikhungweni zemfundo ephakeme
(e-UNISA kanye nase-UKZN). Bazofundiswa kabanzi abengamele izigcinamagugu
kanye nabasebenzi bakhona maqondana nokufinyelela kwemiphakathi ekhubazekile
ezikhungweni zezigcinamagugu. Uphiko Lwezemisebenzi Yezigcinamagugu
lusezinhlelweni zokuhumushela ku-Braille lawo magugu agcinwe kwisigcinamagugu esingumahambanendlwana, ukuze lesi sigcinamagugu sikwazi ukusebenza
njengemtapo wolwazi ongumahambanendlwana wabantu abangaboni kahle ngokunjalo nalabo abangaboni nhlobo.
24
Uhlelo Lokulondolozwa Kwamagugu
Kusukela ekwethulweni kwalo ngowezi-2016, uhlelo obizwa nge-KwaZulu-Natal Heritage
Preservation Initiative (KZNHPI) selukwaze ukuhlizeka ngamagugu ezigcinamagugu
nawezamasiko angaphezulu kwezi-10 000 ngobuchwepheshe bamakhompyutha,
okuzokwenza izizukulwane ezizayo zikwazi ukuqonda imvelaphi yazo futhi zifunde
nangomlando onothile walesi sifundazwe. Njengamanje, bangaphezulu kwama-750
abantu abakwazi ukufinyelela kulo mthombo ngobuchwepheshe bamakhompyutha kanti
lesi sibalo sikhula ngama-30% njalo ngenyanga. UMnyango uzogxila ekutheni
kubonakale namagugu aphathelene nomzabalazo wethu wenkululeko, intando yabantu
kanye nokuthuthukiswa kwenhlalo nomnotho ngokufaka amanye amagugu amasha angaphezulu kwama-20 000 kusizindalwazi (website) esithi kznheritage.org portal.
Imibungazo ka-OR Tambo
Nonyaka kugujwa ikhulukanyaka lika-Oliver Reginald Tambo osewadlula emhlabeni,
ingqalabutho yesizwe neqhawe lomzabalazo wenkuleko, elabumba umbono wezwe,
impokophelo kanye namagugungqangi ethu. Sizobungaza umlando wakhe
ngokusungula ingosi yokufundisa kwisizindalwazi esithi kznheritage.org, okuyinto ezoqhakambisa impilo kanye nenkolelo ka-OR Tambo.
Amagugu ezamasiko ayinto engeke wayithola ndawo futhi akukho okuvala isikhala sawo,
ngakho-ke lesi sizukulwane samanje sinomthwalo wokuwalondoloza ukuze izizukulwane ezizayo zikwazi ukuwaqonda futhi zihlomule kuwo.
Isigcinamagugu sasePort Sheptone- Umnotho Wezasolwandle
Kuyintokozo ukumemezela ukuthi ukwakhiwa kweSigcinamagugu esisha sasePort
Sheptone esidle u-R17 million, kuphothulwe ngoNdasa wezi-2017. Ngijabule impela
ngoba nonyaka sizokwakha indawo yombukiso ezokudla u-R 1.4 million ezokhombisa
umnotho wasolwandle. Lokhu sizokwenza kube yingxenye yegalelo lethu kuzakhamuzi
25
zethu ukuze zazi nge-Blue Economy njengalokhu ichazwe ohlelweni olubizwa nge-
Presidential Operation Pakisa Programme. Lesi sigcinamagugu sizovulwa ngokusemthethweni makhathaleni kulo nyaka.
Izimali ezedluliselwa komasipala kanye nasezinhlanganweni ezingenzi nzuzo
UMnyango uzodlulisela u-R12.984 million komasipala bezindawo kanye
nasezikhungweni ezingenzi nzuzo maqondana nokuxhaswa kokuqashwa kwabasebenzi
kanye nezinye izindleko zokwenziwa kwemisebenzi ephathelene nokusebenza
kwezigcinamagugu. Lokhu yingxenye yokudalwa kwamathuba emisebenzi. Kanti-ke
maqondana nezikhungo ezingenzi nzuzo, lolu xhasomali lubhekele ukuqashwa kwabaphathi bezigcinamagugu.
Kulo nyaka, uMnyango uzoxhasa i-Prince Mangosuthu Buthelezi Museum kanye ne-
Documentation Centre, okuyizikhungo esezifakwe ohlwini lwezigcinamagugu
ezingaphansi koMnyango. Lokhu kukhombisa ukuzibophezela kwethu ekusebenzisaneni nemikhakha eyehlukene yemiphakathi yethu.
Lokhu kwedluliselwa kwezimali kuzohambisana nezinyathelo ezinqala zokuqapha ngeso
lokhozi ngokuthi kusayinwe izivumelwano zokusebenzisana futhi kube nezinhlelo
zokuqalisa ukusebenza ezinezikhathi ezibekwe ngokucacile kanjalo nemiphumelangqo
ebonakalayo okumele ifezekiswe.
Inhlanganisela Yezinhlelo Zokungenelela kuma-War Room
Sihlala njalo siphokophelele ukwenza ngcono izindlela zokusiza imiphakathi emazingeni
aphansi futhi sibe negalelo elibonakalayo elizoguqula impilo yabantu. Ukufezekisa lokhu,
iZinhlelo Zokungenelela kuma-War Room zilokhu ziyindlela engcono yoMnyango
yokuhambisa izidingo kubantu. Le ndlela ihambisana nohlelo lwesifundazwe olubizwa
nge-Operation Sukuma Sakhe. Imisebenzi esiyenzela imiphakathi ezingeni lama-war
room ngale nhlanganisela ibandakanya ukunikezela ngokhehlegume bezomculo
26
ngenhloso yokulekelela abaculi abasafufusa ukuba bakwazi ukuzilungiselela nokwenza
umsebenzi wabo; sikhokhela amaciko asemnkantshubomvu imadlana yokuqinisa
iphakethe ngokuqeqesha kwawo amaciko asangamavukana; siqeqesha amathimba
okufunda nokubhala izincwadi; sisiza abantu abasha bakwazi ukulandelela imvelaphi
yabo ngomklamo obizwa nge-Family Tree Project; futhi siqasha abacwaningi abaqoqa umlando ngokuxoxisana nabantu.
Kuyintokozo ukwethula isabelomali sowezi-2017/18 sika-Vote 15 esimi kanje:
Uhlelo 1: u-R149 387 million
Uhlelo 2: u-R 263 350 million
Uhlelo 3: u-R 461 331 million
Isamba sesisonke: u-R 874 068 million
Ukuhlonipha amaciko aselandulele leli
Ngingakahlali nje phansi, Somlomo, ngivumele nginxuse le Ndlu Ehloniphekile ukuba sike
sithobe umzuzwana nje sihloniphe bonke asebesishiyile kulo mhlaba, nokho abayibekile
induku ebandla embonini yezobuciko namasiko – abasishiye kamuva nje okunguSifiso
Ncwane (womculo wokholo), uLundi Tyamara (naye ongowomculo wokholo), uNgane
Ziyamfisa Ntuli (okaMaskandi) kanye no-Joe Mafela (wemidlalo yeshashalazi) – lena
bekuyingwazi ebeyaziwa emhlabeni wonke jikelele ebambe elikhulu iqhaza kulo mkhakha. Sengathi imiphefumulo yabo ingalala ngokuthula.
Isiphetho
Kuyobe ngehlulekile ukwenza umsebenzi wami uma ngingabongi uMhlonishwa
uNdunankulu kanye neqembu elibusayo ngokungethemba abangikhombise khona
ngokuthi bangiphe ithuba lokuhola lo mnyango. Ngithanda nokubonga iKomidi
Lesishayamthetho elibhekele Ezobuciko Namasiko kanye nelibhekele Ezezimali ngoholo
27
kanye nokweseka abahlala besinikeza kona; kanjalo nomndeni wami oyinsika yami
zikhathi zonke. Okokugcina, ngibonga ukwesekwa okukhulu engikuthola koyiBamba leNhloko yoMnyango, uMnu MB Mnguni, abaphathi kanye nabasebenzi jikelele.
Masisebenze singaphumuli ukuze sakhe uMphakathi Obumbene, Ohlalisene Kahle
noneNqubekela Phambili Ngezobuciko, Amasiko Namagugu.
Ngiyabonga.