poesía
DESCRIPTION
poesís en galegoTRANSCRIPT
Quíxenche tanto, meniña
tívenche tan grande amor,
que para min eras lúa
branca aurora e craro sol;
auga limpa en fresca fonte,
rosa do xardín de Dios,
alentiño do meu peito,
vida do meu corazón”.
Así che falín un día
caminiño de San Lois,
todo oprimido de angustia,
todo ardente de pasión;
mentras que ti meescoitabas
depinicando unha frol,
por que eu non
vise os teus ollos
que refrexaban traiciós.
Dempois que si me dixeches,
en proba do teu amor,
déchesme un caraveliño
que gardín no corazón.
¡Negro caravel maldito,
que me fireu de dolor!...
Mais a pasar polo río
¡o caravel afondou...!
Tan bo camiño ti leves
como o caravel levou.
Rosalía de Castro
Regreso ao teu corpo
no que me afundo
para esquecelo todo.
Afondoen ti,
xa me levas
no claro día dos teus ollos.
Mergúllome no mel
da túa herba e dos teus labios.
Sinto un río
de bolboretas lenes
enchendo as miñas veas
mar arriba a desborda
Autor: Xulio L. Valcárcel
Onda un muro
De pedra
eu puxen un bico
para ti
Baixo un teito
de pedra
pintaches un bico
para min.
Un bico pintado.
Un bico pousado
na tea
na area.
Dous bicos calados
na pedra
na tebra.
Dous bicos
sen fin.
Antonio García Teijeiro
Voz sen verbas:
silencio.
mar sen auga:
deserto.
Sol sen raios:
misterio.
Luz sen brillo:
coitelo.
Man sen man:
un berro.
Dor sen laios:
o tempo.
Eu sen ti:
inferno.
Antonio García Teijeiro
.
SEMPRE a rosa.
Sempre:
a forma,
a cor,
o recendo,
a luz,
a perfección da rosa.
Prefiro a rosa vermella.
E amo a rosa branca
porque, cando lle digo
simplementes: ROSA,
entrecerra os ollos,
treme
e ruborece.
Manuel María
Miña nai traballa nunha fábrica de conservas.
Un día miña nai díxome:
o amor é unha sardiña en lata. ¿Ti sabes
cómo se preparan as conservas en lata?
Un día miña nai díxome: o amor é unha obra de arte
em lata.
Filla,
¿sabes de onde vés? Vés dun viveiro de mexillóns
en lata. Detrás da fábrica, onde podrecen as cunchas
e as caixas de peixe. Un fedor imposible, un azul que
non vale. De alí vés.
Ah! Dixen eu, entón son a filla do mar.
Non.
Eres a filla dun día de descanso.
Ah! Dixen eu,
son a filla da hora do bocadillo.
Sí, detrás, entre as cousas que non valen.
Luisa Castro
Nas leves tardes de Outono tan serenas,
ateigadas de silencio e dozura
eu vou sentindo, amor, a túa tenrura
igual que lume queimándome nas veas.
O son das aves, o vento e as sereas,
a voz solemne do mar, rouca e escura,
é a voz do amor coa súa fondura,
co seu incansábel ritmo de mareas.
Eu quero vivir o outono na ribeira
para amistar coas gaivotas e embarcar
nunha dorna xentil, ben mariñeira.
O meu desexo máis fondo é naufragar,
¡ouh miña boa e sinxela compañeira!
no teu mar de tenrura. Só no teu mar.
(Manuel María)
Aquel veran dixeches que me amabas.
Non era amor, mais ti falabas delo.
Falábasme do amor do noso selo
e que era a min soamente a quen buscabas.
Aquel verán dixeches que me amabas.
Que ansiabas de entre o amor o máis sinxelo:
percorrer cos teus beizos o meu pelo
e tocarme coma só ti me tocabas.
Aquel verán dixeches que me amabas.
Que non tiveras antes quen te amara,
nin quen te amara tanto ti tiveras.
Aquel verán dixeches que me amabas.
Dixeches que deixándome perderas
o día en que pra sempre te marchabas.
(Modesto Fraga)
Ondas do mar de Vigo,
se vistes meu amigo!
E ai Deus, se verrá cedo!
Ondas do mar levado,
se vistes meu amado!
E ai Deus, se verrá cedo!
Se vistes meu amigo,
o por que eu sospiro!
E ai Deus, se verrá cedo!
Se vistes meu amado,
por que hei gran coidado!
E ai Deus, se verrá cedo!
Martin Codax
Cando setenta invernos na túa frente
caven fondos agravios e regañas,
cando leves escrita polas cañas
a traxedia do tempo displicente;
cando o curso dos anos che amolente
a preciosa dureza das entrañas,
cando mesmo calvexen as marañas
que son coroa ó monte máis ardente;
cando a morte se pouse nos teus ombros
e todo sexa un resoar de escombros
e ruína certísima da rosa,
se eusigo por aquén, amarei tanto
a túa decadencia, o teu quebranto,
que has de morrer pensándote fermosa.
Darío Xohán Cabana
¿Cómo hei vivir mañá sen a luz túa?
Case morto vivín sen coñecerte
aló na chaira seca por absurdas rúas
onde ninguén me soubo dar mornura.
Foi soidade desconforme adentro
e a semente a caer en terra dura.
¿Cómo hei vivir mañá sen a luz túa?
Erguinme e vinte ao regresar á terra
como se fora todo aquilo un soño
pesado e ti xa foras sempre miña.
Foi outra vez materno en aloumiño
o bico teu na lingua.
E foi de novo corazón adentro
comprender a existencia e a dozura.
¿Cómo hei vivir mañá sen a luz túa?
Pero hoxe mesmo o día abriu en medo
entrou na fiestra un sol estraño inmenso
e deixáchesme o leito en mantas frías.
Está a volver agora corazón adentro
a soidade o podre a agonía
a me pinchar as cousas en millóns de pugas
cada minuto en séculos de agullas.
¿Cómo hei vivir mañá sen a luz túa?
Bernardino Graña
Manco o sol que regresa da xanela
e estou aquí a mor e estou contigo:
quixera vernos fundidos á terra,
á terra, á auga, ó mundo inmenso.
As túas mans que me andiveron son días,
días que marchan e esquecín hai anos,
moitos anos, esta forma de volta
pois cen anos hai ata agora mesmo,
se ti non me abrazaras.
E estou aquí amor e estou contigo,
teus ollos chuvia, túa voz quen me agocha,
quen me agocha, meu amigo querido.
É contigo que podo
cre-las mentiras do amor
crer nas mentiras do amor,
unha imbecilidade que é imposible.
Xela Arias
A amante nunca ten dentes postizos
graus no nariz
pelos nas coxas
gorduras nos cadrís.
Á amante nunca lle inchan os ollos ao dormir.
O poeta ama a perfección
non te ama a ti.
Es idealización
mito
metáfora da metáfora.
De non seres perfecta como te amarían?
Mª Xosé Queizan
Si o certo é teu amor
i é cobiza a sospeita
perdóame.
Si son eu o que fuxe
i eres ti quen te quedas
perdóame.
Si é engado teu querer
e o certo é miña dúbida,
engádame.
Si para a tua ledicia
percisas miña anguria,
engádame.
Blanco-Amor
Estamos xuntos
pero tamén
moi separados.
O noso amor é poesía.
Poemas abertos,
os nosos corpos.
Se te enamoras
vaste e non volves.
Ou chegas e miras todo
como unha estranxeira.
Ninguén
me prohibirá nunca
estar soa.
Lupe Gómez
Toma esta chave.
Abre os meus beizos
pero non raches
o meu silencio.
Abre os meus labios,
tes moito tempo.
Ti ben coñeces
a voz do vento.
Faino con calma.
Faino con xeito.
Quero vivir
nun beixo eterno.
A.García Teijeiro,
Es doce como o soño degolado,
doce folla de aceiro dun coitelo,
doce como a nudez do carambelo,
doce sangue vermello derramado.
Es doce como o verso encabalgado,
doce palabra libre e pesadelo,
doce como ese son do violonchelo,
doce canto, barítono do agrado.
Es doce como a noite pequerrecha,
doce casa común, tobo futuro,
doce como asubío dunha frecha,
doce zume, morango ben maduro,
doce como o sendeiroi dunha crecha,
doce exaculación a ben seguro.
Miro Villar
E cando me volvín para bicalo
escoiteille dicir
"facía tanto tempo".
Non lle pedín permiso.
Non sabía.
Do seu corazón lento
nunca puiden contar tódolos golpes.
María do Cebreiro
Sube por min
arrastrándote e rozando as miñas pernas,
envolvendo, torpe e irto,
as miñas coxas.
Debuxa como sabes o meu corpo,
construíndote en min
como acostumas,
inventándote quizais en nova pel.
Crea a figura que coñeces
e agarda a que te abotoe.
Mónica Góñez
Unha noite na eira do trigo,
o refrexo do branco luar,
unha nena choraba
sin trégolas,
os desdés dun
ingrato galán.
Y a coitada
entre queixas decía
xa no mundo
non teño a ninguén,
vou morrer e non ven
os meus ollos,
os olliños
do meu doce ben.
Os seus ecos
de malencolía
camiñaban nas alas
do vento,
Y o lamento repetía
vou morrer e non ven
o meu ben.
Curros Enriquez