КЛИМАТСКИ ИЗГЛЕДИ ЗА МЕСЕЦ АПРИЛ и МАЈ 2019година

Сезонските предвидувања обезбедуваат низа можни климатски информации кои најверојатно ќе се појават во сезоната што следи.

Важно е да се има предвид дека поради хаотичната природа на атмосферската циркулација, не е можно да се предвидат варијациите на дневна основа на одредена локација неколку месеци однапред. Дури и точното предвидување на просечните вредности, како што е просечната температура за даден месец е исклучително тешко, така да во најголема мерка за сезонските прогнози зборуваме во смисла на најверојатните отстапувања од просечните вредности.

Исто така, во однос на просторната распределба треба да се има предвид дека сезонските климатски изгледи се однесуваат на поголеми пространства (мрежа со 80 км резолуција). Локалното време и климата се под големо влијание на карактеристиките кои се премногу мали за да бидат вклучени во моделот со релативно ниска резолуција (ридови, крајбрежја, својства на површината на земјиштето).

За климатските изгледи во месеците април и мај, како последни два месеца од пролетната сезона се користени податоците од Европскиот центар за среднорочна прогноза временски (ECMWF), кој користи интеграции на обединет глобален модел на океанот и атмосферата; податоците од Регионалниот виртуелен центарна Југоисточна Европа за климатски промени (SEEVCCC) и податоците од Меѓународниот истражувачки Институт за клима при Универзитетот Колумбија (IRI).

Во месец април 2019, средната месечна температура се очекува да се движи од 6-8°С на високите планини во крајниот северозападен дел од Републиката; од 8-10°С во западните, централните региони и дел од југоистокот; и од 10-12°С во североисточна Македонија. Се очекува месец април да биде потопол од просечно за 1-2°С.

Средната месечна температура во мај 2019 се очекува да биде од 14-16°С, а во планинските области од 12-14°С, со тоа што како месец ќе биде со просечна и надпросечна температура (за 1-2°С). Повисока температура од просечната може да има во источна Македонија (2-3°С)

Месечната сума на врнежи и во април и во мај се очекува да изнесува од 50-100мм.

Во април тие ќе бидат подпросекот во западниот дел (до 25%), просечни долж Повардарието и над просекот во источна Македонија (до 25%). Помалку од просечните месечни врнежи скоро во целата Република се очекуваат во мај, со исклучок на источните делови.

Треба да се напомене дека е можна појава на локални настани, така што се препорачуваат редовни следења на прогнозата.

Сите понатамошни информации за прогнозата на времето, ажурирањата и предупредувањата со пократок домет се достапни 24/7 од Управата за хидрометеоролошки работи.

Изготвил:С.Алчинова МоневскаА.Стевков Директор,

Одобрил:Н.Алексовска М-р Ивица Тодоровски

Прилог-прогностички карти