Årsmelding 2018

Hordaland fylkesbibliotek

1

Framsidebilde: Til saman fjorten kommunar arrangerte foredraget og debatten: "Klimaendringar på Vestlandet: Korleis handtere det uunngåelege?" med forskar og geolog Kikki Kleiven og dagleg leiar i Norsk klimastiftelse Lars-Henrik Paarup Michelsen. Turneen var eit samarbeid mellom Hordaland fylkeskommune, Nasjonalbiblioteket, Bjerknessenteret for klimaforskning og Norsk Klimastiftelse.

Innhald Høgdepunkt i 2018 s. 3 Fylkesbiblioteket sitt oppdrag s. 4 Utviklingsoppgåver Modellbibliotekprogrammet s. 5 Auke tal på besøk og arrangement s. 6 Digital formidling og innhaldsproduksjon s. 7 Digitale tilbod i biblioteka i fylket s. 8 Skulebibliotek for kunnskap og trivsel s. 8 Fleirkulturelle bibliotektenester s. 9 Interkommunalt biblioteksamarbeid s.10 Kompetanseutvikling s.10 Kurs 2018 s.11 Litteraturformidling s.13 Driftsoppgåver Fjernlån og transport mellom bibliotek s.16 Bokbåten Epos s.17 Klassesett s.18 Råd og rettleiing s.18 Informasjonsarbeid s.18 Politiske saker s.19 Innlegg s.19 Internasjonalt arbeid s.20

3

Høgdepunkt i 2018

Austevoll og Fusa opna modellbibliotek

3.440 deltakarar besøkte 75 arrangement på turnear i regi av fylkesbiblioteket

Integreringsprosjektet Rom for møte skapte aktivitetar i femten kommunar

Besøket auka på bokbåten Epos

Utlånet på e-bøker auka

Bildet over: Klimadebatt på Fjell folkeboksamling Bildet under: Staseleg opning med flott kake på Fusa folkebibliotek

Fylkesbiblioteket sitt oppdrag

I følgje Lov om folkebibliotek skal fylkeskommunen ivareta regionale bibliotekoppgåver og regional bibliotekutvikling. Fylkesbiblioteket er bibliotekfagleg rådgivar for kommunane og biblioteka i vidaregåande opplæring. Vi initierer, leier, finansierer og støttar utviklingsarbeid i biblioteka i Hordaland. Dei fem regionale biblioteksamarbeida, som omfattar 32 kommunar, er basis for arbeidet vårt. Ei kjerneoppgåve er å utvikle og oppdatere kompetansen hjå bibliotektilsette gjennom strategisk arbeid, kurs, konferansar og andre kompetansehevande tiltak. Arbeidet i fylkesbiblioteket er styrt av Biblioteklova og Hordaland fylkeskommune sin vedtekne bibliotekpolitikk, som er nedfelt i Premiss : Kultur - Regional kulturplan for Hordaland 2015-2025 og Skulebiblioteket – kunnskapskjelde, kulturberar og sosial møteplass : strategi for utvikling av skulebibliotek i vidaregåande opplæring i Hordaland 2017 – 2020. Fylkesbiblioteket er leia av fylkesbiblioteksjefen. I 2018 var det i tillegg 9 personar i 6,4 årsverk knytt til arbeidet.

5

Modellbibliotekprogrammet – utvikling av moderne folkebibliotek

Eitt av innsatsområda i regional kulturplan er at innbyggarane i Hordaland skal ha tilgang til moderne og attraktive bibliotek. Fylkeskommunen har sidan 2014 vore med på å utvikle biblioteket som arena for møte og arrangement gjennom modellbibliotekprosjektet, som no omfattar 16 bibliotek. I tillegg til økonomisk tilskot får deltakande bibliotek bidrag til interiørarkitekthjelp og anna praktisk hjelp med prosjektet. Programmet har ført til eit løft for biblioteka. Statistikken viser tydeleg auke i bruken av dei biblioteka som har fått oppdatere lokale og aktualiserte samlingar. 11 av biblioteka er meiropne, dvs. at brukarane kan kome inn utanom bemanna opningstid. I 2018 var Voss, Sveio og Masfjorden plukka ut til å vere med i prosjektet, medan Austevoll og Fusa opna dørene til nye og moderniserte bibliotek.

Foto: Melaine Bergeron. Austevoll bibliotek opna nye lokale 24.03.2018

Auke tal på besøk og arrangement

Turneverksemd Fylkesbiblioteket organiserer og koordinerer turnear til biblioteka for å hjelpe dei til å vere uavhengige møteplassar og arenaer for offentleg samtale og debatt. Turnetilbodet er eit populært tiltak, og i 2018 la vi til rette for 75 tilskipingar med til saman 3.440 deltakarar ved ulike bibliotek i Hordaland. Turnear 2018 Snill for ein million med Arnfinn Kolerud Fjordabåtar med Øyvin Konglevoll Jul i gamle dagar med Astrid Koppen Mjanger Erlend & Erlend gjer Vestlandet med Erlend Nødtvedt og Erlend Apneseth Avslutningsfest for Sommarles med Trond Magnum Klimaendringar på Vestlandet: Korleis handtere det uunngåelege? med forskar og geolog Kikki Kleiven og dagleg leiar i Norsk klimastiftelse Lars-Henrik Paarup Michelsen. Samarbeid mellom Hordaland fylkeskommune, Nasjonalbiblioteket, Bjerknessenteret for klimaforskning og Norsk Klimastiftelse. Om migrantar og menneskeverd med Kristin Sørsdal Fuglen og det store eventyregget med Marianne Stenerud Programserie om psykisk helse etablert på biblioteka på Voss, Lindås og Fjell.

7

Digital formidling og innhaldsproduksjon

Biblioteknettstader Til saman 18 kommunar har nettstadar som fylkesbiblioteket har utvikla i samarbeid med biblioteka og utviklarmiljø. Utgangspunktet er ein mal i Wordpress og Webløft-prosjektet frå Buskerud. I 2018 arrangerte vi tre nettstadverkstader i biblioteksamarbeida og var med på Webløftkonferansen i Sandefjord 13. mars. Fylkesbiblioteket gir hjelp til bibliotektilsette med nettstadene i det daglege arbeidet.

Nettstadverkstad på Voss i januar 2018.

Kjelda I 2017 fekk fylkesbiblioteket støtte på 300 000 kr frå Nasjonalbiblioteket til prosjekt Kjelda. Målet er å gi brukarane dei gode kjeldene og samstundes eit breiare bilde av kva biblioteket kan by på. Helsebiblioteket og Miljøstatus er to av kjeldene som er brukt i prosjektet. For å vekke interesse for kjeldene samarbeider vi med ekspertar på sine område om artiklar/arrangement, og vi testar ulike versjonar på biblioteknettstadene. Målet er å finne nye måtar å formidle kjelder, med vekt på brukaroppleving. Prosjektgruppa på fylkesbiblioteket produserer også artiklar. Ei vidareføring av prosjektet blir vurdert i løpet av hausten 2019.

Digitale tilbod i biblioteka i fylket

E-bøker Biblioteka i kommunane, utanom Bergen, er saman med dei vidaregåande skulane i Hordaland med i eit konsortium for digitale ressursar, som vert administrert av fylkeskommunen. Det vart lånt ut 26 652 e-bøker i 2018, noko som er ein auke på 8 %. PressReader Alle folkebiblioteka i Hordaland har eit felles abonnement på den digitale avis- og tidsskriftstenesta PressReader. Bruken auka frå 57 000 lesne artiklar i 2017 til 64 000 i 2018.

Skulebibliotek for læring og trivsel

I 2018 opna fleire vidaregåande skular nye biblioteklokale. Mellom anna flytta biblioteket tilknytt Bergen Katedralskole inn i fine, nye lokale i januar i samband med ombygging av skulen. U.Pihl blei lagt ned i juni og seinare riven. Boksamlinga der blei overført til Tertnes vgs, som også har flytta til nyoppussa lokale. Bemanninga i biblioteka på dei vidaregåande skulane har vore uendra i 2018. Av dei skulebibliotekansvarlege utgjorde dei fagutdanna bibliotekarar 16,5 årsverk, fordelt på 19 av dei 33 skulane. Alt i alt har det vore 23,5 årsverk i vgs-biblioteka i Hordaland i 2018.

Tilsette ved vgs-skulebibliotek og folkebibliotek i fylket var på kurs i samlingsutvikling med Tone Moseid, biblioteksjef ved Tønsberg og Færder bibliotek. Fjell folkeboksamling

8. mai 2018.

9

I august vart ei rettleiing for skulebibliotekansvarlege ferdigstilt. Det er ein manual for korleis skulebiblioteka i Hordaland skal bli drivne, både med tanke på biblioteksystem og arbeid mot elevane. Dei tilsette i skulebiblioteka har vore samla på fire fagdagar fordelte på våren og hausten. Samlinga i mai var delvis i lag med folkebiblbliotektilsette i fylket (kurs i samlingsutvikling). Samlinga i november var i Stavanger, som del av ‘Fagforum Vestlandet’, i samarbeid med skulebibliotekarar i Rogaland og Sogn og Fjordane. I september dro fem skulebibliotekarar til Oslo på skulebibliotekseminar på Nasjonalbiblioteket. I desember vart den ideelle organisasjonen Faktisk.no invitert til å halde foredrag for skulebibliotektilsette i fylket. Dette var eit samarbeid med Olsvikåsen vgs, og både elevar ved skulen og bibliotekarane fekk nyte godt av besøket.

Fleirkulturelle tenester

Det Felles Innvandrerråd i Hordaland har saman med Bergen Offentlige Bibliotek og Hordaland fylkesbibliotek fått nye 1 420 000 kroner frå Gjensidigestiftinga til å vidareføre arbeidet med å vise mangfald og auke integreringa mellom nordmenn og innvandrarar i prosjektet Rom for møte. Prosjektet bygger vidare på det flotte arbeidet som er gjort i biblioteka i Hordaland og vil gå fram til 2020. I 2018 blei det tildelt 243 500 kroner til 14 kommunar, utanom Bergen, til ei rekkje interessante prosjekt innan norsktrening og integreringsaktivitet. Her kan du følgje aktivitetar i prosjektet; https://www.facebook.com/romformoter/

Interkommunalt biblioteksamarbeid

Fylkesbiblioteket arbeider med oppfølging av biblioteksamarbeida i fylket, mellom anna ved å delta på møte i dei fem regionsamarbeida. Målet er at fagpersonalet på fylkesbiblioteket skal vere med på møte i samarbeida kvart halvår. Dette sikrar god dialog og at arbeidet på fylkesbiblioteket blir retta inn mot behova i regionane.

Møte med Sunnhordlandssamarbeidet i april 2018.

Kompetanseutvikling

Fylkesbiblioteket har eit lovfesta ansvar for å arrangere møte og kurs om bibliotekspørsmål. Gjennomføring av forskjellige typar kurs og konferansar for ulike målgrupper er ei prioritert oppgåve på fylkesbiblioteket. Fylkesbiblioteket arrangerte åleine, eller i samarbeid med andre, 19 kurs og konferansar med til saman 558 deltakarar.

Flott gjeng med bibliotekleiarar i fylket på veg til Bibliotekdagane i Austevoll i juni 2018.

11

Helge Skurtveit frå fylkesbiblioteket på Årets bøker for barn og unge som samla

131 deltakarar.

Bibliotekdagar i Austevoll juni 2018.

Kurs 2018

Dato Kurs Stad Deltakarar

09.01 Nettstadverkstad Knarvik 7

26.01 23 offentlege ting, dag 1 Bergen 19

12.02 Marknadsføringsseminar Bergen 16

16.02 23 offentlege ting, dag 2 Bergen 16

06.03 Bokgilde Bergen 41

13.03 Webløftkonferanse Sandefjord 47

16.03 23 offentlege ting, dag 3 Bergen 16

10. – 11.04 Bokbad og utstillingsteknikk

Bergen 30

18.04 Det Bergenske bibliotekseminar

Bergen 57

04.05 Nettstadverkstad Odda 3

07.05 Skulebiblioteksamling 24

08.05 Det er ikkje hokus-pokus - samlingsutvikling

Fjell 30

05. – 06.07 Bibliotekdagane Bekkjarvik 40

12.10 Nettstadverkstad Fusa 2

02.11 Sosiale media i det offentlege

Bergen 15

07.11 Falturiltu - bibliotekseminar

Leirvik 44

12. – 13.11 Skulebiblioteksamling 13

28.11 Årets bøker Bergen 131

03.12 Kurs i faktasjekk, faktisk.no

Bergen 7

Til saman 558

13

Litteraturformidling

Sommarles 2018 Sommarles er ein landsdekkjande digital lesekampanje for barn i 1. - 7. klasse. Målet med kampanjen er å halde i hevd og styrke lesedugleiken gjennom frivillig lesing i sommarhalvåret. Digitale spel og løysing av oppgåver, registrering av bøker ein les, lesetips og små premiar som ein hentar på biblioteka, gjer at kampanjen treff målgruppa godt og skapar begeistring både hos barn og bibliotektilsette. I Hordaland har kommunane teke del i kampanjen sidan 2016, då med 21 deltakande bibliotek. I 2018 vart talet auka til 28 bibliotek, med 19,3 % av borna i grunnskulen engasjerte i lesing og digitalt spel. Fylkesbiblioteket står for administrering, og vi betaler også delar av kostnadane knytt til deltaking for dei påmeldte biblioteka. I tillegg organiserer vi ein turné til avslutninga av kampanjen. I 2018 var det avslutningsfest med Trond Magnum.

Trond Magnum frå Abrakadabra teater på Sommarlesfest i Fitjar med song, musikk, leik og gjøgling.

Leseknappen Målet med Leseknappen er å støtte opp under den første leseopplæringa. Hovudmålgruppa er elevar i 2. klasse, som har eller er på veg til å knekke lesekoden.

I opplegget er det eit samarbeid mellom folkebibliotek, skule og foreldre. Barna vitjar folkebiblioteket med klassen og får med seg heim informasjon om Leseknappen, eit lesekort og ei forslagsliste over bøker. Barna står sjølvsagt fritt til å velje kva bøker dei vil lese. Når barnet har lese ti bøker, kan det levere lesekortet på biblioteket og få overrekt Leseknappen. Det er ingen tidsfrist for innlevering av lesekortet.

Fylkesbiblioteket koordinerer felles bestilling av leseknappar og klassesettsamlinga vår har ein god del bøker til denne målgruppa. Dei fleste bøkene er på nynorsk, men vi har også kjøpt nokre sett på bokmål.

Nynorske lesegledarar Lesegledarane er personar med engasjement og kunnskap om bøker, som driv direkte formidling til skular, barnehagar og bibliotek. Ordninga er støtta av fylkeskommunen og Nynorsksenteret, og organiseringa er eit samarbeid mellom fleire fylke. I Hordaland har vi 13 lesegledarar, og seks av dei hadde oppdrag i 2018, med til saman 33 program.

Vg2 Barne- og ungdomsarbeidarfag ved Austrheim vgs hadde besøk av lesegledar Hanna Bekkestad. Klassen fekk då innføring og praktiske øvingar i kvifor det er viktig å lese for barn og korleis ein bør gjere det, mellom anna med omsyn til

stemmebruk. No er klassen klar for å praktisere det dei har lært i Austrheim kystbarnehage

15

Bokgilde På det årlege Bokgilde formidlar bibliotektilsette i fylket bøker til kvarandre. Her blir skjønn- og faglitteratur for vaksne som ikkje har fått så mykje merksemd andre stader løfta fram; kulturfondbøkene, debutantane og dei smalare utgjevingane. Dette er snarvegen for å bli kjent med nye bøker og samstundes god øving i formidling.

Bokgilde 6. mars 2018.

Lesarsørvis

Lesarsørvis er ein måte å formidle bøker på som bygger på amerikanske Readers’ Advisory. Metoden handlar om å analysere bøker etter bestemte appellfaktorar, for å finne titlar ein kan anbefale til lånarar. Leseombod Leseombod er personar som les høgt for menneske som har vanskar med å lese sjølve. Dette er ein del av Leser søker bok si Bok til alle-ordning, som 17 folkebibliotek i Hordaland er med i. Biblioteka tek eit særleg ansvar for å formidle eit utval bøker som har fått støtte av organisasjonen. Felles er god, leseleg skrift og «luft» på sidene. Innhaldet i dei fleste tekstane høver for alle, medan nokre bøker har enklare innhald.

Driftsoppgåver

Fjernlån og transport mellom bibliotek

Frå 2017: Lån mellom bibliotek i Noreg har endra seg dei seinare åra. Nedgang i biblioteka sine mediebudsjett og ein moderne infrastruktur har ført til auka innlån og nye lånevegar. Fjernlånet ligg heilt på same nivå som i 2017. Bergen offentlege bibliotek står for 48 % av fjernlånet i Hordaland. 8 % av innlånet gjekk til Bergen. Innlånet i folkebiblioteka i fylket minka med 10 % frå 2017 til 2018, noko som tydar på at sjølvforsyningsgraden aukar. Norsk bibliotektransport har ansvar for frakt av bøker og anna materiale mellom biblioteka i fylket og ut av fylket. Alle dei kommunale folkebiblioteka utanom Eidfjord, Modalen og Etne er med (Etne har transportordning saman med Vindafjord i Rogaland). Hovudmålet for transporttenesta er at det skal bli enklare og raskare for biblioteka å låne frå kvarandre, og at ein i samarbeidsregionane i fylket kan planlegge felles mediesamlingar utan tanke på tungvint transport.

Nasjonalbiblioteket opna tenesta Biblioteksøk https://bibsok.no/ for biblioteka i Hordaland i juli. Dette gjer at alle innbyggjarane i Hordaland kan bestille bøker og andre dokument frå bibliotek i heile landet, og hente dei på sitt næraste bibliotek. Dette vert kalla Norgeslån.

17

Bokbåten «Epos»

Bokbåten hadde 42 driftsdagar og 50 stoppestader delt på 22 kommunar. Utlånet gjekk opp frå vel 9400 til nærare 9800 utlån. Besøket auka igjen, frå 4485 til 4704. I samarbeid med Den kulturelle skolesekken og med støtte frå Folkeakademiet Hordaland var det eit barneprogram på dei fleste stoppa. I tillegg hadde vi vaksenprogram fem stader. Bokbåten tok del i litteraturfestivalen Falturiltu i Leirvik med eit barneprogram og eit vaksenprogram. www.bokbaten.no

Schlager og Kanari med Ingvild Storhaug og Lena Rist-Andersen på Bokbåten.

Klassesett Fylkesbiblioteket låner ut klasse- og gruppesett av bøker til grunnskular i Hordaland utanom Bergen. Mange av bøkene er på nynorsk. Vi har også nokre lydbøker og dvd-ar i samlinga. I 2018 lånte vi ut 129 sett (2017: 107) og til saman 2188 einingar.

Råd og rettleiing Dei tilsette på fylkesbiblioteket svarar i løpet av året på mange spørsmål frå kommunane om innreiing, samlingsutvikling, samarbeid og andre bibliotekfaglege problemstillingar.

Informasjonsarbeid

Nettstaden til fylkesbiblioteket blir aktivt brukt til å informere om tenester og prosjekt. Facebook blir brukt særleg til å dele aktivitetar og diskutere bibliotekutvikling med partnarane våre i kommunane og elles. Sida har god rekkevidde i målgruppa, og vi får jamt over god respons på aktiviteten på sida. Fylkesbiblioteket deltar i fleire grupper på Facebook for å ha dialog med kollegaer og på tvers av kommunegrenser. Postlista til bibliotekleiarane blir nytta til informasjon og invitasjon til kurs, konferansar og liknande.

19

Bokbåten har eigen nettstad og ei Facebook-side i samarbeid med fylkesbiblioteket i Møre og Romsdal. Desse kanalane er også aktivt brukt for å informere om tilbodet og halde kontakten med brukarane og andre interesserte. Skulebibliotekarane i dei vidaregåande skulane i fylket kommuniserer og utvekslar informasjon med kvarandre og med fylkesbiblioteket i ei lukka gruppe på It’s Learning og ei gruppe på Facebook. Fylkesbiblioteket bidreg også til å dele ut informasjon til TV-aksjonen, som i 2018 gjekk til Kirkens Bymisjon og aksjonen «Mindre alene sammen», for å skape eit meir inkluderande samfunn.

Politiske saker I 2018 la fylkesrådmannen fram seks politiske saker for Kultur- og ressursutvalet med sakshandsamar frå fylkesbiblioteket. To av sakene vart handsama i Fylkesutvalet. I tillegg fekk utvalet fire referatsaker med utspring i fylkesbiblioteket. Ei av desse gjekk vidare til Fylkesutvalet.

Innlegg

På det 76. norske Bibliotekmøtet i Sandefjord i mars heldt fylkesbiblioteksjefen innlegget: «Fjernlånet i Norge – hvor er vi på vei?» I april På Neptunkonferansen i Bergen heldt fylkesbiblioteksjefen innlegget: «IFLABibLibre International Marketing Award. Gode eksempel på marknadsføring av bibliotek. I mai heldt fylkesbiblioteksjefen innlegget «Biblioteket i 2028» for kommunestyret i Jondal.

Internasjonalt arbeid

IFLA Fylkesbiblioteksjef Ruth Ørnholt er med i Management and Marketing seksjonen i IFLA (International Federation of Library Associations and Institutions). I september deltok to tilsette på fylkesbiblioteket i eit Nordplus prosjekt om digital kompetanse blant eldre. Dei andre partnarane var Estland, Finland og Litauen. Etter første samling, som var i Litauen, vart det bestemt at vi ikkje skulle delta vidare i dette prosjektet. Erasmus+ Hausten 2018 arrangerte fylkesbiblioteket studietur til Nederland. I tillegg til to tilsette frå fylkesbiblioteket var seks tilsette frå ulike folkebibliotek med. Turen, som var fullfinansiert med Erasmus+ midlar, varte i fem dagar. Vi besøkte åtte inspirerande og ikoniske bibliotek, og vi fekk lære om andre måtar å organisere biblioteka på, m.a. ved bruk av frivillige og brukarbetaling. Alle biblioteka hadde stor fokus på program retta mot low literacy, ikkje berre mot nye landsmenn, men også mot barn og eldre med dårleg lese- og skrivekompetanse. Rapport frå studieturen: https://www.hordaland.no/globalassets/for-hfk/kultur/fylkesbiblioteket/nederlanderasmus.pdf

Frå De bibliotheek DOK Delft

21

Agnes Mowinckels gate 5 Postboks 7900 5020 Bergen Telefon: 55 23 90 00 E-post: hfk@hfk.no www.hordaland.no