vitin - fmasíðani varð aftur siglt eftir ætlaðu rutuni. sambært stýrimanninum varnaðist hann...

Vitin

sigldi á land í Norra, 28. mai 2017

Sjóvanlukkufrágreiðing frá Sjóvinnustýrinum

2 Faroese Maritime Authority . Hoyvíksvegur 5 . FO-100 Tórshavn

Tel +298 355600 . [email protected] . www.fma.fo

Innihald Endamál .................................................................................................................................................. 3

1. Samandráttur ...................................................................................................................................... 3

2. Skipsupplýsingar: ................................................................................................................................ 4

3. Veðrið .................................................................................................................................................. 5

4. Frágreiðing um óhappið ...................................................................................................................... 5

5. Orsøk til hendingina ............................................................................................................................ 6

6. Greining ............................................................................................................................................... 6

7. Eftirmeting og niðurstøða ................................................................................................................... 7

8. Fyribyrgjandi atgerðir .......................................................................................................................... 7



1. Endamál Endamálið við kanningini er at útvega upplýsingar um óhapp og vanlukkur, at fáa greiðu á

tilburðargongd og at staðfesta orsøkir, ið hava við sær, at óhapp ella vanlukkur henda. Hetta

til tess, at Sjóvinnustýrið kann taka neyðug stig til at minka um vandan fyri, at tílík óhapp ella

vanlukkur henda aftur.

Sjóvinnustýrið hevur onga ávirkan á møguligar revsirættarligar- ella endurgjaldsspurningar í

sambandi við vanlukkur.

Starvsfólkini á Sjóvinnustýrinum og onnur, ið luttaka í kanningunum, hava tagnarskyldu í

øllum málum um óhapp og vanlukkur á sjónum, meðan mál verða kannað.

Hendan frágreiðingin er útgivin 29. aug. 2018 og er at finna á heimasíðuni hjá

Sjóvinnustýrinum, www.fma.fo .

1. Samandráttur M/S Vitin sigldi frá Husøy 26. mai 2017 kl. 00:30 LT. Umborð vóru 3040 tons av farmi til

laksafóður. Vitin sigldi á land tann 28. mai 2017 kl. 04.15 LT, sambært frágreiðing frá

skipinum.

Veðrið var frískt lot av útnyrðingi, uml. 12 m/s, slættur sjógvur, dagsljós og gott sýni.

Siglt varð norðureftir til Myre eftir ætlaðu rutuni. Sambært stýrimanninum var mótgangandi

skipaferðsla og tí varð snarað eitt sindur á stýriborð fyri at geva pláss fyri mótgangandi

skipum. Síðani varð farið aftur at sigla eftir ætlaðu rutuni.

Sambært stýrimanninum varnaðist hann í síðstu løtu, at skipið fór at bera við land, og av tí at

skipið var tungt lastað, eydnaðist ikki at steðga skipinum, áðrenn tað tók.

Sambært frágreiðing frá skipinum hevur stýrimaðurin helst durvað eina løtu.

Skaði kom á kúlustevnið og á stýriborð síðu. Leki varð staðfestur í bow thruster-rúminum

og barlastatangum 2 og 3.

Eingin mansskaði stóðst av óhappinum og ongin havdálking.

http://www.fma.fo/



2. Skipsupplýsingar: Skipanavn VITIN

Kallimerki OZ2150

MMSI 231114000

Heimstaður Fuglafjørður

Skrásett Føroysk Altjóða Skipaskrá

Eigari P/F Sandgrevstur, Føroyar

IMO nummar 9006289

Byggiár / skipasmiðja 1992 / Peene-Werft GmbH

Bruttotons 2.449,00

Nettotons 1.380,00

Longd 81,810 metrar

Breidd 12,800 metrar

Dýpd 7,100 metrar

Longd yviralt (LOA) 87,830 metrar

Motorslag Deutz MWM Motoren-Werke Mannheim AG

Motortypur SBV 8 M 628

Motororka 1.500,00 KW

Klassafelag: RINA

Vitin er skip hjá P/F Sandgrevstur í Fuglafirði. Skipið siglir í stóran mun í Norðureuropa við

farmi í bulk (leysum farmi).

Manningaskjalið er dagfest 28.september 2016. Minsta manning er ásett til 6 persónar.

Hesa mynstring hevði skiparin verið umborð 18. - 25. mai 2017 sum yvirstýrimaður og

skipari í tíðarskeiðinum 25. - 28. mai 2017, tá skipið sigldi á land. Skiparin hevði 27 ára

royndir á sjónum, harav 20 ár sum skipari, og 3 ára royndir við norsku strondina. Skiparin var

í kamarinum á frívakt, tá óhappið hendi. Hann tørnaði tó út beinanvegin, tá hann hoyrdi

larmin frá stoytinum.

Stýrimaðurin mynstraði umborð 25. mai 2017 um kvøldið og fór mestsum beinleiðis á vakt.

Hetta var triðja útmynstringin hjá honum á Vitanum, so hann kendi skipið. Ein útmynstring er

6 vikur.

Eftir vaktarskipanini gingu skipari og stýrimaður vakt soleiðis:

Skipari: 06:00 – 13:00 og 18:00-23:00,

Stýrimaður: 23:00 – 06:00 og 13:00 – 18:00.

Vitin var á veg frá Husøy til Myre tann 26. mai 2017 kl. 00:30 LT.

Vitin sigldi á land 28. mai 2017 kl. 04:15 LT, og eftir at skipið var leyst kl. 15.15, sigldi

skipið til neyðhavn í Sandnessjøen, har ein fyribilsumvæling varð gjørd og góðkend av

klassafelagnum RINA, áðrenn ferðin helt fram til Myre.

Vitin brúkti ECDIS- og ARPA-radar. Stýrt varð við sjálvstýrara, og ferðin var 9 kn. Upplýst

varð, at brúgvavaktsalarmurin varð stillaður til 12 min. Stýrimaðurin var einsamallur á

brúnni. Upplýst varð eisini, at siglingarætlan varð gjørd yvir leiðina.



3. Veðrið Veðrið: frískt lot av útnyrðingi, uml. 12 m/s, slættur sjógvur, dagsljós og gott sýni.

4. Frágreiðing um óhappið Frágreiðingin niðanfyri er grundað á viðtal við manningina.

Vitin var á veg frá Husøy til Myre tann 26. mai 2017 kl. 00:30 LT. Stýrimaðurin hevði haft

vakt frá kl. 23:00 dagin fyri og skuldi hava vakt til kl. 06:00. Frá Husøy til Myre varð siglt

innanskers.

Ongin kagmaður var á brúnni.

Upplýst varð, at dekkarnir arbeiða um dagin við at mála v.m.

Skiparin og stýrimaðurin umrøddu, hvørt teir skuldu sigla uttanskers ella innanskers, men av

tí at veðurforsøgnin hevði boðað frá uml. 10-15 m/s av útnyrðingi, varð mett, at tað var betri

at sigla innanskers, tí skipið misti 1-2 míl av ferð, tá siglt verður beint upp í móti ættini.

Annars var vanligt at sigla so nógv innanskers sum møguligt, tí sum oftast er hetta skjótari og

betri sigling.

Vitin sigldi norðureftir innanskers tann 28.mai 2017 og kl. 04:15 LT sigldi Vitin á land. Skaði

kom á kúlustevnið og á stýriborðssíðu. Leki varð staðfestur í bow thruster-rúminum og

barlastatangum 2 og 3.

Siglt varð norðureftir til Myre eftir ætlaðu rutuni. Sambært upplýsingum frá manningini var

mótgangandi skipaferðsla, og tí varð snarað eitt sindur á stýriborð fyri at geva pláss fyri

mótgangandi skipum. Síðani varð aftur siglt eftir ætlaðu rutuni.

Sambært stýrimanninum varnaðist hann í síðstu løtu, at skipið fór at bera við land, og av tí at

skipið var tungt lastað, eydnaðist honum ikki at steðga skipinum, áðrenn tað tók.

Kl. 04:15 28.mai 2017 sigldi skipið á land á knattstøðu 66°30’8N ; 013°00’0E.

Kl. 04.20 til 05:00 kannaði manningin skipið. Staðfest varð, at hol var á barlastatanga 2.

Kl. 05:00 varð boðað til Bodø Radio. Skipið fekk samband við ein sleipara og

kl. 06:40 varð roynt at sleipa M/S Vitan av, men

kl. 07.00 varð royndin slept til flóðin kom.

Kl. 09:00 varð staðfest, at hol eisini var á barlastatanga 2 og 3 stb. og í bow thruster-

rúminum.

Kl. 13:30 varð nýggj roynd gjørd. Hesa ferð við 2 sleipibátum.

Kl. 15:15 var skipið leyst. Barlastatangarnir vórðu aftur kannaðir og staðfest varð, at umleið

100 litrar lóku inn um minuttin. Tað var eingin trupulleiki at pumpa sjógvin út.



Kl. 15:40 varð kósin sett til Sandnessjøen. Skipið kom til kei kl. 19:20.

Seinnapartin 29. mai 2017 høvdu kavarar gjørt eina støðulýsing av botninum. Út frá hesu

støðulýsing viðgjørdi RINA-klassamaðurin skaðan.

Ein jarnkassi varð sveisaður yvir rivuna á botninum í bow thruster-rúminum. Aftaná hetta

vórðu fleiri aðrar gjøgnumgongdir framdar, ið RINA skuldi góðkenna. Tá hesar vórðu

góðkendar fekk Vitin loyvi at sigla til lossihavnina, Myre.

5. Orsøk til hendingina Sambært frágreiðing frá manningini, so hevði stýrimaðurin helst durvað eina løtu. Hvussu

leingi, var ringt at meta um.

Sambært frágreiðingini frá manningini stóð brúgvavaktsalarmurin til 12 min., men alarmurin

varð kanska yvirdoyvdur av tónleiki.

Seinni varð upplýst, at skipið hevði kósbroyting, og at tá varð brúgvavaktsalarmurin

kvittaður. Sambært frágreiðingunum var hetta 8 min. áðrenn skipið rendi á land.

6. Greining Sambært upplýsingum, sum Sjóvinnustýrið hevur fingið frá klassafelagnum, RINA, so

riggaði brúgvavaktsalarmurin.

Fyrsta alarmstøðið var í ordan, og ljóðaði alarmur á brúnni eftir 12 min.

(Brúgvavaktsalarmurin kann setast minni enn 12 min).

Um alarmur ikki verður kvittaðalar á brúnni aftaná 12 min. fær vakthavandi stýrimaður

ávaringna “Reytt ávaringarljós”. Um vakthavandi stýrimaður ikki reagerar uppá reyða

ávaringarljósið ljóðar brúgvavaktsalarmurin á brúnni. Um hesin ikki verður kvittaður á

brúnni, fer ljóðið víðari til næsta vakthavandi. Í hesum førinum skiparan.

Sambært RINA fór alarmurin umborð á Vitanum beinleiðis um alt skipið, tá hann ikki varð

kvittaður á brúnni.

Tað er ikki samsvar ímillum frágreiðingina hjá manningini og upplýsingarnar, sum

Sjóvinnustýrið hevur fingið útvegað frá norsku myndugleikunum um, hvussu skipið hevur

siglt. Sí skjal nr. 1, har kósin var 010° (Heading) frá kl. 03:39 til kl. 03:54, tá kósin varð

broytt til 006°. Sí skal 2.

Kl.04:04 var kósin framvegis 006°. Sí skjal 3 og skjal 4.

Tá Vitin rendi á land, var kósin framhaldandi 006°. Sí skjal 5.

Út frá hesum skjølum hevur seinasta kósbroytingin verið 15 min. áðrenn skipið rendi á land.

Sí skjal 7 frá skipinum og skjøl 1-6 frá Sjóvinnustýrinum.



Í skjali 7 frá skipinum er kósbroyting kl.04:07, og skipið sigldi á land kl.04:15, í alt 8 min.

Skipið hevði ikki nakað skrásett útfrá ECDIS, men manningin hevur teknað kósina í skjali 7.

Sjóvinnustýrið hevur skrásett skjøl frá norsku myndugleikunum, sí skjøl 1-6, ið vísa, at

seinasta kósbroytingin var kl. 03:54 - sí skjal 2 - har kósin broytist frá 010° til 006°. Skipið

sigldi á land kl. 04:09, í alt 15 min.

7. Eftirmeting og niðurstøða Tá tað verður upplýst, at vakthavandi stýrimaður á brúnni durvað,i er nærliggjandi at hugsa,

at stýrmaðurin hevur verið darvaður av møði. Sambært frágreiðing frá manningini er hetta

møguliga grundað á, at stýrimaðurin ikki er komin rættiliga fyri seg aftaná at hava verið farin

beinleiðis á vakt, tá hann mynstraði umborð tann 25. mai 2017.

Harumframt verður upplýst, at brúgvavaktsalarmurin møguliga varð yvirdoyvdur av tónleiki.

Hvílitíðarskemaið gevur onga ábending um nakað óregluligt. Stýrimaðurin stendur til at hava

verið á vakt frá kl. 2300 kvøldið fyri til kl. 0600 morgunin eftir og hvílt frá kl. 0600 til 1300

osfr.

Í mun til dekkarnar umborð varð upplýst, at hesir bara arbeiða um dagin, m.a. við at mála.

Hetta samsvarar ikki við hvílitíðarskemaið, sum Sjóvinnustýrið hevur móttikið fyri 1.

dekkara. Hesin stendur til at hava verið til arbeiðis/á vakt um náttina.

Sjóvinnustýrið hevur eftirfylgjandi kannað, um reiðaríið hevur nakrar skrivligar

mannagongdir um kaging tá siglt verður innanskers, og serliga um nøkur skrivlig

mannagongd er um hetta er í ISM-manualinum.

Reiðaríið hevði ongar serligar skrivligar mannagongdir fyri sigling innanskers. Tað, sum er

nevnt í ISM-manualinum, er meira generelt og vísir til tað sama sum vaktarhaldskunngerðin

og til galdandi lóggávu á staðnum, har skipið sigldi.

8. Fyribyrgjandi atgerðir Sjóvinnustýrið leggur dent á, at “Master’s standing orders” skulu fylgjast, og at ISM

mannagongdir eiga at verða endurskoðaðar í sambandi við sigling innanskers.

Reiðarin hevur upplýst, at tað hevur hert mannagongdirnar fyri líknandi sigling. Millum

annað er brúgvavaktsalarmurin nú settur niður til 3 min. tá siglt verður innanskers, og teir

sigla uttanskers, tá veðrið og umstøður loyva tí.



Skjal 1



Skjal 2



Skjal 3



Skjal 4



Skjal 5



Skjal 6



Skjal 7

vitin - fmasíðani varð aftur siglt eftir ætlaðu rutuni. sambært stýrimanninum varnaðist hann...

Documents