streymi og stíflur og... · 2018-10-15 · ! 1! Ágrip&!...
TRANSCRIPT
1
Ágrip
Markmið mitt með þessari ritgerð er að kanna hvernig margvíslegir þættir hafa
áhrif á siðferðilega afstöðu manna gagnvart náttúrunni og í hverju sú siðfræði
felst sem býr í þessari afstöðu. Ég legg áherslu á tvær þekktar stíflur, Sardar
Sarovar-‐stífluna á Indlandi og Kárahnjúkastíflu á Austurlandi. Báðar stíflurnar
hafa verið mjög umdeildar. Þeim hefur verið mótmælt harðlega og miklar
umræður hafa skapast í kjölfarið. Spurningar sem hafa til að mynda vaknað eru:
Hvers virði er náttúra fyrir einstakling og samfélag? Hvernig ber mönnum að fara
með náttúruna? Hefur náttúran gildi í sjálfu sér? o.s.frv. Ég kanna einnig hvort
heilagleiki og fegurð ættu að skipta máli í ákvarðanatöku um landnýtingu og
hvernig viðhorfi til vatns er háttað.
Í fyrsta hluta fjalla ég ítarlega um með-‐ og mótrök Sardar Sarovar-‐
stíflunnar á Indlandi. Margir þættir koma þar fram, svo sem pólitískar og
hagnýtar ástæður, sem og gagnrýni sem felur í sér spurningar um áhættumat,
fólksflutninga og siðferðileg álitamál, til að mynda réttur komandi kynslóða. Í
öðrum hluta ritgerðarinnar fer ég yfir svipuð álitamál gagnvart Kárahnjúkastíflu.
Umfjöllunin er þó aðeins annars eðlis þar sem menning og samfélag eru mjög ólík
á Íslandi og á Indlandi. Þó má sjá líkingu þar á milli og ég legg áherslu á þann
lærdóm sem fólk getur miðlað af vegna reynslu sinnar af stórframkvæmdum sem
þessum.
Í þriðja hlutanum kanna ég hvort heilagleika sé að finna í íslenskum
hugsunarhætti og ég athuga hvort hann sé hluti af náttúrusýn Íslendinga.
Náttúrusýn er mjög frábrugðin á Indlandi en þar skiptir heilagleiki miklu máli og
skipar stóran sess í indverska samfélaginu. Ég kanna einnig hvort fagurfræði,
tilfinningar og reynsla skipti máli í náttúrusýn og siðfræði.
Í fjórða og síðasta hlutanum fjalla ég um vatn og viðhorf til þess. Vatn er
forsenda alls lífs og er viðhorfið til þess mjög mismunandi eftir landssvæðum.
Íslendingar hafa töluvert aðra sýn og önnur viðhorf til vatns en Indverjar en ég
held því fram að það sé hægt að afla mikillar og mikilvægrar þekkingar með því
að kanna önnur og öðruvísi viðhorf. Það er mikilvægt að skoða allar hliðar
málsins þegar tekin er ákvörðun um landnýtingu og þegar stórar stíflur eins og
Sardar Sarovar-‐stíflan og Kárahnjúkastíflan eru byggðar.
2
Efnisyfirlit
Inngangur ............................................................................................................................. 5
I. Sardar Sarovar-‐stíflan í Narmadadalnum á Indlandi ..................................... 8 1. Ástæður stíflugerðar í Narmadadalnum ..................................................................... 8 1. 1. Hagvöxtur, framþróun og velmegun .................................................................................. 9 1. 2. Pólitískar ástæður – indverska ríkið og Alþjóðabankinn ....................................... 10 1. 3. Hagnýtar ástæður til þess að koma „böndum“ á vatnið .......................................... 12
2. Mótbárur ............................................................................................................................. 14 2. 1. Ágangur á landið ....................................................................................................................... 14 2. 2. Fólksflutningar .......................................................................................................................... 15 2. 3. Sjúkdómar fylgifiskur ............................................................................................................. 17 2. 4. Áhættumat ................................................................................................................................... 19 2. 5. Aðskilnaður ríkra og fátækra .............................................................................................. 20 2. 6. Þvingun fólks til þróunar ...................................................................................................... 23 2. 7. Hverjum á að treysta? ............................................................................................................. 24 2. 8. Komandi kynslóðir .................................................................................................................. 25
II. Kárahnjúkastíflan á Austfjörðum ..................................................................... 27 1. Ástæður stíflugerðar ...................................................................................................... 27 1. 1. Atvinnusköpun .......................................................................................................................... 28 1. 2. Lífsgæðum viðhaldið ............................................................................................................... 31 1. 3. Nýta það sem nýta má ............................................................................................................ 31
2. Mótbárur ............................................................................................................................. 33 2. 1. Mikið röskun á náttúru .......................................................................................................... 34 2. 2. Einsleit atvinnuuppbygging ................................................................................................. 35 2. 3. Einsleitt hugarfar ...................................................................................................................... 36 2. 4. Ímynd út á við ............................................................................................................................ 37 2. 5. Hið góða líf og mismunandi gæði þess ............................................................................ 39
3. Mótmælendur ................................................................................................................... 41 3. 1. Á Indlandi .................................................................................................................................... 41 3. 2. Á Íslandi ........................................................................................................................................ 43
III. Heilagleiki og fagurfræði náttúru ................................................................... 47 1. Heilagleiki á Indlandi ..................................................................................................... 47 2. Heilagleiki á Íslandi ........................................................................................................ 49 3. Heilagleiki og fjölbreytileiki ........................................................................................ 54 4. Fagurfræðilegt gildi náttúru ........................................................................................ 56 5. Tilfinningar og reynsla í náttúrunni ......................................................................... 58
IV. Vatn og viðhorf ....................................................................................................... 62 1. Viðhorf til náttúrunnar .................................................................................................. 62 2. Tvíhyggja og vald ............................................................................................................. 64 3. Siðfræði vatns ................................................................................................................... 65 4. „Blátt gull“ .......................................................................................................................... 68 5. Viðhorf Indverja til vatns .............................................................................................. 71 6. Viðhorf Íslendinga til vatns .......................................................................................... 73
3
7. Mikilvægi umræðunnar ................................................................................................. 76 8. Afturhvarf til fortíðar ..................................................................................................... 78
Lokaorð .............................................................................................................................. 82
Heimildaskrá .................................................................................................................... 84
4
Myndayfirlit
Mynd 1: Kort af þeim framkvæmdum sem fyrirhugaðar eru í Narmadadalnum.... 8
Mynd 2: Ferðamannastaður við Sardar Sarovar-‐stífluna............................................... 13
Mynd 3: Sardar Sarovar-‐stíflan og uppistöðulónið.......................................................... 26
Mynd 4: Kárahnjúkastífla og Hálslón.................................................................................... 27
Mynd 5: Hálslón............................................................................................................................ 30
Mynd 6: Mótmæli á Indlandi..................................................................................................... 42
Mynd 7: Mótmæli við Austurvöll í Reykjavík...................................................................... 45
Mynd 8: Kringilsárrani............................................................................................................... 52
5
Inngangur
Svo hljómar inngangur Helga Valtýssonar í bókinni Á hreindýraslóðum:
öræfatöfrar Íslands:
Öræfin eru faðmvíð og fjallablá. Kyrrð þeirra gerir þig hljóðan og
hlustandi. Þar skilurðu Heimdall til fullnustu. Hugfanginn hlustarðu á
andardrátt þinnar eigin sálar, sem þú hafðir gleymt árum saman. Hér
skynjarðu fyrst ómælis-‐víðáttu anda þíns, og þú stendur kyrr og undrandi í
djúpri þögn og óumræðri lotningu fyrir guðdómi sálar þinnar.1
Hann lagði upp í ferðalag í þeim tilgangi að skrásetja og taka myndir af
hreindýrum á Austurlandi. Hann upplifði eitthvað sem kalla mætti helgi eða
heilagleika. Hann segir „[h]ér á eðli mitt heima“2 og vísar þar í hálendið og
æskuslóðir sínar austur á landi. Slík upplifun er algeng hjá þeim sem leggja leið
sína á hálendi Íslands, hvort sem þeir eiga þangað ættir að rekja eða ekki. Sumir
finna fyrir skapara sínum, aðrir finna fyrir eigin sjálfi eða persónu og enn aðrir
fyrir mikilfengleika náttúrunnar sjálfrar. En skiptir þessi tilfinning einhverju
máli? Ég ætla að kanna í þessari ritgerð hvort slíkar tilfinningar eigi eitthvert
erindi í siðferðilegri umræðu og hvort menningarleg arfleið skipti þar yfirleitt
höfuð máli.
Í þessari ritgerð ætla ég að bera saman tvær merkilegar og umdeildar
stíflur, Sardar Sarovar-‐stífluna á Indlandi og Kárahnjúkastíflu á Austurlandi. Ég
ætla að skoða hvora stífluna fyrir sig með kosti og galla í huga, þ.e. bera saman
með-‐ og mótrök beggja stíflnanna. En hver er tilgangurinn með því að bera
saman svo ólík verkefni þar sem himin og haf ber á milli menninga og
landsvæða? Hafa t.d. Íslendingar einhvern hag af því að skoða reynslu annarra
þjóða þegar taka skal ákvörðun um byggingu virkjana og er einfaldlega mögulegt
að bera þessi dæmi saman? Ég tel svo vera og einnig tel ég að Íslendingar geti
miðlað sinni reynslu til annarra þjóða ef svo ber undir.
Því næst mun ég fjalla almennt um siðfræði vatns og náttúru og viðhorf til
þessara fyrirbæra. Í náttúrusiðfræði hefur nýlega skotið upp kollinum svokölluð
1 Helgi Valtýsson, Á hreindýraslóðum: öræfatöfrar Íslands, Akureyri 1945, bls. 11. 2 Sama rit, bls. 11.
6
vatnssiðfræði (e. water ethics) sem gengur út á að skilgreina samband okkar
mannanna við vatn og þá náttúru sem það snertir. Við eigum í sérstöku sambandi
við vatn, við getum ekki lifað án þess og það er algjör forsenda fyrir öllu lífi. En
hver er ástæðan fyrir því að við þurfum sérstakt siðferði gagnvart vatni? Svarið
er fólgið í því hversu mikilvægt vatnið er en þessi nýi armur náttúrusiðfræðinnar
er þó nokkuð víðtækur. Hann leitast við að svara spurningum eins og hvert gildi
vatns sé og hvort okkur beri skylda til að haga okkur á sérstakan hátt gagnvart
því og síðast en ekki síst þeim vistkerfum sem það heldur uppi. Þarna koma við
sögu fljót, vötn, jöklar o.s.frv. Við getum þá spurt okkur hvernig okkur beri að
haga streymi vatnsins.
Þriðji hluti ritgerðarinnar fjallar um heilagleika í náttúru og ég velti því
fyrir mér hvort hann skiptir einhverju máli í umræðunni. Af frásögnum Helga
Valtýssonar að dæma þá býr heilagleiki í sambandi okkar við náttúruna eða
réttara sagt: það verður einhvers konar uppgötvun á helgi lífsins í náttúrunni
sem kannski finnst hvergi annars staðar. Mörg rómantísk ljóð hafa verið samin til
náttúrunnar (eða um hana) á Íslandi en það sem ég leita að ristir jafnvel enn
dýpra. Það snertir tilveru okkar og tilgang. Ástæðan fyrir því að ég byrjaði að
kanna þetta voru frásagnir og náttúrulýsingar Indverja sem ég las við
rannsóknarvinnu á með-‐ og mótrökum og þær heilluðu mig strax. Menningarleg
arfleið þeirra er gildishlaðin og beintengd náttúrunni. Þeir leitast ekki við að
útiloka sjálfa sig eða líkama sína frá náttúru heldur fylgja þeir einhvers konar
heildarhyggju (andstætt tvíhyggju Vesturlandabúa). Þarna er trúin samtvinnuð
náttúrusýn þeirra og hvort sem fólk er kristið, hindúar eða múslímar þá er þetta
gegnumgangandi í þjóðarsálinni.
Með því að kanna þetta svið mannlegrar reynslu ætla ég að komast að því
hvort verndun ákveðinna landsvæða sé réttlætanleg á öðrum forsendum en
vanalega eru notaðar. Orðræðan í tengslum við vernd náttúru og þ.a.l. siðfræði
náttúru er oft og tíðum byggð á mjög einstrengingslegum rökum sem eru
afmarkandi. T.d. er mikið fjallað um hugtök eins og framfarir, hagvöxt,
byggðaþróun og nýtingu. Ætli orðið nýting hafi ekki hvað sterkast vægi? Í því
felst sú hugsun að okkur mönnunum beri að nýta landið á sem hagkvæmastan
hátt til þess að ná markmiðum okkar. En með því að víkka út orðræðuna tel ég að
7
hægt sé að fá betri niðurstöðu sem flestir eru sáttir við og er kannski líka í meira
samræmi við almannahag og hagsmuni komandi kynslóða.
Ég ætla að fjalla um stíflurnar tvær á sem hlutlausastan hátt m.t.t. með-‐ og
mótraka þrátt fyrir að ég taki skýra afstöðu þegar líður á ritgerðina. Mér er málið
skylt en ég er Reyðfirðingur, á ættir mínir að rekja þangað og fjölskylda mín býr
þar. Því er Kárahnjúkastífla mér sérstaklega hugleikin. Ég er alin upp við ákveðin
gildi sem hafa haft mikil áhrif á mig sem fullorðna manneskju og hafa mótað mig.
En þessi persónulega reynsla mín hefur aðeins dýpkað þá skoðun að nauðsynlegt
sé að kanna allar hliðar málsins. Múgæsingur og illa ígrundaðar ákvarðanir eru
með því verra sem gerist í umhverfismálum því oft er ekki aftur snúið eftir að
ákvörðun hefur verið tekin.
Í ritgerðinni leita ég að öðru sjónarhorni gagnvart vatns-‐ og
náttúrusiðfræði en sú siðfræði ætti að skipta máli, bæði í víðu alþjóðasamhengi
sem og í þröngu staðbundnu samhengi. Ástæða þess er sú að hún gefur okkur
viðmiðunarreglur um það hvernig best sé að haga lífinu. Lífsgæði mannsins ættu
að batna ef öllum hliðum mannlegs eðlis er sinnt. Mismunandi sjónarmið
stangast á í þessum efnum sem eðlilegt er en þess vegna er umræðan mikilvæg.
En eru vangaveltur um heilagleika og annars konar gildi útópía og
óskhyggja? Erum við Íslendingar tilbúnir að meðtaka önnur gildi og taka önnur
sjónarhorn til greina? Skiptir þetta Íslendinga máli eða er þetta einfaldlega of
sérstakt og „ó-‐íslenskt“? Ég satt að segja hef ekki skýrt svar við þessum
spurningum en ég held mig samt við þá óskhyggju að hugmyndir sem þessar
skipti máli. Að minni hyggju ættu heimspeki og siðfræði að skipta máli úti í
samfélaginu en ekki vera aðeins jaðargrein innan háskólasamfélagsins. Og þegar
stórar ákvarðanir eru teknar sem varða náttúru og samspil manna við hana þá
tel ég að taka skuli öll rök til greina og að sum þessara „jaðarraka“, sem ég fjalla
um í ritgerðinni, eigi alveg sama rétt á sér eins og önnur rök. Að kanna allar
staðreyndir málsins og greina möguleikana, sem eru fyrir hendi út frá
mismunandi sjónarhornum, er frumforsenda þess að menn geti tekið upplýsta
ákvörðun í siðferðilegum málefnum. Aðeins þá geta þeir verið sáttir við sjálfa sig
sem manneskjur og lifað sem farsælustu lífi.
8
Mynd 1. Kort af þeim framkvæmdum sem fyrirhugaðar eru í Narmadadalnum.
I. Sardar Sarovar-‐stíflan í Narmadadalnum á Indlandi
1. Ástæður stíflugerðar í Narmadadalnum
Örlög mannsins eru að hafa stjórn á allri jörðinni: og örlögin og
jörðin eiga að vera undirgefin manninum. 3
John Widtsoe
Indverjar hafa lengi glímt við mörg vandamál eða allt frá því er þeir fengu
sjálfstæði árið 1947. Með fólksfjölda yfir milljarð manna eru erfiðleikarnir
margir bæði vegna þess að litið er á Indland sem þriðja heims ríki og eftir að
landið fékk sjálfstæði hefur gengið erfiðlega að koma því upp úr fátæktinni.
Stórar stíflur virðast þá hafa verið hluti af svari við vandamálunum af ýmsum
ástæðum, að koma þjóðinni upp úr vansældinni og inn í heim nútímans til að hún
verði samkeppnishæf gagnvart öðrum löndum í hinum stóra heimi.
Í fyrsta lagi má nefna að til þess að koma Indlandi upp úr efnahagslægð
um miðja síðustu öld þá þótti gott ráð að ráðast í stórar framkvæmdir sem gæfu
mikið af sér. Það var með miklum þrýstingi frá alþjóðasamfélaginu en stór lán
3 Höfundur ritgerðar er þýðandi alla texta úr ensku í ritgerðinni.
9
höfðu verið tekin hjá Alþjóðabankanum. Hann var því fús til að leggja fé í slíkar
framkvæmdir til þess að hjálpa til við þróun Indlands.
Einnig er nauðsynlegt að segja frá þeim kostum sem eru beinar
afleiðingar stíflugerðarinnar, eins og vatnssöfnum, rafmagnsframleiðslu o.s.frv.
Mikilvægt er að ná að stjórna þeim vatnsflaumi sem rennur um ár á Indlandi, t.d.
þegar miklar monsúnrigningar ganga yfir; þá er hægt að nýta vatnið þegar
þurrkatímar taka við. Einnig er markmiðið að nota vatnið til drykkjar og til að
stjórna flóðum og vatnsyfirborði svo eitthvað sé nefnt. Í þessum kafla mun ég
fjalla um kosti þess og helsta rökstuðning þess að ráðast í svo stórar
framkvæmdir, sem raun ber vitni, í Narmadadalnum á Indlandi.
1. 1. Hagvöxtur, framþróun og velmegun Iðnaður skapar hagvöxt sem margir telja að geti hjálpað til við uppgang og
velmegun á Indlandi. Þrátt fyrir mikla uppsveiflu í indversku hagkerfi vantar
mikið upp á að svo sé, t.d. er mikil fátækt og erfiðleikar sem fylgja henni. Þar sem
Indverjar eru yfir milljarður manna og landið telst með þriðja heims ríkjum er
vel hægt að ímynda sér öll þau vandamál sem þeirri fólksmergð fylgir. Bæði er
vatnsskortur mikill á mörgum stöðum á Indlandi, sem og matarskortur. Með
þeirri velmegunarímynd, sem Vesturlöndin hafa á sér, er augljóst af hverju
hagvöxtur og iðnvæðing eru álitin eftirsóknarverð og fullkomlega eðlilegt að ætla
að Indverjar tileinki sér þá lífssýn og reyni með öllum tiltækum ráðum að finna
lausn á vandamálum sínum. Með framþróun og hagvexti liggur beinast við að
ætla að þeir nái settum markmiðum þar sem lífsgæði Vesturlandabúa eru mun
betri og með sömu aðferðum væri Indverjum gert kleift að taka þátt í
velmeguninni.
Með stíflugerð reyna Indverjar að komast jafnfætis stórveldum. Það ríkir
mikill metnaður hjá mörgum Indverjum, ekki bara til að ná að fæða og klæða sig
og sína heldur einnig að vera með þeim bestu. Pavan K. Varma lýsir metnaði
landa sinni í bókinni Being Indian á þennan hátt:
Indverjar hafa viljandi selt þá ímynd að þeir séu annars-‐heims.
Þeir njóta þess að litið sé á þá þannig að þeir séu yfir
efnishyggjuheiminn hafnir. Þessi ímynd er aðeins goðsögn.
10
Indverjar hafa alltaf haft jarðbundna sýn efnishyggjuheimsins.
Því fer fjarri að þeir lítilsvirði freistingu peninga og auðs, öllu
heldur hafa þeir ítrekað hampað þessum hlutum.4
Varma lýsir aðstæðum þannig að mikill misskilningur sé hjá Vesturlandaþjóðum
um markmið og metnað Indverja. Hann heldur því fram að peningar og velmegun
skiptir Indverja miklu máli. Vald og staða skiptir miklu í ímynd þeirra sem stefna
að því að verða auðugir. Þetta mat hjá Varma kemur kannski á óvart miðað við þá
sýn sem við höfum á Indverja og ég mun fjalla um það betur síðar en hér vil ég
benda á að sú hugsun að verða ríkur eða að koma velmegun og peningum inn í
landið er ekki einskorðuð við Vesturlönd. Því er fullkomlega eðlilegt að ef stórar
framkvæmdir á við stíflugerð muni koma Indlandi á kortið þá leiti þeir þeirra
lausna.
Einnig eru Indverjar í mikilli samkeppni við nágrannaríki sitt í norðri en
Kínverjar hafa einmitt verið duglegir við stórframkvæmdir af þessu tagi.
Samkvæmt ICOLD, World Register of Dams, er Kína efst á lista yfir stórar stíflur
eða með 18.820 árið 1986.5 Því má búast við að sú tala hafi aðeins hækkað frá því
ári en samkvæmt World Commission on Dams er talan komin í yfir 22.000.6 Þetta
segir mikið um metnaðinn og hugsunarháttinn á þeim slóðum. Einnig er ákveðin
togstreita milli þessara tveggja ríkja, ekki aðeins vegna samkeppni í uppgangi
heldur einnig vegna staðsetningar landanna en þau deila mikilvægum ám sem
renna úr Himalayafjöllum. Samkeppni er því einnig mikilvægur þáttur í þeirri
ákvarðanatöku sem viðkemur stórum framkvæmdum.
1. 2. Pólitískar ástæður – indverska ríkið og Alþjóðabankinn Pólitískar ástæður geta verið af misjöfnum toga og virðast breytast eftir hverju
tilviki fyrir sig. Á Indlandi eru ráðamenn með misjafnar aðferðir til þess að ná
fram markmiðum sínum. Til þess að hagvöxtur haldi áfram að aukast og góðæri
að dafna þá leitast stjórnmálamenn við að borga niður skuldir landsins og efla
velsæld þess. Stór þáttur í stjórnmálalífinu er að afla tekna til að borga
Alþjóðabankanum en það er einmitt ein aðferð út úr efnahagslegum þrengingum. 4 P.K. Varma, Being Indian, London 2005, bls. 61. 5 Patrick McCully, Silenced Rivers, London & New York 2001, bls. 3. 6 http://www.internationalrivers.org
11
Bankinn stendur fyrir því að lána fyrir framkvæmdum til þess að afla tekna.
Stórfyrirtæki koma á eftir til að fjármagna framkvæmdirnar og standa að
stíflugerð.
Ríkið eða stjórnvöld telja sig vita best hvað er gott fyrir Indland.
Stjórnvöld beita rökunum kostnaður – ávinningur (e. cost-‐benefit) og fá það út að
bygging stíflu í Narmadadalnum sé það rétta í stöðunni. Kostir og gallar voru sem
sagt teknir saman og útkoman var sú að stíflugerð skyldi hefjast. Stjórnvöld eru
undir gríðarlegum pólitískum þrýstingi frá alþjóðasamfélaginu og trúa því að
þetta sé góð lausn. Sú hugmynd skiptir einnig miklu máli að þjóðin skuli vera
vera best, sterkust og stærst (virðist óháð tíma, landamærum og kynþáttum). Að
„temja“ náttúruna, fylgja eftir þeirri framþróun sem er æskileg, að byggja sem
stærsta stíflu sem um getur. Og ef allt gengur að óskum fylgja gríðarlegar
peningaupphæðir þeirri þróun. Vald liggur þar sem peningarnir eru. Mikið stolt
fylgir því að geta haldið slíkum framkvæmdum úti.
Ein frægasta setning, sem Nehru, fyrrverandi forsætisráðherra Indlands,
sagði, hljómar svo: „Stíflur eru musteri nútíma-‐Indlands“.7 Hvert skólabarn á
Indlandi þekkir þessa setningu og er kennt að miklar framkvæmdir, eins og
stórar stíflur, séu leið Indlands út úr fátækt og volæði. Vegna þessa
hugsunarháttar og stefnu í pólitík eru 4.818 stíflur á Indlandi sem geta flokkast
undir það að vera stórar stíflur og 375 í bígerð.8 Slíkar tölur sýna þann mikla
metnað sem einkennir Indverja varðandi stíflugerð og þá drauma sem fylgja því
að verða iðnríki.
Alþjóðabankinn leikur stórt hlutverk í stórframkvæmdum á Indlandi.
Hann fjármagnar og hjálpar t.d. til við að leysa ýmis vandamál sem fylgja slíkum
framkvæmdum. Þar ber að nefna þá bótaskyldu sem fellur á ríkið þegar fólk er
flutt af jörðum sínum eða úr þorpum. Takmarkið er þó að sem fæstir þurfi að
þjást eða missa heimili sín vegna stíflunnar. Alþjóðabankinn orðar það svo að
„grundvallarmarkmið í stefnuskrá Alþjóðabankans er að ná aftur þeim lífsgæðum
og tekjugetu þeirra sem brottfluttir eru – og mögulega bæta þau“.9 Markmiðið
með lánveitingu fyrir Sardar Sarovar-‐stíflunni var einnig að bæta hag Indverja og
7 Arundhati Roy, The algebra of infinite justice, London 2002, bls. 51. 8 http://www.cwc.nic.in, heimasíða Central Water Commission. Þar eru upplýsingar um helstu framkvæmdir á Indlandi. Upplýsingar voru síðast uppfærðar í febrúar 2012. 9 Patrick McCully, Silenced Rivers, London & New York 2001, bls. 82.
12
sjá þeim fyrir rafmagni, vatni o.s.frv. og vinna að sem hagkvæmustum lausnum
með ríkisstjórninni.
1. 3. Hagnýtar ástæður til þess að koma „böndum“ á vatnið Áveita eða söfnun vatns, og þar með að nýta regnvatnið sem fellur, er helsta
ástæða Sardar Sarovar-‐stíflunnar. Það vatn, sem safnast saman í lóninu, er síðan
notað á landsvæðunum í kring. Þetta er mjög mikilvægt fyrir landið því þurrkar
eru miklir í þessum héruðum sem um ræðir. Slíkt á að koma bændum og öðrum
til góða.
Stíflan safnar drykkjarvatni (eða heimilisvatni) fyrir fjölda fólks í
héruðunum í kring. Þar sem vatnsskortur er mikill á Indlandi skiptir miklu máli
að nánast hver vatnsdropi sé nýttur. Árlega deyja þúsundir manna úr
vökvaskorti eða sjúkdómum sem fylgja því að drekka óhreint eða mengað vatn.
Stjórnun flóða, vatns og náttúru almennt er önnur hagnýt ástæða. Stjórna
má vatnshæðinni nákvæmlega, straumar verða minni og auðveldara er fyrir báta
að fara um svæðið. Það er mikilvægt að hafa í huga hvernig veðurfarið er á
Indlandi, þ.e. í sambandi við úrkomu o.fl. Monsúnrigningar herja á landið með
reglulegu millibili en þar á milli eru miklir þurrkar. Þess vegna skiptir miklu máli
að huga að því hvernig best sé að nýta vatnið sem hægt er að safna saman.
Framleiðsla raforku er einnig mikilvæg ástæða stíflugerðar. Hún er sögð
eiga að geta framleitt allt að 1450 MW.10 Þegar talað er um raforku er venjulega
átt við hreina orku sem er góð fyrir umhverfið og er sjálfbær. Alþjóðabankinn
leggur mikið upp úr slíkri orku og á heimasíðu hans er sagt frá ástæðunum fyrir
því að standa bak við stórar stífluframkvæmdir:
Aðaláhersla ríkisstjórnar Indlands er á þróun vatnsorku til að ná
að svala orkuþörf landsins og útvega öllum landsmönnum
raforku fyrir árið 2012. [...] Vatnsorka, sem er til taks
innanlands, er hrein og endurvinnanleg orka, sú orka sem
ríkisstjórnin vill nota er ekki enn til taks á þessu svæði, núna eru
aðeins 23 % notuð af þeirri vatnorku sem hægt væri að nýta.11
10 http://www.cwc.nic.in, þó er ekki búist við því að full framleiðsla geti náðst. 11 http://www.worldbank.org.in.
13
Skilaboð, sem Alþjóðabankinn sendir eru skýr enda almennt talið að um „góða“
orku sé að ræða. Hjálpin felst í því að útvega Indverjum það rafmagn sem þeir
þurfa eða munu þurfa í framtíðinni hvort sem það á við um heimilishald eða
hvers konar iðnað. Ríkisstjórnin hefur sótt mikið í lán og styrki til þess að koma
þessari hugsjón í framkvæmd. Þar að auki útvegar bankinn tækni og þekkingu til
þess að gera þetta mögulegt.12
Einnig telja margir stífluna fallegt mannvirki sem hægt er að nota í
ferðamannaiðnaðinum. Fólk vill ólmt skoða dýrðina. Lystigarður hefur verið
gerður í kringum stífluna og hægt
er að sjá hana frá mismunandi
sjónarhornum.13 Allir möguleikar
eru nýttir til að gera sem mest úr
stíflunni og því er
ferðamannaiðnaðurinn engin
undantekning á því. Búið er að
byggja önnur mannvirki í staðinn
fyrir þau sem urðu undir í
vatnsflaumnum hvort sem það eru
gönguslóðar eða musteri. Einnig er hægt að skoða húsakynni og þorp þeirra sem
vinna við stífluna en ríkisstjórnin hefur látið koma upp samfélagi sem kallast
Kevadia. 14 Þetta er orðinn mjög vinsæll ferðamannastaður sem ekki er að undra
þegar um svo stórt mannvirki er að ræða eins og Sardar Sarovar-‐stífluna. Þetta á
ekki bara við um erlenda ferðamenn heldur sækja Indverjar mikið í að skoða
staðinn.
12 http//www.worldbank.org.in. 13 Á internetsíðunni http://www.gujarattourism.com er dæmi um þar sem hægt að skoða stífluna sem ferðamannastað. Mun fleiri dæmi eru til um fyrirtæki og fólk sem nýtir sér stífluna til ferðamannaiðnaðar. 14 http://www.holidayiq.com/destinations/Kevadia-‐Narmada-‐Overview.html.
Mynd 2. Ferðamannastaður við Sardar Sarovar-‐stífluna.
14
2. Mótbárur
Hvort sem þú elskar stífluna eða hatar, hvort sem þú vilt hana
eða ekki, þá er mikilvægt að skilja þá fórn sem færð er.
Arundhati Roy
Mikil mótmæli hafa verið gegn Sardar Sarovar-‐stíflunni og þau eiga rætur sínar
að rekja aftur til miðbiks síðustu aldar. Gagnrýnin hefur aðallega beinst að því
hvernig farið var að framkvæmdunum sjálfum, stjórnvöld eru gagnrýnd fyrir
fljótfær og vanhugsuð vinnubrögð og í rauninni hefur allt ferlið verið
misheppnað. Náttúruverndarsamtök hafa barist fyrir því að landið verði ósnert
en einnig hafa þau barist fyrir þær þúsundir manna sem misst hafa heimili sín
vegna stíflugerðarinnar. Slæmar afleiðingar í Narmadadalnum eru sagðar mun
meiri og verri en þeir kostir sem stíflan var sögð hafa í upphafi. Tekið hefur verið
fram fyrir hendurnar á fólki, upplýsingar ekki verið veittar, misskipting gæða
hefur aukist og svo mætti lengi telja. Hér ætla ég að fjalla um helstu þættina sem
gagnrýndir hafa verið við stíflugerðina.
2. 1. Ágangur á landið Miklum landsvæðum var sökkt. Þegar stórar stíflur eins og Sardar Sarovar-‐stíflan
fyllist þá fer gríðarlegt svæði undir vatn. Stíflan sjálf er 1210 m á lengd og 163 m
á hæð (þar sem hún er hæst). Hún er þriðja hæsta steinsteypta stíflan á Indlandi
á eftir Bhakra (226 m) og Lakhwar (192 m). Hún safnar vatni af 214 km svæði
sem nær yfir þrjú héruð, Gujarat, Maharashtra og Madhya Pradesh. Að rúmmáli
er vatnið 9,50×109 m3.15 Skóglendi og tún fara undir vatn og mikil röskun verður
á dýralífi við svona aðstæður. Lífríki fiska raskast mikið sem hefur svo aftur áhrif
á bæði dýr og menn á svæðinu.
Einnig hefur stíflugerðin áhrif á farvegi áa. Þegar hinum náttúrulega
farvegi er raskað hefur það áhrif á fólk á mjög stóru svæði þannig að miklar erjur
hafa skapast milli héraða sem er vandamál fyrir ríkisstjórnina. Það er
grafalvarlegt mál en Vandana Shiva hefur fjallað um þetta efni. Hún bendir á að
15 http://www.cwc.nic.in.
15
nánast allar ár á Indlandi hafi orðið að ágreiningsefni. Árnar Sutlej, Yamuna,
Ganges, Narmada, Mahanadi, Krishna og Kaveri hafa verið miðpunktur mikilla
deilna milli héraða sem eru ósammála um eignarhald og úthlutun vatns.16 Vegna
mikilvægis vatnsins eru deilurnar hatrammar og sérstaklega þegar svo stórar ár
eiga í hlut því að afleiðingarnar eru miklar þegar þeim er beint úr sínum eðlilega
farvegi með t.d. stíflugerð.
Þó er vert að tala meira um þau umhverfisáhrif sem fylgja stíflugerðinni í
sambandi við árnar og árfarvegina og þeirri röskun sem á sér stað. Patrick
McCully fjallar um þetta í bók sinni Silenced Rivers en hann fer ítarlega yfir þau
almennu umhverfisáhrif sem verða við miklar framkvæmdir. Það má vel yfirfæra
þau fræði yfir á svæðið í Narmadadalnum.
Af því nánast allar stíflur minnka venjulegt flæði, þá brjóta þær
niður vistkerfi með því að útiloka ána frá eðlilegu flæði, og
breyta því sem fiskvistfræðingar kalla „eðlilegt flæði í á“ yfir í
„rotþróar-‐á“ [...]. Þetta uppbrot á vistkerfi árinnar hefur án
nokkurs vafa haft þær afleiðingar að mikil fækkun hefur orðið á
dýrategundum [...].17
McCully segir þó að umhverfisáhrif sumra stíflna geti haft góðar afleiðingar fyrir
sumar tegundir dýra en það sé í svo litlu magni að varla sé hægt að telja það til
bóta; á heildina litið séu áhrifin slæm. Hann bendir einnig á að áhrif mikilla
inngripa í náttúruna séu í rauninni aldrei alveg fyrirsjáanleg og ekki í rauninni
hægt að segja til um þau fyrr en eftir mörg ár.18
2. 2. Fólksflutningar Þúsundir manna hafa misst heimili sín, fólk er neytt til að flytja og margir enda á
götunni. Opinberar tölur, sem til eru um þann fjölda fólks sem hefur þurft að
flytja sig um set, er 40.000–41.500 en þær þykja mjög fjarri sanni.19 Líklegra
þykir að allt frá 240.000 til hálfrar milljónar manna hafi þurft að flytja vegna 16 Vandana Shiva, Water Wars, London 2002, bls. 69. 17 Patrick McCully, Silenced Rivers: The Ecology and Politics of Large Dams, London & New York 2001, bls. 31. 18 Sama rit, bls. 31. 19 Arundhati Roy, The Algebra of Infinite Justice, London 2002, bls. 74.
16
framkvæmdanna. Sumir fengu fébætur fyrir „fórnina“, aðrir annað landsvæði en
yfirleitt virðist þetta fólk ekki hafa náð að koma undir sig fótunum á ný. Einnig
eru dæmi þess að fólk hafi þurft að flytja tvisvar vegna þess að verkfræðingar
misreiknuðu sig. Mikil mótmæli hafa brotist út í kjölfarið og í rauninni hefur
mikil andstaða verið við framkvæmdina. Fólk er óánægt vegna þess að lífi þess
hefur verið raskað á þennan hátt; land, sem gengið hefur milli margra ættliða, er
horfið og mikil tilfinningaleg bönd, sem tengja saman fólkið og landið, rofna.
Bændurnir hafa sumir enga aðra reynslu en að vinna á akrinum eða annast
búfénað. Þetta veldur því að margar fjölskyldur enda á götunni vegna þess að
fyrirvinnan er horfin og peningabætur endast ekki lengi.
McCully lýsir aðstæðum á þeim svæðum sem verst verða úti við stórar
framkvæmdir. Fólksflutningurinn bitnar mjög á konum og börnum. Konan
verður oftar en ekki að sjá fyrir fjölskyldu sinni og reynist það mörgum erfitt
vegna þjóðfélagshátta þar sem fátækt og stéttaskipting er mikil. Ástandið bitnar
einnig mjög illa á þeim öldruðu, því að forsendur fyrir að byrja nýtt líf við svo
erfiðar aðstæður eru varla til staðar. Aðstæður í nýju þorpunum geta verið
hryllilegar, bæði vegna þess að allt of mörgum er troðið saman á lítið svæði eða
að matur sé af skornum skammti. McCully greinir frá: „Tata Institute of Social
Sciences í Mumbai greinir frá því að fiskur og kjöt hafa horfið úr mataræði þeirra
sem bjuggu í nýju þorpunum milli áranna 1986 og 1993 og almennur skortur á
ávöxtum og grænmeti hafi einnig verið algengur í þessum þorpum.“20 Þetta lýsir
ekki góðu ástandi og það er engin ástæða til að halda að þessar lýsingar eigi
einvörðungu við þá sem þurfa að flytja sig eða búa á þessum slóðum. Fjöldi
manns hefur líka einfaldlega horfið, þ.e. engin skrá er yfir fólkið og enginn veit í
rauninni um afdrif þeirra. Mjög líklegt þykir að margir hafi endað á götum
stórborganna í fátækt og örbirgð.21
Mörg störf hafa glatast. Fyrir utan áhrif á landið, sem fólkið missir, og á
þann landbúnað sem því fylgir, þá hefur stíflan gríðarleg áhrif á fiskveiðar á
svæðinu. Þá er aðallega verið að tala um veiðimennina sem vinna einir eða í mjög
litlum hópum. Fiskurinn drepst vegna þess að hann nær ekki niður að sjó. Við
þessu var ekki búist þegar framkvæmdir hófust og hvergi eru gögn til um að 20 Patrick McCully, Silenced Rivers: The Ecology and Politics of Large Dams, London & New York 2001, bls. 79. 21 Sama rit, bls. 76.
17
þetta hafi verið rannsakað. Hvað verður þá um þessa stétt sem telur um 40.000
manns í Narmadadalnum? Arundhati Roy greinir frá því að „[s]tíflur hafi annað
hvort útrýmt eða ógnað fimmtungi alls fersks fisks í heiminum.“22 Það segir sig
sjálft að með þessum alvarlegu afleiðingum á vistkerfi fiska og dýra yfirleitt þá
hlýtur fólk að líða fyrir það ef ekkert kemur í staðinn.
Þessi hluti ferlisins, þ.e. hinn mikli fólksflutningur, er það sem hvað mest
hefur verið gagnrýndur, svo og hvers konar vinnubrögð hafa verið stunduð bæði
af yfirvöldum og Alþjóðabankanum. Þetta var gróflega mistúlkað af hálfu
bankans sem varð meira að segja til þess að hann dró sig út úr verkefninu árið
1993 eftir að harðorð skýrsla kom út eftir Bradford Morse og Thomas Berger.
Við teljum að Sardar Sarovar-‐framkvæmdin eins og hún er sé
gölluð, sá fólksflutningur og endurhæfing fólksins á vegum
verkefnisins er ekki ásættanlegur undir þessum kringum-‐
stæðum og umhverfisáhrif verkefnisins hafa ekki verið fyllilega
könnuð eða nógu vel staðið að þeim. [...] Niðurstaða okkar er sú
að við teljum að besta leiðin fyrir Alþjóðabankann sé að draga
sig út úr verkefninu og endurskoða það.23
Niðurstaða skýrslunnar er afdráttarlaus, þ.e. að þessi meðferð á fólki og umhverfi
réttlæti ekki framkvæmdirnar og þá sérstaklega vegna þess að fólksflutningurinn
var stórlega vanmetinn. Þó var ekki hætt við framkvæmdirnar í miðjum klíðum,
ríkisstjórnin og héraðsstjórn Gujarat tilkynntu að lokið yrði við stífluna og að
fjármunum yrði safnað til þess.24
2. 3. Sjúkdómar fylgifiskur Óeðlileg vatnssöfnum getur valdið sjúkdómum eða auðveldar að minnsta kosti
útbreiðslu þeirra, sérstaklega í heitu og röku loftslagi. Hægt væri að koma í veg
fyrir mikla útbreiðslu alvarlegra sjúkdóma með réttum aðferðum og
22 Arundhati Roy, The Algebra of Infinite Justice, London 2002, bls. 106. 23 Sama rit, bls.85−86. Roy fær þessar upplýsingar beint úr skýrslunni: Bradford Morse og Thomas Berger, Sardar Sarovar: The Report of the Independent Review, útgefið af Resource Futures International Inc., Ottawa, 1992, bls. 62. 24 Sama rit, bls. 87.
18
heilbrigðiskerfi en vanalega er það ekki raunin í vanþróuðum ríkjum og þess
vegna er mjög erfitt að hafa hemil á smiti.
Í fyrsta lagi ber að nefna þá áhættu sem fylgir því að þúsundir
verkamanna koma inn á svæði sem hefur verið tiltölulega einangrað (t.d. miðað
við stórborgirnar). Þetta á sérstaklega við í hitabeltislöndum og þeim fátækari.
Verkamennirnir eru oftast fátækir, ólærðir og bera alls konar sjúkdóma með sér,
s.s. berkla, mislinga, sárasótt, flensutegundir og HIV-‐veiruna. Þar sem þekkingin
er ekki mikil á t.d. smitleiðum sjúkdóma þá berast sjúkdómar fljótt á milli manna,
sérstaklega þegar stíflusvæðin eru afskekkt.25 Dæmi um þetta er hægt að finna
um allan heim en sérstaklega í vanþróuðu og heitu löndunum.
Kólera er algengur sjúkdómur á Indlandi en hún smitast með sýktu vatni.
Þá er sérstaklega varasamt það vatn sem lítil hreyfing er í og lítið líf, t.d. í
vatnslónum sem myndast við stíflugerð. Bakterían veldur miklum uppköstum,
niðurgangi og krömpum og ef sjúkdómurinn er ekki meðhöndlaður með réttum
aðferðum eða lyfjum getur sá sýkti dáið á mjög skömmum tíma af völdum
vökvataps.26
Nefna ber að malaríutilfellum hefur fjölgað gríðarlega hjá fólki sem búsett
er við uppistöðulónið við Sardar Sarovar en fleiri þjást af þeim sjúkdómi eftir að
yfirborð vatnsins hækkaði. Í kringum stífluna og í nálægum þorpum hefur
malaríutilfellum fjölgað sexfalt.27 Þegar malaría er ekki meðhöndluð verður hún
með alvarlegri sjúkdómum sem hægt er að fá. McCully greinir frá því að „[á]rið
1990 hafi malaríusníkjudýrið smitað yfir 300 milljón manns og sennilega dregið
yfir milljón manns til dauða.“28 Svipaðar tölur eiga við nú á dögum. Malaría
smitast með moskítóflugum en þeim fjölgar einmitt við stillt uppistöðulón eða
söfnun vatn. Helstu einkenni malaríu eru hitatoppar með köldu og svitakófi,
höfuðverkur og beinverkir, niðurgangur og hósti. Sýking, sem sníkillinn
Plasmodium falciparum orsakar, getur leitt til alvarlegra einkenna frá
miðtaugakerfi með rugli, meðvitundarleysi og krömpum. Önnur alvarleg
einkenni falciparum-‐malaríu eru blóðleysi, truflanir í storkukerfi, miltisstækkun,
25 Patrick McCully, Silenced Rivers: The Ecology and Politics of Large Dams, London & New York 2001, bls. 86. 26 http://www.landlaeknir.is. 27 Arundhati Roy, The Algebra of Infinite Justice, London 2002, bls. 90. 28 Patrick McCully, Silenced Rivers: The Ecology and Politics of Large Dams, London & New York 2001, bls. 90.
19
gula, nýrnabilun og blóðþrýstingsfall. Leiðir hún oft til dauða ef hún er ekki
meðhöndluð. Malaría er sérlega hættuleg ófrískum konum.29 Þessa alvarlegu
sýkingu er vert að fjalla um vegna þess hve algeng hún er og hversu skæð hún
getur orðið. Í tengslum við malaríu er því miður erfitt að byrgja brunninn áður en
barnið er dottið ofan í. Lítið er hægt að gera til að koma í veg fyrir smit nema
gæta sín á moskítóflugunum sem birtast við sólsetur og sólarupprás. Malaríulyf,
sem notuð eru sem forvörn gegn sýkingunni, eru dýr og innfæddir Indverjar nota
þau lyf nánast aldrei. Þess vegna hefðu stjórnvöld átt að huga að þessu þegar
uppistöðulónið var að fyllast og gera varúðarráðstafanir gagnvart fólkinu sínu.
2. 4. Áhættumat Aðvörunarraddir hafa heyrst síðan byrjað var að byggja stórar stíflur. Ekki eru til
nægar rannsóknir sem sanna að stíflur séu hættulausar, þ.e. endanlegar
afleiðingar eru langt í frá á hreinu. Talið er að þær geti valdið jarðskjálfa (vegna
þunga vatnsins sem safnast upp) og að þær losi gróðurhúsalofttegundir út í
andrúmsloftið. Einnig er flóðahætta mikil ef stíflan brestur. Nærtækasta dæmið
um það er frá árinu 1975 í Kína þegar tvær stíflur brustu; talið er að um 240.000
manns hafi farist.30
Þegar ráðist er í svo miklar framkvæmdir og sem skipta svona miklu máli
þá myndi maður ætla að allt ferlið, áður er stíflan er gerð, væri vel skipulagt og
mikið lagt í það. Svo virðist ekki vera í mörgum tilfellum heldur hefur verið ráðist
í framkvæmdir áður en nægjanlegar upplýsingar og rannsóknir hafa átt sér stað,
bæði hvað varðar svæðið sjálft og sjálfa stíflugerðina. Þetta var einmitt staðreynd
við byggingu Sardar Sarovar-‐stíflunnar. Miklu var ábótavant í framkvæmd og
skipulagningu hennar, t.d. voru rafknúin kerfi, sem áttu að mæla vatnsmagn, sett
upp eftir byggingu stíflunnar og þótti það mjög varasöm og erfið framkvæmd.
Þetta hefði átt að skipuleggja og ákveða áður með tilheyrandi rannsóknum.31
Skortur á peningum og tíma er oft sagður orsakavaldur slíkra mistaka og reyna
stjórnmálamenn og verktakar að leysa þann vanda sem kemur upp í hverju
tilviki fyrir sig. Hver stífla er sérstök og ófyrirséð vandamál hljóta að skjóta upp 29 http://www.landlaeknir.is 30 Patrick McCully, „Big Dams, Big Trouble,“ grein á interneti 2003, bls. 3. 31 Arundhati Roy, The Algebra of Infinite Justice, London 2002, bls. 111−113.
20
kollinum en það afsakar samt ekki það andvaraleysi sem virðist einkenna
undirbúning í mörgum tilfellum.
Vísbendingar voru um að mun minna vatn myndi safnast í Sardar
Sarovar-‐stífluna heldur en búist var við í upphafi en samt var upprunalega
skipulaginu haldið óbreyttu.
Indian Central Water Commission viðurkennir að núverandi
mælingar sýni að minna vatn muni safnast í Narmada heldur en
talið var í fyrstu. Samt heldur stofnunin áfram að styðja Sardar
Sarovar-‐framkvæmdina af þeirri stærð sem raun ber vitni, þar
sem tugþúsundir manna munu þurfa að flytja sig um set, í
staðinn fyrir smærri stíflu sem væri hönnuð fyrir það
vatnsmagn sem búist er við.32
Þetta sýnir ákveðið hugarfar sem er til staðar og er mjög varhugavert, þ.e. að
jafnvel þótt sannað sé að vankantar séu á hönnun og framkvæmd stíflu þá er
farið eftir því sem pólitískt þykir rétt í staðinn fyrir að taka mið af niðurstöðum
rannsókna.
2. 5. Aðskilnaður ríkra og fátækra Aðeins í fátækari löndum eru stíflur af þessari stærð byggðar nú á tímum. Þegar
Vesturlöndin hafa gert sér grein fyrir því að slíkar framkvæmdir séu ekki þess
virði að fara út í þær þá liggur beinast við að koma þeim yfir á hina berskjölduðu.
Þegar lönd eða samfélög eru að sligast undan skuldum, glíma við mikla fátækt og
erfiðleika, þá er auðvelt að sannfæra þau um að framkvæmdir sem þessar séu
fýsilegur kostur. Það er í rauninni verið að nýta neyð hinna fátæku og vanþróuðu
og loforð um um betra líf fyrir fólkið er ekki fylgt eftir.
Við þær aðstæður, sem myndast, t.d. við framkvæmd Sardar Sarovar-‐
stíflunnar, verður enn meiri aðskilnaður milli ríkra og fátækra. Því hver er það
sem raunverulega græðir? Hvert rennur hagnaðurinn? Fólkið sjálft, þeir
Indverjar sem búa við stífluna eða í héruðunum í kring, fá ekki það sem þeim var
32 Patrick McCully, Silenced Rivers: The Ecology and Politics of Large Dams, London & New York 2001, bls. 106.
21
lofað. Sem dæmi um það má taka að drykkjarvatn, sem átti að berast fólki í
Gujarat-‐héraðinu, hefur ekki skilað sér heldur hefur vatnsflaumur til iðnaðar
aukist í staðinn.33 Vatnið er allt of dýrt fyrir venjulegt fólk þannig að hagkvæmast
er að selja það hæstbjóðanda.
Þeir sem fátækastir eru koma verst út úr þessu og bilið milli fátækra og
ríka heldur áfram að breikka. Í framhaldi af því veldur framkvæmdin
misskiptingu gæða, í fyrsta lagi staðbundið, þ.e. meðal fólksins á svæðinu þar
sem stíflan er staðsett, í öðru lagi milli stétta og í þriðja lagi milli þjóða. Er það t.d.
Indland sem virkilega græðir á framkvæmdunum? Vert er að skoða það aðeins
nánar.
Miðað við þær tölur, sem ég hef fyrr nefnt í sambandi við þá sem flytja
þurfa burt af landinu, og þær aðstæður sem fólk lendir í eftir flutninginn má vel
halda því fram að ástandið sé ekki að batna í Narmadadalnum heldur versna. Við
getum gefum okkur það að góður vilji hafi staðið að baki framkvæmdum og
einnig þegar fólkinu var gert að flytja annað eða því bættur skaðinn með fébótum
en þrátt fyrir góðan vilja þá hefur ekki nóg verið gert til að komast hjá slæmum
afleiðingum. Ef dregur úr lífsgæðum fólks og þúsundir manna lenda á götunni þá
er augljóst að einhverjir fá stærri sneið af kökunni en aðrir.
Einnig er mikilvægt að gefa því gaum hvernig indverskt samfélag virkar.
Þar ríkir mikil stéttaskipting en fólk fæðist inn í ákveðna stétt. Framkvæmdirnar
koma, eins og ég hef greint frá áður, verst niður á þeim fátæku vegna þess að þeir
sem tilheyra efri stéttum hafa meiri peninga milli handanna, betri menntun og
njóta samfélagslegrar virðingar sem gerir þeim kleift að fóta sig betur en öðrum.
Um leið og þeir fátækari verða enn fátækari þá sitja einnig margir uppi með enga
vinnu (eða mjög lítið launaða, lítils metna og oft hættulega), ekkert heimili og
njóta enn minni virðingar en áður. Þetta ástand kemur í staðinn fyrir þann
möguleika að reiða sig á sjálfbærni í landinu. Afleiðingin er sú að það sem heldur
fólki á lífi og það sem ætti að kallast sameiginleg eign fólksins (e. common goods)
er tekið í burtu frá þeim sem virkilega þurfa á því að halda. Þetta er gert bæði
með því að sökkva landinu en einnig með nauðungarflutningum. Þetta ýtir undir
enn meiri stéttaskiptingu þegar hinir fátækustu ná ekki einu sinni að klæða sig
og fæða af gæðum jarðarinnar. 33 Arundhati Roy, The Algebra of Infinite Justice, London 2002, bls. 115.
22
Spilling meðal yfirvalda og stórfyrirtækja veldur því að arðurinn rennur
til þeirra sem eiga nóg fyrir á meðan þeir sem eiga ekkert þjást fyrir það. Þarna
vaknar aftur spurningin um hvort Indland græði virkilega eins mikið á
stórframkvæmdum eins og sumir telja. Með þrýstingi frá Alþjóðabankanum og
alþjóðasamfélaginu er kannski verið að gera ávinninginn meira aðlaðandi en
hann í rauninni er. Valdið er nefnilega þar sem peningarnir eru. Ef Indverjar og
fleiri þriðja heims ríki hefðu verið í sömu stöðu og Vesturlöndin, þ.e. með
yfirburðarstöðu á fjármálamarkaði, betri lífsgæði o.s.frv., hefðu þeir þá ákveðið
að ráðast í slíkar stórframkvæmdir með svo alvarlegum afleiðingum fyrir náttúru
og menn eða hefðu þeir valið annan kost? Við vitum að Vesturlandabúar hafa
gengið mjög nærri náttúru og umhverfi sínu til þess að gera lífið þægilegra og
bærilegra, en er samt ekki hægt að álykta að ef stífla með slíkar afleiðingar hefði
verið á dagskrá í Evrópu á sama tíma þá hefðu slíkar framkvæmdir ekki komið til
greina? Arundhati Roy orðar ástandið í landi sínu þannig:
Það er á allra vitorði að það sem stórar stíflur koma til leiðar
gengur þvert á það sem þeir sem markaðssetja þær segja þær
gera. [...] Annars vegar bölsótast indverska ríkisstjórnin, allar
indverskar ríkisstjórnir, sjálfumglöð gagnvart fyrsta heims
ríkjunum en hins vegar borgar hún fyrir innpakkaðan úrgang.34
Með þessum orðum gagnrýnir hún það viðhorf að á meðan fyrsta heims ríkin
neita nú orðið að byggja svo stórar stíflur, þá „henda“ þau slíkum verkefnum í
þriðja heims ríkin í formi þróunarhjálpar. Hún á ekki bara við stórar stíflur
heldur talar hún líka um úrgang eins og t.d. gömul vopn, úrsérgengnar flugvélar
og ólöglegt skordýraeitur.35 Allt það sem fyrsta heims ríkin vilja ekki lengur
senda þau til þeirra sem eiga erfitt með að neita „aðstoðinni“. Indland tekur
hjálpinni fegins hendi þrátt fyrir að vita að hún sé úlfur í sauðagæru.
34 Arundhati Roy, The Algebra of Infinite Justice, London 2002, bls. 53. 35 Sama rit, bls. 53.
23
2. 6. Þvingun fólks til þróunar Á Indlandi er löng saga hefða og helgisiða. Bæði er það tengt trúnni, t.d.
hindúismanum, en einnig náttúrunni. Þegar slík tengsl eru svona mikil er
umrótið enn þá meira við miklar framkvæmdir. Náttúruvernd er oft og tíðum
ekki af „náttúruverndarástæðum“ eins og á Vesturlöndum, heldur af
trúarástæðum. Það er mikil togstreita milli gamallar trúar og nýs vestræns
hugsunarháttar. Á ákveðinn hátt er gert mjög lítið úr þessum tengslum þegar
hugmyndafræði iðnaðarsamfélags er þröngvað upp á fólk. Miklar rökræður er
hægt að hafa uppi um ágæti framfara og tækniþróunar en á Vesturlöndum eiga
þessi gildi það til að vera hafin upp til skýjanna. Af þeim sökum er litið á
vanþróaða þjóð eins og Indland sem annars flokks ríki. Indverjar hljóta að finna
fyrir þessu og bregðast við á augljósan hátt, þ.e. með því að reyna að líkjast
Vesturlöndum í háttum og hugsunargangi. Með þessu er fólki ekki leyft að halda í
sínar eigin hefðir heldur er þvingað yfir í „nútímann“.
En hvað er svona gott við þróun og framfarir? Augljósa svarið er að með
þeim hafa lífsgæði og velmegun aukist, tækni og þekking aukið skilning okkar á
bæði okkur sjálfum, umhverfi okkar og umheimi. Þó er langt í land að við
komumst að hinum eina sanna „sannleika“ og ætli við verðum ekki alltaf í
þekkingarleit og í stöðugri framþróun? En þrátt fyrir að hugsun okkar hafi
síðustu aldir lagt mikinn metnað í að komast lengra, vita meira og ná enn þá
meira valdi á tækni og umhverfinu í kringum okkur þá er nauðsynlegt að staldra
aðeins við og meta kosti þess og galla. Er ekki réttlætanlegt að nota gagnrýna
hugsun og opna aðeins hugann fyrir því að framþróun sé ekki endilega alltaf af
hinu góða?
Georg Henrik von Wright fjallar um þessi málefni í bók sinni
Framfaragoðsögnin en þau eiga vel við hér, þ.e. gagnrýni á skynsemis-‐ og
framfarahugtakið.
Sú útsmogna og stýrandi skynsemi sem nútíma náttúruvísindi
eru upphaflega sprottin af hefur náð þvílíkum yfirtökum að
öllum öðrum tjáningarformum mannsandans – listrænum,
24
siðferðilegum, trúarlegum -‐ er annað hvort útrýmt eða vísað í
undirdjúp órökvísrar trúar og óbeislaðra tilfinninga.36
Nauðsynlegt er að geta gagnrýnt með þessum hætti þau gildandi viðmið að til
þess að einstaklingar og þjóðfélög standi sig vel eða fái það besta út úr lífinu þá
sé tækniframþróun og skynsemishugsun besti kosturinn. Þetta kann að hljóma
heldur ankannanlega í eyrum sumra þar sem það er svo innprentað í menn að
skynsemi sé það eina rétta. Þess vegna er alveg hægt að spyrja sig hvort rétt sé
að þröngva iðnvæðingu, og þar með þeirri tækni sem fylgir stíflugerðinni í
Narmadadalnum, upp á fólkið sem býr þar fyrir, þar sem aðrir siðir ríkja og
öðruvísi viðhorf. Fólkið, sem býr á þessu svæði, er ekki spurt hvort það vilji
breyta um lífshætti heldur er það þvingað inn í aðstæður og látið laga sig að þeim
án virðingar fyrir viðhorfum þeirra, reynslu og trú.
2. 7. Hverjum á að treysta? Misvísandi og ruglandi upplýsingar frá yfirvöldum voru áberandi í
ákvörðunarferlinu fyrir stífluna og sú spurning kviknar: Hverjum á að treysta?
Verkefnið virðist hafa verið sett af stað án þess að raunverulegt mat væri gert á
aðstæðum; það fór stórlega fram úr kostnaðaráætlun, léleg áætlun var gerð fyrir
fólkið sem var flutt í burtu, rannsóknir fáar og náttúrumat nánast ekkert.
Margvíslegar fjárhagsáætlanir voru gerðar, fólki var lofað betra lífi, afleiðingar
fyrir fólkið í kring ekki kynntar nægilega, mengun ekki rétt áætluð og orkunýting
vanmetin.
Blekkingar og lygar voru notaðar til að koma framkvæmdum af stað,
upplýsingar ritskoðaðar og fólk æst upp í að styðja „það sem skiptir máli“ að mati
stjórnvalda. Patrick McCully er mjög gagnrýninn á þetta og segir vald
Alþjóðabankans mikið og að hann hafi lönd eins og Indland í snöru:
Alþjóðabankinn er mikilvægasta opinbera stofnunin í
stíflugerðariðnaði nútímans. Á fyrstu hálfrar aldar tímabili eftir
stofnun hans árið 1944 lánaði hann 527 stíflutengd lán sem
36 Georg Henrik von Wright, Framfaragoðsögnin, þýð. Þorleifur Hauksson, Reykjavík 2003, bls. 66.
25
samtals studdu við bakið á byggingu, stækkun eða tilfærslu
meira en 600 stíflna í 93 löndun, þar með talið margra af
heimsins umdeildustu framkvæmdum.37
Hver er ástæðan fyrir þessum lánum? Er þeim eingöngu ætlað að hjálpa þeim
sem þurfa á þeim að halda eða liggur eitthvað meira þar að baki? Einnig getur
mikil spilling fylgt þeim fyrirtækjum sem smíða stífluna, mútuþægni er algeng
því miklir peningar eru í umferð og stíflur jafnvel byggðar þrátt fyrir að lítil sem
engin þörf sé á þeim.
Þessar misvísandi upplýsingar og skortur á viðunandi vinnubrögðum hafa
valdið því að margir vita ekki sitt rjúkandi ráð. Mikil mótmæli hafa einnig brotist
út í sambandi við stíflugerðina en þau hafa verið áberandi allt frá upphafi. Margir
hafa misst trúna á stjórnvöld og í rauninni allt stjórnarskipulagið í heild sinni.
Mikil togstreita hefur myndast milli hópa og lítið er reynt til að sannfæra eða
upplýsa fólk. Það er slæmt þegar ákvarðanir af þessum toga hafa slíkar
afleiðingar, bæði gagnvart fólkinu sjálfu en einnig þeirri hugmyndafræði, sem
fólk treystir á, eins og lýðræði, réttlæti o.s.frv. Mótmælendum og íbúum í
Narmadadalnum er svarað með lögreglu-‐ og hervaldi þegar fólkið spyr
spurninga, sem og með eintómu skrifræði. Arundhati Roy lýsir þessu óréttlæti:
„Þrátt fyrir að talsvert hafi verið skrifað um viðfangsefnið [Sardar Sarovar], er
mest af því um „sérhagsmuni“ þeirra sem skrifa. Fréttaskýringar eiga það til að
fjalla um einangrað sjónarhorn á framkvæmdina. Opinber skjöl eru innsigluð
sem leyndarmál.“38 Samskiptamáti framkvæmdaraðila og almennings er slæmur
og það lítur út fyrir að almenningur líti svo á að fólk skiptist í tvo hópa, þá sem
treysta ríkisstjórninni í blindni, trúa á tæknivæðingu og framfarir og svo hina
rómantísku, órökvísu og tilfinningasömu.
2. 8. Komandi kynslóðir Ein gagnrýni, sem einnig hefur komið fram, er sú að menn séu að taka ákvarðanir
fyrir komandi kynslóðir. Réttara sagt, þær eru sviptar möguleikanum á að taka
eigin ákvarðanir. Ef t.d. eyðilegging náttúru er það mikil að jafnvel illgerlegt sé að 37 Patrick McCully, Silenced Rivers: The Ecology and Politics of Large Dams, London & New York 2001, bls. 258. 38 Arundhati Roy, The Algebra of Infinite Justice, London 2002, bls. 46.
26
afturkalla þær gjörðir þá er ákvörðunin tekin fyrir þá sem á eftir koma. Er það
siðferðileg skylda okkar að hugsa um þessa hluti eða ber okkur aðeins að huga að
hagsmunum okkar kynslóðar?
Í Narmadadalnum er um mikið landsvæði að ræða sem farið er undir vatn
eins og komið hefur fram áður í þessari ritgerð. Hvort sem talað er um land,
gróður, dýr eða mannvirki er augljóst að áhrif stíflunnar eru mikil. Landslaginu
hefur verið breytt um ókomin ár
og er þá fólk svipt þeim réttindum
að njóta eða nýta það sem var.
Einnig fóru mörg mannvirki undir
vatn, t.d. gömul musteri sem
eftirsjá er að. Menningarverðmæti
glatast og arfur bæði þeirra sem
eiga uppruna sinn á svæðinu en
einnig hins almenna heimsborgara
er tekinn frá þeim.
Útlit stíflunnar sjálfrar er líka mjög umdeilt, sumir líta á hana sem
glæsilegt mannvirki sem sýni vel ágæti mannsins og hvers hann sé megnugur.
Aðrir segja hana ljóta og að hún stingi í stúf við umhverfið, sé eins konar ör á
landi Indverja vegna gríðarlegs umfangs hennar. En hvernig sem fólk lítur á
stífluna sjálfa, hvort því þyki hún falleg eða ljót, þá fara áhrifin, sem hún hefur á
umhverfið í kring vegna uppistöðulónsins, ekki á milli mála.
Mynd 3. Sardar Sarovar-‐stíflan og uppistöðulónið.
27
Mynd 4. Kárahnjúkastífla og Hálslón.
II. Kárahnjúkastíflan á Austfjörðum
1. Ástæður stíflugerðar
Söfnun vatns er helsti sigur mannsins á náttúrunni og að sjá
stóra vatnsbreiðu veitir þeim sem hana eiga innri ánægju.
S.H.C. de Silva
Mikið hefur verið rætt og rökrætt um stífluna við Kárahnjúka. Þetta er
ástríðumál margra, á hvora hliðina sem litið er. Ástæður stíflugerðar eru
tiltölulega einfaldar og auðvelt að útskýra þær. Helstu ástæðurnar, sem ber að
nefna, eru sköpun atvinnu á Austurlandi og almenn uppbygging í samfélaginu.
Með stíflunni er hægt að framleiða seljanlega orku sem skapar iðnað.
Margt hefur breyst á síðastliðnum árum og Íslendingar hafa aukið lífsgæði
sín mjög mikið. Þeir telja sig með þeim fremstu í heiminum hvað varðar
menntun, velferðarkerfi og hamingjustuðul. Stórframkvæmdir geta að margra
mati orðið til þess að íslenskt samfélag haldi áfram að þróast og að jafnvel væri
hægt að gera enn betur með því að halda áfram uppgangi og viðhalda þannig
þeim lífsgæðum sem við búum við. Þetta er mjög algengur hugsunarháttur meðal
margra hér á landi enda mikið gert úr dugnaði og vinnusemi sem skilar sér svo í
28
betra lífi. Einnig er mikið hamrað á því að nota eigi þær auðlindir sem
Íslendingar eiga. Ekki eigi að láta þær fara til spillis en Ísland hefur einmitt
ógrynni ónýttra auðlinda sem hægt er að líta á sem góðan kost okkur til afnota.
1. 1. Atvinnusköpun Stíflugerð og álvinnsla skapar atvinnu á svæðinu í kring. Eitt helsta vandamál,
sem Austfirðir og í raun landsbyggðin öll, mátti glíma við á níunda áratug síðustu
aldar var gríðarlegur fólksflutningur á suðvesturhorn Íslands. Til að mynda voru
brottfluttir umfram aðflutta í Fjarðabyggð 1.552 talsins á tímabilinu 1987 til
2002.39 Fólk var orðið örvæntingarfullt yfir því ástandi sem skapaðist við þá
þróun. Litla vinnu var að fá og ungt fólk sótti ekki í að flytja til baka eftir ýmiss
konar nám vegna þess að ekkert var fyrir það að gera á þessu svæði. Einnig var
þróunin þannig að fyrirtæki voru farin að færa sig um set og t.d. á Reyðarfirði var
öll fiskvinnsla farin annað. Þó voru enn fiskvinnslufyrirtæki á Norðfirði, Eskifirði
og Fáskrúðsfirði en þau önnuðu ekki eftirspurn eftir vinnu fyrir nógu marga.
Þannig var ástandið ekki einskorað við að unga fólkið kæmi ekki aftur að loknu
námi heldur var atvinna þeirra sem fyrir voru í hættu. Sama þróun var uppi á
Héraði en þó í minna mæli.
Þessi þróun, eða ástand eins og sumir kölluðu það, var slæmt á marga
vegu. Ef maður ímyndar sér að samkvæmt svörtustu spám muni landbyggðin að
miklu leyti leggjast niður og langflestir Íslendingar flytja á höfuðborgarsvæðið
yrði þversnið þjóðarinnar fábreytilegt. Það ætti að vera í forgangi hjá
Íslendingum að efla landsbyggðina með öllum tiltækum ráðum til að fólk sjái sig
ekki knúið til að flytja í burtu. Margir hafa mikil tengsl við landsbyggðina, bæði
vegna ættartengsla en einnig vegna þess að ekki vilja allir búa í þéttbyggðri borg
eins og Reykjavík, en ef fólk hefur ekkert eða lítið út á land að sækja er augljóst
að valið verður annað. Þetta kom fram í ræðu þáverandi iðnaðarráðherra, Jóns
Sigurðssonar, í ræðu á Alþingi um ástandið á Austurlandi:
Hæstv. forseti. Þrjátíu ár eru síðan umræða um orkufrekan
iðnað á Austurlandi hófst. Árin eru saga vonbrigða fyrir flesta
39 http://www.hagstofan.is, Fjarðabyggð samanstendur af Stöðvarfirði, Fáskrúðsfirði, Reyðarfirði, Eskifirði, Mjóafirði og Norðfirði.
29
Austfirðinga allt fram til ársins 2003 er skrifað var undir
samninga um byggingu Kárahnjúkavirkjunar og álvers í
Reyðarfirði. Staðan í atvinnumálum Austurlands einkenndist af
fækkun starfa í frumvinnslugreinum, fólksfækkun, stöðnun í
byggingariðnaði, lágu fasteignaverði og samdrætti í
þjónustugreinum með örfáum undantekningum. Atvinnulífið á
Austurlandi var í samdrætti sem nam samtals 3% af starfandi
mönnum, frá 1999–2003. Starfsmönnum í landbúnaði,
sjávarútvegi og iðnaði fækkaði um 10% meðan samdrátturinn í
hótel-‐ og veitingarekstri var nokkru meiri. Störfum í samgöngu-‐
og fjármálaþjónustu fækkaði einnig um 5%. Nokkrar
atvinnugreinar voru í vexti en samtals stóðu allar
þjónustugreinar á Austurlandi í sama stað 2003 og þær höfðu
verið 1999.40
Sem sagt engar framfarir heldur stöðnun og jafnvel afturför. Þetta er ekki fögur
mynd sem brugðið var upp og enginn mótmælti því að brýn þörf væri fyrir
lausnir og aðgerðir á svæðinu.
Með þessum framkvæmdum varð mikil atvinnuuppbygging sem átti að
skapa ný störf í hundraðatali, hvort sem það var í viðskiptum, verslun eða iðnaði.
Miklar vonir voru bundnar við það að mannlífið myndi blómstra í kjölfar
framkvæmda. Þetta átti við um stíflugerðina sjálfa, Fljótsdalsstöðina og álverið,
sem kom í kjölfarið, en einnig við um alla þá uppbyggingu sem á eftir myndi
koma. Jón heldur áfram í sömu ræðu og segir:
Frá 2003–2005 hefur starfandi mönnum fjölgað samtals um
26% á Austurlandi. Mest er fjölgunin í mannvirkjagerð þar sem
orðið hefur fjórföldun starfa en næstum þreföldun starfa í
ýmissi þjónustu við atvinnulífið. Hótel-‐ og veitingarekstur hefur
bætt við sig 45% starfa frá 2003. Fræðslustarfsemi hefur aukist
um 28% en aðrar greinar nokkuð minna. Opinber þjónusta og
40 Jón Sigurðsson, 133. löggjafarþing — 11. fundur, 12. okt. 2006. Kárahnjúkavirkjun og Hálslón, munnleg skýrsla iðnaðarráðherra.
30
stjórnsýsla, [...] hefur dregist saman og er nú með um það bil
jafnmarga starfandi og árið 1998.41
Greinilegt er af þessum tölum að með framkvæmdunum hafi líf kviknað rækilega
á Austurlandi enda ekki annað að ætla þegar verkefnið er stórt og mikið að gera.
Að hafa eitthvað að stefna að, að sjá framþróun í hugsun og verki eflir mannlíf
sem nauðsynlegt er að hafa til að halda uppi byggð.
Þetta er þó ekki einungis einangrað við Austfirðinga heldur er gott fyrir
þjóðarbúið að auka hagvöxt en með framkvæmdum eins og Kárahnjúkastíflunni
og álverinu er peningum ausið inn í hagkerfið með þeim afleiðingum að vinna
skapast og kaupgeta eykst. Í skýrslu frá Landsvirkjun, sem kom út í maí árið
2001 og nefnist „Mat á umhverfisáhrifum“, kemur fram að helstu kostir
framkvæmdanna séu að landsframleiðsla aukist um 8−15 milljarða á ári, að
útflutningstekjur landsmanna aukist um 14% og að aukning verði á
efnahagsumsvifum og atvinnu á landinu, þá sérstaklega á Austurlandi.42
Einnig má benda á að samhliða framkvæmdum hefur verið lagt til að efla
ferðaþjónusta til muna á hálendinu austan Vatnajökuls. Á vef
Kárahnjúkavirkjunar segir: „Vegir Landsvirkjunar hafa opnað hálendi Íslands
fyrir ferðamönnum á undanförnum áratugum og er það stefna fyrirtækisins að
efla útivistarmöguleika á
virkjunarsvæðum og opna dyr
orkuvera sinna fyrir
ferðamönnum.“43 Stefnan er tekin á
að sætta mótmælendur gegn
stíflugerðinni og virkjunarsinna með
því að benda á sameiginleg markmið
hópanna tveggja. Einnig er það mat
margra að um stórkostlegt
mannvirki sé að ræða sem vert er að skoða og markaðssetja fyrir ferðamennsku.
41 Jón Sigurðsson, 133. löggjafarþing — 11. fundur, 12. okt. 2006. Kárahnjúkavirkjun og Hálslón, munnleg skýrsla iðnaðarráðherra. 42 „Mat á umhverfisáhrifum: Kárahnjúkavirkjun allt að 750 MW,“ skýrsla Landvirkjunar, 2001, (samantekt) bls. 7. 43 http://www.karahnjukar.is.
Mynd 5. Hálslón.
31
1. 2. Lífsgæðum viðhaldið Með mikilli atvinnusköpun og fjármagni er hægt að viðhalda þeim lífsgæðum
sem mönnum á Vesturlöndum þykja sjálfsögð. Þeir eru orðnir góðu vanir og til
þess að halda þessum lífgæðum, og jafnvel bæta þau, þá þarf að hafa einhver
úrræði fyrir fólkið. Stórar framkvæmdir henta vel til þess.
Sá lífsstíll, sem fólk í okkar heimshluta hefur komið sér upp upp og hefur
vanist er alls ekki sjálfsagður þrátt fyrir að fólk geri sér ekki alltaf grein fyrir því.
Það er dýrt að vera til og það þarf mikla orku og framleiðslu til þess að daglegt líf
gangi snurðulaust fyrir sig. Ef þessu er stofnað í hættu, t.d. þegar fólk hefur ekki
vinnu eða almennur uppgangur er ekki eins og vonast er eftir, þá er það
mikilvægt verkefni stjórnvalda og sveitastjórna að bæta ástandið. Þetta snýst
ekki bara um að lifa af, eiga þak yfir höfuðið eða matarbita fyrir fjölskylduna,
heldur er lífsfyllingin önnur og meiri. Íslendingar eru margir hverjir vel
menntaðir og þeir standa vel í ýmiss konar samanburði við aðrar þjóðir. Það
hefur í för með sér að metnaðurinn er mikill og viðmiðið hátt. Markmiðið er að
vera samkeppnishæf þjóð með sömu lífsskilyrði og aðrir og jafnvel betri. Fólk
sættir sig ekki við neitt nema það besta og þegar það er orðið vant því sem hið
góða líf hefur upp á að bjóða verður að gera allt til að viðhalda því ástandi.
Gaman er að benda á hvernig helsta orkufyrirtæki Íslendinga skilgreinir hlutverk
sitt: „Landsvirkjun er orkufyrirtæki sem leggur grunn að nútíma lífsgæðum“.44
Þetta segir mikið um það hver markmið stíflu eins og við Kárahnjúka eru.
1. 3. Nýta það sem nýta má Það er gömul hugsun og ný að líta svo á að nýta eigi land ef það er hægt og þá
orku sem fyrirfinnst. Ef þjóð búi yfir auðlindum, sem hægt sé að nota í þágu
manna, sé nauðsynlegt að nýta þær auðlindir. Ef hægt sé að gera líf fólks
auðveldara eða betra þá beri okkur að nota þau úrræði sem gefist. Á einhverju
verður fólk að lifa og náttúran sé augljóslega vettvangur þess.
Sýn Vesturlandabúa hefur lengi verið á þann veginn að náttúran sé á
einhvern hátt utan við manninn, að hann lúti sínum eigin lögmálum. Maðurinn sé
skynsemisvera sem skeri sig úr frá öðrum dýrum, hann hafi aðrar tilfinningar,
44 http://www.landsvirkjun.is
32
noti skynsemi, réttlætingu o.s.frv. Þetta hefur í för með sér að maðurinn er sá
sem stjórnar náttúrunni til eigin nota og nýti fyrir eigin þarfir.
Benda má á að einn af frumkvöðlum framfarahugsunarinnar var Francis
Bacon. Hann var einn af þeim sem stóðu að framafarahyggju á 17. öld með nýrri
hugsun og með nýrri aðferðafræði. Bacon taldi að með vísindalega rétt fenginni
þekkingu væri hægt að gera samfélagið betra. Hann bjó til eigin útópíu um hinn
fullkomna heim í bók sinni New Atlantis. Hann boðaði þar að hægt væri að bæta
sköpunarverkið með því að nota skynsemi, reynslu og þekkingu. Hann hafði
óbilandi trú á vísindum og taldi að með þeim væri hægt að bæta heiminn. Hann
trúði á góð vísindi og taldi að með því að nota reynsluna í tilraunum myndu
menn öðlast eitthvað stórfenglegt, sannleikann. Það væri einhvers konar
paradísarheimt eins og hann boðar í New Atlantis. Þannig gætu mennirnir notað
náttúruna í sína þágu í göfugum tilgangi. Hann fékk mikið lof fyrir að vera
framsýnn og fyrir að huga að því hvernig sannleikurinn gæti nýst manninum ef
hann myndi kanna náttúruna sem best og uppgötva alla hennar leyndardóma.
Því eru engin mörk sett hvað mennirnir geta gert.45
Viðhorf Íslendinga er ekki svo frábrugðið viðhorfi Bacons en Landsvirkjun
var stofnuð af íslenskum stjórnvöldum árið 1965 til þess að nýta orkulindir
landsins á betri hátt og með því að laða að erlenda fjárfesta. Þessi
hugsunarháttur hefur verið lengi ríkjandi og margir hafa haft háleitar hugmyndir
um virkjanir á Íslandi. Þess vegna kemur ekki á óvart að viðhorf margra til
Kárahnjúkastíflu sé jákvætt, og sérstaklega þeirra sem mesta hagsmuni hafa sem
endurspeglast í því viðhorfi að nota skuli það sem landið gefur. Fólk á að nýta
þær auðlindir sem bjóðast samkvæmt þeirri hugsun.
45 Carolyn Merchant, The Death of Nature, San Francisco 1980, bls. 164−191.
33
2. Mótbárur
Við byggjum vatnsþró eða stíflu til að geyma vatn, og veðsetjum
áveitudalina og iðnaðurinn borgar fyrir það, en á hverju ári
safna lónin aðeins minna vatni og aðeins meiri drullu.
Ávinningurinn, sem ætti að vera eilífur, verður aðeins
uppspretta tímabundinnar velmegunar.
Aldo Leopold
Mikið hefur verið rætt um Kárahnjúkastífluna á Íslandi og umræðan skiptist
nánast alveg í tvö horn. Þeir sem talað hafa gegn virkjunum hafa mætt mikilli
andstöðu þar sem haldið hefur verið fram að andmæli séu andstæða
skynseminnar, þróunar og velmegunar. Þó er nauðsynlegt að skoða ástæður þess
að fólk rís upp og segir áðurnefnda skoðun sína þrátt fyrir yfirgnæfandi mótbyr.
Ég tel að aðalástæðan fyrir því að fólk sé á móti slíkum stórfram-‐
kvæmdum sé röskun náttúrunnar á Íslandi. Náttúruvitund hefur aukist, mikil
hugarfarsbreyting hefur orðið síðastliðin ár og háværari kröfur eru um að
Íslendingar fari vel með það sem þeir eiga hér á landi. Þá skiptir ekki máli þótt
landið, sem eyðilagt er, sé uppi á hálendi eða á fáförnum slóðum því fegurð þess
og gildi fyrir Íslendinga skiptir þá alveg jafn miklu máli. Þá hefur verið gagnrýnd
sú einhæfa hugsun að virkjanir og stóriðnaður bjargi Íslendingum út úr öllum
þeim kreppum sem þeir lenda í efnahagslega og að aðrir kostir til úrbóta sé virtir
að vettugi.
Einnig hefur verið bent á að kostir framkvæmdanna séu ýktir, þ.e. að allt
það góða sem út úr þeim muni koma sé ofmetið og að margt hafi ekki verið tekið
nógu mikið til greina. Þar má velta fyrir sér spurningum eins og hvort það sé
virkilega fólkið í landinu sem hagnast á þessu, hvaða áhrif hefur þessi stefna á
sjálfsmynd Íslendinga sem og á álit umheimsins? Og skipta rök sem tengjast
tilfinningum okkar, fegurðarmati og heilagleika náttúru máli þegar talað er um
virkjunarframkvæmdir?
34
2. 1. Mikið röskun á náttúru Fyrst er mikilvægt að nefna hina miklu röskun á náttúrunni sem verður við
stíflumyndun. Mikið land fer undir vatn með þeim afleiðingum að ýmsar tegundir
grasa, blóma og gróðurs hverfa, varpland fyrir fugla verður ekki til staðar lengur
o.s.frv. Umhverfisáhrif eru ekki fyllilega á hreinu, það er í rauninni ekki vitað
hvaða áhrif stíflan og lónið hafa á landið og ekki síst vistkerfið í kring.
Kárahnjúkastíflan er stærsta stífla sinnar tegundar í Evrópu. Hún er 700 m löng
og 198 m há. Hálslónið er 57 km² að flatarmáli þegar það er fullt og 25 km á
lengd þannig að svæðið sem fer undir vatn er gríðarlega stórt.46
En þá hlýtur sú spurning að vakna hvort það skipti einhverju máli þótt
röskun verði á náttúru og af hverju. Það er mjög mismunandi hvernig fólk svarar
því, vegna þess að þar liggur ágreiningurinn um hvort það sé þess virði að fórna
landinu fyrir kosti virkjunarinnar. Einnig eru skiptar skoðanir á því hvort þetta
tiltekna svæði sé nógu fallegt til þess að barist sé fyrir varðveislu þess. Af þessum
ástæðum er erfitt fyrir manneskju, sem finnst landið ægifagurt og stórfenglegt,
að mæla með því að það verði látið ósnortið þegar öðrum finnst það ljótt og að
enginn söknuður verði eftir því. Þrátt fyrir þennan skoðanamun þá verður líka að
hlusta á þann sem mælir fyrir landverndun. Í því liggur grundvallaratriðið, að
vægi þeirrar skoðunar að finnast landið þess virði að bjarga sé líka mikilvægt, og
ekki bara tekið mið af „skynsemisrökunum“. Ég mun fjalla betur um þetta síðar í
ritgerðinni.
Annað atriði, sem einnig er talað um í sambandi við röskun á náttúru, er
ósanngirni gagnvart komandi kynslóðum. Þetta er það sama og ég nefndi í kafla
2.8, þar sem fjallað er um Indland, og á þessi hugsun augljóslega við hvar sem
fólk er í heiminum. Með ákvörðunum eins og þessari er augljóslega tekið fram
fyrir hendur komandi kynslóða. Stífla er byggð sem hefur áhrif á lífríki og náttúru
á svæðinu en fullkominn skilningur á afleiðingum slíkra gjörða er í rauninni ekki
fyrir hendi. Með slíkum framkvæmdum er verið að huga að eiginhagsmunum
Íslendinga á líðandi stundu og kannski komandi ára en í raun er ekki hugsað
lengra.
46 http://www.landsvirkjun.is
35
2. 2. Einsleit atvinnuuppbygging Mikil gagnrýni hefur komið frá andstæðingum Kárahnjúkavirkjunar um að
framkvæmdirnar leiði af sér einsleita atvinnuuppbyggingu sem gæti snúist upp í
andstæðu sína með því að einskorða sig um of við álverið. Þegar vandamálin eru
mörg á ákveðnu landsvæði t.d. í sambandi við uppbyggingu, framfarir, atvinnu og
lífsgæði, þá er auðvelt að „stökkva á“ tækifæri, eins og stórar framkvæmdir, til
þess að eygja von um betra líf. Ef loforðin eru stór og væntingarnar miklar getur
verið auðvelt að einskorða sig við þá lausn sem þykir augljósasta svarið við öllum
þessum vandamálum. Þessi afstaða er mjög gagnrýniverð og þá sérstaklega
vegna þess að miklu er veðjað á einn möguleika. Ef fólk heldur að endanlega
svarið sé gefið og lausn vandans fundin þá getur það skapað aðstæður sem lýsa
sér í ákveðnu framtaksleysi. Jú, fólk segir á móti að með stórframkvæmdum byrji
uppbyggingin og í framhaldi vinda góðir hlutir upp á sig. Allt sem kemur á eftir sé
af hinu góða. Setja má stórt spurningarmerki við þessa fullyrðingu þótt eitthvað
sé þó satt og rétt í henni en þetta getur þó haft ákveðinn misskilning í för með
sér. Velmegun, atvinna o.s.frv. þarf ekki að vera bein afleiðing stórra álvera eða
framkvæmda þrátt fyrir að svo sé sagt. Kannski má segja að í einhvern ákveðinn
tíma, á meðan framkvæmdum stendur og árin á eftir, sé næga atvinnu að hafa og
fólk sæki í að vinna á svæðinu en þá er alls ekki þar með sagt að slíkur
uppgangur haldi endalaust áfram. Það er auðvelt að missa sjónar á þessu atriði
þegar framkvæmdirnar sjálfar eru í gangi en hvað gerist þegar þeim lýkur og
flest fellur í sama horf innan tíðar? Þá verða að vera aðrar lausnir við nýjum
vandamálum og í þeim felst ekki að byggja álver við hvern fjörð á landinu. Einnig
koma aðrar spurningar upp í hugann: Hvað ef ál hættir að seljast? Sitjum við uppi
með ónýtta stíflu? Allt of mörg egg eru sett í sömu körfuna.
Andri Snær Magnason fjallar um þetta hugarfar í bók sinni Draumalandið:
Sjálfshjálparbók handa hræddri þjóð en þar gagnrýnir hann harðlega þessa
einsleitu atvinnuuppbyggingu. Hann fjallar á einum stað um dæmisöguna um
píramídana í Egyptalandi til forna og hvernig „[m]aðurinn hefur tilhneigingu til
að viðhalda kerfum hvort sem þau eru rökleg eður ei. Öryggisþrá, óvissa og ótti
við breytingar veldur því að fólk rígheldur í þann veruleika, sem það býr við,
36
hvort sem hann er byggður á rökum eða ekki.“47 Boðskapur sögunnar er sá að
ekki er nóg að byggja bara einn píramída heldur hefur það í för með sér að fleiri
eru byggðir og alltaf stærri í hvert skipti. Þannig væri hægt að líta á stíflugerð
vegna þess að hún snýst ekki um neitt annað en þessa vinnu. Engin frjó hugsun
er þarna að baki heldur einungis einhæf og tímabundin lausn við atvinnuleysi.
2. 3. Einsleitt hugarfar Einsleit hugsun tengist því beint sem ég fjallaði um hér að ofan en þó í víðara
samhengi. Þegar fólk hefur ákveðið að eitthvað sé satt, rétt og gott er erfitt að fá
það ofan af þeirri skoðun (einfaldlega af því hún „er“ sönn, rétt og góð). Það
vantar gagnrýna hugsun í þessu sambandi milli skoðana annars vegar og vona
hins vegar, þ.e. að geta horft á hlutina út frá öðru samhengi, þó ekki væri nema
agnarögn, og ekki útiloka önnur viðhorf án alvarlegrar umhugsunar. Því þegar
stórar ákvarðanir eru teknar þá ættu allar hliðar málsins að vera teknar til
athugunar, þrátt fyrir bágt ástand hvort sem það er í þjóðfélaginu öllu eða
staðbundið.
Þegar fólk er örvæntingarfullt og sér von í fjarska þá er auðveldast að
„stökkva á“ þá niðurstöðu sem þykir best en þegar öllu er á botninn hvolft geta
reynst alvarlegir brestir í röksemdafærslunni. Þó er auðvitað hægt að vera vitur
eftir á og segja: Já, ég vissi að þetta myndi fara svona eða hinn veginn en þá er
allavega hægt að segjast hafa íhugað þann möguleika en samt komist að sömu
niðurstöðu.
Hvað felst í frjórri hugsun? Það er kannski ógnvekjandi að þurfa að leita
annarra leiða sem eru frumlegar og óvenjulegar og tefla jafnvel í tvísýnu
fjárhagslegu öryggi og ákveðnum stöðugleika. Að fá nýjar hugmyndir, sem gefa af
sér og eru samfélaginu til góða, er ekki endilega sjálfgefið en þó er ástæða til að
gefa þeim tækifæri frekar en að líta fram hjá þeim. Þá á ég við hugmyndir sem
ganga út á annað en stóriðju og framkvæmdir sem eru afar umdeildar eins og
Kárahnjúkastíflan. Andri Snær bendir á vandamálið við það að fá nýjar
hugmyndir:
47 Andri Snær Magnason, Draumalandið: Sjálfshjálparbók handa hræddri þjóð, Reykjavík 2006, bls. 143.
37
Það er vel hægt að komast í gegnum lífið sem farþegi hugmynda
eða kerfa sem aðrir hafa skapað. En þeir sem sofa hlutina af sér
geta vaknað einn daginn við vondan draum. Við eigum ekki
mörg hugtök eða myndhverfingar sem ná utan um eðli
hugmynda, hvernig einn hugsar eitt áður en það verða viðtekin
sannindi og hvernig múgæsingur getur breiðst yfir heilt
samfélag án þess að neinn geti rönd við reist.48
Erum við mannskepnurnar svona mikil hjarðdýr? Er svona auðvelt fyrir fólk að
fylgja þeirri viðteknu stefnu sem á við í hverju samfélagi fyrir sig á hverjum tíma?
Þar sem við erum skilyrt því samfélagi sem við lifum í, þ.e. við ölumst upp í
ákveðnu umhverfi, í ákveðnu samfélagi með ákveðin gildi, þá er kannski
augljósast að við hlýðum því sem t.d. stjórnmálamenn segja að sé satt og rétt og
besta útkoman í erfiðri stöðu er þá fengin hjá þeim sem mest vita um málið.
Þetta gerði gagnrýni á stórframkvæmdina mjög erfiða því mörgum þóttu
þeir sem voru á móti virkjuninni engan veginn í takt við veruleikann á Íslandi.
Sérstaklega var erfitt fyrir fólk á Austurlandi að hafa aðrar hugmyndir en
Kárahnjúkastíflu; því var úthúðað fyrir hugsjónir sínar og til eru meira að segja
dæmi þess að fólk þurfti að flytja búferlum ef það var ekki sammála viðteknum
skoðunum. Þetta eru dæmi um ákveðna þröngsýni og skort á vilja til að sjá
hlutina í öðru samhengi en „fólki er sagt að gera“. Ef einhver er hreinlega búinn
að ákveða í huga sínum að eitthvað sé rétt þá er það rétt – sama hvað hver segir.
2. 4. Ímynd út á við Getur verið að Kárahnjúkastíflan sé slæm ímynd út á við? Á tímum, þegar þjóðir
byggja gríðarlega mikið á ímynd og ferðamennsku, kann að hljóma einkennilega
að verið sé að eyðileggja náttúruna sem ferðamenn sækjast eftir að njóta á
Íslandi. Alltaf dettur fólki hið sígilda dæmi í hug þegar Einar Benediksson kom
fram með hugmynd um að virkja Gullfoss og við hugsum til þess með hryllingi ef
það hefði gengið í gegn þar sem Gullfoss er einn af eftirsóttustu
ferðamannastöðum á landinu og náttúrulegt verðmæti fyrir okkur Íslendinga. Sú
48 Andri Snær Magnason, Draumalandið: Sjálfshjálparbók handa hræddri þjóð, Reykjavík 2006, bls. 31.
38
þróun að í framtíðinni verði stærstu stíflur Evrópu allar á Íslandi er eflaust ekki
góð fyrir ferðamannaiðnaðinn.
Ef Íslendingar reyna á annað borð að skapa þá ímynd af landinu að hér sé
ægifögur náttúra og að fólk eigi eftir að upplifa stórkostlega hluti hér þá er
kannski betra að vera samkvæmur sjálfum sér í þeim efnum og „gera eins og
maður segir“ – í stað þess að spila á það að Ísland sé ein stór náttúruperla en
haga sér svo í mótsögn við það.
Eins og ég benti á í kaflanum á undan þá er það stefna Landsvirkjunar að
efla ferðamannaiðnaðinn við stífluna sjálfa en einnig í kringum Hálslónið og
norðaustanverðan Vatnajökulsþjóðgarð. Þetta er í sjálfu sér gott framtak en
virkar samt eins og yfirklór. Sumir segja að vísu að lónið sjálft sé stórfenglegt
o.s.frv. en af tveimur kostum þá held ég að flestir myndu velja landið sem fyrir
var en dautt áveitulón.
Það er mikið til í því að fyrirtæki eins og Landsvirkjun hafi hjálpað okkur
að uppgötva hálendið á Íslandi. Fyrirtækið hefur staðið fyrir lagningu vega sem
hafa gert fólki fært að sjá og upplifa heim sem okkur var hulinn í gegnum
aldirnar. Mjög stutt er síðan almenningur gat farið upp á hálendið, bæði vegna
þess að þangað hafði fólk einfaldlega ekkert að sækja og einnig vegna þess að það
var ekki hægt á þeim farartækjum sem til voru á þeim tíma. Með tilkomu
vegalagna Landsvirkjunar hefur ferðamannastraumur aukist til muna; bæði
innlendir og erlendir ferðamenn sækjast eftir að sjá hina stórfenglegu náttúru. Í
þessu felst ákveðinn tvískinnungur: fyrirtækið, sem opnaði leiðina að hálendinu,
er jafnframt það fyrirtæki sem leitast við að nýta hana og eyðileggja. En þrátt
fyrir það þá réttlætir það ekki að hægt sé að gera hvað sem er við landið. Þetta er
sambærilegt við það að ef einhver fyndi nýja eyju þá væri í lagi að hann færi
með hana eins og hann vildi, það hefði hvort sem er engin mannvera notið
hennar fyrir.
Ferðamannaiðnaðurinn er orðinn mjög mikilvægur fyrir Íslendinga og
fyrir ímynd þeirra því líka. Það ber þó að hafa varann á í þeim efnum því sá
iðnaður gæti líka snúist í höndum þeirra. Það þarf mikla útsjónarsemi og
skipulagningu til þess að takmarka umhverfisspjöll og eyðileggingu en margar
þjóðir hafa þurft að kljást við afleiðingar ferðamannaiðnaðar. Margs þarf að gæta
ef ímynd tærrar og hreinnar náttúru á að viðhaldast.
39
2. 5. Hið góða líf og mismunandi gæði þess Hvað er átt við þegar talað er um hið góða líf? Ég ætla að fjalla aðeins um einn
þátt sem ég hef ekki nefnt áður og það er skilgreining á hinu góða lífi. Sumum
kann að finnast slík skilgreining huglæg eða afstæð því að það sem einhverjum
þykir gott líf finnst öðrum ekki. En ekki er þar með sagt að ekki sé hægt að finna
einhvern mælikvarða sem hægt er að fara eftir. Í framhaldi af því er hægt að
spyrja sig hvort þetta hafi eitthvað með stórframkvæmdir að gera og hvort þær
ýti undir það að gæði skiptist ójafnt milli manna.
Fyrst er mikilvægt að nefna grunnþarfir sem allir eiga að geta fullnægt,
eins og magafylli, húsaskjól og viðurkenningu á tilvist. Allir eiga rétt á að
lífsskilyrði séu sem best og að manneskjan gæti vaxið og dafnað í heilbrigðu
umhverfi. Í annan stað er mikilvægt fyrir fólk að öðlast einhvers konar möguleika
á hamingju í lífinu, þ.e. að hafa getu og aðstöðu til að elska og vera elskaður, að
hafa möguleika á menntun og val til að gera það sem hugurinn girnist, hvort sem
um er að ræða starf eða eitthvað annað. Hver og einn velur sína leið í lífinu og
mjög misjafnt er hvaða leið hver og einn velur. Mjög erfitt er að segja til um hvað
gerir fólk hamingjusamt eða ánægt. Manneskja, sem lifað hefur farsælu lífi, hefur
lifað í sátt við aðra menn, farið eftir eigin sannfæringu og verið ánægð með störf
sín hvort sem það er á utan heimilis eða innan fjölskyldu. Með það að viðmiði að
hið góða líf sé nokkurn veginn eins og ég hef lýst þá finnst mér ekki felast í því að
eiga ógrynni fjár eða að hafa völd. Að gera það að hreinu og beinu markmiði að
eignast peninga eða hluti ætti ekki að vera aðaláherslan í lífinu. Að eiga miklu
meira af peningum en fólk þarfnast raunverulega er óþarfi þrátt fyrir að í því
samfélagi, sem við lifum, þyki það eðlilegt markmið.
Enn eitt atriðið, sem hægt er að nefna í sambandi við hið góða líf, er
hvernig við lítum á okkur sjálf sem manneskjur í þessum heimi. Þá koma sígildar
siðferðilegar spurningar upp í hugann sem sækja að okkur og við erum alin upp
við. Þetta hefur áhrif á okkur sem manneskjur, þ.e. hvernig við hugsum um sjálf
okkur og gjörðir. Er ég sátt við það sem ég er að gera? Er ég að stuðla að góðu lífi
hjá mér og hjá öðrum? Er eitthvað sem ég get gert eða breytt í lífsskoðunum
mínum og hegðun til að líða betur með hvernig ég er? Það er jafnvel hægt að fara
lengra með þá hugsun og pæla í því hvað ég geti lagt af mörkum í umhverfi mínu
40
og hegðun gagnvart landinu mínu til að stuðla að betra lífi hjá mér. Þetta getur
snúið að náttúrunni og þeirri siðferðilegu spurningu hvað mér ber að gera fyrir
hana og af hverju. Þessari spurningu er hægt að svara á margvíslegan hátt, t.d. að
það sem mér ber að gera fyrir náttúruna er það sem hentar mínum markmiðum.
Samkvæmt því ber mér bara að varna því að ég fari svo illa með hana að það
skaði mig og aðra menn. En það er einnig hægt að svara þessari spurningu á
annan hátt, þ.e. að mér beri að vernda náttúruna vegna þess að við mennirnir
erum hluti af henni og til þess að öðlast farsæld í lífinu þá verðum við sem
siðferðisverur að hugsa um þessi atriði. Kannski má segja að til þess að öðlast
sem besta sjálfsmynd þá þarf að bera virðingu fyrir sjálfum sér og umhverfinu og
með bættri sjálfsmynd er meiri möguleiki á að öðlast farsælt líf.
Hefur Kárahnjúkavirkjun í för með sér misskiptingu gæða? Hver hagnast
mest og á hvers kostnað? Þegar ákveðið var að virkja og ganga í gegnum allt
ferlið þá voru væntingar miklar um vinnu, gróða o.s.frv. því að gríðarlegir
fjármunir voru í húfi og settir í framkvæmdirnar. En þá vaknar spurningin um
það hver raunverulega hagnist.. Hverju erum við að fórna fyrir gróða sem
kannski skiptist á fárra manna hendur? Ljóst er að önnur störf skapast en aðeins
þau sem eru við álverið sjálft, eins og virkjunarsinnar hafa bent á, en það svarar
t.d. ekki kröfunni um fjölbreytni starfa og í raun hvort atvinnulífið haldist í jafn
góðu horfi eftir að framkvæmdum er lokið.
Misskipting gæða er afstætt hugtak. Ef við hugsum um efnisleg gæði, t.d.
peninga, húsnæði og ýmiss konar lúxus þá er mjög misjafnt hvers fólki finnst
„eðlilegt“ að njóta. Skipting þessara gæða er mjög misjöfn meðal Íslendinga þrátt
fyrir að okkur finnist allir frekar jafnir yfirleitt. Flestir hafa þak yfir höfuðið og
enginn hreinlega deyr úr vannæringu. Af þessum sökum er sá staðall, sem gildir
um góðæri í lífinu, frekar hár miðað við marga aðra staði í heiminum og þetta
hefur áhrif á hugmyndina um hvað sé nauðsynlegt og gott fyrir okkur á móti því
hvernig gæði vilji okkar stendur til. En hvað sem því líður þá er alltaf einhver
sem á meira og betra en annar og okkur finnst það eðlilegt vegna þess að ekki
geta allir verið í nákvæmlega sömu stöðu í lífinu.
41
3. Mótmælendur Mótmælendur eru mikilvægur þáttur í sögu náttúruverndar. Það eru þeir sem
rísa upp og neita að sætta sig við ástandið. Venjulega nota þeir friðsamlegar
aðgerðir, þeir reyna að ná eyrum fólks, að vekja umtal og fá stjórnvöld til að
hlusta á sjónarmið sín. Þetta gengur þó misvel og eru mörg dæmi þess að fólk
hefur orðið illa úti við átök sem af mótmælum kunna að verða. Á þessu sviði
skiptir engu máli hvaðan úr heiminum mótmælandi er, þ.e.a.s. ef hann mótmælir
einhverju vegna sannfæringar sinnar þá mun hann eiga erfitt uppdráttar því að
það er erfitt að vera á móti stjórnvöldum og stórfyrirtækjum. Það liggur við að
engu skipti hver málstaðurinn er eða hvar í heiminum mótmælin fara fram þá er
ákveðinn samnefnari með öllum mótmælendum sem mótmæla á friðsaman hátt.
Ég ætla að fjalla um mótmælendur í löndunum tveimur, Íslandi og Indlandi, og
sjá hvað þeir eiga sameiginlegt þrátt fyrir ólíkan bakgrunn og mismunandi
áherslur.
3. 1. Á Indlandi Mótmæli vegna stíflna í Narmadadalnum, sérstaklega vegna Sardar Sarovar-‐
stíflunnar, hafa lengi verið við lýði á svæðinu eða allt frá því framkvæmdir hófust
um miðja síðustu öld. Fyrst beindist gagnrýnin aðallega að greiningu stjórnvalda
á kostum og göllum stíflunnar en þá var mörgum ofboðið þegar kostir voru
stórlega ýktir og lítið gert úr göllunum. Einnig varð ástandið enn erfiðara þegar í
ljós kom að þeir sem áttu að flytja í burtu fengu ekkert land í staðinn og
vesluðust margir upp í kerfinu og einfaldlega hurfu í mannfjöldann.49
Margt var gert til að koma málstaðnum á á framfæri við fólk og til að ná
athygli heimsins. Þá voru framdir litlir gjörningar, vegum lokað, opnir fundir
haldnir, farið í hungurverkföll og gengnar kröfugöngur. Einn atburður, sem átti
sér stað þann 29. september árið 1989, fékk sérstaklega mikla athygli en þá
komu um 60.000 sjálfboðaliðar saman í bænum Harsud í Madhya Pradesh-‐
héraðinu, flestir voru úr ættflokkum eða voru smábændur, og ætluðu þeir að
fórna sjálfum sér og hótuðu að fara í kaf með landinu. Ýmsir lögðu leið sína til
Harsud og mættu margir áhrifamiklir leiðtogar baráttuhópa til að styðja 49 Patrick McCully, Silenced Rivers: The Ecology and Politics of Large Dams, London & New York 2001, bls. 76.
42
hreyfinguna gegn byggingu stíflunnar.50 Eftir þetta atvik og eftir marga smærri
atburði urðu mótmælendur gegn framkvæmdum í Narmadadalnum mjög
áberandi og fjöldi fólks tók þátt í mótmælum hvaðanæva að af Indlandi og jafnvel
utan þess.
Ein helstu mótmælendasamtökin, sem stofnuð voru í framhaldi af
deilunum í Narmadadalnum, kalla sig Narmada Bachao Andolan (NBA). Einn
helsti forsprakki samtakanna heitir Medha Patkar en hún hefur unnið fyrir
mannréttindasamtök um allt Indland en lætur sig þetta málefni sérstaklega
varða. Þessi samtök hafa áunnið sér virðingu um allan heim vegna áræðni og
ákveðni varðandi stefnumál sín.
Patkar sagði við blaðamann hjá
enska blaðinu Guardian í apríl árið
1993: „Við höldum okkur fast við
landið eins og barn heldur sér fast
í móður sína. Þegar vatnsborðið
hækkar munum við mæta þeim
eins við höfum alltaf heitið sjálfum
okkur. Þetta er ekki sjálfsmorð og
okkur langar ekki að deyja en sú skylda okkar að bjóða vatninu byrginn hefur
alltaf verið grundvallarregla í samtökum okkar.“51 Þessi gríðarlega andstaða við
stífluna beinist einkum að þeirri staðreynd að tugþúsundir manna þurfa að flýja
heimili sín og hefur það verið helsta stefnumál samtakanna að sporna gegn þeirri
þróun. En þrátt fyrir að stjórnvöld hafi alltaf náð að halda sínu striki þá hafa
samtökin haft mikil áhrif innan Indlands og verið gott fordæmi þeirra sem vilja
hafa áhrif og láta í sér heyra.
Mótmælendur hafa þó mætt mikilli andstöðu á Indlandi. Þeim hefur verið
úthúðað og þeir sagðir vera ofur tilfinningasamir og ekki hirða um framþróun; að
þeir vilji ekki það sem kemur sér best fyrir Indland og jafnvel er gengið svo langt
að segja að þeir séu hreinlega á móti Indlandi og íbúum þess. Þegar fyrstu
mótmælafundirnir gegn stíflunni í Narmadadalnum voru haldnir voru
50 Madhav Gadgil og Ramachandra Guha, „Ecological Conflicts and the Environmental Movement in India,“ Development and Change, Oxford 1994, bls. 113. 51 Patrick McCully, Silenced Rivers: The Ecology and Politics of Large Dams, London & New York 2001, bls. 299.
Mynd 6. Mótmæli á Indlandi.
43
mótmælendur handteknir samkvæmt „Defense of India“-‐lögunum vegna þess að
athöfnin að mótmæla stíflum var litin alvarlegum augum og í raun var litið á
athöfnina sem mótmæli gegn sjálfu indverska ríkinu. 52 Meðlimir NBA-‐
samtakanna hafa einnig fengið að kenna á því en Gadgil og Guha lýsa því þannig
að „[þ]rátt fyrir að sjálf samtökin hafi ekki beitt ofbeldi hafa forsvarsmenn og
þátttakendur iðulega verið hundeltir og stundum barðir og settir í fangelsi.“53
Þeim er gefið að sök að halda aftur af þróun samfélagsins og viðhalda fátækt og
menntunarskorti.
3. 2. Á Íslandi Hér á landi hefur einnig verið efnt til mótmæla. Þó hefur áhersla mótmælenda
verið með öðrum hætti vegna þess að enginn beinn skaði hefur orðið á lífshögum
fólks o.fl.. Það er þó ekki þar með sagt að mótmælin á Íslandi hafi verið lítilvæg
eða að þau skipti minna máli. Þvert á móti hefur fólk mikla sannfæringu gagnvart
og áhuga á málefninu sem gerir það mikilvægt. Mótmælin hafa komið fram í
skoðanaskiptum milli fólks, m.a. í fjölmiðlum, á veraldarvefnum og bókaskrifum
en einnig hafa mótmælin færst austur, bæði við Kárahnjúkana sjálfa og svo til
Reyðarfjarðar þar sem álverið stendur. Mótmælin hafa að mestu farið
friðsamlega fram en einhverjar stimpingar hafa þó orðið milli mótmælenda,
virkjunarsinna og lögreglu. Þar sem Kárahnjúkavirkjun hefur verið mikið hitamál
hafa deilurnar oft og tíðum verið miklar og grimm ummæli hafa fallið í hita
leiksins. En mótmæli og gagnrýnin umræða er afar mikilvæg og þess vegna er
vert að skoða og læra af þeirri sögu.
Ein af róttækustu hreyfingum, sem komið hafa saman til þess að mótmæla
Kárahnjúkavirkjun, er án efa Saving Iceland. Þau hafa verið iðin við að auglýsa
málstað sinn og grípa til róttækra aðgerða til að koma sínu fram. Það kemur fram
á heimasíðu þeirra:
Saving Iceland er alþjóðleg grasrótarhreyfing sem berst gegn
náttúruspjöllum á Íslandi bæði með hefðbundnum leiðum og
52 Shiv Visvanathan, „Environmental Values, Policy, and Conflict in India,“ grein á interneti, bls. 3−4. 53 Madhav Gadgil og Ramachandra Guha, „Ecological Conflicts and the Environmental Movement in India,“ Development and Change, Oxford 1994, bls. 113.
44
beinum aðgerðum. Munurinn á grasrótarhreyfingu og
samtökum er sá að samtök eru mun meira skipulögð. Þau kjósa
sér stjórn sem fer með ákveðið vald og tilteknir einstaklingar
eru talsmenn samtakanna út á við. Hreyfing hefur enga
félagaskrá og enga stjórn sem tekur ábyrgð á ákvörðunum eða
sker úr um ágreiningsmál. Innan hreyfingar geta starfað margir
litlir hópar sem hafa ekki endilega samráð sín á milli.54
Meðlimir hreyfingarinnar koma víðs vegar að úr heiminum en það eru ekki
einungis Íslendingar sem láta sér annt um málstaðinn og berjast fyrir honum.
Þeir segja: „Við erum hreyfing fólks af fjölmörgum þjóðernum sem ætlar ekki að
standa hjá og horfa á íslensku ríkisstjórnina eyðileggja íslenska náttúru í
samvinnu við erlend stórfyrirtæki. Íslenskir umhverfissinnar þurfa nauðsynlega
á utanaðkomandi hjálp að halda til þess að hrekja á brott þessa ógn.“55 Saving
Iceland er dæmi um hreyfingu þar sem hópur fólks lætur sig málefni náttúrunnar
varða og berst fyrir varðveislu hennar. Sumir hafa gagnrýnt hana og sagt að
innan hennar séu svokallaðir atvinnumótmælendur, sem hafa það fyrir
lífsviðurværi að mótmæla út um allan heim. Sumum finnst þeir ekki eiga erindi
til Íslands þar sem þeim koma málefnin beinlínis ekki við. Þarna koma upp
athyglisverðar spurningar sem snúa að þeim siðferðilegu spurningum hverjum
það komi við hvað sé gert við náttúruna. Eru það bara Austfirðingar sem málin
varða, bara Íslendingar eða kemur það öllum við?
54 http://www.savingiceland.org. 55 Sama síða.
45
Margir aðrir hafa einnig verið
áberandi í fjölmiðlum og stóðu ýmsir
hópar fyrir mótmælum þegar
ákvarðanir um framkvæmdirnar voru
teknar og þegar þær hófust. Ómar
Ragnarsson hefur t.d. verið harður
andstæðingur Kárahnjúkavirkjunar,
hann myndaði svæðið fyrir og eftir
fyllingu Hálslóns, hefur skrifað í blöð og gefið út bækur. Í bók hans Kárahnjúkar:
Með og á móti segir hann að „Kárahnjúkavirkjun [sé] mesta umhverfishneyksli
Evrópu á síðari tímum. Hún [eigi] eftir að skaða ímynd lands og þjóðar og valda
óbætanlegu tjóni á svæði sem gæti orðið stærsti, frægasti og sérstakasti
þjóðgarður Evrópu.“56 Mörgum hefur liðið eins og Ómari en fólk hefur mismikið
látið bera á þeirri skoðun. Ómar stóð fyrir mótmælagöngu í september árið 2006,
sem var kölluð Jökulsárgangan, þar sem mættu allt upp í 15.000 manns. Mikil
samstaða var meðal fólks þrátt fyrir að gangan hafi verið full seint á ferðinni því
byrjað var að fylla í Hálslón í lok september sama ár.
Andri Snær Magnason skrifaði einnig bók árið 2006, Draumalandið:
Sjálfshjálparbók handa hræddri þjóð sem var mjög umdeild en mikið lesin. Hann
gagnrýnir stóriðju-‐ og virkjanastefnu stjórnvalda og ákallar fólk um breytt
hugarfar í stað ofurtrúar á stórframkvæmdir á kostnað náttúru. Var bókin kölluð
áróðursrit af virkjunarsinnum og þótti sumum frjálslega farið með staðreyndir.
En ætli Andri Snær hafi ekki hitt á viðkvæma taug hjá mörgum sem voru á
öndverðu máli. Í eftirmála bókarinnar gagnrýnir hann þá umræðu sem átti sér
stað í landinu á þessum tíma:
Þegar ég kafaði í heimildir runnu á mig tvær grímur. Ég velti
fyrir mér hvernig fjölmiðlun væri eiginlega háttað í þessu landi.
Bjartsýnisfrétt á Íslandi um áhuga Rusal á uppbyggingu á
Norðurlandi og 2000 störf birtist á sama tíma og Moscow Times
fjallaði um málsókn gegn yfirmönnum fyrirtækisins sem voru
taldir hafa stundað hótanir, fjárkúganir og morð svo fátt eitt sér 56 Ómar Ragnarsson, Kárahnjúkar: Með og á móti, Reykjavík 2004, bls. 113.
Mynd 7. Mótmæli við Austurvöll í Reykjavík.
46
nefnt. Átti ég, íslenskufræðingur, ljóðskáld og barnabóka-‐
höfundur, að vera sá sem upplýsti fólk um fyrirbæri eins og Rio
Tinto, súrál og terawött? Áttu fréttirnar utan úr heimi ekkert
erindi til okkar? Var mönnum alveg sama hver „stoð
atvinnulífsins skyldi verða“? Var engin ástæða til að kynna
fyrirtæki sem átti að fá aðgang að auðlindum okkar og hagkerfi?
Var hægt að læra af reynslu annarra? Var hægt að sjá í gegnum
ákveðnar aðferðir? Fannst mönnum ekki rétt að spyrja þá
gagnrýninna spurninga sem stóðu í því að bjóða heim mönnum
með vafasamt orðspor? Átti öll upplýsing að fara fram gegnum
almannatengsl og auglýsingar? Almennt virðast fjölmiðlar ekki
hafa mannafla eða tíma til að leiða mál til lykta eða fylgja þeim
eftir.57
Það virðist sem umræðan hafi verið heldur einsleit og hugarfarið með. Þetta er
viðkvæmt málefni sem kemur mörgum lífum við og afkoma margra veltur á því;
þegar einhver bendir á gallana þá er við því að búast að einhver viðbrögð verði
við því.
Mótmæli eru því gríðarlega mikilvæg hvar sem er í heiminum og sú
gagnrýna umræða sem skapast í framhaldinu. Hvað sem fólk telur rétt eða rangt í
sambandi við stóriðnað og stíflur þá eru afleiðingarnar svo miklar að fólk þarf að
vera vel upplýst um báðar hliðar málsins. Ef ekki heyrist í fólki ef því finnst á sér
brotið, þá gerist ekkert og engin hugsanabreyting verður. Þess vegna er
virðingarverð sú vinna sem margir hafa lagt í að upplýsa og rísa upp til að
breyting verði á.
57 Andri Snær Magnason, Draumalandið: Sjálfshjálparbók handa hræddri þjóð, Reykjavík 2006, bls. 262.
47
III. Heilagleiki og fagurfræði náttúru
Við fyrsta andvarpið, þegar maðurinn tók eftir fegurð eða
undrun heimsins, átti fyrsta andlega reynslan sér stað.
Henryk Skolimowski
Í þessum hluta ritgerðarinnar ætla ég að fjalla um heilagleika og fagurfræði
náttúru. Ég ætla að skoða hvað heilagleiki er og hvernig hann skiptir fólki máli
bæði á Indlandi og á Íslandi. Einnig er áhugavert að skoða hvernig fagurfræði,
tilfinningar og reynsla í náttúru skapa hugmyndir okkar um umhverfið og sjá
hvernig þær hugmyndir hafa áhrif á ákvarðanatöku okkar um auðlindir og
vatnsstjórnun. Mikill mismunur er á sýn á náttúru og tilfinningu fyrir heilagleika
í henni á Indlandi og á Íslandi en menningar-‐ og samfélagslegur mismunur hefur
þar mikið að segja. Ég mun skoða þennan mismun og sjá hvort hægt sé að opna
fyrir umræðu um annars konar viðhorf á Íslandi en hefur viðgengist um árabil.
1. Heilagleiki á Indlandi Eru stórframkvæmdir átroðningur gagnvart heilagleika náttúrunnar, trú og
lífsýn fólks? Að fjalla um heilagleika á Indlandi er vandmeðfarið þar sem landið
er gríðarlega mannmargt, margar hefðir eru ríkjandi og því erfitt að alhæfa um
alla. Þó er hægt að tala um ákveðin atriði í sambandi við heilagleika sem tengjast
trúnni og þá sérstaklega hjá þeim sem búa í sveitunum og lifa á landsins gæðum.
Þar eru hefðirnar gamlar, rótgrónar og skipta miklu máli fyrir fólkið sem í hlut á.
Vatn á Indlandi er talið heilagt. Nafnið Indai, sem landið dregur nafn sitt
af, kemur af nafni trúarinnar Hindu sem ber nafn árinnar Sindhu. Allar ár eru
tilbeðnar og taldar vera uppspretta alls lífs. Þegar barn fæðist fær það dropa af
vatn úr á og þá verður framtíð þess björt. Þegar manneskja deyr er hún brennd
og askan eða líkamsleifar látnar renna niður á til að fara aftur til guðanna. Vatnið
felur í sér ákveðin tengingu við guðina og hefur mikinn tilgang í trúariðkun fólks.
Með mikilli röskun er því verið að traðka á heilagleika náttúrunnar í augum
þessa fólks.
Vandana Shiva fjallar um heilagleika vatns í bókinni Water Wars, en þar
lýsir hún heilagleika áa á Indlandi.
48
Á Indlandi, eru allar ár heilagar. Litið er á ár sem framlengingu
og að einhverju leyti staðfestingu á guðunum. Samkvæmt
Rigveda-‐sköpunarsögunni er möguleikinn á lífi á jörðinni
tengdur við losun himnesks vatns af Indra, guði regnsins.
Óvinur Indra, Vrtra, guð óreglu, hélt vatninu og safnaði því
saman til að koma í veg fyrir sköpunina. Þegar Indra náði að
sigra Vrtra, þá náði himneska vatnið að renna til jarðar, og lífið
byrjaði.58
Ár eru brýr hins guðlega yfir til okkar hér á jörðinni. Margar hátíðir eru haldnar
ánum og vatninu til dýrðar til þess að halda guðunum góðum, svo og til að fagna
lífinu. Margir Indverjar hafa mikil tilfinningaleg bönd til vatns og fljóta, hvort
sem það er af persónulegum ástæðum eða trúarlegum. Árnar eru notaðar til að
hreinsa andann og efnið en það er mikilvægur siður í hindúismanum. Bæði er
talið að þær hreinsi fólk en einnig að þær gefi til baka góða orku. Og þrátt fyrir
alþjóðavæðingu helst þessi hefð og er enn mjög sterk á Indlandi. Jörðin og árnar
hafa mikið tilfinningalegt gildi sem tekið er mark á meðal fólksins.
Madhav Gadgil og Ramachandra Guha tala einnig um þetta í bók sinni This
Fissured Land: An Ecological History of India. Þar útskýra þeir ástæðu þess að í
margar aldir hefur verið litið á sóun eða skemmdir á náttúrulegum auðlindum
sem alvarlegan hlut. „[T]rúarkerfi þeirra sem söfnuðu mat [...] [var þannig að
þeir] sáu anda sem þeir báru virðingu fyrir í trjám, lundum, tjörnum, ám og
fjallatoppum.“59 Þau mismunandi trúarbrögð, sem hafa verið höfð í heiðri eins og
hindúismi og búddismi, hafa gert það að verkum að litið er á það sem vanhelgun
að koma illa fram við náttúruna en það kemur sér alls ekki vel fyrir fólkið sjálft.
Tilfinningalegt og trúarlegt gildi gagnvart landinu og ánum var alls ekki virt sem
skyldi þegar Sardar Sarovar-‐stíflan var ráðgerð og byggð því að í augum þúsunda
manna er þetta lífið sjálft og með því að óhreinka eða breyta farvegi ánna er
troðið á því sem þessu fólki er heilagast.
58 Vandana Shiva, Water Wars, London 2002, bls. 131. 59 Madhav Gadgil og Ramachandra Guha, This Fissured Land: An Ecological History of India, New York 1992, bls. 82.
49
2. Heilagleiki á Íslandi Er til eitthvað sem heitir heilagleiki náttúru á Íslandi? Hvernig er hægt að fjalla
um heilagleika náttúru á Íslandi, þ.e. í augum fólks sem hér býr. Íslendingar hafa í
hundruð ára þurft að lifa með náttúrunni, oft og tíðum við erfiðar aðstæður bæði
vegna þess að veðurfar er afar sveiflukennt og víða um land hefur verið harðbýlt.
Hvernig er tenging okkar Íslendinga við náttúruna eftir öll þessi ár háttað?
Getum við sagst vera „náttúrubörn“ eða hefur aldrei verið mikið gert úr því hér á
landi? Ég myndi ætla að þegar fólk hefur þurft að byggja afkomu sína á náttúru
og óblíðu veðurfari hlýtur það að mynda einhvers konar tengsl við landið sjálft.
Kannski er það tregaþrungið samband, sambland ástar og haturs og þegar
möguleikinn er fyrir hendi að nýta það á sem bestan máta til þess að öðlast
þægilegra og auðveldara líf þá er gæsin gripin og tækifærið nýtt út í ystu æsar.
Margir hafa þó lýst annarri tilfinningu gagnvart landinu, sem kalla má
mun rómantískari og tilfinningalegri. Það er hin hliðin á peningnum ef svo mætti
segja, gagnstætt þeirri hugsun að landið sé aðeins til þess að nýta það, að
eitthvað meira búi að baki hugsunum okkar og sambandi við náttúruna, að við
getum upplifað eitthvað veigameira og djúpstæðara en peningalega afkomu.
Páll Skúlason fjallar um samband manns og náttúru í bókinni
Hugleiðingar við Öskju en þar talar hann um upplifun sína í Öskju. Hann segir:
Þegar ég kom til Öskju gekk ég inn í sjálfstæða veröld,
Öskjuheim, sem er ein skýrt afmörkuð heild sem spannar allt og
fyllir hugann svo að maður hefur á tilfinningunni að hafa numið
veruleikann allan í fortíð, nútíð og framtíð. Handan
sjóndeildarhringsins er hin ókunna eilífð, hið mikla, þögla tóm.
Þegar maður kynnist slíkri veröld er maður kominn á
leiðarenda. Kominn í snertingu við veruleikann sjálfan.
Hugurinn opnast fyrir fullkominni fegurð og maður sér loksins
um hvað lífið snýst.60
Þarna er mögnuð lýsing á reynslu í náttúrunni sem margir geta samsamað sig
við. Þeir sem hafa farið á staði, þar sem enginn annar maður er nálægt, eða
60 Páll Skúlason, Hugleiðingar við Öskju, Reykjavík 2004, bls. 6−7.
50
upplifað stórkostlega náttúru hafa margir sömu sögu að segja – að einhver
algjörlega óhversdagsleg reynsla eigi sér stað, að spurningar vakna um lífið og
tilveruna sem ekki er spurt í amstri dagsins; að skynja allt sem heild og velta því
síðan fyrir sér hvar maður er staddur í þessari heild og einhvers konar
„raunverulegum veruleika“. Erfitt er að útskýra þessa tilfinningu með orðum en
Páll gerir það vel þrátt fyrir að viðurkenna hversu erfitt það er.
Að koma til Öskju hefur því – í mínum huga – einfalda og skýra
þýðingu: Það að uppgötva jörðina og sjálfan sig sem jarðarbúa.
Að vera jarðarbúi er að finna líf sitt bundið jörðinni, ef ekki
beinlínis sprottið af henni, finna að hún er forsenda lífsins.61
Að finna fyrir smæð sinni og tengingu við bæði heiminn og jörðina er ekki
sjálfsögð upplifun og á sér einmitt stað við slíkar aðstæður. Reyndar má segja að
þær aðstæður, sem láta mann íhuga þessa hluti án þess að ætla það í rauninni,
geti verið á fleiri stöðum en í náttúrunni. Þessi tilfinning er ekki skipulögð, hún
bara kemur og setur mann í samband við raunveruleikann þegar aðstæðurnar
eru framandlegar eða öðruvísi en vanalega.
Í inngangi þessarar ritgerðar vitnaði ég í Helga Valtýsson og upplifun hans
uppi á hálendi austur á landi. Í bók hans, Á hreindýraslóðum: öræfatöfrar Íslands,
má finna lýsingar af ferðalögum hans og svipaða frásögn og hjá Páli um upplifun í
náttúru. Hann segir meðal annars:
Í öræfakyrrð skilst okkur fyrst til fullnustu, hvílík dásamlegt
undraævintýr jarðlíf vort er og guðsgjöf, sem vér skiljum
sjaldnast ella né metum að verðleikum. Hversdagslíf vort með
kaldlyndi og kæruleysi, dægurþrasi og blaðaskömmum,
flokksríg og nágrannakryt, úlfúð og rógi, sundurlyndi og
illyrðum, fjárgræðgi og frekju í framkomu allri og umgengni, −
allt verða þetta fjarlægir illviðrisbakkar og kólguský yst við
sjóndeildarhring sálu vorrar, og svalur blær öræfanæturinnar
sópar þeim á brott í skyndi. Og geimurinn fyllist hásöng lífsins
og ljóðaljóði í litum, hljómum og línum: Litirnir syngja, og
61 Páll Skúlason, Hugleiðingar við Öskju, Reykjavík 2004, bls. 21.
51
hljómarnir skipta litum. – Allt lífið syngur og endurómar í
voldugum regnhljóm öræfakyrrðarinnar. – Eilífðin verður eitt
augabragð. Augabragðið eilífð. −−−62
Helgi nær að lýsa tilfinningunni vel í frásögn sinni og maður getur ekki annað er
hrifist með. Hann skrifar þetta árið 1944 en þetta á fyllilega við í dag enda
tilfinningin óháð tíma. Hversdagslífið gefur okkur sjaldnast færi á upplifunum
sem þessum þar sem allt er sett í samhengi og hlutir, sem okkur virðast
mikilvægir, eru það ekki í „stóra“ samhenginu. Eftir nokkrar ferðir á fimm ára
tímabili kveður Helgi öræfin með trega: „Sennilega höfum við félagar kvatt
Kringilsárrana og Vestur-‐öræfi um hríð, og ég ef til vill fyrir fullt og allt. Vekur sú
tilhugsun einkennilega sáran söknuð og dulmagnaða þrá í brjóstum vorum.“63
Hann á erfitt með að fara til baka í hið hversdagslega líf en eftir slíka reynslu
verða sumir aldrei samir. Og hann heldur áfram:
Þeirri kvöldbláu hljómkviðu lita og lína gleymir ei sá, sem hana
hefir litið opnum augum líkama og sálar. Og órofa friður og
öræfakyrrð, öllum jarðneskum skilning og skynsemi æðri, seytla
og flæða inn yfir hrímgaðar hrjósturlendur huga vors og sálar
með guðfrjóvgað gróðurmagn og hlýjan laufblæ, sem vekur
undursamlegan söng brjóstsins blundandi strengja, svo að ljúfir
ómar fylla hug vorn og vitund alla, í vöku og draumi, í hverju
stormahléi hversdags-‐erilsins, um langan aldur.−−−64
Slík reynsla, sem ylur hjartarætur og sál, er allt annað en hversdagsleg og gefur
fyllingu í lífið sem er ómetanleg. Ég get ekki lýst tilfinningunni betur þannig að ég
hef látið Pál og Helga um það fyrir mig.
62 Helgi Valtýsson, Á hreindýraslóðum: öræfatöfrar Íslands, Akureyri 1945, bls. 57−59. 63 Sama rit, bls. 104−105. 64 Sama rit, bls. 105−107.
52
Helgi fer um Kringilsárrana en vert er að taka fram að hann liggur
meðfram því sem nú er Hálslón.
Kringilsárrani heitir innsti hluti
Brúaröræfa sem afmarkast af Brúarjökli,
Hálslóni og Kringilsá og myndar
þríhyrnda hásléttu í 625–700 m hæð yfir
sjávarmáli. Brúarjökull hefur mótað
Ranann og skilið eftir sig jökulgarða þvert
á skriðstefnu sína. Gróður er víða nokkuð
fjölbreyttur í Kringilsárrana en hefur
mótast af hlaupum og hopi Brúarjökuls.
Allvíða er votlendi og tjarnir sem koma
sér vel fyrir aukinn fjölda heiðagæsa í
Rananum síðustu áratugina. Árið 1939
fann Helgi um 100 hreindýr í Rananum og taldi að það væru einu eftirlifandi
dýrin í landinu. Síðustu áratugina hafa yfirleitt verið 200–300 hreindýr í
Rananum en flest um 600 árið 1981. Torsótt er í Ranann vegna Kringilsár eða
Sauðár og frá og með friðlýsingunni árið 1975 gilda m.a. eftirfarandi reglur:
Raninn er hreindýrafriðland og hreindýraveiðar bannaðar, umferð vélknúinna
farartækja um svæðið er óheimil nema með leyfi Umhverfisstofnunar og allt
jarðrask er bannað, svo og að skerða gróður eða trufla dýralíf.65
Það eru einnig margir sem lýsa sambandi sínu við náttúruna eins og
trúarlegu sambandi. Fólk getur upplifað trúarlega reynslu í náttúrunni sem
tengir það við lífið og Guð. Þá er það ekki endilega sá Guð sem við þekkjum úr
kristinni trú heldur einhvers konar kraftur sem fólk finnur fyrir og upplifir í
stokkum og steinum. Eflaust er hægt að tengja þessa trúarupplifun við þá
heildarhugmynd sem Páll talar um, þ.e. að maðurinn upplifi sig sem hluta af
heild. Og kannski líka sem allt og ekkert. Sú tvíhyggja sem við höfum oft og tíðum
milli náttúru og manna hverfur við slíkar reynslu og getur einfaldlega breytt sýn
manna á lífið. Þetta er reynsla sem enginn getur tekið af fólki og er alls ekki
metin til fjár.
65 http://www.vatnajokulsthjodgardur.is.
Mynd 8. Kringilsárrani.
53
María Ágústsdóttir fjallar um trúarlega reynslu í náttúrunni á þennan
hátt:
Maðurinn kann að afneita náttúrunni, meðvitað eða ómeðvitað, í
virðingarleysi og hroka. Óróleiki hjartans gerir vart við sig,
hvíldin fjarri. En sé hlúð að heildstæðri skynjun mannsins, er
honum þá mögulegt að skynja Guð í hinu ómennta lífi og landi,
að sjá Skaparann af sköpun hans? Því svarar Sören Kierkegaard
játandi í riti sínu Lilien paa Marken og Fuglen under Himlen.
Hann segir liljuna og fuglinn, sem fulltrúa náttúrunnar, vera
lærimóður og læriföður mannsins. Hið hljóða eða þögla líf þeirra
kenni manninum að lifa í kyrrð, og kyrrð lilju og fugls flytur
lofgjörð náttúrunnar til Guðs. Þannig skynjar maðurinn Guð í
sköpun hans, þegar næmleiki skynjunarinnar þenst út í kyrrð,
þeirri kyrrð sem náttúran kennir og miðlar.66
Þarna er gott dæmi þess hvernig maðurinn getur öðlast andlega reynslu í
gegnum náttúruna. Í gegnum kyrrðina í náttúrunni getur fólk fundið fyrir
skapara sínum og sú lotning, sem á sér stað, er virðing fyrir sköpunarverkinu í
heild sinni.
Þannig að þrátt fyrir mikla skynsemis-‐ og nýtnihugsun Íslendinga þá örlar
einnig á einhvers konar tilfinningu fyrir heilagleika í náttúrunni. Íslendingar eru
ekki aðeins með hugann við hvernig hægt sé að nýta landið til efnislegra gæða,
heldur hljóta einnig að vera fyrir hendi annars konar tilfinningar gagnvart því.
Sem dæmi um þetta er þegar náttúruhamfarir eiga sér stað; þá ber á ákveðinni
virðingu gagnvart náttúrunni og eru hamfarirnar áminning mannsins um smæð
hans. Einnig lýsir sér sú virðing, sem sumir bera fyrir náttúrunni, þannig að vegir
eða rafmagnslínur eru lagðar hreinlega í kringum svokallaða álfasteina sem ekki
þykir óhætt að færa.
66 María Ágústsdóttir, „„Hyggið að liljum vallarins...“ – af skynjun manns í sköpun Guðs,“ Náttúrusýn: Safn greina um siðfræði og náttúru, Reykjavík 1994, bls. 62.
54
3. Heilagleiki og fjölbreytileiki Þegar talað er um heilagleika á Íslandi og á Indlandi staldrar maður aðeins við.
Umhverfið er mjög ólíkt og trúarbrögðin einnig. Það er kannski þessi munur á
trúarbrögðum sem skilur mest að heilagleika landanna tveggja? Við höfum gamla
trú eins og ásatrú á Íslandi en eftir tilkomu kristinnar trúar virðist skilningur á
manni og náttúru hafa breyst. Ef litið er á þá tvíhyggju, sem hefur fylgt kristinni
trú með arfleið Platóns, er bersýnilega hægt að sjá mun á hugsunarhætti sem
fylgir trúnni gagnvart náttúrunni. Á hinn bóginn er mun meiri áhersla lögð á
samband manns og náttúru í hindúismanum sem gerir það að verkum að fólk
lítur á náttúruna sem mikilvægan þátt í trúariðkuninni. En þrátt fyrir þetta þá er
hægt að finna heilagleika í hugsun Íslendinga gagnvart náttúrunni, eins og kom
fram hér á undan, bara með öðrum hætti en á Indlandi.
Eins og ég útskýrði áður þá er heilagleiki gagnvart náttúru mikilvægur í
trúariðkun Indverja. Þetta á sérstaklega við gagnvart vatninu en einnig gagnvart
landinu sjálfu. Stundum er ekki vitað hvernig hefðir verða til, þær fylgja
manninum og móta hann og menningu hans á svo marga vegu. T.d. er það algengt
á Indlandi að fólk vill ekki drepa kóbraslöngur en fáir vita svo af hverju. Þá er
alltaf einhver ástæða, fólk bara gerir sér ekki grein fyrir því hver hún er, fyrir
djúpum menningar-‐ og trúarlegum hefðum. Þó er ákveðin þversögn í þessu því
að stundum er það skaðlegt að fylgja hefðunum en trúin fær samt að ráða í trássi
við skynsemina. Fólk heldur t.d. áfram að dýfa sér í ár og vötn þrátt fyrir mikla
mengun og sjúkdómahættu. Þetta er ekki óalgengt því einu gildir hvaðan fólk
kemur úr samfélaginu, hvort sem það er ríkt eða fátækt, menntað eða ómenntað,
af hárri stétt eða lágri, þá fylgir fólk hefðunum.67
Margbreytileiki trúar er mikill á Indlandi, því ekki er um eina kirkju
hindúa að ræða, ekki bara eina bók sem hindúar fara eftir o.s.frv. Vandana Shiva
lýsir fjölbreytileikanum þannig:
Sálrænt líf á Indlandi er eins fjölbreytilegt og fólkið: við höfum
isht-‐devata (persónulega guði) og gram-‐devata (þorpsguði).
Þrjú hundruð milljón guðdómlegar verur eru dýrkaðar, og þar
eru meðtaldar árnar okkar, fjöllin okkar, jörðin, dýrin og
67 N. Jagaram, fyrirlestur „Culture and Environment,“ Bangalore, 27. júlí 2007.
55
plöntur. Guðdómleiki er í öllu, í öllum mönnum, í öllum
lífsformum og er greinileg gjöf frá Indlandi til heimsins. Hann er
sameiningartákn þeirrar fjölbreytilegu menningar landsins sem
kallað er Indland.68
Þessi sterku einkenni trúar og samband hennar við náttúruna eru með öðrum
hætti en á Vesturlöndum. Ekki er hægt að segja að guðdómleiki sé áberandi í
vestrænni hugsun og gæti hann jafnvel flokkast sem andstæða skynsemis-‐ og
vísindahyggju.
Heilagleiki á Íslandi gagnvart náttúrunni kemur fram með öðrum hætti.
Ekki er gert jafn mikið úr trúnni hér og tenging náttúru og trúar er alls ekki
augljós. Við höfum rómantískar hugmyndir um náttúruna og finnum fyrir
heilagleika með öðrum hætti vegna þess að hefðir okkar Íslendinga eru gerólíkar
indverskum hefðum. Við höfum t.d. öðlast annað fegurðarskyn gagnvart
náttúrunni í gegnum listir og menningu frekar en trú. Með myndlist og ljóðlist
höfum við byrjað að meta náttúruna á annan hátt. Þorvarður Árnason talar um
þetta og segir:
Hérlendis virðist áhugaverð bylting á náttúrusýn þjóðarinnar
hafa átt sér stað um og eftir síðustu aldamót [1900]. Þessi
umbylting má að stórum hluta rekja til tilkomu íslenska
landslagsmálverksins. Þá fyrst virðist þjóðin fara að gefa fegurð
náttúrunnar verulegan gaum þegar hérlendir málarar taka að
festa ímynd hennar á striga.69
En er fegurðarskyn tengt heilagleika? Já, því að ef menn meta náttúruna og
umhverfið á annan hátt en einungis út frá notagildi þá geta þeir upplifað eitthvað
annað og meira innra með þeim en ella. Þetta er okkar heilagleiki nú á tímum,
sumir lýsa því sem sambandi við guð, aðrir sem hluta af einhverri heild og verður
hver og einn að túlka sína eigin reynslu og upplifanir í náttúrunni. Það er
fjölbreytileikinn á Íslandi.
68 Vandana Shiva, India Divided, New York 2005, bls. 156. 69 Þorvarður Árnason, „Náttúrufegurð,“ Náttúrusýn: Safn greina um siðfræði og náttúru, Reykjavík 1994, bls. 263−264.
56
Sigríður Þorgeirsdóttir fjallar um heildarhugsun í greininni „Heild sem
gerir mann heilan: Um siðfræði náttúrufegurðar“ en þar tekur hún fyrir bók Páls
Skúlasonar Hugleiðingar við Öskju. Tvær ástæður liggja að baki túlkun Sigríðar á
siðfræði náttúrufegurðar í Öskju Páls: „Í fyrsta lagi ætla ég að greina
grundvallarhugtök hennar um heild og tengsl í því skyni að setja hana í víðara
heimspekilegt samhengi [...] Hún felur að mínum dómi í sér vísi að gagnrýni á
þann einsleita mannskilning sem löngum hefur verið ráðandi í vestrænni
heimspeki.“70 Síðara markmið Sigríðar með grein sinni er pólitískara. Hún segir:
„Ég tel að náttúruskilningurinn sem hin frumspekilega reynsla af heild og
tengslum sem Páll lýsir sé hluti af, geti nýst til að komast út yfir þá þröngu
notagildishugsun sem hefur einkennt deilur um nýtingu náttúrunnar undanfarin
ár hér á landi.“71 Sigríður gagnrýnir þá einsleitu sígildu sýn heimspekinnar á
manninn að hann sé óháð og sjálfráða vitsmunavera. Hún notar aðallega nálgun
femínískrar heimspeki en hún felur í sér annan mannskilning, þ.e. að maðurinn
sé skilyrtur af samfélaginu og tengslum við aðrar manneskjur.
Sigríður bendir á að sú náttúrusýn sem birtist í Hugleiðingum við Öskju sé
andstæð þeirri veraldarsýn sem vísindin lýsa. Náttúrusýn Páls sé á vissan hátt
frumspekileg og „sé að því leyti í andstöðu við veraldarskilning nútímans sem er
að miklu leyti skilyrtur af heimsmynd vísindanna.“72 Vísindin leitast við að
smætta og sundurgreina og fela ekki í sér þessa heildarsýn sem Páll lýsir. Þessi
einsleita sýn vísindanna hefur t.d. í för með sér að mannlegar tilfinningar og
tengsl manna og náttúru eru hunsuð.
4. Fagurfræðilegt gildi náttúru Hver ákveður hvað er fallegt og hvað ekki? Ef fegurð er afstæð, þ.e. ef enginn
getur í rauninni sagt til um hvað er raunverulega fallegt, þá er vandkvæðum
bundið að tala um fegurðargildi hvort sem það er í náttúru eða almennt. En það
nægir í rauninni að náttúran hafi t.d. fagurfræðilegt gildi fyrir einstakling eða hóp
til að þau gildi standi, þrátt fyrir að einhver annar sé ekki sammála. Það má bera
70 Sigríður Þorgeirsdóttir, „Heild sem gerir mann heilan: Um siðfræði náttúrufegurðar,” Hugsað með Páli, Reykjavík 2005, bls. 163. 71 Sama grein, bls. 164. 72 Sama grein, bls. 166.
57
þetta saman við notagildi: hlutir hafa ekki alltaf sama notagildi fyrir fólk en við
getum þó viðurkennt tilvist þeirra gilda.
Þá er komið að annarri spurningu: Skiptir máli yfirleitt hvort eitthvað sé
fagurt eða ekki? Hvað gerir það fyrir okkur sem manneskjur eða samfélag að
huga að því fagra á jörðinni? Þetta tengist heilagleikanum sem ég fjallaði um í
síðasta kafla, hvernig reynsla og upplifun í náttúru fær okkur til að huga að
öðrum þáttum náttúrunnar en t.d. bara notagildi hennar. Reyndar er orðið
fallegur ekki rétt í þessu samhengi, því við getum upplifað eitthvað sterkt og
mikið og sagt það vera fallegt, sem fellur þó ekki undir þessa klassísku
skilgreiningu á fegurð. Mikilleiki og stórfengleiki eru orð sem geta flokkast undir
fagurfræðileg gildi.
Mikilvægt er að velta fyrir sér afstæði fegurðar náttúrunnar. Þetta er
túlkunaratriði sem fer eftir bakgrunni manna, lífsviðhorfi, reynslu o.s.frv.
Þorvarður Árnason talar um þetta í grein sinni „Náttúrufegurð“:
Við klæðum náttúruna [...] í búning okkar eigin hugmynda,
náttúran ber að hluta til „ásjónu“ þess sem á horfir. Þessar
hugmyndir eru breytilegar frá manni til manns en þær taka
jafnframt skýrum breytingum frá einum tíma til annars og
virðist ekki síður háðar menningarþróun en einstaklingsbundnu
mati. Þar með er ekki sagt að skynjun náttúrunnar og mat á
fegurð hennar séu fullkomlega afstæð fyrirbæri, eins og oft er
haldið fram, heldur aðeins að fyrirbæri af þessum toga kalli á
víðtæka og fordómalausa rannsókn á samspili náttúru,
mannshuga og menningar.73
Þarna kemur fram djúpstæð hugsun sem sýnir sig þegar virkjunarsinnar horfa
yfir Hálslón og róma fegurð þess á meðan náttúruverndarsinnar horfa með
döprum augum á lónið og dæsa. Fegurð í náttúrunni er þá skilyrt af skoðunum
okkar og hvernig við lítum á eða hugsum um náttúruna. En eins og Þorvarður
tekur fram þá er fegurðarsýn ekki endilega fullkomlega afstæð heldur mun
flóknari en það. Hann fjallar um mismunandi fegurðarmat og náttúrusýn
73 Þorvarður Árnason, „Náttúrufegurð,“ Náttúrusýn: Safn greina um siðfræði og náttúru, Reykjavík 1994, bls. 263.
58
Íslendinga í gegnum aldirnar og hvernig hún hafi frekar auðkennst af nytjahyggju
frekar en nokkru öðru. Það land er fallegt sem hægt er að nýta. Hann bendir á
breytingarnar, sem þó hafa orðið, „þar sem náttúrufegurð er metin „á eigin
forsendum“ fremur en í krónum, aurum, fiskum eða fallþunga.“74 Þannig er sýn
okkar að breytast þrátt fyrir að breytingarnar séu hægar.
Ef ég skoða aðeins betur það umfjöllunarefni, sem tekið er fyrir í þessari
ritgerð, Kárahnjúkavirkjun og Hálslón, þá er það mjög gott dæmi um þessa
mismunandi hugsunarhætti. Svo til engin umferð var um hálendið austan
Vatnajökuls og fáir ferðamenn áttu leið um svæðið. Margir Austfirðingar og aðrir
Íslendingar litu svo á að notagildi þessa svæðis væri algjört því að enginn hafði
neitt annað upp úr því. En eftir því sem fleiri sáu sér fært að fara upp á hálendið á
þessum slóðum og eftir því sem svæðið fékk meiri athygli þá tóku að heyrast
aðrar skoðanir frá fólki. Mörgum fannst svæðið stórfenglegt og fallegt og margir
hugsuðu til þess með hryllingi að sökkva því undir vatn. Þó breyttist sýn þeirra
sem mestan hug höfðu á að virkja ekki neitt og það var jafnvel talin hneisa að líta
á þetta land með fegurð í huga. Sumum fannst það meira að segja forljótt. Lónið
varð til og land fór undir vatn sem sumum þótti fallegt, öðrum ekki. Það er lítið
hægt að segja um fegurð þess núna nema kannski um ásýnd lónsins sjálfs en það
breytir ekki þeirri staðreynd að þeir sem litu á landið með fegurð í huga eru
sviptir þeim möguleika að njóta, upplifa og öðlast af því reynslu eftir eigin höfði.
5. Tilfinningar og reynsla í náttúrunni Tilfinningar og reynsla í náttúrunni skipta miklu máli í því samhengi sem ég hef
fjallað um í þessum hluta ritgerðarinnar. En er hægt að tengja tilfinningar og
reynslu við siðfræði? Róbert H. Haraldsson fjallar um siðfræði Kants í greininni
„Náttúrusýn, hluttekning og siðferði“. Kant er einn merkasti heimspekingur
sögunnar og eru áhrif hans mikil, sérstaklega innan siðfræðinnar. Hann leit á
manninn sem skynsemisveru og að siðferði ætti að snúast um þá sérstöðu.
Hegðun okkar gagnvart náttúrunni er háð því að maðurinn noti þessa skynsemi
og þá ætti að koma í ljós að það sé honum til hagsbóta að fara vel með náttúruna.
Kant gerir tilfinningum ekki hátt undir höfði enda eru þær – að hans mati – ekki 74 Þorvarður Árnason, „Náttúrufegurð,“ Náttúrusýn: Safn greina um siðfræði og náttúru, Reykjavík 1994, bls. 266.
59
jafn mikilvægar og skynsemin sjálf. Róbert útskýrir afstöðu Kants til tilfinninga í
siðfræði á þennan hátt:
Tilfinningasemi er eitt af því sem Kant vildi útrýma úr „ríki
hinna sjálfstæðu markmiða“ (þ.e. samfélagi skynsamra manna)
[...] En Kant var ekki eingöngu á móti tilfinningasemi heldur
hafði hann margvíslegar efasemdir um tilfinningar í siðferði.
Þótt hann legði áherslu á mótun tilfinninga í siðferðilegu
uppeldi þá taldi hann að ekki væri hægt að byggja siðferði á
tilfinningum, til þess dygði skynsemin ein.75
Hið skilyrðislausa skylduboð Kants hljómar svo: „Breyttu einungis eftir þeirri
lífsreglu sem þú getur á sama tíma viljað að verði að algildu lögmáli.“76 Kant vildi
byggja siðfræði upp á skynseminni og hann taldi að ekki væri hægt að finna þessi
algildu lögmál í gegnum tilfinningar því þær væru afstæðar og háðar
einstaklingum og aðstæðum. Róbert bendir réttilega á að hræðslan almennt við
tilfinningar innan siðferðis byggist á hræðslunni við afstæðishyggjuna. Hvernig
er hægt að taka mark á huglægum skoðunum einstaklinga með mismunandi
bakgrunn við mismunandi aðstæður?
Mörgum finnst afstæðishyggjan í sambandi við tilfinningar draga úr
trúverðugleika kenninga og þá sérstaklega siðfræðikenninga. En hvernig er hægt
að draga sig svo fullkomlega út úr aðstæðunum og sínum eigin líkama þannig að
allar kenningar verði einungis byggðar á óhlutdrægum skynsemisrökum? Allir
hafa sína afstöðu hvort sem þeim líkar betur eða verr og menn bregðast
misjafnlega vel við því. Eru þeir ekki alltaf háðir kyni, stöðu í samfélagi, reynslu
o.s.frv.? Auðvitað forðast menn gjarnan að láta allar skoðanir litast af eintómum
geðþóttaákvörðunum en að komast algjörlega hjá því hlýtur að vera erfitt.
Róbert bendir einnig á að tilfinningar geti búið yfir ákveðinni skynsemi,
að þær lúti ákveðinni rökfræði. Hann segir:
75 Róbert H. Haraldsson, „Náttúrusýn, hluttekning og siðferði,“ Náttúrusýn: Safn greina um siðferði og náttúru, Reykjavík 1994, bls. 77. 76 Immanuel Kant, Grundvöllur að frumspeki siðlegrar breytni, þýð. Guðmundur Heiðar Frímannsson, Reykjavík 2003, bls. 140.
60
Vissulega eru tilfinningar huglægar en þær eru ekki hráar
upplifanir, gersneyddar vitsmunabundnu innihaldi. Allir sem
ígrunda eðli tilfinninga sjá að þær búa yfir ákveðnu innihaldi og
lúta ákveðinni rökfræði. Þær eiga sér viðföng, tilefni og ástæður,
stefnu, markmið og hugmyndafræði. Í tilfinningum birtist oft
markviss herkænska („strategíur“) og þær tengjast löngunum,
dómum, hugmyndum og hvötum með býsna skynsamlegum
hætti. Sú staðhæfing að tilfinningar séu hráar upplifanir er því
fjarri sanni.77
Tilfinningar eru ekki bara eitthvað sem við skynjum beint í gegnum skynfæri
okkar, heldur eru þær mun flóknara fyrirbæri. Það ætti því að vera hægt að gera
ráð fyrir tilfinningum í siðfræði, þrátt fyrir að þær verði ekki „bjargfastur
grunnur“78 eins og Kant vildi finna. Tilfinningar ættu að geta legið til grundvallar
siðferði og vera mikilvægur þáttur í því samkvæmt Róberti.
Guðbjörg R. Jóhannesdóttir talar einnig um tilfinningar og reynslu í stuttri
grein sinni „Fagurfræðilegt gildi íslenskrar náttúru“. Þar talar hún, eins og nafnið
gefur til kynna, um fagurfræðileg gildi, hvernig þau tengjast tilfinningum,
landslagi og síðan hvernig megi nota þau við ákvarðanatöku um landnýtingu.
Guðbjörg segir:
Í almennri umræðu eru fagurfræðileg gildi, einmitt af því að þau
eru tengd við fegurð, talin samsvara persónulegum og
huglægum tilfinningum sem ekki er hægt að mæla og meta á
hlutlægan hátt og þess vegna talið erfitt og jafnvel ómögulegt að
taka þessi gildi inn í mat á náttúruverðmætum.79
Hún er ekki sammála þessari almennu umræðu og henni finnst að það þurfi að
taka tillit til fegurðargildisins (við ákvarðanatöku), því að til þess að taka
upplýsta ákvörðun þá þurfa allar staðreyndir að liggja fyrir. „Fáir myndu neita
77 Róbert H. Haraldsson, „Náttúrusýn, hluttekning og siðferði,“ Náttúrusýn: Safn greina um siðferði og náttúru, Reykjavík 1994, bls. 80−81. 78 Sama grein, bls. 82. 79 Guðbjörg R. Jóhannesdóttir, „Fagurfræðilegt gildi íslenskrar náttúru,“ grein á interneti, bls. 1.
61
því að það sé eitthvað til sem heitir fagurfræðileg reynsla í náttúrunni og að slík
reynsla sé mikils metin.“80
Í rannsókn sinni, sem greinin fjallar um, fjallar Guðbjörg einnig um
hugtakið landslag en það hefur verið þáttur í umhverfismati í Bandaríkjunum og
Evrópu síðustu áratugi. Íslendingar eru eftir á í þessari umræðu og það má sjá
t.d. í stjórnsýslu landsins þar sem reynst hefur erfitt að skilgreina og túlka
hugtakið. Landslag er náttúrulegt umhverfi sem er upplifað fagurfræðilega. Í
rannsóknum, sem Guðbjörg vísar til, eru hugtökin landslag og fegurð oft lögð að
jöfnu.81 Landslag er bæði hlutlægt og huglægt, ef svo mætti segja. Það er viðfang í
sjálfu sér (sjálft umhverfið og þar af leiðandi hlutbundið) en einnig er það hið
skynjaða sem gerir það huglægt. Guðbjörg bendir á tvenns konar vanda sem
þetta skapar. Annars vegar er of mikil áhersla lögð á hið hlutlæga sem gerir það
að verkum að ekki sé litið á landslag sem skynjað í víðum skilningi,heldur
einungis litið á hin sjónrænu áhrif. Ekki er tekið tillit til annarrar skynjunar eða
reynslu eins og hljóðs, lyktar o.s.frv. Á hinn bóginn fjalla náttúrufagurfræðingar
lítið um landslagshugtakið sjálft.
Guðbjörg vil koma umræðunni um náttúruvernd á annað stig. Hún vill
eyða þeirri tvíhyggju að fagurfræðilegt gildi sé einungis afstætt, huglægt og
persónulegt. Hún segir:
Til þess að skapa nýjan farveg þarf þess vegna að dýpka
umræðuna um fagurfræðileg gildi með því að skoða íslenska
náttúrufegurð og upplifun af henni með hliðsjón af þeim
fræðilegu kenningum sem hafa fengist við þetta viðfangsefni á
erlendum vettvangi í áratug.82
Fagurfræðileg gildi, upplifun og reynsla ættu að skipta máli þegar teknar eru
ákvarðanir um náttúruna. Gildi upplifana okkar mannanna í náttúrunni ætti að
meta til jafns við önnur gildi.
80 Guðbjörg R. Jóhannesdóttir, „Fagurfræðilegt gildi íslenskrar náttúru,“ grein á interneti, bls. 1. 81 Sama grein, bls. 2. 82 Sama grein, bls. 4.
62
IV. Vatn og viðhorf
Stríð þessarar aldar [20. aldar] hafa verið háð vegna olíu, en
stríð næstu aldar verða háð vegna vatns.
Ismail Serageldin
Í þessum síðasta hluta verður fjallað um vatn og viðhorf Íslendinga og Indverja til
þess. Ég mun byrja á að fjalla um viðhorf til náttúrunnar sjálfrar og tala um
muninn á mannhverfum og ómannhverfum viðhorfum. Ég ætla að benda á þá
tvíhyggju sem liggur í sýn okkar á umhverfi okkar og heiminn en ég hef þó nefnt
þessa tvíhyggju áður í þriðja hluta ritgerðarinnar. Hún er mikilvæg til þess að
skilja uppruna og ástæður fráhvarfs manna frá náttúru. Siðfræði náttúrunnar er
ný grein innan náttúru-‐ og umhverfissiðfræði og vil ég benda á hana sem nýtt
sjónarhorn í umræðunni með mikilvægi hennar í huga.
1. Viðhorf til náttúrunnar Mannhverf viðhorf til náttúru snúast um að maðurinn sé yfirburðavera og sé í
raun æðri náttúrunni, þ.e. mennirnir geti gert hvað sem þeir vilja við náttúruna
og auðlindir jarðar ef það hentar þeim. Bryan Norton útskýrir þetta í grein sinni
„Environmental Ethics and Weak Anthropocentrism.“ Sterkt mannhverft viðhorf
lýsir sér þannig að maðurinn hafi engar siðferðilegar skyldur gagnvart
náttúrunni heldur aðeins gagnvart öðrum mönnum sem einnig hafa
siðferðisvitund. Veikt mannhverft viðhorf er öllu opnara fyrir að líta á náttúruna
frá öðrum sjónarhóli eða eins og Norton orðar það: „[V]eikt mannhverft viðhorf
lætur í té grundvallargagnrýni á gildiskerfi sem aðeins nýtir náttúruna.“83 Ef
menn vanvirða náttúruna þá eru þeir að vanvirða þá sjálfa. Það er þeim í hag að
nota ekki náttúruna eins og þeim þóknast hverju sinni og mikilvægt er að lifa í
sátt og samlyndi við hana.
Ómannhverf viðhorf til náttúru lýsa sér í þeirri sýn á náttúruna að hún
hafi gildi í sjálfu sér, algjörlega óháð mannlegri reynslu eða upplifun. mennirnir
eru hluti af heildinni og þeim er skylt að horfa sömu siðferðilegu augum til 83 Bryan Norton, „Environmental Ethics and Weak Anthropocentrism,“ Environmental Ethics: An Anthology, Oxford: 2003, bls. 165.
63
náttúrunnar eins og annarra manna. Það er mjög erfitt að tala um að náttúran
hafi gildi í sjálfu sér, allavega án þess að viðhorf manna séu tekin með. Gildi er
eitthvað sem við ákveðum og öll hugmyndafræði okkar er skilyrt af okkur
sjálfum. Þær rökræður sem eiga sér stað um hvernig eigi að haga sér gagnvart
náttúru, sérstaklega ef siðferði er nefnt í sömu setningu, hljóta að snúa að okkur
sjálfum.
Ef við setjum þetta í samhengi við stíflurnar tvær, sem ég fjalla um í
ritgerðinni, þá er hægt að sjá alls konar viðhorf sem tengjast þeim. Í fyrsta lagi
það sterka mannhverfa viðhorf að við getum sökkt heilu svæðunum undir vatn
o.s.frv. og að við höfum engar skyldur gagnvart náttúrunni. Það eina sem kemur
mönnunum vel er það rétta. Þegar þeir þurfa á t.d. rafmagni að halda fyrir
einhvers konar iðnað þá skiptir engu máli hvert umrót náttúru er, þ.e. hverjar
afleiðingar gjörða mannanna hafa á náttúru og vistkerfi hennar. Hún hefur ekkert
gildi fyrir þá og þeir hafa ekki siðferðilega skyldu gagnvart henni. Hins vegar má
segja að víst hafi náttúran gildi og að mennirnir hafi engan rétt á að eyðileggja
eða raska ró hennar, bara af því þeir telji sig hafa þörf fyrir það. Millivegurinn
þarna á milli er eitthvað á þá leið að mennirnir hafi sama rétt og aðrar lífverur til
að nýta auðlindir jarðar en þó þurfi þeir að huga vandlega að afleiðingunum
gjörða sinna. Við ættum að geta nýtt náttúruna okkur til hagsbóta með þeim
varnöglum að bera virðingu fyrir öðru lífi og fara vel með umhverfið.
Gallinn við kenningar í siðfræði, sem lúta að náttúru og umhverfi, er að
við eigum svo erfitt með að ákvarða gildi náttúru. Þau eru einnig mjög misjöfn
eftir landsvæðum og trúarbrögðum. Ef fólk trúir t.d. á endurholdgun þá er horft
öðruvísi á aðrar lífverur en í kristinni hefð. Augljóslega er borin mismikil virðing
fyrir náttúrunni og þá hljóta gildin að breytast samkvæmt því. Einnig skiptir máli
hvaða hagsmunir liggja að baki og hverra því eins og komið hefur fram í
ritgerðinni getur verið mjög óljóst hverjir hagsmunirnir eru.
Ef við reynum um of að skilgreina siðfræðina eftir þessum línum þá
lendum við í vandræðum. Öfgafullar skoðanir í báðar áttir virka ekki því sama er
hvernig við lítum á málið þá erum við hluti af náttúrunni og ef við hugsum okkur
að við getum gert hvað sem við viljum þá hlýtur það að koma niður á okkur
sjálfum. Ef við einblínum um of á eigingildi náttúrunnar þá missir umræðan um
64
leið marks vegna þess að hugtakið sjálft er háð því að við búum það til og réttur
okkar verður enginn.
2. Tvíhyggja og vald Tvíhyggja manns og náttúru á sér langa sögu, allt frá hugmyndum Platons um
frummyndir og tveggja heima kenningu allt til Descartes og hugmynda hans um
tvíhyggju sálar og líkama, fram til dagsins í dag. Platon taldi að ekki væri hægt að
treysta hinum skynjanlega heimi, heldur þyrfti að fara í heim frummynda til þess
að fá raunverulega þekkingu. Á þessari tvíhyggju hefur heimspekin byggt upp sitt
kerfi og þess vegna hafa skynjanir og náttúra ekki verið metnar sem skyldi hjá
heimspekingum fortíðar sem og nútíðar. Erfitt er að taka eitthvað gott og gilt
byggt á skynjunum því að þær eru óútreiknanlegar og hverfular. Þá er gott að
hafa þennan ,,raunverulega” heim (annan en okkar) þar sem allt er stöðugt og
áreiðanlegt vegna þess að þá er mun auðveldara að komast að niðurstöðu og
finna raunverulega þekkingu. Það mætti segja að kristin hefð taki þessa hugmynd
upp þegar litið er á samskipti manna við náttúruna. Í fyrsta lagi er maðurinn
talinn æðri náttúru og hefur umboð frá Guði til þess að fara með hana að vild. Í
öðru lagi erum við annars vegar með raunheim sem við lifum í sem er fullur af
breysku fólki, synd og volæði og hins vegar með himnaríki sem er
eftirsóknarvert og gott. Hjá Descartes byggðist allt á hugsuninni, þar var
byrjunarreiturinn að hans mati, í huganum. Þannig var áreiðanleg þekking
bundin við vitsmuni okkar en alls ekki skynjun, náttúru eða reynslu. Þar sem
skynjunin er óáreiðanleg, þ.e.a.s. við getum orðið fyrir ofskynjun eða ekki vitað
hverju við eigum að treysta, þá er miklu betra að hans mati að treysta á hinn
vitræna þátt eins og hin fræga setning segir: ,,Ég hugsa, þess vegna er ég”.
Þessi tvíhyggja hefur á ákveðinn hátt gert manninn fjarlægan náttúrunni,
þ.e. slitið hugmyndafræðileg tengsl hans við umhverfi sitt í heimspekihefðinni.
Þetta hefur í för með sér ákveðinn valdastrúktúr sem hefur viðgengist og gerir
enn í samskiptum okkar við náttúruna. Mennirnir fara með valdið og gera það án
umboðs frá neinum (nema kannski Guði). Þessi hugsun kemur sérstaklega fram í
vestrænni heimspekihefð en þessi fjarlægð virðist hafa skapað ójafnvægi milli
náttúru og manna. Þetta ójafnvægi smitar út frá sér og bitnar sérstaklega illa á
65
þeim sem minna mega sín. Allir kynþættir, sem eiga á brattann að sækja, verða
einnig fyrir barðinu á þessu ójafnvægi og minnihlutahópar almennt. Ég hef bent á
það fyrr í þessari ritgerð hvernig fátækir menn á Indlandi koma illa út úr þessu
og fólk sem hefur litla sem enga rödd.
3. Siðfræði vatns Einn angi siðfræði er að ryðja sér til rúms innan náttúrusiðfræðinnar og það er
siðfræði vatns. Tilgangurinn með slíkum fræðum er að finna siðfræðilíkan sem
leggur vatn til grundvallar og að finna gildi þess vegna þess hve mikils virði vatn
er fyrir lifandi verur. Það virðist ekki hafa verið gætt nægilega að þessum
siðfræðilegu viðhorfum í gegnum tíðina. Sandra Postel lýsir tilgangi
vatnssiðfræði í grein sinni „The Missing Piece: A Water Ethic“:
Upptaka [...] vatnssiðfræði myndi tákna sögulegan viðsnúning
frá strangri nytjahyggju til vatnsstjórnunar og að samþættri
nálgun sem sýnir fólk og vatn sem tengda hluta í stærri heild. Í
staðinn fyrir að spyrja hvernig við getum enn frekar stjórnað og
ráðskast með ár, vötn og strauma til þess að koma til móts við
sívaxandi kröfur okkar, ættum við að spyrja hvernig við getum
mætt mannlegum þörfum um leið og við mætum vistfræðilegum
þörfum ferskvatnskerfa. Þetta mun líka leiða okkur að dýpri
spurningum um mannleg gildi [...]84
Vegna þess að vatnið er slíkt grundvallarefni fyrir allt líf á jörðinni þá þarf að
byggja upp gott siðfræðikerfi fyrir það og fyrir náttúruna. Hafa ár, vötn og
streymi einhvers konar rétt? Það þarf að komast til botns í þessum málum til
þess að vatnsstjórnun verði sem sanngjörnust og þannig að bæði menn og
náttúra hafi hag af.
Í vatnssiðfræði er spurt spurninga eins og hvernig við eigum að stjórna
vatni og þeim straumi sem það fylgir. Hvernig eigum við að geyma það og
hvernig er hægt að haga málum þannig að sem flestir fái að njóta vatnsins? Þetta
84 Sandra Postel, „The Missing Piece: A Water Ethic,“ Water Ethics: Foundational Reading for Students and Professionals, Washington 2010, bls. 222.
66
á ekki bara við um vatnið sjálft heldur á það einnig við um jarðveginn, landið,
lífverurnar, fólkið og vistkerfið sem byggist upp á vatninu.
Í inngangi Water Ethics: Foundational Readings for Students and
Professionals talar ritstjóri bókarinnar, Jeremy J. Schmidt, um að á síðustu
áratugum hafa verið gerðar tilraunir til þess að setja siðareglur fyrir
vatnsstjórnun og vatnsnotkun. Árið 1997 gerði UNESCO (Menningarmálastofnun
Sameinuðu þjóðanna) rannsókn á notkun ferskvatns. Skýrslan var unnin með
þrjú markmið í huga: „(1) [S]ameiginlegur tilgangur og samhljómur með náttúru,
(2) jafnvægi milli hefðbundinnar mannlegra gilda og tæknilegrar nýbreytni [og]
(3) jafnvægi milli „heilagleika og nýtni vatns, milli skynsemi og tilfinninga.““85
Árið 2004 komu síðan út enn fleiri greinargerðir á vegum UNESCO um vatn og
siðfræði. Helstu vandamálin sem komu fram í þessum greinargerðum var í fyrsta
lagi að ákvarða siðferðilegan mælikvarða, hvernig á að ákveða hvað sé rétt og
rangt í sambandi við vatnsnotkun, og í öðru lagi ákveðin afstæðishyggja, þ.e. að
það þurfi að virða mismunandi skoðanir, menningu og gildi. 86
Vegna aukinnar meðvitundar um siðfræði vatns í alþjóðasamfélaginu
hefur fólk reynt að finna henni stað í umræðunni. Schmidt talar um að til séu
tvenns konar nálganir á siðfræði vatns. Annars vegar að hún skipi sess á
svipuðum stað og almenn náttúrusiðfræði og hins vegar að hún eigi að fá
sérstakan sess út að fyrir sig vegna sérstöðu sinnar í sambandi við notkun,
heilagleika, hefðir o.s.frv. Það hefur ekki almennilega náðst samkomulag um
hvora leiðina skuli fara og líklega mun það halda áfram að vera til umræðu.
Schmidt segir: „Sama hvort við hugsum um siðfræði vatns sem sérstakt
áhyggjuefni eða sem hluta af almennum rökræðum þá hafa ákvarðanir um
vatnsnotkun okkar raunverulegar afleiðingar fyrir bæði menn og lífríki.“87 Hann
lítur svo á að þrátt fyrir að ekki náist samkomulag um siðfræði vatns sem slíks þá
verði umræðan að halda áfram vegna mikilvægis vatnsins.
Við getum byrjað að ræða siðfræði vatns með því að velta fyrir okkur gildi
þess. Hvert er gildi þess fyrir okkur, tilfinningalega, fjárhagslega og líffræðilega?
Við getum verið án margs annars í náttúrunni og lifað við ótrúlegustu aðstæður
85 Jeremy J. Schmidt, „Water Ethics and Water Management,“ Water Ethics: Foundational Reading for Students and Professionals, Washington 2010, bls. 5. 86 Sama grein, bls. 5. 87 Sama grein, bls. 6.
67
en okkur er lífsins ómögulegt að lifa án vatnsins og við virðumst gleyma því oft
og tíðum þegar við höfum nóg af því. Vandamálið er ekki að við gefum vatninu
ekki gildi heldur hvernig það rekst á við aðra hagsmuni. Þarna má nefna
hagsmunaárekstra milli manna, einstaklinga, fyrirtækja, samfélaga,
menningarsamfélaga og lífríkja. Hvernig á að meta hvað er mikilvægast? Hvers
hagsmunir eru „merkilegastir“?
Samkvæmt þeim sem pæla í vatnssiðfræði er ekki nóg að taka saman
vísindalega og tæknilega þekkingu þegar kemur að vatnsstjórnun. Allt of algengt
er að fleiri þættir séu hunsaðir og virtir að vettugi. Vegna flókinna kerfa, sem
vatnið kemur úr, og áhrifanna, sem það hefur á hringrás lífsins, þá virðist oft
vanta heilsteypta mynd ef t.d. raska þarf farvegi áa. Peter G. Brown og Jeremy J.
Schmidt benda á í grein sinni „An Ethic of Compassionate Retreat“ að oft vanti
annars konar viðhorf en þekkingarfræðilegt, t.d. viðhorf sem tekur tillit til
fagurfræði og sanngirni eða sem eru líkari siðfræðilegum gildum frekar en aðeins
vísindalegum. Víkka þarf út hugsun okkar um vatnsstjórnun og hvernig hún er
framkvæmd. Öll þekking er mikilvæg, hvernig sem hún birtist. Brown og Schmidt
tiltaka þrjá þætti sem verður að hafa í huga þegar litið er á vatnsstjórnun með
siðfræði að leiðarljósi:
(1) Innan nútíma stjórnunarfræða ríkir enn nokkur óvissa sem
endurspeglar mjög lítinn skilning á flóknu félagslegu og
líffræðilegu kerfi. Í raun, með okkar takmarkaða skilning í
sumum tilfellum, geti verið skynsamlegt að viðurkenna fávisku
okkar. (2) Endurskoðað viðhorf – en alls ekki nýtt – á sambandi
manna og alls lífs og heims. [...] (3) Hvernig endurskoðað
viðhorf geti hjálpað þeim sem stjórna vatni til þess að byrja að
hugsa um siðferðilegar gjörðir á erfiðleikatímum og hvernig eigi
að hverfa frá stjórnun sem einblínir aðallega á vísindalega og
tæknilega þekkingu gagnvart því sem við köllum „samúðarfullt
undanhald“. 88
88 Brown og Schmidt, „An Ethic of Compassionate Retreat,“ Water Ethics: Foundational Reading for Students and Professionals, Washington 2010, bls. 266−267.
68
Það sem höfundarnir eiga við með samúðarfullu undanhaldi (e. compassionate
retreat) er að við vatnsstjórnun ættu fleiri þættir að vera teknir til greina svo
heildarmyndin verði betri. Þegar við áttum okkur á að við erum hluti af mjög
flóknu vistfræðilegu kerfi og að okkar hagsmunir eru samtvinnaðir öllu kerfinu
þá hljótum við að geta notað siðfræðina til gagns frekar en bara sem gagnslausar
viðmiðunarreglur. Þeir Brown og Schmidt benda einnig á að vegna takmarkaðrar
þekkingar okkar á raunverulegum orsökum og afleiðingum athafna okkar í
vatnsstjórnun ættum við að stíga varlega til jarðar. Við eigum að nota þekkingu
okkar í vísindum og tækni til þess að ná fram skynsamlegri og hóflegri stefnu.
Þeir segja einnig: „Með samúðarfullu undanhaldi væri ekki litið á náttúruleg kerfi
vélrænt þar sem afleiðingar afskipta eru nú alltaf taldar vera afturkræfar eða
auðveldlega „læknanlegar“.“ 89 Náttúruleg kerfi eiga að fá að njóta vafans,
sérstaklega þar sem þau eru flókin og oft ófyrirsjáanleg og við vitum ekki alltaf
afleiðingar gjörða okkar fyrr en það er um seinan. Við eigum að nota þekkinguna,
sem við höfum, til þess að komast að heildrænni niðurstöðu en einnig
viðurkenna takmarkanir okkar. Við sjáum að stjórnun vatns hefur brugðist víðs
vegar um heiminn og það þarf að horfa á á málið frá nýju sjónarhorni til þess að
hægt sé að gera betur í framtíðinni. Þarna koma inn þættir eins og annars konar
gildi, mismunandi menningarsýn, trúarbrögð og heilagleiki.
4. „Blátt gull“ Hver á þetta dýrmæta vatn sem safnað er saman? Miklar umræður hafa verið um
einkarétt á vatni, hver á vatnið í ánum, í loftinu, ofan í jörðinni o.s.frv. Þessi
umræða á vel við í þessari ritgerð þar sem vatn er talið sérstaklega verðmætt á
Indlandi, bæði peningalega séð en einnig tilfinningalega. Hverra er að ákveða
hvernig farið er með þetta vatn sem rennur um landið? Er um að ræða hálfgerða
einkavæðingu vatns sem á sér stað við stórframkvæmdir? Þegar fámennur hópur
ákveður fyrir mikinn fjölda fólks hvað sé best að gera við þessa lífæð fólks getur
maður ekki annað en efast um að réttlæti ríki. Í raun ætti aðgangur að vatni að
vera venjuleg og augljós mannréttindi, eitthvað sem allir ættu rétt á án þess að
borga fyrir það eða vera sviptir því án þess að vera spurðir. 89 Brown og Schmidt, „An Ethic of Compassionate Retreat,“ Water Ethics: Foundational Reading for Students and Professionals, Washington 2010, bls. 277.
69
Ólafur Páll Jónsson fjallar um eignarétt á vatni á Íslandi í bók sinni
Náttúra, vald og verðmæti og hann segir:
Eignaréttur varðar heild þeirra réttinda og skyldna sem
einstaklingar tiltekins samfélags hafa og siðferðilega stöðu
einstaklinga innan samfélags. Vatn er þess eðlis að enginn kemst
af án þess og með því að gera vatn að einkaeign er sá sem þarf á
vatni að halda gerður háður þeim sem vatnið á. Hér höfum við
skýrt dæmi um að siðferðileg staða einstaklinga breytist -‐ sá
sem á vatn og hinn sem á ekki vatn eru ekki lengur jafningjar.
Það má vissulega setja lög að enginn megi meina öðrum að ná
sér í vatn, en það breytir því ekki að tilvera eins er háð eign
annars; einn er gefandi og annar þiggjandi.90
Þannig að þrátt fyrir að réttur manna til aðgangs að vatni sé ekki skertur þá er
alltaf vandkvæðum bundið siðferðilega séð hvort rétt sé að einhver eigi það. Sá
sem er þiggjandinn er alltaf í þeirri stöðu að vera undir hælnum á þeim sem
heldur eignaréttinum. Þetta er ekki öfundsverð staða fyrir þiggjandann og ætti
ekki að þykja eðlileg.
Vegna þess að vatn er orðið svona mikilvægt91 og mikil söluvara út um
allan heim skapar það hálfgert stríðsástand milli hópa fólks, landsvæða og þjóða.
Þetta á ekki bara við um þriðja heims ríki, heldur stendur baráttan líka á
Vesturlöndum. Milljónir manna berjast fyrir því að hafa aðgang að vatni til þess
að komast af og á hinn bóginn eru alþjóðleg fyrirtæki á borð við Suez Lyonnaise
des Eaux, Vivendi Environment og Bechtel að hrifsa til sín markaðinn í
hagnaðarskyni. Þessi fyrirtæki fá hjálp frá stjórnvöldum hvaðanæva úr
heiminum sem og frá Alþjóðabankanum og fleiri alþjóðlegum stofnunum. 92
Vandana Shiva hefur verið öflug í starfi sínu sem umhverfisverndarsinni og hefur
lagt sérstaka áherslu á að benda á þau mannréttindabrot sem fylgja nýtingu
auðlinda í þágu stórfyrirtækja og alþjóðastofnana. Hún hefur sagt að það að
ráðskast með vatnið og náttúruauðlindir sé beinlínis hryðjuverk og ætti ekki að
90 Ólafur Páll Jónsson, Náttúra, vald og verðmæti, Reykjavík 2007, bls. 115. 91 Vatn hefur augljóslega alltaf verið mikilvægt, en í kjölfar fólksfjölgunar, iðnvæðingar og frjálshyggju hefur baráttan um það aukist til muna. 92 Vandana Shiva, Water Wars: Privatization, Pollution, and Profit, London 2002, bls. xii.
70
taka léttúðlega. Hún segir: „Eyðilegging vatnsauðlinda og skóglenda [...] er
ákveðin tegund hryðjuverks. Að neita fátæku fólki um aðgang að vatni með því
að einkavæða úthlutun vatns eða með því að menga brunna og ár er líka
hryðjuverk.“93 Græðgin er þannig allsráðandi og er einmitt rót þeirra deilna sem
skapast hafa í kringum auðlindirnar. Þetta óréttlæti er látið viðgangast vegna
þess að þannig er hugsunarhátturinn og reglurnar sem við setjum okkur. Okkur
ætti þó að bera siðferðileg skylda til þess að breyta þessari stefnu og koma því
þannig fyrir að allir ættu möguleika á hreinu vatni, sama hvar í heiminum menn
eru, hverrar þjóðar eða hverrar trúar.
Það sama á við þegar stórar stíflur eru byggðar með þeim afleiðingum að
ár hverfa og eitt stórt lón verður til. Við þær aðstæður er vatnssöfnunin svo mikil
að eðlilegt rennsli gjörsamlega hverfur. Rennslinu er stjórnað af þeim sem „vita
betur“ með hvaða hætti það á að vera og til þess að fullkomin nýting verði á
vatninu. Þau orð hafa oft hljómað hjá virkjunarsinnum að það vatn, sem látið er
renna ósnert til sjávar, sé ónýtt vatn. Þetta er furðuleg fullyrðing, en þó er hún
frekar augljós og sönn. Vatnið, sem er leyft að renna til sjávar, er ekki endilega
nýtt af mönnunum og hverjum einasta dropa er ekki stjórnað. En ekki er þar með
sagt að það þurfi að vera slæmt, því rennsli vatns í ám er grunnforsenda fyrir því
að líf þrífist. Stórar stíflur breyta umhverfinu á svo stórum mælikvarða að ekki er
hjá því komist að afleiðingarnar verði miklar. Þannig að pælingar um nýtingu
vatns í þágu manna er öfugsnúin því hún getur auðveldlega snúist upp í
andstæðu sína, þ.e. þegar vatnið fer að þjóna fáum í stað þess að sem flestir njóti
þess.
Hver einasta á er sérstök hvað varðar flæði og landslag er mismunandi
eftir löndum. Einnig er notkunin á vatninu, sem rennur, mismunandi eftir því
hver þörfin er. Á Austurlandi er staðan önnur en í Narmadadalnum en þá
aðallega vegna þess fólks sem býr með fram ánum og á lífsviðurværi sitt undir
rennslinu. Þó eru greinileg áhrif á streymi vegna Kárahnjúkavirkjunar en það
lýsir sér í því að Jökulsá í Fljótsdal og Jökulsá á Dal eru virkjaðar báðar í einu og
vatnið er síðan flutt yfir til Fljótsdals og þaðan yfir í Lagarfljót.94 Hækkun á
yfirborði fljótsins er því óumflýjanleg en ráðstafanir hafa þó verið gerðar til þess
93 Vandana Shiva, Water Wars: Privatization, Pollution, and Profit, London 2002, bls. xiv. 94 http://www.landsvirkjun.is.
71
að skaðinn verið sem minnstur. Allt vistkerfið er þó viðkvæmt þar sem farvegum
áa er breytt með þessum hætti því allt plöntu-‐ og dýralíf byggist svo mikið á
þeim. Langtímaumhverfisáhrif eru því ófyrirsjáanleg og það verður bara að bíða
og sjá hvað tíminn leiðir í ljós hvað þau varðar.
5. Viðhorf Indverja til vatns Heilagleiki vatns er mikill á Indlandi. Vatnið táknar lífið og samkvæmt trúnni á að
koma fram við það af virðingu og lotningu. Þetta viðhorf kemur ekki á óvart þar
sem án vatns er ekkert líf. Það liggur í augum uppi að það sem heldur fólki á lífi
sé hafið upp og reynt að tengja við guðina. Slíkt viðhorf erfist kynslóð fram af
kynslóð og eru enn þann dag í dag haldnar miklar hátíðir og göngur til þess að
halda upp á heilagleika vatnsins og eru tileinkaðar guðunum. Engin efnahagsleg
ástæða liggur að baki þessum hátíðum og tilgangurinn er ekki að hagnast á þeim
heldur að sjá annað gildi vatnsins.
Vatnið er dýrmætt og það er látið fara sem minnst til spillis. Öll
vatnsnotkun er úthugsuð í daglegu lífi, hvort sem það er til drykkjar, þvotta eða
almennrar heimilisnotkunar. Í borgunum er vatnssalerni með öðru sniði en á
Vesturlöndunum, þannig að miklu minna vatn er notað, fólk þrífur sig með því
safna vatni í bala og þetta venjulega rennsli, sem Vesturlandabúar eru vanir, er
ekki til staðar. Vatn úr flöskum er dýr munaðarvara sem langfæstir Indverjar
leyfa sér að njóta og þá er annað hvort drukkið vatn úr krananum, sem getur
verið mjög ólystugt og jafnvel mengað, eða úr lækjum og ám. Þá grípa sumir sem
efni hafa til þess ráðs að kaupa tæki sem síar vatnið og hreinsar það. Kalt vatn er
einnig ekki eitthvað sem allir þekkja á Indlandi og alls ekki á færi þeirra fátæku
að eiga. Í sveitunum er aðalatriðið að hafa vatn eða á í nálægð við þorpið til þess
að hægt sé að lifa eðlilegu lífi. Allur þvottur fer þar fram og vatnsöflun til
matargerðar. Það er algjört grundvallaratriði til þess að líf og menning nái að
blómstra.
Í ritgerð, sem margir indverskir höfundar hjálpuðust að við að skrifa
„Water Privatization and Implications in India,“ kemur eftirfarandi fram:
72
Sameinuðu þjóðirnar hafa viðurkennt að aðgangur að vatni sé
grundvallarmannréttindi, og þær halda því fram að vatn sér
félagsleg og menningaleg verðmæti, ekki bara efnahagsleg
verslunarvara. Allt frá fornu fari hefur vatn á heimsvísu verið
viðurkennt sem ómetanleg auðlind. Vatni hefur verið safnað
saman á Indlandi allt frá upphafi siðmenningar. Ramayana,
Mahabharata og ýmis önnur Vedarit, auk rita búddista og jain-‐
trúarmanna innihalda nokkra kafla um vatnssöfnun sem
stendur fyrir tilvist lífs og vatn er heiðrað sem lífgjafi og
viðvarandi afl.95
Ramayana og Mahabharata eru tvær stærstu fornsögur Indverja en þær
innihalda t.d. lýsingar á því hvernig skal haga sér. Vedaritin eru einn elsti
hindúatexti sem til er og eru fyrrnefndar sögur hluti af honum. Af því má ráða að
meðhöndlun vatns hafi lengi verið talin mikilvæg enda hafa Indverjar þurft í
langan tíma að laga sig að aðstæðum til þess að lifa af. Búddatrúin og jainatrú,
sem er gömul trú á Indlandi, byggist á því að gera engum öðrum mein, dýrum,
pöntum eða mönnum. Þær eru báðar þess eðlis að virðing fyrir vatninu er mikil
vegna þess hve mikilvægt það er fyrir forsendu lífsins. Lífið er heilagt og allir
hlutar þess einnig. Þess vegna eiga Indverjar erfitt með að kyngja því að
stórfyrirtæki, Alþjóðabankinn og Alþjóðagjaldeyrissjóðurinn skapi þær aðstæður
að vatn er tekið úr náttúrulegum farvegi sínum þar sem allir hafa sameiginlegan
aðgang að því og í staðinn hafa einungis þeir sem hafa mikið af peningum milli
handanna efni á því. Það er djúpur hugmyndafræðilegur ágreiningur milli
almennings og þeirra sem ráða ferðinni. Saga, trú og menning eru ekki virt sem
skyldi miðað við mikilvægi þessara þátta í daglegu lífi Indverja.
Heilög vötn bera okkur handan fjármálamarkaða inn í heim
hlaðinn goðsögnum og sögum, trú og bænum, menningu og
hátíðarhalda. Þetta eru heimar sem hjálpa okkur að varðveita og
deila vatni, og að breyta vöntun í gnægð. Við erum öll börn
Sagars, þyrst í vatn sem frelsar okkur og gefur okkur líf –
95 Anitha Sampath og Balakrishnan Kedarnath og fleiri höfundar. „Water Privatization and
Implications in India,“ grein á interneti, bls. 1.
73
líffræðilega og andlega. Baráttan um Kumbh, milli guða og djöfla,
milli þeirra sem vernda og milli þeirra sem eyðileggja, milli
þeirra sem næra og þeirra sem arðræna, heldur áfram. Hvert
okkar hefur hlutverk í þróunarsögu framtíðarinnar. Hver okkar
hefur ber ábyrgð á Kumbh – hrærigraut hins heilaga vatns.96
Þannig endar Vandana Shiva bókina sína Water Wars: Privatization, Pollution,
and Profit. Sagar var guð hafsins sem réð yfir djöflum jarðarinnar en sálir sona
hans voru hreinsaðir af Ganges eftir harða baráttu við aðra öfluga guði. Við erum
þannig öll synir og dætur hans því við höfum tækifæri til að hreinsa okkur í hinu
heilaga vatni. Kumbh Mela er löng pílagrímaferð sem venjulega er farin á fjórum
stöðum á Indlandi og milljónir manna sýna lotningu sína gagnvart guðunum og
vatninu. Að verða vitni að sambærilegum atburðum á Indlandi er ólýsanlegt og
það er ekki annað hægt en að heillast og hrífast með stemningunni sem skapast í
kringum slíkar hátíðir. Það er ekki annað hægt en að smitast af þeirri hugsun að
vatn sé það dýrmætasta sem við eigum.
6. Viðhorf Íslendinga til vatns Einnig er mjög áhugavert að athuga og velta fyrir sér viðhorfi til vatns á Íslandi.
Hvernig skiptir það okkur máli? Getum við einhvern tímann samsamað okkur
þeirri tilfinningu að vatn sé dýrmætt eins og gull þegar við höfum svona mikið af
því og göngum að því sem gefnu? Verðum við firrt alvarleika málsins í sambandi
við vatnsskort, hreint vatn og verðum við að upplifa vandamálið á eigin skinni til
þess að skilja það?
Vatn er eitthvað sem Íslendingar eiga mikið af og þess vegna er sú hugsun
fjarri okkur að vatnsskortur geti einhvern tímann orðið á Íslandi. En það er ekki
þar með sagt að það losi okkur undan þeirri ábyrgð að íhuga það vandamál sem
steðjar að komandi kynslóðum í sambandi við vatnsskort og virkilega að meta
það sem við höfum. Milljónir manna þurfa nú þegar að glíma við þetta vandamál
og það sem gerir þetta svona erfitt er að það snýst ekki um hvort fólk eigi
húsaskjól, falleg föt, borði góðan mat eða taki eitthvað af þeim lífsgæðum sem
gefnum, sem við teljum nauðsynleg, heldur snýst það einfaldlega um hvort fólk 96 Vandana Shiva, Water Wars: Privatization, Pollution, and Profit, London 2002, bls. 139.
74
geti lifað af. Vandinn er alltaf til staðar hvort sem við viðurkennum hann eða ekki
eða hvort við látum okkur standa á sama eða ekki. Þá kemur að næstu spurningu:
Hvernig kemur þetta okkur við ef við erum svona vel sett sjálf? Skiptir það okkur
raunverulega einhverju máli hvernig fólk úti í hinum stóra heimi hefur það, hvort
það þjáist eða ekki? Svarið við þessari spurningu er að það ætti að skipta okkur
máli þótt ekki væri nema vegna þess að slíkt hið sama gæti hent okkur einn
daginn. Ef fyrirhyggjan er nánast engin og vandamálið ekki viðurkennt sem
skyldi þá mun koma að því að fólk hér á landi standi í sömu sporum og „hinir“.
Hreint vatn er ekki óþrjótandi auðlind og það gæti gengið okkur úr greipum ef
við förum ekki vel með það og íhugum hvernig framtíð okkar gagnvart því eigi að
vera háttað. Ef það er einhvern tímann tími til að læra af reynslu annarra þá er
það núna.
Dagur vatnsins er 22. mars ár hvert og stendur Íslenska
vatnafræðinefndin fyrir því að halda hann hátíðlegan hér á landi. Hlutverk
nefndarinnar er að fara með Alþjóðasamstarf á sviði vatnafræði innan vébanda
Menningarstofnunar sameinuðu þjóðanna, UNESCO.
Hinn árlegi dagur vatnsins er helgaður umræðu um sértæk
viðfangsefni sem varða vatn og verndun vatnsauðlindarinnar.
Viðfangsefnið í ár [2010] er að miðla upplýsingum um tækifæri
og hættur sem varða vatnsgæði og stuðla að því að vatnsgæði
skipi þýðingarmikinn sess í vatnsstjórnun. Markmið
ráðstefnunnar er að vekja umræðu hérlendis meðal hagsmuna-‐
og eftirlitsaðila um vatnsgæði og stjórnun
vatnsauðlindarinnar.97
Margir hafa tekið þátt í þeirri umræðu sem skapast á þessum degi og er
þarfaþing að halda henni uppi á Íslandi. Þar er t.d. fjallað um vatnsgæði á Íslandi,
frumvarp til laga um stjórn vatnamála, vatnsvernd, þáttur vistkerfa í að viðhalda
vatnsgæðum o.s.frv. Gunnar Hersveinn, rithöfundur og heimspekingur, hélt
erindi á Degi vatnsins árið 2010 sem hann kallaði „Vatnsþanka.“ Þar bendir hann
m.a. á að Íslendingar séu klofnir í afstöðu sinni gagnvart verðmætum
97 http://www.vedur.is/vatnafraedinefndin.
75
náttúrunnar annars vegar og hins vegar hvernig hægt sé að umbreyta þeim í
eitthvað annað okkur til hagsbóta. Hann talar um hvað grunnvatnið okkar sé
mikilvægt, jafnvel ómetanlegt og við þurfum að huga vel að því hvernig við förum
með þessa auðlind okkar. Hann segir:
Það virðist vera ógæfa manna um víða veröld að sjá ekki
perluna sem stendur þeim til boða vegna þess að perlufestin
hangir [ofar] huga þeirra. Um þessa reglu, þennan ókost, hafa
óteljandi skáldsögur verið skrifaðar: við föllum of oft í sömu
gryfjuna. Keppumst við að vera fremst þjóða í einhverju, best í
heimi í einhverju öðru en liggur beinast við.98
Nýtum við vatnsauðlind okkar til þess að öðlast eitthvað sem er svo ekki þess
virði? Svarið er ekki augljóst en þó er mikilvægt að viðurkenna að gjaldið er hátt
við stórfellda röskun á náttúru. Að því getur komið að við þurfum að borga mikið
fyrir það, sérstaklega ef óafturkræf eyðilegging hefur átt sér stað. Mér finnst
Gunnar hitta naglann á höfuðið þegar hann segir:
Færa má sterk rök og ástæður fyrir því að íbúar þessarar týndu
eyju í Atlantshafi ættu að veita íslenskri náttúru, sögu og tungu
fulla virðingu og ganga um þessi gæði með lotningu í hjarta. Sú
hegðun er ekki meðfædd heldur er hún dyggð sem þarf að læra.
Verðmætum er auðvelt að glata. Dyggðin náttúruvernd verður
aðeins lærð, hana þarf að velja, æfa og rækta með sér. Færa
mætti rök fyrir því að þetta sé einnig skylda þjóðarinnar.99
Að læra að bera virðingu fyrir því sem ætti að skipta okkur mestu máli í
framtíðinni og hugsa sem svo að það sé bæði skylda okkar sem einstaklinga og
sem þjóðfélags að varðveita bæði vatnsauðlindir okkar og náttúru. Þetta er það
sem mun halda mönnunum á lífi í framtíðinni. Einnig er mikilvægt að við losum
okkur við þá mýtu að það eina sem sé gott fyrir mennina sé nýting alls sem þeir
eiga og að þeir þurfi að temja náttúruna til þess að farnast vel.
98 Gunnar Hersveinn, „Vatnsþankar,“ grein á interneti, bls. 2. 99 Sama erindi, bls. 2.
76
Við lærum af því sem fyrir okkur ef haft og við öpum upp eftir öðrum
bæði sjónarmið og skoðanir. Þarna er okkar veikleiki í sambandi við
náttúruvernd, það virðist vanta almenna vakningu á Íslandi fyrir náttúruvernd
og ef við ölumst ekki upp við þá hugmynd þá er enn erfiðara að læra umhyggju
fyrir náttúru seinna meir. Það er þó alls ekki of seint að kenna Íslendingum
hvernig fara eigi með vatnið okkar og það er einmitt það sem við þurfum að gera.
Bæði vegna hagsmuna okkar núna og í framtíðinni en einnig vegna þess að við
verðum einfaldlega ánægðari með okkur sjálf sem manneskjur. Þess vegna er
gott framtak að halda Dag vatnsins ár hvert á Íslandi, til þess að umræður skapist
og athygli sé vakin á málefninu. Þó þyrfti enn meira að gerast og ákveðin
grundvallarbreyting á viðhorfum gagnvart vatni að verða.
7. Mikilvægi umræðunnar Það er ekkert síður mikilvægt fyrir Íslendinga að huga að vatns-‐ og
náttúruumræðu heldur en fyrir íbúa úti í hinum stóra heimi. Viðhorfið er
stundum ekki það sama en þörfin fyrir vatnið er þó nákvæmlega eins, sú
grundvallarþörf sem við höfum hvar sem við búum. Það er mikið menningaráfall
fyrir Vesturlandabúa að koma til Indlands og þurfa að tileinka sér þá
vatnsnotkun sem tíðkast þar enda leyfa Indverjar okkur oft og tíðum að halda í
okkar siði en við þurfum þá bara að borga aukalega fyrir það en það er einmitt
nokkuð sem venjulegur Indverji hefur ekki efni á. Þvílíkur lúxus að láta renna úr
krana, vökva garðinn, þrífa föt, líkama og híbýli með nánast fullkomnu vatni –
svo ekki sé minnst á alla vatnsnotkunina í iðnaði og til framleiðslu matar og vöru
sem við tileinkum okkur. Það er átakanlegt að sjá með eigin augum hvað aðrir
þurfa að lifa við og uppgötva að það sem við tökum sem gefnu eru forréttindi í
augum flestra annarra manneskja sem lifa í þessum heimi. En sú reynsla vekur
mann þó af værum blundi og rífur mann inn í raunveruleikann, þ.e. þann
raunveruleika sem gæti vel hellst yfir okkur, þá betur settu, í framtíðinni.
Að tala um af hverju vatn er mikilvægt tengist einnig því hvernig við
förum með það, t.d. í sambandi við grunnvatnstöðu, nýtingu áa, boranir í jörðu af
ýmsum ástæðum o.s.frv. Slíkar aðgerðir þurfa að vera úthugsaðar ef þær eru
nauðsynlegar á annað borð og það þarf að breyta því hvernig við hugsum um
77
vatnið, þ.e. að við metum það að verðleikum, hvort sem það sé efnahagslega eða
tilfinningalega. Ef við berum hagsmuni okkar fyrir brjósti, í nútímanum og til
framtíðar, þurfum við að huga að stórframkvæmdum eins og Kárahnjúkum.
Miðað við rótið, breytingu árfarvega og óeðlilega vatnssöfnun, þá get ég ekki
ímyndað mér að fólk vilji leggja í slíkt um allt land með tilheyrandi afleiðingum.
Ef við verðum meðvitaðri um vatn og hvers virði það er þá hlýtur meiri umhyggja
fyrir varðveislu þess og metnaður að koma í kjölfarið.
Á Indlandi, sem og í mörgum öðrum löndum en þó sérstaklega í þriðja
heiminum, er mengað vatn algengt og vatnstengdir sjúkdómar svo algengir að
umræða um slík vandamál verður mikilvægari með hverju árinu. Það er betra að
byrgja brunninn áður en barnið dettur ofan í hann. Mun auðveldara og ódýrara
er að fyrirbyggja mengun og vernda þær tæru auðlindir, sem til eru, en að
hreinsa það vatn sem þegar er mengað. Þannig að þekking, lærdómur fyrri
kynslóða og sparsamleg neysla eru mikilvæg og jafnvel lífsnauðsynleg þegar
koma á með lausnir á vandamálinu. Ef útskýrt er fyrir fólki – sama hvaða stétt
það tilheyrir eða hversu margar rúpíur eru í vasanum – hverjar ástæðurnar fyrir
vatnsskorti eða mengun eru og hverjar úrlausnirnar eru, er strax kominn
grundvöllur fyrir úrbótum. Og með hjálp og vilja þeirra, sem um stjórnvölinn
halda, væri hægt að styrkja stoðir hvers bæjarkjarna eða samfélags fyrir sig með
virðingu fyrir því svæði sem um ræðir í staðinn fyrir að leita í stórtækar aðgerðir
eins og stórar stíflur eða einkavæðingu vatns. Meginmarkmiðið ætti að vera að
allir hefðu aðgang að hreinu vatni.
Að vera nægjusamur og í raun þakklátur fyrir það ef aðgangur að vatni er
nægur er góð hugsun en er hún raunhæf? Íslendingar lifa við það að
vatnsaðgangur sé eðlilegur hlutur og þess vegna hirðum við lítið um að vernda
flæðið sem því fylgir. Við erum andvaralaus fyrir öðrum aðstæðum en þeim sem
við þekkjum og þá fellur í gleymsku reynsla annarra.
M. K. Gandhi var frægur trúarleiðtogi Indverja og lagði sitt af mörkum til
að land hans öðlaðist sjálfstæði frá Bretum árið 1947. Hann var mikill friðarsinni
og trúði á aðgerðir án ofbeldis. Hann lifði án munaðar og leitaðist ekki eftir
efnislegum gæðum. Hann var grænmetisæta að hindúasið og reyndi að fylgja
sannfæringu sinni á öllum sviðum lífsins. Hann á að hafa sagt fræga setningu sem
hljómar svo: „Jörðin getur fullnægt þörfum allra en ekki græðgi fárra.“ Þetta er
78
falleg setning sem er fullkominn boðskapur sem allir ættu að fara eftir. Þó er hún
því miður óraunhæfa og fyrir því eru tvær ástæður. Í fyrsta lagi verður að svara
þeirri spurningu hverjar þarfir hvers og eins eru og í öðru lagi þarf að horfast í
augu við það efnahagslega lögmál sem við fylgjum í heiminum.
Ef sú þörf væri látin ráða sem Vesturlandabúar hafa fyrir vatn eða bara
fyrir náttúruauðlindir yfirleitt og ef allir í heiminum færu eftir því lífsmynstri
sem Vesturlandabúar lifa eftir, þá myndu auðlindirnar fljótt þurrkast út.
Neyslumynstrið er svo gerólíkt heimshluta á milli að erfitt væri fyrir okkur á
Vesturlöndum að lifa eftir því sem Gandhi ætlaðist til og hélt fram miðað við hans
lífssýn. Hvernig eigum við sem erum svo góðu vön að breyta til? Þetta á ekki bara
við daglegt líf og venjur mismunandi menningarheima, heldur er efnahagslegum
auði mjög misskipt og ekki lítur út fyrir að það eigi eftir að breytast gífurlega í
náinni framtíð. Alltaf verður einhver einstaklingur eða ríki sem ráða yfir öðrum,
hvort sem það er beint eða óbeint. En ef óbreytt ástand og óréttlæti heldur áfram
að líðast þá er hætta á að við missum einmitt þessi góðu lífsgæði ef illa er farið
með þau. Mér finnst liggja beinast við að fara einhvern milliveg en um leið og við
förum að gera okkur grein fyrir mikilvægi vatnsauðlinda og náttúru þá getum við
lært að haga okkur samkvæmt því. Við getum ekki réttlætt græðgi okkar sem
einföld lífsgæði heldur taka alvarlega til umhugsunar ný gildi og breytta afstöðu
til náttúru. Ef við viljum ekki gera það fyrir aðra þá getum við allavega gert það
fyrir okkur sjálf.
8. Afturhvarf til fortíðar Nú hef ég fjallað um Indland og Ísland og mörgum kann að koma það spánskt
fyrir sjónir að svo gerólíkar þjóðir séu bornar saman. Ísland er eitt ríkasta land
heims og almenn velsæld er mikil. Aðstæður eru allt aðrar á Indlandi eins og þarf
varla mikið að útlista. Þó þarf ekki að fara langt aftur í tímann til að koma auga á
svipaða erfiðleika á Íslandi. Hér hefur alls ekki verið auðvelt að búa í gegnum
aldirnar og fólk hefur þurft að þjást og berjast fyrir því að lifa. Það er mikill
munur milli kynslóða því tækniframfarir hafa verið miklar sem auðvelda hið
daglega líf til muna. Rafmagn hefur bætt lífskjörin mikið; betri samgöngur, aukin
menntun o.fl. hefur aukið lífsgæði og peningaauður hvers einstaklings hefur
79
aukist. Indverjar vilja stefna að þessu því að lífsstíll Vesturlandabúa er
eftirsóknarverður. Hver vill ekki vinna auðveldari störf með meiri frítíma og
afkomu? Hver vill ekki vera ríkur og geta boðið börnum sínum upp á betra líf?
Með þetta í huga ber að skoða þá gagnrýni sem hefur komið frá
virkjunarsinnum um að náttúruverndarsinnar sjái ekki kosti þess að iðnvæða né
heldur þær framfarir sem iðnvæðingunni fylgja. Ef siðferði gagnvart náttúrunni
fer að yfirtaka siðferði gagnvart mönnum þá sé það stöðnun og jafnvel afturhvarf
til fortíðar. Sú gagnrýni að horft sé of rómantískum augum til fortíðar, þar sem
menn lifðu í mun meiri nálægð við náttúruöflin og lífsafkoma var algjörlega undir
þeim komin, er réttlætanleg og mikilvægt að svara henni. Til þess að menga sem
minnst og ganga sem minnst á auðlindir jarðar væri freistandi að segja að best
væri ef við tækjum upp það lífsmynstur sem var fyrir iðnvæðingu og hætta öllu
sem eyðileggur umhverfið eins og virkjunum, borunum, vegalagningum, lagningu
rafmagnslína o.s.frv. Það er þó mjög óraunsær möguleiki að ætla fólki að gefa allt
upp á bátinn vegna náttúruverndarsjónarmiða og það verður seint gert. Því einu
gildir hvar fólk stendur, með eða á móti t.d. stórum virkjunum, þá nýtur þorri
fólks þeirra gæða sem nútímasamfélag býður upp á.
Einstaka hópar hafa tekið sig til og gerst fullkomlega sjálfbærir og lifað á
sólarorku og á landsins gæðum þrátt fyrir að hafa val um annað. Slík hugsjón er
virðingarverð en verður þó að teljast óraunhæf ef hún ætti að ganga yfir alla.
Fæstir velja að lifa þannig lífi ef annað stendur til boða. Einnig hefur fólk tekið sig
saman, farið hálfgerðan milliveg og búið til hverfi þar sem hús eru unnin með
óhefðbundnum hætti. Sem dæmi um það má nefna Michael E. Reynolds,
bandarískan arkitekt, sem hefur lagt mikinn metnað í að gera hús úr
endurvinnanlegum efnum eins og plastflöskum og gúmmídekkjum. Híbýlin eru
þannig gerð að regnvatni er safnað saman í gegnum rennur á þakinu sem íbúar
nota svo til þvotta, drykkjar o.s.frv. Engar rafmagnslínur, gaslínur eða
holræsisrör liggja frá húsunum og eiga þau þannig að vera mjög
umhverfisvæn.100 Þetta krefst þó nokkuð meiri vinnu dag hvern við venjuleg
heimilisstörf en hugmyndin er góð engu að síður og kannski verður framtíðin
eitthvað í líkingu við þetta.
100 Oliver Hodge, Garbage Warrior, heimildarmynd um Michael E. Reynolds, 2007.
80
Á vissan hátt má líkja þessu sjálfbæra lífi við daglegt líf hjá mörgum
Indverjum. Oft eru húsakynni gerð úr því sem hendi er næst og allt notað sem
hægt er að nota. Það er gott á vissan hátt en ómögulegt á annan. T.d. væri óskandi
að Vesturlandabúar tækju sér til fyrirmyndar nýtni Indverja á hverjum hlut sem
til er en á hinn bóginn er það samt ekki eftirsóknarvert líf að lifa við fátækt og
erfiðleika. Öfgarnar eru miklar í báðar áttir og ástandið beggja vegna þyrfti að
breytast.
Í tengslum við hugleiðingar um afturhvarf til fortíðar skal sögunni nú
vikið að stífludæmunum tveimur sem fjallað er um í þessari ritgerð. Í fyrsta lagi
væri betra að tala um viðvarandi ástand á Indlandi frekar en afturhvarf. Þar er
hugmyndin að færa Indverja nær því sem við köllum nútíma með því að byggja
stórar stíflur til virkjunar. Það er staðreynd að mjög brösuglega gengur að flytja
rafmagn til allra Indverja enda er Indland stórt land og fjölmennt. Ef það á að
ganga upp verður að finna lausnir sem borga sig til þess að færa Indverja nær
Vesturlöndunum hvað lífsstíl varðar ef það er ósk þeirra. Vandinn við stórar
stíflur eins og Sardar Sarovar-‐stífluna er umfang hennar og slæm áhrif á
umhverfi, náttúru og fólk. Það gerir augljóslega ekki sama gagn og vonast var
eftir þegar afleiðingarnar eru teknar með í reikninginn. Þannig að mótrök gegn
þeim sem segja að eina lausnin til þess að iðnvæða Indverja sé þessi mikla
framkvæmd eru þau að tilgangurinn helgar ekki meðalið í þessu tilfelli og áður
ætti að íhuga alvarlega aðrar lausnir sem kæmi sér betur fyrir almenning og
umhverfi.
Á Íslandi er auðveldara að tala um afturhvarf því almenningur hefur það
mjög gott og býr við ýmis þægindi sem honum finnst orðin eðlileg og sjálfsögð.
En eins og ég nefndi áðan þá er ekki langt síðan Íslendingar fóru að venjast
slíkum munaði. Mannfólkið er þó fljótt að aðlaga sig aðstæðum og það væri erfitt
að taka upp þráðinn frá því fyrir t.d. 100 árum. Í sambandi við virkjanir tel ég að
almenns misskilnings gæti þess efnis að allir sem eru á móti Kárahnjúkavirkjun
séu á móti öllum virkjunum. Við þurfum rafmagn til daglegra nota og til að
fyrirtæki geti starfað; það er engin launung á því að rafmagn er nauðsynlegt til
þess að samfélagið gangi eins og það gerir í dag og einhvers staðar þarf að fá
þessa orku. En með þessum orðum sögðum þá beinist gagnrýni gegn
Kárahnjúkavirkjun að öðrum þætti, þ.e. ekki endilega að því að hún framleiði
81
rafmagn heldur að því í hvað orkan fer en það skiptir gríðarlega miklu máli. Við
hefðum aldrei þurft svona stóra stíflu með þessum miklu afleiðingum fyrir
umhverfið til að mæta þörfinni fyrir „venjulega“ rafmagnsnotkun. Stíflan var
byggð í alveg sérstökum tilgangi: til þess að bræða ál. Gagnrýnin beinist því ekki
að virkjun almennt heldur þeim stíflum sem byggðar eru fyrir þennan gríðarlega
orkufreka iðnað. Þar liggur hundurinn grafinn; gagnrýnin hefur ekkert að gera
með að fara 100 ár aftur í tímann og byrja að lifa eins og þá tíðkaðist heldur felst
hún í því að fleiri hliðar virkjana eru ekki teknar inn í dæmið og einblínt er á
þessa einu lausn, hina gríðarstóru Kárahnjúkavirkjun.
82
Lokaorð
„Blátt gull“ er ekki rangnefni yfir vatnið. Það gefur okkur allt sem við eigum og ef
við ættum að velja milli gulls og vatns væri valið auðvelt. Þess vegna er full
ástæða til þess að tala um siðfræði vatns í sömu andrá og við tölum um siðfræði
náttúru. Þessi fræði eru samtvinnuð og ættu líka að vera það í þjóðarumræðu og
sál. Það ætti ekki aðeins að vera fræðimanna að íhuga hvers virði náttúra og vatn
eru okkur eða hvaða gildi þau hafa heldur ættu allir að huga að því persónulega
og einnig samfélagslega.
Þrátt fyrir að náttúrusiðfræði sé frekar ný grein þá hefur samband
náttúru og manna vafist fyrir hugsuðum. Er maðurinn sérstakur í náttúrunni eða
er hann einfaldlega einn af dýrunum? Mennirnir vilja halda upp á sérstöðu sína
sem má rekja til meðvitundar þeirra um sjálfa sig sem vitsmunaverur. Við gerum
okkur grein fyrir því að gjörðir okkar hafa afleiðingar og þess vegna er þess
krafist af okkur að hugsa vel um það hvernig við aðhöfumst í umhverfi okkar og
náttúru.
Ég hef hér fjallað um tvær stíflur, Sardar Sarovar-‐stífluna á Indlandi og
Kárahnjúkastíflu á Austfjörðum en báðar hafa þær verið umdeildar í
heimalöndum sínum. Í ritgerðinni hef ég sýnt fram á mikilvægi þess að skoða
rökstuðning bæði með og á móti slíkum framkvæmdum svo heildstæðari sýn
fáist á þær. Ég tel mjög mikilvægt að fleiri þættir en efnahags-‐ og hagfræðirök séu
teknir til greina og tilfinningar, heilagleiki og fagurfræðileg gildi séu einnig
skoðuð. Því þegar öllu er á botninn hvolft þá höfum við takmarkaðar auðlindir til
afnota og ákvarðanir okkar skipta máli, bæði fyrir okkur sjálf en einnig börn og
barnabörn. Við þurfum að staldra við og spyrja okkur hvað raunverulega skiptir
okkur mestu máli. Hvernig líf viljum við eiga og hvernig samband viljum við hafa
við umhverfi okkar? Með því að svara þessum spurningum og skoða hvernig við
segjum frá okkar reynslu og upplifunum er hægt að finna siðfræðilegan
grundvöll fyrir náttúruna í lífi okkar því hún kemur okkur beint við.
Með því að huga að siðfræði vatns og náttúru í ákvarðanatöku okkar og
vatnsstjórnun er hægt að finna betri leiðir til þess að finna farsælli niðurstöður
sem koma sem flestum vel. Það þarf að huga að fleiri þáttum, taka tillit til
mismunandi sjónarmiða, hlusta á allar raddir sem viðkoma málinu til þess að fá
83
heilsteypta mynd af hverju dæmi fyrir sig. Hver ákvörðun er sérstök og hvert
dæmi er einstakt. Hver lækur og á eru sérstök og mikilvæg. Í stóra samhenginu
ættu allir að sjá það. Við ættum líka að geta lært af reynslu annarra. Við getum
t.d. lært mikið af Indverjum og þeir af okkur. Við verðum að bera sömu virðingu
gagnvart náttúrunni og vatninu eins og við gerum gagnvart öðru mannfólki. Það
mun á endanum koma okkur vel.
Heilagleiki býr í náttúrunni og í okkur sjálfum. Upplifun í náttúru og
reynsla hvers og eins er ómetanleg og ætla ég að enda ritgerðina á því að láta
Helga Valtýsson um að lýsa sinni reynslu:
Öræfanótt: Aleinn í Guðs víðum geimi. Öræfi, fjöll og hreindýr á alla
vegu. Félagar mínir fjarri. [...] Hugurinn svífur. Sálin starfar. Nóttin
er hljóð og full af friði, svölum og hreinum, ástríðulausum. Það er
sem öll líkamleg tengsl við umheiminn séu rofin. Sálin er ein,
barmafull af friði og geimvíðri kyrrð næturinnar. Orðlaus og
almælandi. Aldir og eilífð streyma gegnum hana eins og hægur
niður með ólýsanlegri ljúfri unaðskennd.-‐-‐-‐101
Þessi tilfinning gefur mönnum ástæðu til þess að hugsa um sjálfa sig í stærra
samhengi og gefur lífinu annað og meira gildi en liggur í efnahag og framförum.
101 Helgi Valtýsson, Á hreindýraslóðum: öræfatöfrar Íslands, Akureyri 1945, bls. 57.
84
Heimildaskrá
Andri Snær Magnason. Draumalandið: Sjálfshjálparbók handa hræddri þjóð.
Reykjavík: Mál og menning, 2006.
Brown, Peter og Schmidt, Jeremy. „An Ethic of Compassionate Retreat.“ Water
Ethics: Foundational Readings for Students and Professionals. Ritstj. Peter
G. Brown og Jeremy J. Schmidt. Washington: Island Press, 2010: 265−286.
Gadgil, M. og Guha, R. „Ecological Conflicts and the Environmental Movement in
India.“ Development and Change. ©Institute of Social Studies. Oxford:
Blackwell Publisher, 1994: 101-‐136.
Gadgil, M. og Guha, R. This Fissured Land: An Ecological History of India. New
York: Oxford University Press, 1992.
Guðbjörg R. Jóhannesdóttir. „Fagurfræðilegt gildi íslenskrar náttúru,“ grein á
interneti, 2010. Skoðað 7. janúar 2013.
<https://heimspeki.hi.is/?p=1405>
Gunnar Hersveinn. „Vatnsþankar,“ grein á interneti, 2010. Skoðað 2. september
2010.
<http://www.vedur.is/media/vatnafar/radstefnur/GunnarHersveinn_vat
n2010.pdf/>
Helgi Valtýsson. Á hreindýraslóðum: öræfatöfrar Íslands. Akureyri: Bókaútgáfan
Norðri h.f., 1945.
Hodge, Oliver (leikstjóri). Garbage Warrior. Heimildarmynd, USA: 2007.
Jagaram, N. „Culture and Environment,“ fyrirlestur í Bangalore sem höfundur
ritgerðar sat, 27. júlí 2007.
85
Jón Sigurðsson. 133. löggjafarþing — 11. fundur, 12. okt. 2006.
Kárahnjúkavirkjun og Hálslón, munnleg skýrsla iðnaðarráðherra.
Kant, Immanuel. Grundvöllur að frumspeki siðlegrar breytni. Reykjavík: Hið
íslenska bókmenntafélag, 2003.
María Ágústsdóttir. „„Hyggið að liljum vallarins...“ – af skynjun manns í sköpun
Guðs.“ Náttúrusýn: Safn greina um siðfræði og náttúru. Ritstj. Róbert H.
Haraldsson og Þorvarður Árnason. Reykjavík: Rannsóknarstofnun í
siðfræði, 1994: 59−68.
„Mat á umhverfisáhrifum: Kárahnjúkavirkjun alla að 750 MW,“ skýrsla
Landsvirkjunar á interneti, 2001. Skoðað 14. janúar 2013.
<http://skipulagvefur.eplica.is/media/attachments/Umhverfismat/671/
2000110003.PDF/>
McCully, Patrick. „Big Dams, Big Trouble,“ grein á interneti, 2003. Skoðað 10.
janúar 2013.
<http://www.newint.org/features/2003/03/01/water-‐dams/>
McCully, Patrick. Silenced Rivers: The Ecology and Politics of Large Dams. London
& New York: Zed Books, 2001.
Merchant, Carolyn. The Death of Nature: women, ecology, and the scientific
revolution. San Francisco: Harper & Row, 1980.
Norton, Bryan. „Environmental Ethics and Weak Anthropocentrism.“
Environmental Ethics: An Anthology. Ritstj. Andrew Light og Holmes
Rolston III. Oxford: Blackwell Publishers Ltd, 2003: 163−174.
Ólafur Páll Jónsson. Náttúra, vald og verðmæti. Reykjavík: Hið íslenska
bókmenntafélag, 2007.
86
Ómar Ragnarsson. Kárahnjúkar, með og á móti. Reykjavík: JPV útgáfa, 2004.
Páll Skúlason. Hugleiðingar við Öskju. Reykjavík: Háskólaútgáfan, 2004.
Postel, Sandra. „The Missing Piece: A Water Ethic.“ Water Ethics: Foundational
Readings for Students and Professionals. Ritstj. Peter G. Brown og Jeremy J.
Schmidt. Washington: Island Press, 2010: 221−225.
Roy, Arundhati. The algebra of infinite justice. London: Flemingo, 2002.
Róbert H. Haraldsson. „Náttúrusýn, hluttekning og siðferði.“ Náttúrusýn: Safn
greina um siðferði og náttúru. Ritstj. Róbert H. Haraldsson og Þorvarður
Árnason. Reykjavík: Rannsóknarstofnun í siðfræði, 1994: 71−87.
Sampath, Anitha og Kedarnath, Balakrishnan og fleiri höfundar. „Water
Privatization and Implications in India,“ grein á interneti, 2004. Skoðað
10. maí 2010. <http://www.aidindia.org/>
Schmidt, Jeremy J. „Water Ethics and Water Managment.“ Water Ethics:
Foundational Readings for Students and Professionals. Ritstj. Peter G.
Brown og Jeremy J. Schmidt. Washington: Island Press, 2010: 3−15.
Shiva, Vandana. India Divided. New York: Seven Stories Press, 2005.
Shiva, Vandana. Water Wars: Privatization, Pollution, and Profit. London: Pluto
Press, 2002.
Sigríður Þorgeirsdóttir. „Heild sem gerir mann heilan: Um siðfræði
náttúrufegurðar.“ Hugsað með Páli: ritgerðir til heiðurs Páli Skúlasyni
sextugum. Ritstj. Róbert H. Haraldsson, Salvör Nordal og Vilhjálmur
Árnason. Reykjavík: Háskólaútgáfan, 2005: 163−179.
Varma, P.K. Being Indian. London: Penguin Books, 2005.
87
Visvanathan, Shiv. „Environmental Values, Policy, and Conflict in India,“ grein á
interneti, 2000. Skoðað 15. maí 2010.
<http://cceia.org/media/709_visvanathan.pdf/>
von Wright, G.H.V. Framfaragoðsögnin. Þýð. Þorleifur Hauksson. Reykjavík: Hið
íslenska bókmenntafélag, 2003.
Þorvarður Árnason. „Náttúrufegurð.“ Náttúrusýn: Safn greina um siðfræði og
náttúru. Ritstj. Róbert H. Haraldsson og Þorvarður Árnason. Reykjavík:
Rannsóknarstofnun í siðfræði, 1994: 263−283.
Vefsíður, heimildir:
<http://www.cwc.nic.in/> Skoðað 11. desember 2012.
<http://www.gujaratturism.com/> Skoðað 14. janúar 2013.
<http://www.hagstofan.is/> Skoðað 1. maí 2010.
<http://www.holidayiq.com/> Skoðað 1. maí 2010.
< http://www.internationalrivers.org/> Skoðað 20. desember 2012.
<http://www.karahnjukar.is/> Skoðað 10. maí 2010.
<http://www.landlaeknir.is/> Skoðað 14. janúar 2013.
<http://www.landsvirkjun.is/> Skoðað 15. maí 2010.
<http//www.savingiceland.org/> Skoðað 2. september 2010.
< http://www.vatnajokulsthjodgardur.is/> Skoðað 2. september 2010.
88
< http://www.vedur.is/vatnafraedinefndin/> Skoðað 2. september 2010.
<http://www.worldbank.org.in/> Skoðað 15. maí 2010.